ሳጻ 12 - ኦራ ጫ̈ቃ ማጻ̈ፋፔቲ ማጪ̇ንዲኬ ዳዋ̈ዳክ 1 ዓኒ̇ፖ ዎሃ ጴች ጋራ̇ሚሲዝ ማላ̇ ኣፋ ቤንቲ̇ዴ፦ ኣዋ̈ፊን ኣፊላፌ̈ን ማኢኖ፥ ኣጋኒን ጋልዳ ፌ ቶህባር ዬኖ፥ ታጶ ናምኢ̇ ቤ̈ርሳን ኣኪሊላፌ̈ን ፌ ቆሚ̇ን ጋልዳ ጋዲ̇ኖ ፔቲ̇ ማጫ̇ዶ̈ራ ቤንታ̇ዴ። 2 ኢዛሬ ዎዳዶን ዬሊዝ ኬሊ̇ ኢዝቦ ኡኪ̇ን ጋርስ ቂንታሙታ̇ ዉይሳ̈ሬ፤ 3 ማ ዪና̇ ኢዝፌ̈ን ሜላ ማላ̇ ኣፋ ቤንቲ̇ዴ፦ ታብዛ ቆም̇ኬ ታጳ ኡሺንቺ ዎ ዞቃ ጴች ዳዋ ቤንቲ̇ዴ፤ ኢ ፌ ቆማን ጋልዳ ታብዛ ዛዉዳ ጉጲኔ፤ 4 ፌ ጎልሲምባራ ቤርሳን ጋርታ̇ፖ ሲሲን ኣፋፖ ጎ̈ቻ̇ር ሳ̈ዳ̇ ቶጚዴ፤ ኣሲን ዬሌጌይን ኢዝ ናኣ ቆ̈ንዳብ ቆፓ̇ሪ ዳዋዲ ኣሲን ቲ̈ን ኣ̈ር ኤቂ̇ዴ። 5 ኣሲንዳሬ ኣላማ ጋልዶ ዎርዣ ዎይዳ ፌ ሲልጣ̈ናባር ጋማር ኣቂሲዝ ኣቲናእ ዬላዴ፤ ኢዝ ናኣዲ ጾ̈ሳ̇̈ካኬ ጾ̈ሳ̇ ዙፋ̈ናኮ ፉዳ ኤኪንቲ̇ዴ። 6 ኣሲንዳ̇ሬ ዎጻ̇ር ባራሃ ጋርታ̇ ሉካ̇ዴ፤ ኢና ፔቲ ሙኩላኬ ናምኢ ጼታኬ ሌሂ ታጳ ቃም ኮሺንቺ ሙሲ ና̈ጊ ቤቃ̇ምፔ̈ኖ ቤስ̇ ጾ̈ሲ ኢዝቦ ጊ̈ጊሲኔ። 7 ኣፋ ኦሊ ዲንዲ̇ዴ፤ ሚካ̈ልኬ ኢ ጻና ዎ ኪ̈ታንቻ̇ን ዎልኣ ማ̈ቃ̇ሪ ዳዋ̈ባር ኦሊንቲዴ፤ ዳዋ̈ዳሬ ፌ ጻና ዎ ኪ̈ታንቻ̇ንባር ዎልኣ ማቃር ኢንታ̇ባር ኦሊንቲ̇ዴ። 8 ዎቲናካሬ ዳዋዳኬ ኢ ኪታንቻ̇ን ጋሚንቲ̇ዴ፤ ዪኒፖ ዎሃ ዳዋባኬ ኢ ኪታንቻ̇ንቦ ኣፋ ዶኢዝ ቤሲ̇ ኢንታ̇ብ ዪዴ። 9 ዳዋ ጴቻ̇̈ዲ ቶ̈ራ ሳ̈ዳ ቶጚንቲ̇ዴ፤ ኢያሬ ኣላሚን ዎይ ባሊዛ ዳብሎ̈ሳ ዎይ ሴ̈ጣና ጌይ ጼይጊንቲ̇ዛ ሚኖ ሾ̈ሻ̈̇ዳ፤ ኢ ቶ̈ራ ሳ̈ዳ ቶጚንቲ̇ዴ ማ ኢ ኪ̈ታንቻ̇̈ንሬ ኢባር ዎልኣ ቶጚንቲ̇ዴ። 10 ዪኒፖ ዓኒ̇ ኣፋፖ̇ ፔቲ̇ ጴች ጊርሲ፤ “ዪዚ ጾ̈ሳ̇ ኣስ ፋዝ ኬሊ̇ን ዬሊ̇ኔ! ዪዚ ጾ̈ሳ̇ ፌ ካ̈ቲቲንዲክ ፌ ዎልቂንዲክ ቤይሲኔ! ዪዚ ሲልጣ̈ናሬ ኢ ክርስቶ̈ሳብ ማ̈ቂ̇̇̇ኖን ቤይሲኔ! ኑ ኢሺንታ̇ን ኑ ጾ̈ሳ̇̈ ቲ̈ን ጋላስኬ ቃም̇ኬ ሞ̈ቲዛ̈ዲ ቶጚንቲ̇ኔ፤ 11 ኢንቲ ዶራ̈ ሱ̈ንባርኬ ፌ ሶ̈ሊኖ ማርኪቲ ቃ̈ሊንባራ ኢያ ጋሚኔ፤ ኢንቲ̇ ፌ ሼምፒ̇ምቦ ሚጪንታ̇ካይዶር ፌ̈ና ዓይቃብ ኣ̈ ኢሚ̇ኔ፤ 12 ዪ̈ኮታቦ ኣፎ ሳ̈ዚንዲኬ ኢዝ ጋርታ ዶኢዛን ዎይ ዪንታ̇ብ ኡፋይስ ማ̈ቆ̇ጋ̈ቤ! ጊላ̇ ቃሚ̇ ሙታ ኢ̈ብ ኣቲ̇ኖን ኤሪኖኮታ̇ቦ ሴ̈ጣኖ ዎይሊን ጎይልባራ ዪንታ̇ክ ሶ̈ቢኔ፤ ዪዚ ሳ̈ዚንዲኬ ባሃሪንዲኬ ዪንታ̇ ባዚ ኣዬ̇!” ጌይን ሲስካ̇ዴ። 13 ዳዋ̈ዲ ሳ̈ዳ̇ ፌ ቶጚንቲ̇ኖን ቤቃ̇ሪ ኣቲናእ ዬሊኖ ማጪ̇ን ዳኪ̇ዴ፤ 14 ኣሲን ማጪ̇ንዳ ባራሃ ጋርታ ፌ̈ብ ጊ̈ጊንቲ̇ኖ ቤሲ̇ንኮ ፋራር ሉካ̇ምፔ̈ን ጴች ኣርጊን ካፓ̇ ማይጺዛ ናምኢ ካ̈ፓ̇ ኢዝቦ ኢሚ̇ንቲ̇ዴ፤ ዪና̇ሬ ኢዛ ዳዋ ቲ̈ናፖ ጎታ̇ራ ዓይዚ ላይኬ ባጋክ ሙያ ኡሽካ̇ ኮሽ ና̈ጊንታ̇ ዶኣምፔ̈ኔ። 15 ኣሲን ዲኦ ኢዞ ሞምፔ̈ኒ ጋ̈ሪ ሾ̈ሻ̈̇ዲ ፌ ኖ̈ና ጋርታ̇ፖ ጴች ጎጊ̇ዝ ዋ ኢዝ ዎሂን ሚሺዴ። 16 ዎቲናካሬ ሳ̈ዚንዳ ኣሲን ማ̈ዳ̇ዴ፤ ሳ̈ዚንዳ ፌ ኖ̈ኒን ዓካራ ዳዋ ሚሺኖ ዋ̈ን ኡሽካ̇ዴ። 17 ዳዋ̈ዲ ኣሲን ጋልዳ ዛልቃ̈ሪ ኣቲ̇ኖ ኢዝ ዜርንባር ኦሊንታ̇ንዳብ ሉኪ̇ዴ፤ ኢንታ̇ሬ ጾ̈ሳ̇̈ ኪ̈ታን ናጊዛንኬ ዬ̈ሱ̈ሳ ባዚን ማርኪቲዛን። 18 ዳዋ̈ዳር ባሃሪን ቡጊድ ሻ̈ማ ጋልዳ ኤቂ̇ዴ። |