ሮሜ 7 - ኦራ ጫ̈ቃ ማጻ̈ፋ

ሙ̈ሳ ሂጊ̇ን ና̈ጋዚን ጋልዳፖ ናጻ ኬስኪ̇ኖን ቤይሲዝ ሚሳ̇̈ሊ

¹ ቴ ኢሺንታ̇ን! ቴ ዓና̇ ሶ̈ላዚንዳ ሂጊ̇ን ኤሪዝ ኣሳንቦ፤ ሂጎ̇ ኣሳ ጋልዳ ኢ̈ብ ሲልጣና ዎ̈ዲ ኣሲ ሼምፓባር ዶኤጌይን ሙታ̇፤ ዪንቲ̇ ዪኖ̇ ኤሪባ̈ሳ?

² ፔቲ̇ ባዝ ሚሳ̇ሊባር ቤቂ̇ስቶ፥ ኢስቲ̇ኖ ፔቲ̇ ማጪ̇ንዳ ኢዝ ኣስና ሼምፓባር ዶኢን ኢዛ ሜላ ኣሳ ኣ̈ል ኢስታ̇ንዳብ ዳንዳኣባሴ፤ ኢ ዓይቄጌይን ኢስታ̇ንዳቦ ዳንዳኣ̈ሬ።

³ ዪ̈ኮታ̇ቦ ኢዝ ኣስና ሼምፓባር ዶኢን ሜላ ኣቲና ኢስቴጌዪን ኢዛ ኦሎላ ጋዲ̇ኔ ጌዪንቲ̇̈ሬ። ኢዝ ኣስና ዓይቄጌይንዶ፤ ኢዛ “ሜላ ኣቲና ኣ̈ል ኢስታ̇ንዳብ ዳንዳኣባሴ” ጋ̈ዝ ሂጊ̇ን ጋልዳፖ ናጻ ኬስካሬ፥ ኢስቴጌይናር ኦሎ̇ላ ጋዳካ̇ዬ።

⁴ ቴ ኢሺንታ̇ን! ዪንታ̇ኮንዳሬ ዪና̇ ኢዝፌ̈ኔ፤ ዪንቲ̇ ክርስቶ̈ሳይ ማ̈ቂ̇ኖኮታ̇ቦ፥ ኣሲ ኣሳ ጋልዳፖ ዓይቃባር ፋጊንታ̇ዚንዲፌ̈ኒ ዪንቲ̇ ሂጋ̇ ጋልዳፖ̇ ፋጊንቲ̇ኔ፤ ዪ̈ኮታ̇ቦ ኑ̈ ዎይን ጾ̈ሳ̇̇ ኦ̈ሳ̈ቦ ኣ̈ፍ ካጻ̇ምፔ̈ኒ ዪንቲ̇ ዓይቃ ጋርታ̇ፖ ዲንዲ̇ኖ ክርስቶ̈ሳይ ማ̈ቂ̇ኔ።

⁵ ኑ̈ኒ ናጋራንቻ̇ ማ̈ቂ̇ኖ ኑ ኣሲቲንቦ ኪ̈ቲንታ̇ዝ ኬ̈ሊ̇ንባራ ሂጊ̇ንዳ ኑ̈ብ ዎ ኢታ̇ ኢኒ̇ን ዲንራ ኑ̈ና ዓይቃብ ዬልዝ ኦ̈ሳ ኦ̈ምፔ̈ን ዎቲኔ።

⁶ ዓት ዎቲናካሬ ኑ̈ና ቃቻ̇ ኤ̈ኖ ሂጊ̇ን ጋልዳፖ̇ ኣሲ ኣሳ ጋልዳፖ ዓይቃባር ፋጊ̇ንታ̇ዚንዲፌ̈ኒ ኑ̈ኒ ኢዝ ጋልዳፖ ፋጊንቲ̇ኖኮታ̇ቦ ሂጋ̇ ቃሺን ጋልዳፖ̇ ኑ̈ኒ ናጻ ኬስኪ̇ኔ። ዪ̈ኮታ̇ቦ ዓኒፖ̇ ጌዳ ኑ̈ኒ ጾ̈ሳ̇̇̈ቦ ኦ̈ዚንዳ ኣያ̇ና ሂጊ̇ን ኦራንባርዶኬ ሚን ጻ̈ፊንቲ̇ኖ ሲላ̇ ሂጊ̇ንባር ጊዳካ̇ዬ።

ሙ̈ሳ ሂጊ̇ንዲኬ ናጋራኬ

⁷ ዪዚ ኑ ኣብዝ ጋኔ? ሂጎ̇ ፌቆማ̇ቦ ናጋሪያ? ጊዳካ̇ዬ! ዎቲናካሬ ናጋራ ጌይዛ̈ዲ ኣብዝኮ ቴ ኤራምፔ̈ን ዎቲኖ̈ዲ ሂጋ̇። ሂጎ̇ “ኢኒ̇ታፔ̇” ጋ̈ካ̇ይኮ ዎን ኢና̇ ኣብዝኮ ቴ ኤራባስዶን።

⁸ ናጋሮ ሂጋ̇ ጋልዳፖ ዬይኖ ኪ̈ቲ̇ንባራ ጎይ ዲጛሪ ታ ጋርታ ዎ ኢና̇ን ዲንሪ ታ̈ኒ ዎይ ባዝ ኢኒ̇ታምፔ̈ን ዎቲዴ። ሂጋ̇ ባይኮ ናጋሮ ዓይቂ̇ኖ ባዜ።

⁹ ቲ̈ን ሂጋ̇ ባዮ̇ ኬ̈ልባራ ቴ ሼምፓባር ዶኣርዶ̈ን፤ ሂጋ̇ ኪ̈ቲን ዬይን ናጋሮ ሼምፓ ዲጚን ታ̈ኒ ዓይቃ̇ዴ።

¹⁰ ቴ ኢዞ ና̈ጋ ፎታራ ሼምፓባር ዶኣምፔ̈ን ኢሚ̇ንቲኖ ሂጋ̇ ኪ̈ቲ̇ንዳ ታ ጋልዳ ዓይቃ ኤካ̇ ዬ̈ዴ።

¹¹ ናጋሮ ሂጋ̇ ጋልዳፖ ዬይኖ ኪ̈ቲ̇ንባራ ጎይ ዲጛሪ ታ̈ና ማቂ̇ዴ፤ ማ ዪና̇ ሂጊ̇ንባራ ታ̈ና ዎዴ።

¹² ዪ̈ኮታ̇ቦ ሂጊ̇ንዳ ጌ̈ሼ̇፤ ጾ̈ሳ̇̇ ኪ̈ቲንዳ̇ሬ ጌ̈ሺ̇፥ ኪን ማ ኮሼ̇።

¹³ ዓት ዪ̈ዶኮ ዪ̈ ኮሽ̇ ማ̈ቂ̇ኖ ባዛ̈ዲ ታ ጋልዳ ዓይቃ ኤኪ̇ ዬ̈ዬ? ጊዳካ̇ዬ! ናጋሮ ናጋራ ማ̈ቂ̇ኖን ኤሪንታ̇ምፔ̈ን ኮሻ ሂጊ̇ን ጎይባራ ዓይቃ ታ̈ብ ኤኪ̇ ዬይዴ። ማ ኪ̈ቲንዳ “ኦ̈ናካር ናጋራ ኦ̈ንዳብ ኮሺ̇ባ̈ሴ” ጋ̈ዚንኮታ̇ቦ ናጋሮ ሺ ኢ̈ታ ባዝ ማ̈ቂ̇ኖ ኤሪንቲ̇ዴ።

¹⁴ ሂጋ̇ዲ ጾ̈ሳ̇ ጋልዳፖ ኢሚ̇ንቲ̇ኖን ኑ̈ኒ ኤሪ̈ሬ። ታ̈ኒ ዎቲናካሬ ናጋራብ ኣይላ ማ̈ቃ̇ምፔ̈ን ዎጚንቲ̇ኖ ዓይቂ̇ዝ ኣሴ።

¹⁵ ቴ ኦ̈ዝ ባዚን ቴ ኤራባሴ፤ ቴ ዶሳዝ ባዝ ኦዚን ኣሻ̇ራ ቴ ኢጻ̇ዝ ባዚን ኦ̈ሬ።

¹⁶ ዪዚ ታ̈ኒ ኦ̈ዚንዳ ቴ ኮያባሶ ባዚን ማ̈ቄ̇ጌዪንዶ ሂጎ̇ ኮሽ̇ ማ̈ቂ̇ኖን ታ ማርኪ̇ታ̈ሬ።

¹⁷ ቴ ኢጻ̇ዝ ባዚን ኦ̈ምፔ̈ን ታ̈ና ዎቲዛ̈ዲ ታ ጋርታ ዎ ናጋራ̈ዲዶኬ ታ̈ኒ ጊዳካ̇ዬ።

¹⁸ ናጋራንቻ ማ̈ቂ̇ኖ ታ ኣሲቲን ጋልዳ ኣባካር ኮሽ̇ ባዚ ባዮ̇ን ቴ ኤራ̈ሬ። ታ̈ኒ ኮሽ̇ ባዝ ኦ̈ንዳብ ኮያርካሬ ቴ ኮያዝ ኮሽ̇ ባዚን ኦ̈ንዳብ ዳንዳኣባሴ።

¹⁹ ቴ ኦ̈ንዳብ ኮያዝ ኮሽ̇ ባዚን ኦ̈ባሴ፤ ቴ ኦ̈ንዳብ ኮያባሶ ኢ̈ታ ባዝ ኦ̈̈ሬ።

²⁰ ታ̈ኒ ኦ̈ንዳብ ኮያባሶ ኢ̈ታ ባዝ ኦ̈ዝ ባዝ ማ̈ቄ̇̈ጌይንዶ፥ ዪኖ̇ ኦ̈ዛዲ ታ ጋርታ ዎ ናጋራ̈ዲዶኬ ታ̈ኒ ጊዳካ̇ዬ።

²¹ ታ̈ኒ ኮሽ ባዝ ኦ̈ንዳቦ ኮያ̈ርዶ̈ን ታ̈ና ኢ̈ታ ባዝ ዎልቃ̇ባር ኦ̈ሳ̈ሬ ዪዚ ታ ጋርታ̇ ኦ̈ዚንዳ ዪኒ̇ፌ̈ኖ ሂጊ̇ንዶ።

²² ታ̈ኒ ቴ ቡዳባር ጾ̈ሳ̇ ሂጊ̇ምባር ኡፋይታ̈̇ሬ።

²³ ማቂናካሬ ቴ ቆፊምባ̇ር ዋንቲሙታ̇ ታ ጋርታ ኦ̈ዛ ናጋራ ሂጋ̇ቦ ታ̈ና ቃሺ ኣስ ማሂዝ ሜላ ሂጋ̇ ታ ጋርታ ዎን ታ̈ብ ቤንታ̇̈ሬ።

²⁴ ታ̈ኒ ኣፌ̈ን ኡፋይሲ̇ ታጋልዳ ዪኖ ኣሳ! ዓና̇ ታ̈ና ዓይቃ ጎይ ኤ̈ጛዝ ቴ ኣሲቲን ጋልዳፖ̇ ኦ̈ ታ̈ና ቡ̈ቲሳንዳዶ̈ኔ?

²⁵ ኑ ጎዳ ዬሱ̈ስ ክርስቶ̈ሳ ሱምባራ ጾ̈ሳ̇̇̈ቦ ጋላታ ማ̈ቆ̇! ዪዚ ታ̈ኒ ቴ ቆፊንባ̇ራ ጾ̈ሳ̇ ሂጊ̇ምቦ ኪ̈ቲ̇ንታ̈ሬ፤ ናጋራንቻ̇ ማ̈ቂ̇ኖ ቴ ኣሲቲንባ̇ራ ናጋራ ሂጊ̇ምቦ ኪ̈ቲ̇ንቲዛ ማ̈ቂ̇ኔ።