ፊል 1 - ኦራ ጫ̈ቃ ማጻ̈ፋ1 ዬሱ̈ስ ክርስቶ̈ሳቦ ኣይላ ማ̈ቃ̇ር ኦ̈ዛን ታ ጳውሎ̈ሳ ጋልዳፔኬ ጢማ̈ቶ̈ሳ ጋልዳፖ፥ ፊልጲሶ̈ሳ ካታሚን ጋርታ ዬሱ̈ስ ክርስቶ̈ሳ ኣማ̇ኒኖ ኣሳንስቦ ዎይ፥ ማ ዎሳ ኬ̈ ጪጛ̈ሻንኬ ዳ̈ቆናንቦ፥ 2 ጾ̈ሳ̇ ኑ ባ̈ባ̈ዲኬ ኑ ጎዳ ዬሱ̈ስ ክርስቶ̈ሳ ኮሺ̇ቲንዲኬ ሳሪቲን ዪንታ̇ብ ማ̈ቆ̇። 3 ዪንታ̇ ባዚ ታ̈ክ ኤልቅ ጌይኖ ቃም̇ ዎይ ቴ ጾ̈ሳ̇ ጋላታ̈ሬ። 4-5 ቲ̈ኖ ቃሚ̇ንፖ ኤ̈ር ዓታ̇ቦ ዬሊ̇ዝ ዲራስ ታ̈ኒ ዎጛላ ኦ̈ሲን ኦ̈ምባራ ዪንታ̇ር ታባራ ኦ̈ኖኮታ̇ቦ፤ ቴ ዪንቲ ዎይንቦ ዎ̈ሳ̈ርዶራ ዎይ ጋላስ ኡፋይስባራ ዎ̈ሳ̇̈ሬ። 6 ዪኖ̇ ኮሽ ኦ̈ሲን ኦ̈ምፔ̈ን ዪንታ̇ባር ማ̈ቃ̇ር ዣማ̇ሪኖ ጾ̈ሳ̇̇̈ዲ ዬሱ̈ስ ክርስቶ̈ሲ ማ̈ቃ̇ር ዬይዝ ቃሚ̇ን ዬሊ̇ዝ ዲራስ ፎታዚን ቴ ኣማ̇ና̈ሬ። 7 ታ̈ኒ ቃሺ ኣ̈ል ዎምባራር ማ̈ቂ̇ን ቃቺንታ̇ናፖ ቲ̈ን ዎጛሊንኮን ኪን ቲሚርቲ̇ን ኣሳን ማቃ ቲሚርታ̇ባር ኢ̈ሲ ይሳካዮዲፌ̈ን ቴ ኢንታ̇ብ ሶ̈ላ ማሃምባርኬ ማ ኢዞ ሚ̈ን ኤሳ̇ንዳቦ ዋ̈ያምባራ ጾ̈ሲ ታ̈ብ ፌ ኮሺ̇ቲባር ኢሚ̇ኖ ኦ̈ሲንዶ ዪንቲ̇ ታባር ዎልኣ ኦ̈ኖኮታ̇ቦ ዪንቲ̇ ታ ቡ̈ዲን ጋርታ ዎ። ዪ̈ኮታ̇ቦ ቴ ዪንታ̇ ባዝ ዪኒ̇ፌ̈ኒ ቆፓ̇ዚንዳ ኪን። 8 ዬሱ̈ስ ክርስቶ̈ሲ ኑ̈ና ካኖ ካንንባራ ቴ ዪንታ̇ ቤቃ̇ንዳብ ዎዛርፌ̈ን ሹ̈ኒታ̈ርኮ ጾ̈ሳ̇ ታ̈ቦ ማ̈ርካ። 9 ዪንታ̇ ካንንዳ ጴች̇ ኤራባ̈ርኬ ቆ̈ፊ̈ባራ ቲ̈ኖንፖ ኣ̈ር ዲጫ̇ሙ̈ታ ሉካ̇ምፔ̈ን ቴ ጾ̈ሳ̇̇ ዎ̈ሳ̇̈ሬ። 10 ዪ̈ዳሬ ዪንቲ ዎይፖ ኮሽ̇ ባዚን ዎኒ̇ኮ ኤራምፔ̈ኒ፤ ክርስቶ̈ሲ ዬ̈ይዝ ዲራስ ጌ̈ሽ̇ኬ ማዛ ኣባክ ዪንታ̇ ጋልዳ ባዮ̇ ኣስ ማ̈ቃ̇ር ዶኣኒፌ̈ኒዬ። 11 ማ ጾ̈ሳ̇̇̈ቦ ቦንች̇ኬ ጋላታኬ ማ̈ቃ̇ምፔ̈ኒ ዪንቲ ዬሱ̈ስ ክርስቶ̈ሳ ዎልቃባር ቤንቲ̇ዝ ኮሻ̇ ኦ̈ሳባራ ኩማሪ ቤንታምፔ̈ኒዬ። ጳውሎ̈ሲ ቃቺንቲ̇ኖንዳ ዎጛላ ኦ̈ሲንዳ ሻካሙታ ሉካምፔ̈ን ዎታዴ 12 ቴ ኢሺንታ̈ን! ታ ጋልዳ ዬሊ̇ኖ ሜታን ዎጛላዲ ጌዳ ሻኪ̇ሙታ ሉካ̇ምፔ̈ኒ ዎቲኖን ዪንቲ ኤራንፔን ቴ ኮያ̈ሬ። 13 ዪኒ̇ባራ ታ̈ናር ቃቺንቲ̇ኖንዳ ክርስቶ̈ሳ ዎጛሊን ሳባ̇ኪኖን ጊሽ̇ ማ̈ቂ̇ኖን ካ̈ታ ኣ̈ሊን ና̈ጊዝ ዎታ̈̇ዳራ̈ንኬ ማ ኢና ዎ ሜላ ኣሳ̈ንር ዎይ ኤሪ̈ኔ። 14 ታ̈ኒ ቃ̈ቺንቲኖን ጎይባራ ዬሱ̈ሳ ኣማ̇ኒኖ ኣሳን ጋርታ̇ፖ ዎይሊንን ዎጛሊን ኢ̈ጫካ̇ይ ሶ̈ላንዳቦ ቲ̈ኖንፖ ሺ ሚ̈ጚንቲ̇ኔ። 15 ፔቲ̇ ፔቲ̇ ኣሳ̈ን ክርስቶ̈ሳ ዎጛሊን ቂና̈ታብ ሳባ̇ኪ̈ሬ፤ ዶካን “ታ̈ኒ ኦ̈ፖ ጉ̈ጻ̈ራ?” ጋ̈ሪ ሳባ̇ኪ̈ሬ ማ ሜላን ኪን ቡ̈ዳባራ ሳባኪ̇̈ሬ። 16 ታ̈ኒ ቃቺ ኣ̈ል ጌሊኖንዳ ዎጛላ ሳባ̇ኪኖኮታ̇ቦ ማ̈ቂ̇ኖን ኢንቲ̇ ኤሪዛኮታ̇ቦ፤ ዪን ኪን ቡ̈ዳባር ጾ̈ሳ̇ ዎጛሊን ሳባ̇ኪዛን ካንቦ ጌዪ ሳባ̇ኪ̈ሬ። 17 ዎቲናካር ሜላ̈ን ክርስቶ̈ሳ ቃ̈ሊን ዎቢ̇ሳር ሳባ̇ኪ̇ዛን ኮሽ̇ ቆ̈ፊባር ጊዳካይዶን ፌ̈ና ካዛኮታ̇ብኬ ቴ ቃቺንቲ̇ኖ ቃ̈ሺን ጋልዳ ሜላ ሜታ ታ̈ብ ጉጃ̇ንዳቦ ኮያር ዎቲ̈ሬ። 18 ዓት ሜቲን ኣባ? ማቃባራር ማ̈ቂ̇ን ኪንባራር ማ̈ቂ̇ን ዎይ ጎይባራ ዎጛላ ሳባ̇ኪንቲ̇ዛኮታቦ ታ̈ና ኡፋይሲ̈ሬ። 19 ማ ሜላ ታ̈ና ኡፋ̈ይሳዚንዳ፤ ዪንቲ ታ̈ብ ዎ̈ሲ̇ኖ ዎ̈ሳባርኬ ዬሱ̈ስ ክርስቶ̈ሳ ኣያ̇ና ጋልዳፖ ቤንቲ̇ዝ ማ̈ዲባራ፥ ታ̈ና ዬሊ̇ኖ ባዚን ቴ ቴ ቃሺን ጋርታ̇ፖ ኬስ̇ካምፔ̈ን ታ̈ና ማ̈ዳ̇̈ዚን ቴ ኤሪዛኮታ̇ቦ። 20 ታ̈ኒ ውርሳ ዬልቃባሴ ጌያ ታስፋ̈ ጋዳ̇ር ና̈ጋ̈ሬ፤ ዎቲናካሬ ክርስቶ̈ሲ ዓኒ̇ፖ ቲ̈ን ታ ኣሲቲን ጋልዳ ቦንቺንቲ̇ኖንዲፌ̈ኒ ዓታ̇ር ማ̈ቂ̇ን ቴ ሼምፓባር ዶኢናር ዓይቂ̇ናካር ኢ ታጋልዳ ቦንቺንቲ̈ሬ ጌያ ኢ̈ጫካይ ሶ̈ላ̈ሬ። 21 ዪዚ ታ̈ቦ ሼምፓ̇ባር ዶ̈ኢ̈ሬ ጋ̈ዚንዳ ክርስ̇ቶሳባር ዶኣዚንዶ፤ ዓይቃ ጋ̈ዚንዳር ማቂ̇ን ታ̈ብ ኮሽዶኬ ኢ̈ት ጊዳካ̇ዬ። 22 ዓኒ̇ፖ ጌዳ ቴ ሼምፓ̇ባር ዶኣ̈ርኮ ጴች ኦ̈̈ሬ፤ ማ̈ቂ̇ናካሬ ዓይቃ ጋርታፔኬ ዶኢ ጋርታፖ ዎኖ̇ ቴ ዶሳ̈ርኮ ቴ ኤራባሴ። 23 ታ̈ኒ ዪን ና̈ምኢ ቆፋን ጊዲ̇ን ጋርታ ዎ፤ ክርስቶ̈ሳባር ዶኣዚን ዎይፖ ሺ ማ̈ቂ̇ኖኮታ̇ቦ ዓንዳፖ̇ ሉካ̇ራ ኢባር ዶኣዚን ኮያሬ። 24 ዎቲናካሬ ታ̈ኒ ሼምፓ̇ባር ዶኣዚንዳ ዪንታ̇ብ ሺ ኮሼ። 25 ዪና̇ ኪን ማ̈ቂ̇ኖን ቴ ኣማ̇ኒኖኮታ̇ቦ ዓይቃ ጋልዳፖ ቡ̈ታ̇ራ፥ ዪንታ̇ ኣማ̇ኒን ሚ̈ጛምፔ̈ንኬ ዪንቲ ኡፋይታ̇ምፔ̈ኒ ቴ ዓይቃካ̇ይ ዪንቲ ዎይንባራ ዶኣዚን ቴ ኤሪኔ። 26 ታ̈ኒ ዪንታ̇ክ ማ̈ቃ̇ራ ሉኪ̇ኖ ጋላሲ ቴ ጊሻ̇ቦ ዪንታ̇ ኡፋይሲ̇ንዳ ዬሱ̈ስ ክርስቶ̈ሳባራ ዎይላ̈ሬ። 27 ዪዚ ዎይባዛ̈ፖ ሺ ዪንቲ ዶ̈ኣዝ ዶኢንዳ ዬሱ̈ስ ክርስቶ̈ሳ ዎጛሊን ቦንቺሺዛ ማ̈ቆ̇ጋ̈ቤ፤ ዪና̇ሬ ታ̈ኒ ዪንታ̇̈ኮ ሉካ̇ራር ማ̈ቆ ማ ጎት ዎዶራር ዪንቲ ፔቲ̇ ቡ̈ዳባር ሚ̈ጛር ኤቂ̇ኖንዲኬ ማ ዎል ፔታ̇ን ማ̈ቃ̇̈ሪ ዎጛላ ቃ̈ሊን ኪንንቦ ቡቲታዚን ቴ ሲስካ̈ሬ። 28 ዪንቲ ዪንታ̇ ታቆ̈ሚዛንቦ ኢ̈ጫፒ̇ቴ፤ ዪና̇ ኢንቲ ያዚንዶ ማ ዪንቲ̇ ጾ̈ሳ̇ባር ማ̈ቃ̇ር ፋጻዚንዶ ኤርሲዝ ማላ̇። 29 ክርስቶ̈ሳ̈ቦ ኦ̈ምፔ̈ን ዪንቲ ጼይጊንቲ̇ኖ̈ንዳ ዪንቲ̇ ኢያ ኣማ̇ናምፔ̈ን ሙታ̇ ጊዳካ̇ይዶን ዪንቲ̇ ኢያ ኣማ̇ኒኖኮታ̇ቦ ዪንታ̇ ጋልዳ ዬይዝ ሜታ ዎይ ኤካ̇ምፔ̈ኒዬ። 30 ዪንቲ̇ ዓት ታ̈ና ዬሊ̇ኖ ሜቲን ጊዳ̇ ታባር ዋ̈ዪሙታ ዎ፤ ዪና̇ ሜቲንዳ ዓኒፖ ቲ̈ን ታ̈ና ዬሊ̇ን ዪንቲ̇ ቤቂ̇ኖንዶ፤ ዓታ̇ር ታ̈ኒ ሜቲን ኢዝ ጊዳ̇ ዎን ዪንቲ̇ ሲስኪሙታ̇ ዎ። |