ሮሜ 14 - ኦራ ጫ̈ቃ ማጻ̈ፋኣሳ ጋልዳ ፊርዳ̇ንዳቦ ኮሺባ̈ሴ 1 ኢ ኣማ̇ኒን ሊ̈ቅ ማ̈ቂ̇ኖ ና̈ሳ ዪንታ̇ ጋርታ̇ ኢያ ኤኪ̇ብትዶኬ ኢ “ዓና̇ ኮሼ፥ ዓና̇ ኢ̈ቴ” ጌዪ ቆፓ̇ዝ ቆፊን ጋልዳ ዋች ዲንፒ̇ቴ። 2 “ዎይ ባዝ ሙ̈ይን ኣባክ ባዬ” ጌዪ ኣማ̇ኒዝ ኣሲ ዎ፤ ኢ ኣማ̇ኒን ሊ̈ቅ ማ̈ቂ̇ኖ ኣሲ ኣይሽ ሞ̈ንዳብ ኢ̈ጪ̇̈ሬ። 3 ዎይ ባ̈ዝ ሙ̈ይዝ ና̈ሳ̈ዲ ዎይ ባዝ ሞ̈ባሶ̈ዳ ሌቃ̇ፖጋቤ፤ ዎይ ባዝ ሞ̈ባሶ̈ዲ ዎይ ባዝ ሙይዛ ና̈ሳ ጋልዳ ፊርዳፖ̇ጋ̈ቤ፤ ኣባ ጌይን “ዎይ ባዝ ሙይን ኣባክ ባዬ̇” ጌይዝ ና̈ሳ̈ዳር ማ̈ቂ̇ን ጾ̈ሲ̇ ኢያ ኢጺ̇ባ̈ሴ። 4 ኣሳ ኣሽካራ ጋልዳ ፊርዲ̇ዛ ኔ ኦ̈ኖ? ኢ ኤቂ̇ናሬ ኬዲ̇ናሬ ፌ ላ̈ቦ። ጾ̈ሲ̇ ኢያ ኤሳ̇ንዳቦ ዳንዳኢዛኮታቦ ሚ̈ጛር ኤቂ̈̇ሬ። 5 ዪና̇ ኢዝፌ̈ኒ “ፔቲ ቃሚ̇ንዳ ሜላ ቃሚ̇ንፖ̇ ሺ ቦንቺንቲ̇ኖ ቃሜ̇” ጌዪ ቆፒ̇ዝ ኣሲ ዶኢ̈ሬ፤ ማ ሜላ̈ዲ “ቃሚ̇ ዎይ ዎልፌ̈ንዶኬ ቃ̈ማን ጊዳ̇ ዱማ ማ̈ቂ̇ኖ ቃሚ̇ ባዬ” ጌዪ ቆፒ̈ሬ። ዪዚ ኣሲ ፌ ቡ̈ዳ ጋርታ̇ ዎንዲፌ̈ኒ ኦ̈ጋ̈ቤ። 6 ፔቲ ቃ̈ሚን ሜላ ቃማ̇ንፖ ሺ ማሃሪ ቦንቺ̈̇ርኮ ኢ ኢዞ ፌ ጎዳ ቦንቻ̈̇ንዳቦ ጋ̈ሪ ዎቲ̈ሬ፤ ፊ̈ሽ ጌዪዛ ዎይ ሙይዛድ ኢ ኢዞ ሞ̈ሪ ጾ̈ሳ̇ ጋላቲዛኮታ̇ቦ ፌ ጎዳ ቦንቻ̇ብ ሙይሬ፤ ዎይ ፊሽ ሞ̈ባሶ̈ዳሬ ፌ ጎዳ ቦንቻ̇ቦ ጋ̈ሪ ሞ̈ባሴ፤ ዪኒ̇ቦ ኢ ጾ̈ሳ̇ ጋ̈ላቲ̈ሬ። 7 ኑ ጋ̈ርታፖ ኦ̈ናካር ማ̈ቂ̇ን ሼምፓባራ ዶኣዚንዳር ማ̈ቂ̇ን ዓይቃ̇ዚን ኢያይ ጊዳካ̇ዬ። 8 ኑ̈ኒ ሼምፓባራ ዶኤጌይንዶ ጎዳ̈ብ ዶኢ̈ሬ፤ ዓይቄ̇ጌይንዳሬ ጎዳ̈ብ ዓይቂ̇̈ሬ፤ ዪ̈ኮታ̇ቦ ኑ̈ኒ ሼምፓባራ ዶኢናሬ ዓይቂ̇ናሬ ኑ̈ኒ ጎዳ̇̈ዬ። 9 ክርስቶ̈ሲ ዓይቃ̇ር ዓይቃ ጋርታ̇ፖ ዲንዲ̇ኖ̈ዲ ሼምፓባራ ዎ̈ንብኬ ዓይቂ̇ኖንቦ ዎይ ጎድ ማ̈ቃ̇ንዳቦ። 10 ዪዚ ዪ̈ዶኮ ኔ̈ኒ ኔ ኢሻ ጋልዳ ኣባቦ ፊርዳ̈ራ? ዎይ ኣባቦ ኔ ኔ ኢሻ ሌቃ̇ራ? ጾ̈ሳ̇ ፊርዲዝ ቃም ኑ ዎይን ቢርት ኢ ቲ̈ን ሺ̈ቂ̈ሬ። 11 “ ‘ታ̈ኒ ሼምፓባሮ̈ዳ፤ ኣሲ ዎይሲ ቴ ቲ̈ን ቡቂንቲ̇̈ሬ፤ ቴ ጾ̈ስ ማ̈ቂ̇ኖን ፌ ኖ̈ናባር ማርኪቲ̈ሬ’ ጌይሬ ጾ̈ሲ̇” ጋ̈ር ጻ̈ፊንቲ̇ኔ። 12 ዪዚ ኑ̈ኒ ኑ ቆሚ̇ን ቆሚ̇ን ኑ ኦ̈ኖ ባዚምቦ ጾ̈ሳ̇̇ ቲ̈ን ሺ̈ቃር ማልሳ ኢሚ̈̇ሬ። 13 ዪኒ̇ኮታ̇ቦ ኑ̈ኒ ዓኒ̇ፖ ጌዳ ፔታ̇ና ፔታ̇ና ጋልዳ ፊርዳ̇ዚን ኣሺ̇ስቶ̇። ኦ̈ናካር ማ̈ቂ̇ን ሜላ̈ ና̈ሳቦ ፊ ማ̈ቂ̇ዝ ባዝ ኦ̈ፖጋ̈ቤ። 14 “ባዝ ዓና̇ ኣስ ቄሬ” ጌዪ ቆፒ̇ዝ ና̈ሳ̈ቦ ባዝ ኢዛ ኢያ ቄ̈ርዶኬ ፊ̈ሺ ፌ ቆማ̇ቦ ቄ ጊዳካ̇ዮን ታ̈ኒ ጎዳ ዬሱ̈ሳይ ማ̈ቂ̇ኖኮታ̇ቦ ዪኖ̇ ኮሺንቻ̇ ኤሪኔ። 15 ኔ ሞ̈ዝ ፊ̈ሺን ኔ ኢሻ̈ብ ፊ ማ̈ቃ̇̈ርኮ ኔ̈ኒ ካ̈ንባራ ዶ̈ኣካዬ፤ ክሪሲቶ̈ሲ ኢ̈ቦ ዓይቂ̇ኖ ኔ ኢሻ ፊ̈ሻኮታ ያምፔ̈ን ዎታፔ̇። 16 ዪዚ ኔ̈ኒ ኮሼ̇ ጋ̈ራ ኦ̈ዝ ባዚንዳ ሜላን ኢዞ ሺሪንታ̇ንፔ̈ን ዎታፒ̇ቴ። 17 ጾ̈ሳ̇ ካ̈ቲቲንዳ ጌ̈ሻ ኣያ̈ናባራ ቤንቲ̇ዝ ጺሊ̇ቲባዝ፥ ሳሪቲ ባዝኬ ኡፋይስባዝዶ̈ኬ ሙ̈ንትባዝኬ ኡሽ̇ ባዝ ጊዳካ̇ዬ። 18 ዪኒፌ̈ኖ ጎይባራ ክርስቶ̈ሳብ ኦ̈ዝ ኣሲ ጾ̈ሳ̇ ኡፋይሲ̈̇ሬ፤ ኣሳ ቲ̈ናር ቦንቺ̈ንቲ̇̈ሬ። 19 ዪዚ ኑ̈ቦ ሳሪቲ ቤ̈ንቲዝ ጎ̈ይንዲኬ ኑ ዎል ዎልኣ ኑ ኣማ̇ኒን ሚንዝ ጎ̈ይ ሚ̈ጛር ኮዪስቶ̇። 20 ፊ̈ሺ ጊሽ ጾ̈ሳ̇ ኦ̈ሲን ኢ̈ስባ̈ዳ። ፊ̈ሺ ዎይ ጌ̈ሼ̇፤ ዎቲ̈ናካር ሜላ ና̈ሳ ኢ ኣማ̇ኒን ጋልዳፖ ኢያ ቶጚዝ ፊ̈ሺ ሞ̈ዚንዳ ኮ̈ሽ ጊዳካ̇ዬ። 21 ኔ ኢሻ ፌ ኣማ̇ኒን ጋልዳፖ ኬ̈ዳካዮዲፌ̈ን ኡሽ̇ኬ ሙንትኬ ኣሻንዳብኬ ዎይ ሜላር ኢ ኬዳ̇ምፔ̈ን ዎቲዝ ባዝ ዎይ ኦ̈ዚን ኣሻ̇ንዳብ ኮሺ̈ሬ። 22 ኔ̈ኒ “ባዝ ዪና̇ ኮሼ፤ ባዝ ዪና ኢ̈ቴ” ጋ̈ራ ኤ̈ዝ ባዚንዶ̇ ኔ̈ናኬ ኔ ጾ̈ሳ̇̈ዲክ ሙታ̇ ኤሪዛ ማ̈ቆ̇፤ “ታ̈ኒ ባዝ ዓኖ̇ ኦ̈ን ኮሼ̇” ጌዪ ኣማ̈ናር ኦ̈ዝ ባዚምባራ ኢ ቡ̈ዲን ኢ ጋልዳ ፊርዳባሶ ና̈ሳዲ ኢ ኣንጂ̇ንቲ̇ኖ ኣሴ። 23 ኤ̈ዝጊሙታ̇ ሙ̈ይዝ ኣሲ ኣማ̇ኒቤዪ ሙይዛኮታ̇ቦ ፊርዲንቲ̈ሬ፤ ኣማ̇ናካይዶ̈ር ኦ̈ዝ ባዚ ዎይ ናጋራ። |