ፊል 4 - ኦራ ጫ̈ቃ ማጻ̈ፋዉርሲ ዞራ 1 ቴ ዪንታ̇ ካዛን፥ ታ̈ና ሹ̈ኒሺዛን፥ ቴ ኡፋይሳ̈ንኬ ቴ ኦ̈ሲምቦ ታ̈ብ ሺሊ̇ማ̈ታፌ̈ን ማ̈ቂ̇ኖ ቴ ኢሺንታ̈ን! ጎ̈ዳባራ ዪንታ̇ብ ዎ ፔቲ̇ቲንባራ ሚ̈ጛር ዶኢብቴ። 2 ኤዎ̈ዳኬ ሲንጺኪኬ ኢንቲ ዎል ዎልኣ ጎዳባራ ካንታ̇ር ዶኣምፔ̈ኒ ቴ ኢንታ ዞራ̈ሬ። 3 ኔ̈ናሬ ኢና ዎ ኣማ̇ኒንቲ̇ኖ ቴባር ዎልኣ ኦ̈ዛ ቴ ላጋ̇̈ዶ! ኔ̈ኒ ዪን ማጫ̇ን ማ̈ዳ̇ምፔ̈ን ቴ ኔ̈ና ጌሻ̇̈ሬ፤ ዪን ማጫ̇ን ቄላምኒጦ̈ሳባራ፥ ኢንታ ሱም ሼምፓባር ዶኢዝ ኣሳን ጻ̈ፊንቲ̇ዝ ማጻ̈ፋ ጋልዳ ጻ̈ፊንቲ̇ኖ ኣሳንባርኬ ቴባር ኦ̈ዛን ሜላንባር ዎል ማ̈ቃ̇ሪ ዎጛላ ኦ̈ሲን ሚ̈ጛር ኦ̈ኖ ኣሴ። 4 ዎይ ጋላስ ጎዳ̈ባር ዪንታ̇ብ ዎ ፔቲ̇ቲንባር ኡፋይቲ̇ብቴ፤ ማሃር ቴ ዪንታ̇ክ ጋ̈ሬ ኡፋይቲ̇ብቴ። 5 ዪንቲ̇ ኮሽ ኣስ ማ̈ቂ̇ኖንዳ ኣስ ዎይ ቲ̈ን ኤሪንቲ̇ኖ ማ̈ቆ̇ጋቤ፤ ጎ̈ዳ ዬንቲ̇ን ኡኪ̇ኔ። 6 ጾ̈ሳ̇ ጌሺሙታኬ ኢያ ጋላቲሙታ ዎይባዝ ዎ̈ሳባር ጾ̈ሳ̇̇̈ኮ ሺ̈ሺ̇ብቴዶ̈ኬ ኣባክ ፔቲ ባዛባር ጫና̇ቂንታፒ̇ቴ። 7 ኣሳ ኤሪቲ ዎይፖ ኣ̈ዛ ጾ̈ሳ̇ ሳ̈ርቲ̈ዲ ዪንታ ቡ̈ዲንዲኬ ዪንቲ ቆ̈ፊን ዬሱ̈ስ ክርስቶ̈ስባራ ና̈ጊ̈ሬ። 8 ቴ ኢሺንታ̇ን! ዉርሲ ጋልዳ ቴ ጋ̈ዚንዳ፥ ኪን ማ̈ቂ̇ኖ ባዝ፥ ቦንቺ̇ንቲ̇ኖ ባዝ፥ ኮሽ ማ̈ቂ̇ኖ ባዝ፥ ጺላ̇ ማ̈ቂ̇ኖ ባዝኬ ካንቲ̇ኖ ባዝ ዎይ ኮሺቲር ማ̈ቂ̇ን ጋላታር ማ̈ቂ̇ን ዪንፌ̈ኖ ባዛን ቆፒ̇ብቴ። 9 ዪንቲ ታ̈ ጋልዳፖ ታማሪኖን፥ ታ ጋልዳፖ ኤኪ̇ኖንዶ፥ ታ ጋልዳፖ ሲስኪ̇ኖንዲኬ ቤቂ̇ኖን ዎይ ኦ̈ብቴ፤ ሳሪቲ ጾ̈ሳ̇̇̈ዲ ዪንታ̇ባራ ዶኢ̈ሬ። 10 ዪንቲ ዎይሊን ኬላ̇ፖ ዎሃ ዓት ታ̈ና ዬሊ̇ኖ ሜቲን ጎይ ቆፒ̇ ዣማ̇ሪኖኮታ̇ቦ ጎ̈ዳባራ ታ̈ቦ ጴች ኡፋይሲ̇ ሲስኪንቲ̇̈ሬ፤ ዪንቲ ታ̈ና ማዳ̇ንዳብ ዪንታ̇ብ ማ̈ቂ̇ዝ ኬል̇ ዲጛካ̇ዬ ጋ̈ርዶኬ ዪንቲ̇ ታ̈ና ቦቲ̈ጚኔ ጌንት ጊዳካ̇ዬ። 11 ማ ቴ ዪኖ̇ ጌይኖንዳ ታ̈ብ ኮሺ̇ዝ ባዚ ጉ̈ጺ̇ኔ ጌንት ጊዳ̈ካዬ፤ ታ̈ኒ “ታ̈ቦ ዎ ባዚን ኢዛ ታ̈ብ ጊዳ̈ሬ” ጋዚን ታ ታማ̈ሪኔ። 12 ቴ ዲጛራር ቤቂ̇ኔ ማ ዪናር ቤቂ̇ኔ፤ ዎይ ጎይባራ ጋፊንቲ̇̈ሬ ጋዚን ኣብዝኮ ሚሼ̇ ጋ̈ዚን ኣብዝኮ ዲጚ̈ኔ ጋ̈ዚን ኣብዝኮ ዪ̈ኔ ጋ̈ዚን ኣብዝኮ ዎይን ኤራ̈ሬ። 13 ዎልቃ ታ̈ብ ኢሚ̇̈ዛ ክርስቶ̈ስባራ ዎይ ባዝ ኦ̈ንዳቦ ዳንዳኣ̈ሬ። 14 ዎቲናካሬ ዪንቲ ታ̈ና ዬሊ̇ኖ ሜቲንባር ታ̈ና ማ̈ዲ̇ኖንዳ ኮሼ̇። 15 ማ ዪኒፓ̇ሬ ዪንቲ ፊልጲሶ̈ስ ካታሚን ጋርታ̇ ዎን ዪንቲ̇ ኤራዚንዲፌ̈ኒ ዪንቲ̇ ዓኒ̇ፖ̇ ቲ̈ን ዎጛሊን ሲስኪ̇ኖ ኬሊ̇ን ጋርታ̇ ታ̈ኒ ሜቂዶ̈ናፖ ዲንዳራ ሉካ̇ዚምባራ ታ̈ብ ኮሺ̇ዝ ባዝ ኢሚባራ ዪንታ̇ዶኬ ሜላ ዎሳ ኬ̈ ኦ̈ናካር ታ̈ና ማ̈ዲ̇ኖ ባዬ̇። 16 ታ̈ኒ ታሳሎንቃ ካታሚን ጋርታ ዎምባራር ታ̈ብ ኮሺ̇ዝ ባዝባር ዎይሊን ቶህ ዪንቲ̇ ታ̈ና ማ̈ዲ̇ኔ። 17 ቴ ዪና̇ ጌይኖንዳ ዪንቲ ታ̈ቦ ኢማዚ̇ን ኮያራ ጊዳካ̇ይዶን ጾ̈ሳ̇ ቲ̈ን ዪንታ̇ ጋቲን ዪንታ̇ብ ዎይላምፔ̈ን ቆፓ̇ራ ጋ̈ሬ። 18 ዪንቲ̇ ታ̈ብ ኮሻ̇ዚንዲኬ ማ ኮሻ̇ዚምፓር ኣ̈ሪ ኣፍሮዲጣባር ታ̈ብ ሚሺኖን ታ ኤኪ̇ኔ፤ ዪና̇ ዪንቲ̇ ታ̈ብ ሚሺኖንዳ ኮሽ̇ ሳውቂ̇ዝ ጾ̈ሳ̇ ኡፋይታ̇ር ኤኪ̇ዝ ዣ̈ርሻ። 19 ዪዚ ቴ ጾ̈ሳ̇̇̈ዲ ፌ ዱሪቲ ዎይሊን̈ዲፌ̈ኒ ዬሱ̈ስ ክርስቶ̈ሳ ጎይባራ ዪንታ̇ቦ ኮሺ̇ዝ ባዛን ዎይ ዎይሊሳር ኢሚ̇̈ሬ። 20 ኑ ባ̈ባ̈ብኬ ኑ ጾ̈ሳ̇̇̈ቦ ሜናብ ቦ̈ንቺ ኢቦ ማ̈ቆ̇፤ ኣሚንኤ። ዉርሲ ሳሪቲ 21 ዬሱ̈ስ ክርስቶ̈ሳ ኣማ̇ኒኖ ኣሳን ዎይ ታ̈ብ ሳሮ ጌብቴ፤ ታባራ ዎ ኣማ̇ኒኖ ኣሳንር ዎይ ዪንታ̇ ሳሮ ጌይኔ። 22 ማ ኣማ̇ኒኖ ኣሳን ዎይ ዎይፖ ሺ ሮማ ጋዲን ካ̈ታ ኣ̈ሎ ኣሳን ዪንታ̇ ሳሮ ጌይኔ። 23 ኑ ጎዳ ዬሱ̈ስ ክርስቶ̈ሳ ካንን ዪንታ̇ባር ማ̈ቆ̇። |