ሳጻ 5 - ኦራ ጫ̈ቃ ማጻ̈ፋዋ̈ኒ̇ሲ ኣፋ ማጻ̈ፋኬ ዶራኬ ቤቂ̇ዴ 1 ዙፋ̈ና ጋልዳ ዶኢኖ̈ዲ፥ ጋርታ̇ ጎይኬ ጋሳ ጎይ ኢዝ ጋልዳ ጻ̈ፊንቲ̇ኖ ታብዛ ቤስ̇ ጋልዳ ማይታማባር ኣሻ̇ጊኖ ማጻ̈ፋ ፌ ኡሻቻ̇ ኩሽታ̇ ኤ̈ንዶን ቤቃ̇ዴ። 2 ኢናፖ ሚ̈ን ኪ̈ታንቻ̇ ፔታ̇ንዶሪ ፌ ቆ̈ ሾክ̇ ዎታሪ “ማይታማን ቢላ̇ንዳብኬ ማጻ̈ፊን ፊርቃ̇ንዳብ ዳንዳኢዝ ሲልጣና ዎ ኦ̈ኖ?” ጋ̈ሪ ሶ̈ላምባር ቤቃ̇ዴ። 3 ዎቲናካሬ ኣፋሬ ሳ̈ዳ̇ሬ ዎይ ሳ̈ዝ ጻና ጋርታ̇ር ማ̈ቂ̇ን ማጻ̈ፊን ፊርቃ̇ንዳብኬ ኢዝ ጋርቶ̇ን ቤቃ̇ንዳብ ዳንዳኢዝ ኣሲ ኦ̈ናካር ዪዴ። 4 ማጻ̈ፊን ፊርቃ̇ር ኢዝ ጋርታ ዎን ቤቃ̇ንዳብ ዳንዳኢዝ ሲልጣ̈ና ዎ ኣሲ ቤንታካ̇ዮኮታ̇ቦ ቴ ዎይሊን ዬ̈ካ̇ዴ፤ 5 ዪና ኢዝባራ ጪጛሻን ጋርታፖ ፔታ̇ና̈ዲ ታ̈ኮ “ኔ ዬ̈ካፔ! ዓዲሼ ቤቃ̇ቤ፥ ዳ̈ዊታ ዜር ጋርታ̇ፖ ዬይኖ ዪሁዳ ዜር ማ̈ቂ̇ኖ ዞባ̇ ኢ ጋሚኔ፥ ኢ ማጻ̈ፊን ፊርቃንዳብኬ ታብዛ ማይታማን ቢላ̇ንዳቦ ዳንዳኢ̈ሬ” ጌይዴ። 6 ዪኒ̇ፖ ዓኒ ዙፋ̈ኒንቦ ሼምፓባሮ ኮቺንታን ኦይዳ̇ንቤኬ ጪጛሻን ጊዳ̇ ሹኪንቲ̇ኖ ዶሪ ማይጺዝ ዶሪ ኤቂ̇ንዶን ቤቃ̇ዴ፤ ዪ ዶራ̈ቦ ታብዛ ኡሺንችኬ ታብዛ ኣ̈ፊ ዎ፥ ኢንታ̇ሬ ኣላማ ዎይ ጋልዳ ኪ̈ቲንታ̇ር ሉኪ̇ኖ ጾ̈ሳ̇ ኣያ̇ና ታብዛን። 7 ዶራ ዬ̈ሪ ዙፋና ጋልዳ ዶኢኖ ኡሻቻ ኩሺን ጋርታፖ ማጻ̈ፊን ኤኪ̇ዴ። 8 ኢ ማጻ̈ፊን ኤኪ̇ን ኦይዲ ኮቺንታ̇ንኬ ላምታ̇ም ኦይዲ ጪጛሻን ዶራ ቲ̈ን ፌ ዴ̈ማ̈ባር ጉጲጚዴ፥ ኢንቲ ዎይን ፌ ኩሽታ ዚምቢኬ ኢዝ ጋርታ̇ ኢጻ̈ና ኩሚኖ ዎርቃባር ኮቺ̇ኖ ሙዳ̈ያ ኤኔ፥ ዪና̇ ኢጻ̈ኒንዳ ጌ̈ሻ̇ ኣሳን ዎ̈ሲ̇ዝ ዎ̈ሳ። 9 ኢንቲ̇ ኦራ ማዝሙራባራ፦ “ኔ̈ኒ ማጻ̈ፊን ኤካ̇ንዳብኬ፥ ኢዝ ጋልዳ ዎ ማይታማን ፊርቃ̇ንዳቦ ኔ̈ብ ቤይሲ̈ሬ፤ ኣባ ጌይን ኔ̈ኒ ሹኪንታ̇ራ ኔ ሱ̈ንባር ኣሳ ዜር ጌይዛ ዎይ ጋርታፖ፥ ሳ̈ዝ ኤ̈ሺ̇ን ጋልዳ ኣሲ ሶ̈ሊንቲ̇ዝ ኖ̈ና ዎይ ጋርታፖ፥ ኣሳ ኮች ጌይዛ ዎይ ጋርታፖ፥ ዎ̈ርዣ ዎይ ጋርታፖ፥ ኣሳ ናኣን ጾ̈ሳ̇ቦ ዎዛንዳቦ፥ ኔ̈ኒ ሹኪንቲ̇ኔ። 10 ኔ ኢንታ ኑ ጾ̈ሳ̇̇̈ቦ ኦ̈ምፔ̈ኒ ካ̈ቲንታኬ ቄ̈ሳኬ፥ ማ̈ቃ̇ምፔ̈ን ዎታዴ፤ ኢንቲ ሳ̈ዝ ጋልዳ ካዉቲ̈ሬ” ዪዝ ጌዪ ዬጺ̇ዴ። 11 ቴ ጌዳ ቤቃ̇ምባራ ዙ̈ፋኒንቦ፥ ኮቺንታ̇ንቤኬ ጪጛሻንቦ ቡጊዲንባራ ዎይሊን ኪ̈ታንቻን ጊርሲን ሲስካ̇ዴ፤ ኢንታ̇ሬ ፋይዲርኮ ዎይሊን ሙኩላኬ ዎይሊን ሚ̈ሎ̈ና ማቂ̇̈ሬ። 12 ኢንቲ̇ ጴች ጊርስባራ፥ “ሹኪንቲ̇ኖ ዶራዲ ዎ̈ልቃ፥ ዱሪቲ፥ ኤሪቲ፥ ሚንቲ፥ ጴቺቲ፥ ቦንችኬ ጋላታ ኤካ̇ንዳብ ኢ̈ብ ቤይሲ̈ሬ” ጌዪ ዬጺ̇ዴ። 13 ኣፋኬ ሳ̈ዳኬ፥ ሳ̈ዝ ጻ̈ናኬ ባሃራ ጋርታ ዎ ኮቺንታን ዎይ፥ “ዙ̈ፋኒን ጋልዳ ዶኢኖ̈ባኬ ዶራ̈ቦ፥ ጋላታ፥ ጴቺቲ፥ ቦንችኬ ዎልቃ ሜናብ ኢ̈ብ ማ̈ቆ!” ጋ̈ዚን ሲስካ̇ዴ። 14 ኦይዲ ሼምፓባሮ ኮቺንታ̇ንሬ “ኣሚንኤ!” ጌይዴ፤ ላምታም ኦይዲ ጪጛሻንሬ ፌ ዴ̈ሚንባር ኢ ቲ̈ን ኬዳ̇ሪ ኢ̈ብ ሞ̈ኪንቲ̇ዴ። |