ሮሜ 13 - ኦራ ጫ̈ቃ ማጻ̈ፋዎርዣ ኣቂሲዛንቦ ኪ̈ቲንታ̇ንዳብ ኮይሲ̈ሬ 1 ኣሳብ ሲልጣ̈ና ኢሚ̇ዛ̈ዲ ጾ̈ሴ፤ ዓት ሲልጣ̈ና ጋልዳ ዎ ኣሳን ሹ̈ሚኖ̈ዳር ጾ̈ሳ̇̇̈ዳ፤ ዪ̈ኮታ̇ቦ ኣሲ ዎይ ሲ̈ልጣ̈ና ዎ ኣሳንቦ ኪ̈ቲንታ̇ንዳብ ኮሺ̈ሬ። 2 ዪዚ ሲልጣ̈ና ዎ ኣሳን ኢጺ̇ዛንሲ ዎይ ጾ̈ሳ̇ ኪ̈ቲን ኢጺ̈̇ሬ፤ ኢንታ̇ብ ኪ̈ቲንትባ̈ዳ ጌይዝ ኣሲ ዎይ ፌ ጋልዳ ፊርዳ ኤሄይሬ። 3 ጋድ ኣቂሲዝ ኣሳብ ኢ̈ጪ̇ዛ̈ዲ ኢ̈ት ኦ̈ኖ ኣስዶኬ ኮሽ̇ ኦ̈ኖ ኣስ ጊዳካ̇ዬ፤ ሲልጣ̈ና ዎ ኣሳብ ኢጫ̇ብዳ ጋዶኮ ኮሽ̇ ባዝ ኦቤ፤ ኢ ኔ̈ና ኣንጂ̈ሬ። 4 ሲልጣና ዎ ኣሲ ኔ̈ቦ ኮ̈ሽ ባ̈ዝ ኦምፔ̈ኒ ጾ̈ሲ̇ ኢያ ጋዲ̇ኖ ኣሴ፤ ኢ ማሳ̇̈ራ ጊጺ̇ኖ̈ዲ ሜላ̇ ጊዳካ̇ዬ፥ ኔ̈ኒ ኢ̈ት ባዝ ኦ̈ርኮ ኢ̈ብ ኢ̈ጫ̇ቤ፤ ኣጊሻ̇ቦ ጌይን ኢ ኢ̈ት ኦ̈ዝ ኣሳን ቃ̈ጣ̇ኣንዳ̇ብኬ ጾ̈ሳ̇ ጎይሊን ቤይሲሙታ̇ ኢ̈ብ ኦ̈ንዳብ ዶኢኖ ኣሴ። 5 ዪንቲ ኪ̈ቲንታ̇ዚንዳ ቂጣ̈ታብ ኢ̈ጫ̇ር ሙ̈ታ ጊዳካይዶን ዪንታ̇ ቡ̈ዲን ዪንታ̇ ዞራዚምቦ ሲልጣ̈ና ዎ ኣሳቦ ኪ̈ቲንታ̇ንዳብ ኮሺ̈̇ሬ። 6 ጋድ ኣቂሲዛን ፌ ኦ̈ሲን ዎይ ጋላስ ኦ̈ንዚንዳ ጾ̈ሳ̇̈̇ቦ ኦ̈ዛኮታ̇ቦ ዪንታ̇̇ር ጊ̈ራ ጊ̈ራንዳብ ኮሻ̇ዚንዳ ዪና̇ ኢዝቦ። 7 ዪዚ ዎይንቦ ኢማ̇ንዳብ ኮሻ̇ዝ ባዚን ኢሚ̇ብቴ፤ ጊ̈ራ ኮሺ̇ዛ̈ቦ ጊ̈ሪብቴ̇፤ ቃራጻ̈ ኮሺ̇ዛ̈ቦ ቃራጻ ቃጺ̇ብቴ፤ ኢ̈ጫ̇ንዳብ ኮሺ̇ዛ̈ቦ ኢ̈ጪ̇ብቴ፤ ቦንቺ̇ ኮሺ̇ዛ̈ቦ ቦንች ኢሚ̇ብቴ። ዎል ዎልኣ ካብቴ 8 ኦ̈ባካር ኣጫ ዪንታ̇ ጋልዳ ዶኣፖ̇ጋ̈ቤ፤ ዪንቲ ዎል ዎልኣ ካንታዚን ሙታ̇ ዪንታ̇̇ቦ ኣጫፌ̈ን ማ̈ቆ̇ጋ̈ቤ፤ ኣስ ካዝ ኣሲ ሂጊ̇ን ና̈ጊኔ። 9 “ኦሎላ ጋዳፔ̇፤ ዎፔ̇፤ ዉ̈ቃፔ̇፤ ኣሳ ባዝ ጌይዛ ዎይ ኢኒ̇ታፔ̇” ጌይዝ ኪ̈ታንኬ ሜላ ኪ̈ታን ዎ̈ይ “ኔ ኔና ካ̈ዚንዲፌ̈ን ኣስ ሜላ ካቤ” ጋ̈ዝ ፔ̈ቲ ኪ̈ቲን ጋ̈ርታ ዎይ ኢና ዎ። 10 ኣስ ካዝ ኣሲ ኣሳ ጋልዳ ኢ̈ታ ባዝ ኦ̈ባ̈ሴ፤ ዪ̈ኮታ̇ቦ ኣስ ካዝ ኣሲ ዎይ ሂጊ̇ን ና̈ጊኔ ጌንቴ። 11 ዪዚ ዪንቲ̇ ኬሊ̇ን ኤሪ ሙታ̇ ዪኖ̇ ኦ̈ብቴ̇። ሱርስ ጋርታ̇ፖ ባርኪ̇ዝ ሳኣ̈ቲን ዓት ዬሊ̇ኖን ዪንቲ ኤሪብቴ፤ ኑ̈ኒ ቲ̈ን ኣማ̇ኒኖ ቃ̈ሚንፖ ሺ ኑ ፋጻዝ ቃሚ̇ን ኑ̈ክ ኡኪ̇ኔ። 12 ቃሚ̇ኖ ቃሚ̇ን ኣ̈ኔ፤ ጋላሲ̇ን ኡኪ̇ኔ፤ ዪዚ ም̇ ጋርታ ኦ̈ዝ ኦ̈ሲን ኣሻ̇ሪ ፎኢን ጋርታ̇ ኦሊንታ̇ንዳቦ ኦላ ማሳ̇̈ሪን ጊጺ̇ስቶ። 13 ጋላስ̇ ፎኢንባራ ዬዝ ኣስፌ̈ኒ ኑ̈ናር ጌ̈ሺቲባራ ዬስቶ̇። ዎልኣ ሺ̈ቃር ኡሽኪ̇ ዬጺ̇ ዶ̈ንባራ፣ ማሲቲባራ፣ ኦሎ̈ላ ጋዲባርኬ ዲርጊ̇̈ስባራ ማ̈ቃፖ፤ ዋችባርኬ ቂና̈ታባራ ማ̈ቃፖጋ̈ቤ። 14 ዪዚ ኣሲ ኣፊላ ማኢን ኢ ጋልዳ ቤንታ̇ዚንዲፌ̈ኒ ጎዳ ዬሱ̈ሲ ዪንታ̇ ጋልዳ ቤንቶ̇ጋ̈ብዶኬ ዪንታ̇ ኢ̈ታ ኢኒ̇ን ኩምንዳብ ቆፓ̇ፒ̇ቴ። |