ሳጻ 4 - ኦራ ጫ̈ቃ ማጻ̈ፋጾ̈ሳ̇̈ ፌ ዙፋ̈ኒን ጋልዳ ዶኢንዶን ዋ̈ኒ̇ሲ ቤቂ̇ዴ 1 ዓኒ̇ፖ̇ ዎሃ ታ̈ኒ ኣፋ ቴ ቲ̈ኒን ጋርታ̇ ፊርቂንቲ̇ኖ ካራ ዎዶን ቤቃ̇ዴ፤ ታ̈ኒ ዓኒፖ̇ ቲ̈ን ሲስኪ̇ኖ ሞይዛፌ̈ኖ ጊርሳ̈ዲ ታ̈ኮ “ዓኒ̇ፖ ዎሃ ማ̈ቂ̇ዝ ባዛን ቴ ኔ̈ና ቤይሲዛኮታ̇ቦ ዓይ ፉዳ ኬስካ̇ቤ” ጌይዴ 2 ኤሊ̇ባራ ታ̈ኒ ጌ̈ሻ̇ ኣያ̇ናባር ኦ̈ሂንታ̇ዴ፤ ማ ኣፋ ዙፋ̈ና ቤቃ̇ዴ፤ ኢዝ ጋልዳ ፔቲ ኣሲ ዶኢኔ። 3 ዙፋ̈ኒን ጋልዳ ዶኢኖ̈ዲ ያስፒዲናኬ ሴርዲኖ̈ና ጌይዝ ቦንቺንቲ̇ኖ ሹቻንፌ̈ኒ ፎኢ̈ሬ፤ ዙፋ̈ኒን ቡጊዲንባራ ቦቺንቲ̇ኖ ጫ̈ላ ሹች ማይጺዝ ዙላ̇ ዎ። 4 ዪና̇ ዙፋ̈ኒን ቡጊዲምባ̇ራ ላምታም ኦይዲ̇ ዙፋ̈ናን ዎ፤ ዪን ዙፋ̈ናን ጋልዳ ቦ̈ርስ ኣፊላ ማኣር ፌ ቆ̈ሚን ጋልዳ ዎርቃባር ኮቺ̇ኖ ኣኪሊላ ጋዲ̇ኖ ላምታም ኦይዲ ጪጛሻን ዶኢኔ። 5 ዙፋ̈ኒን ጋርታ̇ፖ ዜ̈ሊን፣ ጊርስኬ ዳዳ ኬስኪ̇ዴ፤ ዙፋ̈ኒን ቲ̈ን ፎኢዝ ዣባ̇ ታብዛ ዎ፤ ኢንታሬ ጾ̈ሳ̇̈ ኣያ̇ና ታብዛን። 6 ዙፋ̈ኒን ቲ̈ኒን ጋልዳ ጺላ̇ክ ጊልዢዥ ጌይኖ ማስቶ̈ታ ባሃ̈ራ ማይጺዝ ባዚ ዎ፤ ዙፋ̈ኒን ጊዳ̇ ማ ኢዝ ቡጊዲምባ̇ራ፥ ቲ̈ን ጎይኬ ጋስ ጎይ ዎይሊን ኣ̈ፊ ዎ ሼምፓባሮ ኮቺንታን ኦይዲ̇ ዎ። 7 ኢንታ̇ ጋርታ̇ፖ ፔታ̇ና̈ዲ ዞብ̇ ማይጺ̈ሬ፤ ናምኢዳ ጌ̈ን ማይጺ̈ሬ፤ ዓይዚዲ ኣሳ ዴ̈ማ ማ̈ይጺዝ ዴ̈ማ ኢ̈ብ ዎ፤ ኦይዲዲ ፋሪዝ ኣርጊን ማይጺ̈ሬ። 8 ዪን ኦይዲ ኮቺንታ̇ን ኢንታ ቆሚ̇ን ቆሚ̇ን ኢንታ̇ብ ሌሂ ካፓ̇ ዎ፤ ኢንታ ጋሊ̇ን ዎይኬ ኢንታ ካ̈ፒ̇ን ጋርሲን ዎይ ኣ̈ፊ ኩሚኔ። ኢንታ̇ር ቃምኬ ጋላስኬ፥ “ጌ̈ሻ̈̇ዶ! ጌ̈ሻ̈̇ዶ! ጌ̈ሻ̈̇ዶ! ሚናፓር ዎ፥ ዓታር ዎ፥ ጊዳክ ዬይዛ፥ ዎይን ዳንዳኢኖ ጎዳ ጾ̈ሳ̇̈̇ዶ!” ጋዚ̈ን ኣሺባ̈ሴ። 9 ዪን ኮቺንታ̇ን ዙፋ̈ኒን ጋልዳ ዶኢኖቦኬ ሜናብ ዶኢዛ̈ቦ ቦንች፣ ጋላታኬ ጴቺቲስኬ ኢ̈ብ ሺሻ̇ምባራ ዎይ ጋላስ፥ 10 ላምታ̇ም ኦይዲ̇ ጪጛሻን ሜናብ ዶኢዛ̈ቦ፥ ዙ̈ፋና ጋልዳ ዶኢኖ ኢ ቲ̈ኒን ጋልዳ ፌ ዴሚንባር ጉፕ ጋ̈ሪ ኢ̈ብ ሞ̈ኪንቲ̇̈ሬ፤ ፌ ኣኪሊላሬ ዲንር ኢ ዙ̈ፋኒን ቲ̈ን ጋዳ̇ሪ፥ 11 “ኑ ጎዳ̈ዳኬ ኑ ጾ̈ሳ̇̈̇ዶ! ዎይ ባዝ ኔ ኮቺ̇ኖኮታ̇ቦ፥ ባዝ ዎይዳር ኮቺንቲ̇ኖዲኬ፥ ሼምፓ ዲጚኖ̈ዲ ኔ ጌይን ማ̈ቂ̇ኖኮታ̇ቦ፥ ጴቺ̈ቲ፣ ቦንችኬ ዎልቃ̇ሬ ኔ̈ ኤካ̇ንዳብ ቤይሳ̈ሬ” ጌይሬ። |