ፊል 2 - ኦራ ጫ̈ቃ ማጻ̈ፋክርስቶ̈ሲ ፌ̈ና ዪርክ ዪርክ ዎቲኖንዲፌ̈ኒ ኑ̈ናር ኢ̈ኮንዲፌ̈ን ዎቲስቶ̇ 1 ክርስቶ̈ስባራ ዪንታ̇̈ብ ዎ ፔቲ̇ቲን ዪንታ̇ ሚ̈ንሬ፤ ኢ ካንንዳ ዪንታ̇ ሚ̈ንሬ፤ ጌ̈ሻ̇ ኣያ̇ናባራ ዪንታ̇ብ ፔቲ̇ቲ ዎ፤ ማ ዪንቲ̇ ዎልዎልኣ ፔታ̇ና ፔታ̇ና̈ብ ሚጪንቲ̈̇ሬ። 2 ዪዚ ፔቲ̇ ቆ̈ፊባራ፣ ፔቲ̇ ቡ̈ዳባርኬ ካንባራ ዎልፔታ̇ን ማ̈ቃ̇ሪ ቴ ኡፋይሲ̇ን ፎቲ ማ̈ቃ̇ምፔ̈ን ዎቲብቴ። 3 ዪንቲ̇ ኦቲርቂባ̈ሶ ማ̈ቃ̇ሪ ሜላ̈ን ዪንታ̇ፖ ሺዛ ማሃር ፋይዲብቴዶኬ ዪንቲ ዪንታ̇ ካሪ ዎይ “ታ̈ፖ ኣ̈ዛ ኦ̈ኖ” ጋ̈̈̈ሪ ኣባክ ፔቲ̇ባዝ ዎታፒ̇ቴ። 4 ዪዚ ኣሲ ዎይ ፌ̈ና ማ̈ዲ̇ዝ ባዛብሙታ̇ ጊዳካ̇ይዶን ኣስ ሜላ̈ዳር ማ̈ዲ̇ዝ ባዝ ቆፖጋ̈ቤ። 5 ዬሱ̈ስ ክርስቶ̈ሳብ ዎ ቆፊን ዓና̇ ዪንታ̇ ጋርታ̇ር ዶኣንዳብ ኮሻ̇̈ሬ። 6 ዬሱ̈ስ ክርስቶ̈ሲ ኢ ፌ ቆሚ̇ን ጾ̈ስዶሪ፥ ዪኖ̇ ኢ ጾ̈ሳ̇ባራ ዎልፌ̈ን ዎንዶ “ታ̈ኒ ኣሻ̇ንዳብ ኮሻ̇ባሴ” ጋ̈ሪ ቆፓካዬ። 7 ዪኒፖ ኢ ኣይላፌ̈ን ማ̈ቃ̇ር ቤንታ̇ሪ፥ ኣሳ ናእ ማ̈ቃ̇ር ዬሊንታ̇ሪ፤ ፌ̈ብ ዎ ባዝ ዎይ ኣሻ̇ሪ፥ ፌ̈ና ሜላ̇ ኣባክ ባዮ̇ ማ̈ሲዴ፤ 8 ኣስ ማ̈ቃር ቤንታ̇ሪ፤ ፌ̈ና ዪርክ ዪርክ ዎቲዴ፥ ዓይቃቦ ዪ̈ዳሬ ማስቃላ ጋልዳ ዓይቃቦ ዶሳር ፌ̈ና ኣ̈ ኢሚ̇ዴ። 9 ዪ̈ኮታ̇ቦ ጾ̈ሲ ኢያ ዎይሊን ሾክ̇ ሾክ̇ ዎቲዴ፤ ማ ሱም ዎይፖ ሺዝ ሱም ኢ̈ብ ኢሚ̇ዴ። 10 ዪ̈ዳሬ ኣፎ ሳ̈ዝኬ ሳ̈ዶ̇ ሳ̈ዝ፥ ማ ሳ̈ዝ ጻና ዎን ዎይሲ፥ ዬሱ̈ሳ ሱምምቦ ቡቂንታ̇ምፔ̈ኒ 11 ማ ኣሲ ዎይ “ዬሱ̈ሲ ጎዴ” ጌዪ ማርኪቲሙታ፥ ጾ̈ሳ̇̇̈ ባ̈ባ̈ቦ ቦንች ኢማ̇ምፔ̈ኒዬ። ኣላሚን ዓኒ̇ ጋልዳ ዎ ኣሳንቦ ፎኢን ማ̈ቃ̇ር ቤንቲ̇ብቴ 12 ቴ ላጋን! ዪንቲ ዎይ ጋላስ ኪ̈ቲንታዚንዲፌ̈ኒ፥ ቴ ዪንታ̇ባር ዎምባር ሙታ̇ ጊዳካ̇ይዶን ቴ ዓት ዪንታ̇ፖ ጎት ዎንባራር ማ̈ቂ̇ን ቲ̈ኖንፖ ሺ ጾ̈ሳ̇̇̈ብ ኢ̈ጪ̇ ጋንዲ̇ሙታ̇ ዪንታ̇ ፋቲን ፎቲ ማ̈ቃ̇ምፔ̈ን ዎቲብቴ። 13 ኣባ ጌይን ዪንቲ̇ ኢ̈ብ ኪ̈ቲንታ̇ንፔ̈ኒ ኢ ጋ̈ዚን ኦ̈ ፎታምፔ̈ኒ ዪንታ̇ባር ማ̈ቃ̇ር ፌ ቆፊን ኦ̈ዛ̈ዲ ጾ̈ሳ̇̇̈ዳ። 14 ዪንቲ̇ ዎይ ባዝ ጉንዲማካ̇ይዶርኬ ዋጫካ̇ይዶር ኦ̈ብቴ። 15 ዪ̈ዳሬ ኣባቦ ጌይን ዓ ዓታባሮ ኢ̈ት ዬሊቲ ጋርታ ዪንታ̇ ጋልዳ ማዛ ባዮ̇ ኣስ ማ̈ቃ̇ሪ ቤንታ̇ምፔ̈ንኬ ጌ̈ሽ ጾ̈ሳ̇ ናኣን ማ̈ቃ̇ሪ ዓኒ̇ ኣላሚን ጋልዳ ቤ̈ርስፌ̈ን ፎኣምፔ̈ኔ። 16 ዪ̈ዳር ማ̈ቂ̇ዛ̈ዲ ሼምፓ ኢማ̇ዝ ቃ̈ሊን ዪንቲ̇ ሚ̈ንር ኤ̈ጌይንዶ። ዪዚ ዪንቲ̇ ዪኖ̇ ዎቴጌይንዶ ቴ ዎንዳ ዎይ ታ ዳ̈ቡርሲንዳ ሜላ ኣታካ̇ዮኮታ̇ቦ ክርስቶ̈ሲ ዬይዝ ጋላስ ዪና̇ ታ̈ና ኦቲርሲ̇ዛ ማ̈ቃ̇̈ሬ። 17 ዪንቲ ኣማ̇ኒኖኮታ̇ቦ ጾ̈ሳ̇̇̈ቦ ሺሻ̈ዝ ዣ̈ርሺን ጋልዳኬ ዪንቲ̇ ኢ̈ብ ኦ̈ዝ ኦ̈ሲን ጋ̈ልዳ ቴ ሼምፒ̇ንዳሬ ጉ̈ጂንታር ዣ̈ርሻ ማ̈ቃ̇ርካሬ ቴ ዪንቲ ዎይንባራ ዎልኣ ኡፋይታ̇̈ሬ። 18 ማ ዪንታ̇ሬ ዪና̇ ኢዝፌ̈ን ታባር ዎልኣ ኡፋይቲ̇̈ሬ። ጢማ̈ቶስኬ ኣፍሮዲ̈ጣኬ 19 ታ̈ኒ ዪንታ̇ ባዝ ሲስካ̇ራ ኡፋይታ̇ምፔ̈ኒ ኤሊ̇ራ ጢማ̈ቶሳ ዪንታ̇ክ ሚሻንዳብ ዳንዳኣዚን ጎዳ ዬሱ̈ሳባራ ኣማ̇ኒንታ̇̈ሬ። 20 ዪንታ̇ ባዝ ቡ̈ዳፖ ቆፒ̇ዛ ጢማ̈ቶሳዶኬ ሜላ ኣሲ ኦ̈ናካር ታ̈ብ ባዬ። 21 ሜላን ፌ̈ብ ማ̈ቂ̇ዝ ባዝ ሙታ̇ ኮዪ̈ርዶኬ ዬሱ̈ስ ክርስቶ̈ሳ ባዝ ቆፒ̇ባ̈ሴ። 22 ጢማ̈ቶ̈ሲ ቴባራ ናእኬ ባ̈ባክፌ̈ኒ ማ̈ቃ̇ሪ ዎጛላ ኦ̈ሲን ኦ̈ኖንባራ ኢ ኣማ̇ኒንቲ̇ኖ ኣስ ማ̈ቃ̇ር ፌ̈ና ቤይሲኖን ዪንቲ̇ ዎይ ኤሪ̇̈ሬ። 23 ዪዚ ቴ ባዚ ኣብዝ ማ̈ቂ̇̈ርኮ ቴ ኤሪ̇ኖፖ ዓኒ ጢማ̈ቶ̈ሳ ኤሊ̇ራ ዪንታ̇̈ኮ ሚሻንዳብ ታስፋ ጋዲ̇ኔ። 24 ዪኒፓሬ ቴ ቴ ቆሚ̇ን ዪንታ̇ክ ኤሊ̇ር ሉካ̇ምፔ̈ን ጎዳ ታ̈ና ማ̈ዳ̇ዚን ቴ ኣማ̇ና̈ሬ። 25 ታ̈ቦ ኮሺ̇ዝ ባዝ ዎይባራ ታ̈ና ማ̈ዳንፔ̈ን ዪንቲ ታ̈ብ ሚሺኖ ቴባር ዎልኣ ኦ̈ዛ ማ ዎታ̇ዳራፌ̈ን ማ̈ቃ̇ር ታባር ዎልኣ ዋ̈ዪዛ ማ ዪንታ̇ባር ኪ̈ቲንቲ̇ዛ ቴ ኢሻ̈ ኣፍሮዲ̈ጣ ቴ ዪንታ̇ኮ ማ̈ሳር ሚሻንዳብ ኮሻ̇ዚን ታ̈ቦ ቤንቲ̇ኔ። 26 ቴ ዪንታ̇ኮ ኢያ ሚሻዚንዳ ኢ ዪንታ̇ ዎይን ቤቃ̈ንዳቦ ሹ̈ንቲኖኮታብኬ “ኢ ማ̈ኔ” ጌይኖን ዪንቲ̇ ሲስኪ̇ኖኮታቦ ኢ ጫና̇ቂንታዚንጊሼ̇። 27 ኪንባራ ኢ ማር ዓይቃቦ ዬላ̇ር ኣቲ̇ኔ፤ ዎቲናካሬ ጾ̈ሳ̇ ኢያ ማ̈ዲዴ፤ ኢያ ሙታ ጊዳካ̇ይዶን፥ ታ ጋልዳር ሜታ ጋልዳ ሜታ ጉጂንታ̇ካ̇ዮ̈ዲፌ̈ኒ ጾ̈ሲ ታ̈ናር ማ̈ዲ̇ኔ። 28 ዪዚ ዪ̈ኮታ̇ቦ ዪንቲ ኢያ ቤቃ̇ሪ ኡፋይታንፔ̈ንኬ ታ̈ናሬ ቴ ሙዲዳዚን ጋልዳፖ ሼምፓ̇ምፔ̈ን ቴ ዪንታ̇ኮ ኢያ ሚሺኔ። 29 ኢ ጎዳ ኣማ̇ኒኖ ኣስ ማ̈ቂ̇ኖንዲፌ̈ኒ ዪንቲ̇ ኢያ ኡፋይስባራ ሞ̈ኪ̇ ኤኪ̇ብቴ፤ ማ ኢፌ̈ኖ ኣሳ̈ን ዎይ ቦንቺ̈ብቴ። 30 ዪንቲ ታ̈ኮ ኡካ̇ር ታ̈ቦ ኦ̈ንዳቦ ዳንዳኣካዮን ዎይ ኢ ታ̈ብ ኩም̈ሬ ጋ̈ሪ ክርስቶ̈ሳ ኦ̈ሳቦ ፌ ሼምፒ̇ምቦ ሚጪንታካ̇ይዶር ዓይቃቦ ዬሊ̇ንዶን ኣቲ̇ኔ። |