ሳጻ 14 - ኦራ ጫ̈ቃ ማጻ̈ፋፔቲ̇ ጼ̈ታኬ ኦይዲ̇ ታጶ ኦይዲ̇ ሙኩላ ኣሳንኬ ዶራ̈ዳክ 1 ዓኒ̇ፖ ዎሃ ዶራ̈ዲ ጺዮ̈ና ኢንዲ̇ን ጋልዳ ኤቂ̇ንዶን ቴ ቤቃ̇ዴ፤ ኢባራ ኢ ሱ̈ምንዲኬ ኢ ባ̈ባ ሱምን ኢንታ ዴ̈ሚን ጋልዳ ጻ̈ፊንቲ̇ኖ ፔቲ̇ ጼ̈ታኬ ኦይዲ ታጶ ኦይዲ ሙኩላ ኣሳን ዎ። 2 ኣፋፖ ጴች ዋ̈ ሶ̈ሲ ጊርቂዛዲፌ̈ንኬ ጴች ዳዳ ጊርቂ̇ዛዲፌን ጴች ጊርስ ቴ ሲስካ̇ዴ፤ ዪና̇ ቴ ሲስኪ̇ኖ ጊርሲንዳ ዎይሊን ኣሲ ሺቃር ዚምቢ ፉጊ̇ዛ ማይጻ̈ሬ። 3 ዙፋ̈ኒን ቲ̈ንኬ ኦይዲ ሼምፓባሮ ኮቺንታ̇ን ቲ̈ን ማ ጪጛሻን ቲ̈ን ፔቲ̇ ጼ̈ታኬ ኦይዲ̇ ታጶ ኦይዲ̇ ሙኩላ ኣሳን ኦራ ዬ̈ ዬጺ̇ዴ፤ ዪና ዬንዶ ሳ̈ዝ̈ ጋልዳ ጾ̈ሲ ፋኖን ዪን ፔቲ̇ ጼ̈ታኬ ኦይዲ̇ ታጶ ኦይዲ̇ ሙኩላ ኣሳንፖ ሜላ ኦ̈ናካር ታማ̈ራንዳብ ዳንዳኣካ̇ዬ። 4 ኢንቲ ማጫ̇ ዬሊ̇ ፌ̈ና ቄካይ ዎ ኣሴ፤ ኢንቲ̇ ዶራ ሉካ̇ዝ ቤሲ̇ን ዎይ ኢ ዎሂን ዬሬ። ኢንቲ ኣሳን ጊዳ̇ፖ ቆሪንታ̇ሪ ጾ̈ሳ̇̇̈ባኬ ዶራ̈ቦ ኡስ̇ፌ̈ን ሺ̈ቂ̇ኖ ኣሴ። 5 ኢንቲ ዎርዳ ሶ̈ሊ ኤሪባ̈ሴ፤ ኢንታ ጋልዳ ኣባካር ማዛ ባዮ̇ ኣሴ። ጾ̈ሳ̇̈ ፊርዳ ኤርሲዛን ዓይዚ ኪ̈ታንቻ̇̈ን 6 ዪኒ̇ፖ ዓኒ ሳ̈ዝ ጋልዳ ዶኢዝ ዎርዣቦ፣ ኣሳ ዜርቦ፤ ዱማ ዱማ ኖ̈ና ሶ̈ሊዛንኬ ዱማ ዱማ ኮቻንቦ ዎይ ሜናብ ዶኣዝ ዎጛሊን ኤ̈ኖ ሜላ ኪ̈ታንቻ ኣፋ ፋራምባር ቴ ቤቃ̇ዴ። 7 ኢያር ፌ ቆ̈ን ሾክ̇ ዎታሪ “ጾ̈ሳ̇̈ቦ ኢ̈ጪ̇ብቴ! ኢያ ቦንቺ̇ብቴ! ኢ ፊርዳ ቃማ̇ ዬሊ̇ኔ፤ ኣፎ ሳ̈ዚንዲኬ ሳ̈ዶ ሳ̈ዚንዶ፤ ባሃ̈ሪንዲኬ ዋ̈ ዶቃን ኮቺ̇ኖ ጾ̈ሳ̇̈ቦ ሞ̈ኪንቲብቴ̇!” ጌይዴ። 8 ሜላሬ ናምኢ ኪ̈ታንቻ̇̈ዲ “ኣስ ቄዝ ኦላላ ዎይና ጂን ዎርዣ ዎይ ኡሺ̇ኖን ጴቺ̇ን ባ̈ቢሎ̈ና ላ̈ሊ̇ንታ̇ር ያዴ! ላ̈ሊ̇ንታ̇ር ያዴ!” ጌዪሙታ̇ዶሪ ቲ̈ኖ ኪ̈ታንቻ ዎሂን ሉኪ̇ዴ። 9 ሜላሬ ዓይዚ ኪ̈ታንቻ̇̈ዲ ፌ ቆ̈ን ሾክ̇ ዎታሪ “ማ̈ታ ባዛ̈ብኬ ኢ ሚሲላ̈ቦ ሞ̈ኪንቲ̇ዛን፤ ኢ ማሊ̇ን ፌ ዴ̈ሚን ጋልዳ ዎይ ፌ ኩሽታ ኤኪ̇ኖ ኣሳን ዎይ፥ 10 ጾ̈ሳ̇̈ ጎይላ ዎይና ጂ̇ን ኡሽኪ̈ሬ፤ ዪ ዎይና ጃ̈ዲ ዋ̈ባር ቡሻካ̇ይ ጫ̈ሚን ኢዝባራ ጎይላ ዋ̈ንጪን ጋርታ̇ ዱ̈ቂንቲ̇ኔ፤ ኢንቲ̇ ጌ̈ሻ̇ ኪታንቻን ቲ̈ንኬ ዶራ̈ ቲ̈ን ታማባርኬ ኤይጺ̇ዝ ዲ̈ናባር ቢጻ ቤቂ̇̈ሬ” ጌዪሙታ̇ ኢንታ ዎሂን ሉኪ̇ዴ። 11 “ኢንታ ቢጻ ቤይሳዝ ታሚን ጋርታፖ ኬስካ̇ዝ ጩይዢንዳ ሜናብ ጩይታሙታ ፉዳ ኬስካ̇̈ሬ፤ ማ̈ታ ባዛ̈ብኬ ኢ ሚሲላ̈ቦ ሞ̈ኪንቲዛን ኢ ሱ̈ምን ማሊ̇ን ኤኪ̇ኖን ዎይ ቃማ̇ር ጋላሳ̇ሬ ሼምፓንዳብ ዳንዳኢባ̈ሴ” ጌይዴ። 12 ጾ̈ሳ̇̈ ኪ̈ቲን ና̈ጊዝ ኣሳንኬ ዬሱ̈ሳ ኣማ̇ናር ሚ̈ጚዝ ኣሳን ዪኒ̇ባራ ጋርዣንዳብ ኮሺ̈̇ሬ። 13 ኣፋፖ፤ “ዓና̇ ጻ̈ፋቤ! ዓኒ̇ፖ ጌዳ ጎዳ ዬሱ̈ሳ ኣማ̇ናሪ ዓይቂ̇ዛን ኢንቲ̇ ኣንጂ̇ንቲ̇ኖንሴ!” ጋ̈ዚን ሲስካ̇ዴ። ጌ̈ሻ̇ ኣያ̇ና̈ዳሬ “ኣዓ̈! ኢንቲ̇ ፌ ዳ̈ቡርሲን ጋርታፖ ሼምፓምፔ̈ን ኢንታ ኦ̈ሲንዳ ኢንታ ዎሂን ዬ̈ሬ” ጌይሬ። ጎዳ ጎይላ ሳ̈ዝ ጋልዳ ዬይሬ 14 ዪኒ̇ፖ ዓኒ ታ̈ኒ ቦ̈ርስ ሻ̈ራ ቤቃ̇ዴ፤ ሻ̈ሪን ጋልዳ ኣሳ ናኣ ማይጺዛ̈ዲ ዶኢኔ፤ ኢ ቆማ̇ ጋልዳ ዎርቃ ኣኪሊላ ጋዲ̇ኔ፤ ፌ ኩሽታ ኣጪንች ባ̈ጪ ኤ̈ኔ። 15 ሜላ ኪታንቾ ጾ̈ሳ̇̈ ኬ̈ ጋርታ̇ፖ ኬስካ̇ሪ ሻ̈ራ ጋልዳ ዶኢኖ̈ኮ ፌ ቆ̈ ሾክ̇ ዎታሪ “ሳ̈ዝ ጋልዶ ካ ዬሊ̇ኔ! ቴይሲ̇ዝ ኬላ̇ር ዬሊ̇ኔ! ዪዚ ኔ ባ̈ጪን ኤካ̇ራ ካ ቴይሳ̇ቤ” ጌይዴ። 16 ሻ̈ሪን ጋልዳ ዶኢኖ̈ዲ ፌ ኩሽቶ ባ̈ጪን ሳ̈ዳ ሚሺዴ፤ ሳ̈ዝ ጋልዳ ዎ ካ ዎይ ቴይሲንቲ̇ዴ። 17 ሜላ ኪታንቾ ኣፋ ዎ ጾ̈ሳ̇̈ ኬ̈ ጋርታ̇ፖ ኬስኪ̇ዴ፤ ኢያሬ ኣጪንች ባ̈ጪ ፌ ኩሽታ ኤ̈ኔ። 18 ታማ ጋልዳ ኢ̈ብ ሲልጣ̈ና ዎ ሜላ ኪ̈ታንቾ ካ̈ሻ̇ ቤሲ̇ን ላፋፖ ኬስካ̇ሪ ኣጪንች ባ̈ጪ ኤ̈ኖ ኪ̈ታንቻ̇̈ኮ “ዎይና ኣ̈ፊን ካጻ̇ ዲሊኖኮታ̇ቦ ኔ ባ̈ጪን ኣጪንቺንባራ ሳ̈ዝ ጋልዳ ዎ ዎይና ኣፋን ዎይ ቃጻ̇ር ሺ̈ሻ̇ቤ!” ጋ̈ሪ ፌ ቆ̈ ሾክ̇ ዎታር ዉይሲዴ። 19 ኪ̈ታንቻ̇̈ዲ ፌ ባ̈ጪን ሳ̈ዳ ሚሻሪ ሳ̈ዝ ጋልዶ ዎይናን ቃጻ̇ሪ ዎይና ኣ̈ፍ ጪ̈ጪዛ ጾ̈ሳ̇̈ ጎይላ ጴቻ̇ ጋርታ ሚሺዴ። 20 ዎይኒንዳ ካታሚንፖ ቡጊድ ዎ ዎይና ጪ̈ጫዝ ቤሲ̇ን ጋርታ̇ ጪ̈ጪንታ̇ዴ፤ ጪጪን ሱ̈ ኬስካ̇ሪ ጪ̈ጫዝ ቤሲ̇ምፖ ፉዳ ጺት̇ ኦይዲ̇ ዋ ማ ካንታባራ ዓይዚ ጼ̈ታ ኪላ ሜ̈ቲራ ዬሊ̇ዝ ሱ̈ ጎጊ̇ ኬስኪ̇ዴ። |