ሳጻ 20 - ኦራ ጫ̈ቃ ማጻ̈ፋሙኩላ ላይ ዶኢዝ ካ̈ቲቲ 1 ዓኒ̇ፖ ዎሃ ዎሳሊ ባዮ̇ ጴች ዶ̈ቺ̇ን ፊርቂ̇ዝ ቁልፋኬ ጴች ሳንሳ̇ላታ ፌ ኩሽታ ኤ̈ኖ ኪ̈ታንቾ ኣፋፖ̇ ሶ̈ባምባ̇ር ቴ ቤቃ̇ዴ፤ 2 ኢያር ዳዋ̈ ኤ̈ሪ ሙኩላ ላይ ቃቺ̇ዴ፤ ዪ ዳዋ̈ዲ ዳ̈ብሎሳ ዎይ ሴ̈ጣና ጌይዛ ሚኖ ሾ̈ሻ̇̈̃ዳ፤ 3 ሙኩላ ላይ ዉሪዝ ዲራስ ዎርዣን ባሊካ̇ይፌኒ ኪ̈ታንቻ̇̈ዲ ኢያ ዎሳሊ ባዮ̇ ጴች ዶ̈ቻ ጋርታ̇ ሚሺዴ፤ ኢናፖ ኢ ጋልዳ ዪብጻ̇ር ኣሻ̇ጋር ኣሺ̇ዴ፤ ዪኒፖ ዎሃ ሙቃ̇ ጊዛቦ ቢሊ̇ንታ̇ንዳብ ኮሺ̇̈ሬ። 4 ዪኒ̇ፖ ዎሃ ዙፋ̈ናን ቤቃ̇ዴ፤ ዪን ዙፋ̈ናን ጋልዳ ፊርዲዝ ሲልጣ̇̈ና ኢንታ̇ብ ኢሚ̇ንቲኖን ዶኢንዶ̈ን ቤቃ̇ዴ፤ ዬሱ̈ሳባዝ ኢንቲ̇ ሶ̈ሊኖኮታ̇ብኬ ጾ̈ሳ̇ ቃ̈ላ ማርኪቲኖኮታ̇ቦ ኢንታ ቆ ቃጺንቲ̇ኖ ኣሳን ሼምፓን ቴ ቤቃ̇ዴ፤ ኢንቲ ማ̈ታ ባዛ̈ብኬ ኢ ሚሲላ̈ቦ ሞ̈ኪንታካ̇ዮን፥ ኢ ማሊ̇ንዳር ፌ ዴ̈ሚን ጋልዳር ማ̈ቆ̇ ፌ ኩሽታ ኤካካ̇ዮን፤ ኢንቲ̇ ዓይቃ ጋርታ̇ፖ ዲንዳ̇ሪ ክርስቶ̈ሳባራ ሙኩላ ላይ ካዉቲዴ። 5 ዶካ̇ን ዓይቂኖን ሙኩላ ላይን ዉሪዝ ዲራስ ዓይቃ ጋርታ̇ፖ ዲንዲካ̇ዬ፤ ዪና̇ ቲ̈ኖ ዲንዲንዶ̇፤ 6 ቲ̈ኖ ዲንዲንባር ዲንዲኖን ጌ̈ሻ̇̈ንኬ ኣንጂ̇ንቲ̇ኖንሴ፤ ናምኢ ዓይቂን ኢንታ ዬላ̇ንዳብ ዳንዳኣባሴ፤ ኢንቲ ጾ̈ሳ̇ባኬ ክርስቶ̈ሳቦ ቄ̈ሳ ማ̈ቂ̇ሬ፤ ማ ክርስቶ̈ሳባራ ሙኩላ ላይ ካዉቲ̈ሬ። ሴ̈ጣኖ ጋሚንቲ̇ዴ 7 ሙኩላ ላይን ዉሪኖፖ ዓኒ ሴ̈ጣኖ ቃሺ ጋርታፖ ቢሊ̇ንቲ̈ሬ፤ 8 ኣላማ ጋልዳ ዎይ ቤስ̇ ዎ ዎርዣን ዎይ ጎ̈ግኬ ማ̈ጎጋ ጌይዛን ባሊንዳብኬ ኦላብ ሺ̈ሻ̇ንዳብ ኬስኪ̇̈ሬ፥ ኢንታ ፋይዳ̈ዲ ባሃራ ቡጊድ ጋልዳ ዎ ሻ̈ማፌ̈ኔ። 9 ኢንቲ ሳ̈ዝ ዎይ ጋልዳ ዳርጊንታሪ ጌ̈ሻ ኣሳን ዎ ቤሲ̇ን ካንቲኖ ካታሚን ቂርጽ ቃጻ̇ር ማሂዴ፤ ዎቲናካሬ ታማ ኣፋፖ ሶ̈ባሪ ሚቻ̇̈ር ኢንታ ይሲ̇̈ዴ። 10 ኢንታ ባሊኖ ዳ̈ቢሎሲ ማ̈ታ ባዛ̈ዲኬ ዎርዳ ናባ̈ዲ ዎ ዲናባር ሚቺ̇ዝ ታማ ባሃ̈ራ ጋርታ ቶጚንቲ̇ዴ፤ ኢንቲ̇ ቤስ̇ ኢና ቃማ̇ሬ ጋላሳ̇ር ሜናብ ቢጻ ቤቂ̇ ዶኢ̈ሬ። ዉርሲ ፊርዳ 11 ዪኒ̇ፖ ዓኒ ጴች ቦ̈ርስ ዙፋናኬ ማ ዙፋኒን ጋልዳ ዶኢኖ ቴ ቤቃ̇ዴ፤ ሳ̈ዶ̇ ሳ̈ዚንዲኬ ኣፎ ሳ̈ዚንዳ ኢ ቲ̈ናፖ ዎጺ ዪዴ፥ ዶኢዝ ቤሳ̇ር ኢንታ̇ብ ቤንታካ̇ዬ። 12 ጊላ̇ንኬ ጴቻን ዓይቂኖን ዙፋ̈ና ቲ̈ን ኤቂ̇ንዶን ቴ ቤቃ̇ዴ፤ ኢናፖ ማጻ̈ፋን ፊርቂንቲ̇ዴ፤ ማ ሼምፓባር ዶኢዛን ጻ̈ፊንቲ̇ዝ ማጻ̈ፋ ፊርቂንቲዴ፤ ዓይቂ̇ኖ ኣሳንሬ ማጻ̈ፋን ጋልዳ ጻ̈ፊንታር ቤንቲ̇ኖ ኢንታ ኦ̈ሲንዲፌ̈ን ፊርዳ ኤኪ̇ዴ። 13 ባሃ̈ሪንዳሬ ፌ ጋርታ ዎ ዓይቂኖን ኢማ̇ዴ፤ ዓይቃሬ ሲኦ̈ላሬ ፌ ጋርታ ዎን ዓይቂኖን ኢሚ̇ዴ፤ ኢንቲ ዎይን ፌ ኦ̈ሲንዲፌ̈ን ፊርዳ ኤኪ̇ዴ። 14 ዓይቃኬ ሲኦ̈ላሬ ታማ ባሃ̈ራ ጋርታ̇ ቶጚንቲዴ፥ ዪና̇ ታሚንዳ ናምኢ ዓይቂንዶ። 15 ኦ̈ናካሬ ኢ ሱምን ሼምፓባሮን ጻ̈ፊንቲ̇ዝ ማጻ̈ፋ ጋልዳ ጻ̈ፊንታካ̇ዮ ኣሲ ዎይ ታማ ባሃ̈ራ ጋርታ ቶጚንቲ̇ዴ። |