ሮሜ 15 - ኦራ ጫ̈ቃ ማጻ̈ፋ

¹ ኑ̈ኒ ኣማ̇ናባራ ሚጚ̈ኖን ዳቡ̇ርኖ ኣሳን ኢንታ̇ ዳ̈ቡርሲን ጋርታ̇ ኢንታ̇ ማ̈ዳ̇ንዳቦ ኮሺ̈̇ርዶኬ ኑ̈ኒ ኑ ቆሚ̇ን ሙታ̇ ኡፋይሲዝ ኣስ ማ̈ቃ̇ንዳብ ኮሺ̇ባ̈ሴ።

² ኑ ዎይን ሜላን ፌ ኣማ̇ኒንባር ሚ̈ጛንፔ̈ን፤ ኢንታ̇ ማ̈ዲ̇ዝ ባዝኬ ኢንታ̇ ኡፋይሲ̇ዝ ባዝ ኦ̈ስቶ።

³ ኣጊሻ̇ቦ ጌይን ክርስቶ̈ሳር ፌ̈ና ኡፋይሳ̇ካዬ፤ ጌ̈ሻ̇ ማጻ̈ፋ ጋልዳ “ኔ̈ና ቆ̈ኖ ኣሳን ታ̈ና ቆ̈ኔ” ጋ̈ር ጻ̈ፊንቲ̇ኖን ኢያ ዬላ̇ዴ።

⁴ ጌ̈ሻ̇ ማጻ̈ፋን ጋልዳ ጻ̈ፊንቲ̇ኖ ባዛን ኑ̈ብ ቲሚር̇ታ ማ̈ቃምፔ̈ኒ ጻ̈ፊንቲ̇ኔ። ጻ̈ፊንቲ̇ኖ ባዛን ዪን ኑ̈ና ጋርዢዝ ኣስኬ ሚ̈ጚዝ ኣስ ዎቲዛኮታ̇ቦ ኑ̈ኒ ታስፋባራ ና̈ጋንዳብ ዳንዳኢ̈ሬ።

⁵ ጋርዣኬ ሚ̈ንቲ ኢሚ̇ዝ ጾ̈ሳ̇̇̈ዲ፥ ዬሱ̈ስ ክርስቶሲ ዎታዚንዲፌ̈ኒ ዪንታ̇̇ር ዎልዎልኣ ካ̈ር ዶ̈ኢዝ ቡ̈ዳ ዪንታ̇̇ብ ኢሞ̇ጋ̈ቤ።

⁶ ዪና̇ ኢዝፌ̈ኒ ኑ ጎዳ ዬሱ̈ስ ክርስቶ̈ሳ ጾ̈ሳ̇ ባ̈ባ̈ዲ ዪንቲ̇ ፔ̇ቲ ቡ̈ዳባራ ኢያ ቦንቻ̇ንፔ̈ን ዪንታ̇ ማሆጋ̈ቤ።

⁷ ክርስቶ̈ሲ ጾ̈ሳ̇̇ ቦንቻ̈ቦ ዪንታ̇ ፌ̈ዪ ማሃር ኤኪ̇ኖንድፌ̈ን ዪንታ̇ር ዎልዎልኣ ኡፋይስባራ ሞኪ̇ ኤኪ̇ብቴ።

⁸ ጾ̈ሳ̇̇̈̇ዲ ቲ̈ኖ ኑ ባ̈ቢንታንቦ ኢሚ̇ኖ ታስፋ ቃ̈ሊን ፎቲንታምፔ̈ንኬ ጾ̈ሳ̇̇ ኪንቲን ኤሪንታንምፔ̈ኒ ክርስቶ̈ሲ ኣይሁዳንቦ ኣሽካራፌ̈ን ማ̈ቃ̇ር ኦ̈ዴ።

⁹ ማ ኢ ዪኖ̇ ኦ̈ኖን ሜላ ኣኮታ̇ቦ ጌይን፥ ኣይሁድ ባዮ̇ ኣሳን ጾ̈ሳ̇̇ ማ̈ሪቲንኮታ ኢያ ጋላታምፔ̈ኒዬ፤ ዪ̈ዳሬ፦ “ዪ̈ኮታ̇ቦ ዎርዣ ጊዳ̈ ቴ ኔ̈ና ጋላታ̈ሬ፤ ኔ ሱምምቦ ማዝሙራባራ ጋላታ ሺሻንዳ” ጋ̈ሪ ጻ̈ፊንቲ̇ኖንዲፌ̈ኔ።

¹⁰ ማ “ዪንቲ̇ ኣይሁድ ባዮ̇ ኣሳን! ዪንቲ̇ ጾ̈ሳ̇̇ ዎርዣባራ ዎልኣ ኡፋይቲ̇ብቴ!” ጋ̈ሪ ጻ̈ፊንቲ̇ኔ።

¹¹ ዓታ̇ሬ፦ “ኣይሁድ ባዮ̇ ኣሳን! ዪንቲ̇ ጾ̈ሳ̇̇̈ ጋላቲብቴ̇፤ ዎርዣ ዎይ ጾ̈ሳ̇ ጋላቲብቴ̇” ጋ̈ሪ ጻ̈ፊንቲ̇ኔ።

¹² ዪና̇ ኢዝፌ̈ኒ ናባ ኢሳ̈ሲ ጌይርዶሪ፦ “ኢሳ̇ያ ዜር ጋ̈ርታፖ ዬሊንቲ̇ዛ ዬይሬ፤ ኢ ኣይሁድ ባዮ̇ ኣሳን ኣቂሲዝ ኣስ ማ̈ቂ̈̇ሬ፤ ኢንታር ኢ ጋልዳ ታስፋ ጋዲ̇̈ሬ” ጌይሬ።

¹³ ዪንታ̇ ታስፊንዳ ጌ̈ሻ̇ ኣያ̇ና ዎልቃባራ ዲጫ̇ሙታ̇ ሉካ̇ምፔ̈ኒ ታስፋ ኢሚ̇ዝ ጾ̈ሳ̇̇̈ዲ ዪንቲ ኢባር ኣማ̇ኒኖምቦ ኡፋይስኬ ሳሪቲ ዎይሊሳር ኢሞ̇ጋ̈ቤ።

ጳውሎ̈ሲ ኣይሁድ ባዮ̇ ኣሳን ጊዳ̇ ኦ̈ኔ

¹⁴ ቴ ኢሺንታን! ዪንቲ ኮሺ̇ቲባርኬ ኤራባር ኩሚኖ ኣስ ማ̈ቂኖንዲኬ ዎልዎልኣ ዞራንዳ̇ቦ ዳንዳ̇ኢዛ ማ̈ቂ̇ኖን ኪንባር ቴ ኤሪኔ።

¹⁵ ፔቲ̇ ፔቲ̇ ባዝ ቴ ዪንታ̇ ኤልቅ ዎታ̇ንዳብ ኮያራ ዓና̇ ኪ̈ቲንዶ ኢ̈ጫካ̇ይዶ̈ር ጾ̈ሲ̇ ታ̈ቦ ኢሚ̇ኖ ኢዲ̇ሊንባራ ቴ ዪንታ̇ቦ ጻ̈ፊኔ።

¹⁶ ዪና̇ ጾ̈ሲ̇ ታ̈ቦ ኢሚ̇ኖ ኢዲ̇ሊንዳ ታ̈ኒ ጾ̈ሳ̇̇ ዎጛላ ኣይሁድ ባዮ̇ ኣሳንቦ ሳባካ̇ሙታ̇ ቄ̈ሳፌ̈ን ማ̈ቃ̇ራ ዬሱ̈ስ ክርስቶ̈ሳብ ኦ̈ምፔ̈ኒዬ። ዪ̈ኮታ̇ቦ ኣይሁድ ባዮ̇ ኣሳን ጌ̈ሻ̇ ኣያ̇ናባራ ጌ̈ዥጋር ጾ̈ሳ̇̇ ኡፋይሲ̇ዝ ዣ̈ርሻፌ̈ን ማ̈ቃ̇ር ጾ̈ሳ̇̇̈ኮ ሺ̈ቃምፔ̈ኒ ታ̈ኒ ኦ̈ሬ።

¹⁷ ዪ̈ኮታ̇ቦ ታ̈ኒ ጾ̈ሳ̇̇̈ቦ ኦ̈ዚንኮታ̇ ዬሱ̈ስ ክርስቶ̈ሳባራ ቴ ኬርፋ̈ሬ።

^18-19 ኣይሁድ ባዮ̇ ኣሳን ጾ̈ሳ̇̇ብ ኪ̈ቲንታ̇ምፔ̈ኒ ክርስቶ̈ሲ ታባር ማ̈ቃ̇ሪ ጌ̈ሻ̇ ኣያ̇ና ዎልቃ̇ባራ ታሚ̇ራ̈ታኬ ጋራ̇ሚሲዝ ማል̇ባራ ቴ ሶ̈ሊንባርኬ ቴ ኦ̈ሲንባራ ኦ̈ኖ ኦ̈ሲምፖ̇ ኣቲ̇ን ሜ̈ላ ባዝ ኣባካር ቴ ሶ̈ላንዳቦ ኮያባሴ። ታ̈ኒ ዬሩሳ̈ላማፖኬ ኢዝ ቡጊድባራ ዎ ኣካ̇ባባንፖ ኤ̈̇ራ ሊዋ̈ሪቆ̈ና ጌይዝ ቤስ̇ ዬሊ̇ዝ ዲራ̈ስ ክርስቶ̈ሳ ዎጛሊን ውርሳ ሳባ̇ኪኔ።

²⁰ ሜላ ኣሲ ሳባ̇ኪ ዣማ̇ሪኖ ቤስ̇ ጋልዳ ጊዳካ̇ይዶ̈ን ክርስቶ̈ሳ ሱምንዳ ሲስኪንታ̇ካዮ ቤሳ̈ን ጋርታ̇ ሉካ̇ራ ሳ̈ባ̇ካንዳቦ ታ̈ኒ ዎይ ጋላስ ኢኒ̇ታ̈̇ሬ።

²¹ ዪና̈ሬ፦ “ዓኒ̇ፖ ቲ̈ን ኢባዝ ኢንታ̇ቦ ሶ̈ሊንታካዮን ቤቂ̈ሬ፤ ኢባዝ ሲስካ̇ካ̇ዮን ቆፓር ዋይሲ̈ሬ” ጋ̈ሪ ጻ̈ፊንቲ̇ኖንዲፌ̈ኔ።

²² ዓታ̈ብ ዬሊዝ ዲራስ ቴ ዪንታ̇ኮ ዬ̈ካ̇ይዶራ ጋምኢኖን ዪኒ ጊሻ̈̇ቦ።

ጳውሎ̈ሲ ሮ̈ማ ካታማ ሉካ̇ንዳቦ ቆፒ̇ዴ

²³ ዓት ዓይዲ ዎ ጋዳን ጋርታ̇ ቴ ኦዝ ቤሲ̇ ባዮኮታ̇ቦ ማ ታ̈ኒ ዎይሊን ላይፖ ኤ̈̇ር ዪንታ̇ ቤቃ̇ንዳቦ ጴች ኢና̇ባራ ዎኮታ̇ቦ፥

²⁴ ታ̈ኒ ኢስፓይና ጋዳ̇ ሉካ̈ርዶራ ጎይ ኢዝባራ ዪንታ̇ ቤቃ̇ንዳቦ ቆፒ̇ኔ። ጊላ̇ ቃም ዪንታ̇̇ባራ ኡፋይታ̇ ጋምኢኖፖ ዓኒ ቴ ሉካ̇ዚ ጎይሚምቦ ማ̈ቂ̇ዝ ባዝ ዪንቲ̇ ታ̈ና ማ̈ዳ̇ዚንዶ ቴ ታስፋ ዎታ̈ሬ።

²⁵ ዓት ታ̈ኒ ኣማ̈̇ኒዝ ኣሳንሳቦ ኢሚ̇ዝ ሚ̈ሺ̇ ኤካ̇ራ ዬሩሳ̈ላም ካታማ ሉካ̇̈ሬ።

²⁶ ዪ̈ዳሬ ሜቅዶ̈ናኬ ኣካ̇ያ ጋዳ̇ ዎ ኣማ̇ኒዝ ኣሳን ዬሩሳ̈ላማ ካታማ ጋርታ ዎ ኣማ̇ኒዝ ዎርባያን ሚ̈ሻ̇ባር ማ̈ዳ̇ንዳቦ ኮዪኖ ጊሼ̇።

²⁷ ኢንቲ̇ ዪኖ̇ ካር ኦ̈ኖንዳ ዪኒ̇ፌ̈ኒ ኢንታ̇ ማ̈ዳንዳቦ ኮሻ̇ዚንኮታ፤ ኣይሁድ ማቃ̈ካዮ ኣሳን ኣይሁዳን ጋልዳፖ ጌ̈ሻ ኣያ̇ና ኢሚ̇ኖ ኣንጂን ዎልኣ ፋጊንቲ̇̈ርኮ ማ ኢንታ̇ር ፌ̈ቦ ዎ̈ ባዝ ጋልዳፖ ኣይሁዳን ማ̈ዲ̇ዝ ኣጫ ኢንታ̇ቦ ዎ።

²⁸ ዪ̈ኮታ̇ቦ ዪና̇ ሺ̈ቂኖ ሚ̈ሺ̇ን ዬሩሳ̈ላም ካታማ ኤጛ ኢሚ̇ኖፖ ዓኒ ዪንታ̇̇ክ ኣ̈̇ራ ጎይስ ኢዝባራ ኢስፓይና ጋዳ̇ ሉካ̇ንዳ።

²⁹ ታ̈ኒ ዪንታ̇ኮ ዬይዚ ቃሚን ክርስቶ̈ሳ ኣንጂንባር ኩማራ ዪንታ̇ኮ ዬዚን ቴ ኤራ̈ሬ።

³⁰ ቴ ኢሺንታ̇ን! ታ̈ኒ ዎጛላቦ ዋ̈ያዝ ዋ̈ዪንቦ ዎ̈ሳባር ታ̈ና ማ̈ዳ̇ምፔ̈ኒ ጎዳ̈ ዬሱ̈ስ ክርስቶ̈ሳ ሱምባርኬ ጌ̈ሻ̇ ኣያ̇ና ካንንባራ ቴ ዪንታ̇ ጌሻ̈ሬ።

³¹ ዪንቲ ታ̈ቦ ዎሳ̈̇ንዳብ ኮሻ̇ዚንዳ ዪሁዳ ጋዳ ዎ ኣማ̇ኒባ̈ሶ ኣሳን ኩሽታ̇ፖ ቴ ቡ̈ታምፔ̈ንኬ ዬሩ̈ሳ̈ላም ካታማ ጋርታ ታ̈ብ ዎ ዎጛላ ኦ̈ሲንዳ ጾ̈ሳ̇ ኣሳን ቲ̈ን ኮሽ ማ̈ቃ̇ ቤንታ̇ምፔ̈ኒዬ።

³² ዪና̇ ማ̈ቂ̇ኖፖ ዎሃ ጾ̈ሲ̇ ጌዬጌይንዶ ኡፋይስባራ ቴ ዪንታ̇ክ ዬ̈ራ ዪንታ̇ክ ሼምፓንዳብ ኮያ̈ሬ።

³³ ሳሪቲ ኢሚ̇ዝ ጾ̈ሳ̇̇̈ዲ ዪንቲ̇ ዎይንስባራ ማ̈ቆ̇! ኣሚንኤ።