ማ̈ርቆ̈ሳ 1 - ኦራ ጫ̈ቃ ማጻ̈ፋ

ጻማ̇ቂዛ ዋ̈ኒ̇ሲ ጬ̈ቂ̇ኖ ጬ̈ቃ

¹ ጾ̈ሳ̇̇ ናኣ ዬሱ̈ስ ክርስቶ̈ሳ ዎጛላ ዣማ̇ሪዛ ዪዜ፦

^2-3 ናባ ኢሳ̈ሳ ማጻ̈ፋ ጋልዳ፥ “ታ̈ኒ ኔ ጎይሚን ኮሺንቺ̇ዝ ቴ ኪ̈ታ ኣስ ኔ ቲ̈ን ሚሻንዳ̇። ‘ጎዳ̈ብ ጎይን ኮሺንቺ̇ብቴ̇፥ ኢ ዬ̇ዚን ጌ̈ሺ̇ብቴ̇’ ዪዝ ጌዪ ጬ̈ቂ̇ዝ ኣስ ቆ̈ ባራሃ ጋርታ̇ ሲስኪንቲ̇̈ሬ” ዪዝ ጋ̈ር ጻ̈ፊንቲ̇ኔ።

⁴ ዪ̈ኮታ̇ቦ ዋ̈ኒ̇ሲ ጻማ̇ቂ ሙታ̇ ኣሳ̈ኮ “ዪንታ̇ ናጋራ ጾ̈ሲ̇ ኣቶ̇ ጋ̈ምፔ̈ኒ ማ̈ሪቲ ጌላር ጻማ̇ቂንቲ̇ብቴ” ዪዝ ጌዪ ባራሃ ጋርስባር ጬ̈ቂ̇ ሙታ̇ ዬይዴ።

⁵ ዪሁዳ ጋዳ̇ ዎ ኣሳ ዎይ፥ ዬሩሳ̈ላም ኣሳ̈ዳር ዎይ ኬስካ̇ሪ ፌ ናጋራ ኣሳ ቲ̈ን ቡ̈ጺ ሙታ̇ ዮርዳ̈ኖ̈ስ ዋ̈ን ጋርታ̇ ዋ̈ኒ̇ሳ ኩሽታ̇ ጻማ̇ቂንቲ̇ዴ።

⁶ ዋ̈ኒ̇ሲ ማኢዛ̈ዲ ጊማ̈ል ጌይዝ ሜሃ ኢሲንባር ዳዲ̇ኖ ኣፊላ፥ ፌ ባንታባራ ጋማ̇ ጻ̈ዚ ጊጺ̇ሪ፤ ኢ ሞ̈ዚንዳሬ ቦ̈ላኬ ኤቲ ኤ̈ስኬ።

⁷ ኢ ጌይርዶሪ፥ “ቴ ዪርክ ጋ̈ራ ኢ ጫ̈ሚ̇ን ቢላ̇ንዳብ ዳንዳኣካ̇ዮ፥ ታ̈ፖ̇ ሺዛ ጋስ ዬይሬ፥

⁸ ቴ ዪንታ̇ ዋ̈ባር ጻማ̇ቃሬ፤ ኢ ዪንታ̇ ጌ̈ሻ̇ ኣያ̇ናባር ጻማ̇ቂ̈ሬ” ጌይዴ።

ዬሱ̈ሲ ጻማ̇ቂንቲ̇ኖንዲኬ ሴ̈ጣናባር ፋታ̇ኒንቲ̇ኖንዲክ

⁹ ዪና̇ ኢዝ ኬሊ̇ንባር ዬሱ̈ሲ ጋሊላ ጋዳ̇ ዎ ና̈ዝሬ̈ት ጋ̈ዝ ካታሚን ጋርታፖ ዬ̈ሪ ዮርዳ̈ኖ̈ስ ዋ̈ን ጋርታ̇ ዋ̈ኒ̇ሳ ኩሽታ̇ ጻማ̇ቂንቲዴ።

¹⁰ ኢ ዋ̈ን ጋርታ̇ፖ̇ ቢርት ኬስካ̇ዚምባራ ኣፋ ጪላ ፊርቂ̇ንታ̇ሪ ጌ̈ሻ̇ ኣያ̇ና ዶላፌ̈ን ማይጻር ዬሱሳ ጋልዳ ሶ̈ባምባር ቤቂ̇ዴ።

¹¹ ኢናፖ̇ “ቴ ኔባር ኡፋይቲ̇ዛ ታ ካዝ ናኣ ኔ̈ና” ዪዝ ጌይዝ ጊርሲ ኣፋፖ̇ ሲስኪንቲ̇ዴ።

¹² ኢናፖ̇ ጌ̈ሻ̇ ኣያ̇ና ኤሊ̇ባር ኢያ ቲ̈ናር ባራሃ ኤ̈ጚዴ።

¹³ ሴ̈ጣና ኢያ ናጋራ ኦ̈ሲሲ̈ሬ ጌዪ ፋታ̇ናምባ̇ር ሙታ፥ ኦይዲ̇ ታጳ ቃም ማ̈ታ ባዝባራር ዎልኣ ኢና ጋም̇ኢዴ፤ ኪ̈ታንቻ̇ንር ኢ̈ብ ዎ̈ሲንቲ̇ ኢያ ማ̈ዲ̇ዴ።

ዬሱ̈ሲ ሞላ ኤ̈̇ዝ ኦይዲ̇ ኣሳን ጼይጊዴ

¹⁴ ዋ̈ኒ̇ሲ ቃሺ ኣ̈ል ጌሊኖፖ̇ ዓኒ፥ ዬሱ̈ሲ ጾ̈ሳ̇̇ ዎጛላ ጬ̈ቂ̇ ኬዳ̇ ጋሊላ ሉካ̇ሪ፥

¹⁵ “ኬላ̇ ዬሊ̇ኔ፤ ጾ̈ሳ̇̇ ካ̈ቲቲ ኡኪ̇ኔ፤ ማ̈ሪቲ ጌሊብቴ፤ ዎጛላባር ኣማ̇ኒብቴ̇” ጌዪ ሳባ̇ኪዴ።

¹⁶ ዬሱ̈ሲ ጋሊላ ባሃ̈ሪን ላፊንባር ኣ̈ርዶ̈ር ሲሞ̈ናኬ ኢ ኢሻ ኢንድዲራ̈ሳክ ሞላ ኤ̈̇ዝ ኣስ ማ̈ቂ̇ኖኮታ̇ቦ፥ ፌ ማግላባን ባሃ̈ሪን ጋርታ ሚሻምባ̇ር ቤቂ̇ዴ።

¹⁷ ዬሱ̈ሳር ኢንታ̇ኮ “ቴ ዎሂን ዬ̇ብቴ፥ ዪንቲ̇ ሞላ ኤ̈̇ዚንዲፌ̈ኒ ቴ ዪንታ̇ ታ̈ብ ኣስ ሺሺዝ ኣስ ማሃንዳ̇” ዪዝ ጌይን፥

¹⁸ ኢንታ̇ር ኤሊ̇ር ፌ ማግላባን ኣሻ̇ር ኢ ዎሂን ዬ̇ዴ።

¹⁹ ኢናፖ̇ ጊላ̇ ጌዳ ኣ̈̇ሪ፥ ዛብዶ̈ሳ ናኣ ዓይቆ̈ባኬ ኢሻ ዋ̈ኒ̇ሳኬ ዎልኣ ጎጛ ጋርታ̇ ዶኣር ፌ ማግላባን ኮሺንቻ̇ምባር ቤቃ̇ሪ፥

²⁰ ኤሊ̇ር ኢንታ ጼይጊዴ። ኢንታ̇ር ፌ ባ̈ባ ዛብዶ̈ሳ ኦ̈ዝ ኣሳንባር ጎጚን ጋርታ̇ ኢና ኣሻ̇ሪ ኢ ዎሂን ሉኪ̇ዴ።

ዬሱ̈ሲ ኢ̈ታ ኣያ̇ና ኤ̈̇ኖ ና̈ሳ ፋዴ

²¹ ኢንቲ̇ ኢናፖ̇ ዲንዳ̇ሪ ቂፊርና̈ሆ̈ማ ጋ̈ዝ ካታሚን ጋርታ̇ ሉኪ̇ዴ። ዬሱ̈ሳር ሳምባታ ጋላስ ኣይሁዳን ዎ̈ሳ ኬ̈ ጋርታ̇ ጌላሪ ታማ̈ርሲ ኤ̈̇ዴ።

²² ኢ ታማ̈ርሳዚንዳሬ ሙ̈ሳ ሂጋ̇ ታማ̈ርሲዝ ኣሳንፌ̈ን ጊዳካ̇ይዶ̈ን ጴች ኣላቃፌ̈ኒ ታማ̈ርሲን ሲስኪ̇ኖ ዎርዣ ዎይ ኢ ቲሚርታ̇ባር ዎይሊን ጋራ̇ሚንቲ̇ዴ።

²³ ኢና ኣይሁዳን ዎ̈ሳ ኬ̈ን ጋርታ̇ ኢ̈ታ ኣያ̇ናባር ኤ̈ንቲ̇ኖ ፔቲ̇ ኣስ ዎዶ̈ሪ፥

²⁴ “ኣ̈ን ና̈ዝሬ̈ት ዬሱ̈ሶ ኔ ኣብዝ ኮያር ኑ̈ክ ዬይና? ኑ̈ና ይሳ̇ንዳብ ዬይና? ኔ ኦ̈ናኮ ቴ ኔ̈ና ኤራ̈ርሽዋ፤ ኔ̈ኒ ጾ̈ሳ̇̇ ቲ̈ናፖ ዬይኖ ጌ̈ሻ̇̈ዳባያ!” ጋ̈ር ዉይሲዴ።

²⁵ ዬሱ̈ሳር ኢ̈ታ ኣያ̇ና̈ዳ “ዚምዶኣር ኢ̈ ጋልዳፖ̇ ኬስካ̇ር ሉካ̇ቤ” ጋ̈ር ቆዲ̇ዴ።

²⁶ ኢ̈ታ ኣያ̇ና̈ዳር ና̈ሳ ቶጛር ዎይሊን ቃኪቲሲኖፖ̇ ዓኒ ዉ̈ይሳር ኢ ጋልዳፖ ኬስኪ̇ዴ።

²⁷ ዎርዣ ዎይ ጋራ̇ሚንታ̇ር ጌዪ “ኑ ዓ̈ ኣቤ ጋ̈ኔ? ፌ ዎልቃባር ኢ̈ታ ኣያ̇ናን ኪ̈ቲን ኢንቲ ኢ̈ብ ኪቲንቲ̈ሪ! ዪ̈ዲፌ̈ኖ ኦራ ቲሚርታ ባያ?” ጋ̈ር ዎልዎልኣ ሶ̈ሊንቲ̇ዴ።

²⁸ ኢ ኦ̈ኖ ጴች ኦ̈ሳዲ ጋሊላ ጋዳ̇ ዎ ቤሳ̇ን ዎይን ጋልዳ ኤሊ̇ባር ሲስኪንቲዴ።

ዬሱ̈ሲ ማኖ ኣስ ዎይሊን ፋዴ

²⁹ ዬሱ̈ሲ ኣይሁዳን ዎ̈ሳ ኬ̈ ጋርታ̇ፖ̇ ኬስኪ̇ኖንዲፌ̈ኒ፥ ዓይቆ̈ባባርኬ ዋ̈ኒ̇ሳባር ዎል ማ̈ቃ̇ሪ ሲሞ̈ናኬ ኢንዲራ̈ሳ ኣ̈ል ጌሊዴ።

³⁰ ሲሞ̈ና ባይሲማ ጋላ̇ባር ሶ̈ላር ማጋራ ዬሊን ሱርቂ̇ኖን ዬሱ̈ሳብ ሶ̈ሊዴ።

³¹ ኢያ̈ሬ ኢዛ ሱርቂኖ ቤሲ̇ን ጋል ሉካ̇ሪ ኢዝ ኩሺን ኤ̈̇ ዲንን፥ ጋላ̇ባር ሶ̈ሊዛ ኣቲ̇ን ዲንዳ̇ራ ኢንታብ ቡና ባሽካ̇ ዎ̈ሲን ኤ̈̇ዴ።

³² ሳ̈ዚ ቃሚ̇ን ኦማ̈ ኣዋ̈ፊ ጌሊኖፖ ዓኒ፥ ኢና ቡጊድባር ዎ ኣሳን ማኖ̈ንኬ ኢ̈ታ ኣያ̇ናባር ኤ̈ንቲ̇ኖ ኣሳን ኢ̈ክ ኤሄይዴ።

³³ ካታሚን ጋርታ ዎ ዎርዣ ዎይ ኢንታ ኣ̈ል ካራ ጋልዳ ሺ̈ቂን፥

³⁴ ኢ ዱማ ዱማ ዓርጋባር ማኖ ዎይሊን ኣስ ፋዴ፥ ኢ̈ታ ኣያ̇ናር ዎይሊን ኬሲ̇ዴ። ኢ̈ታ ኣያ̇ናንር ዬሱ̈ሳ ኤሪዛኮታ̇ቦ፥ ኣባካር ሶ̈ላካ̇ይፌ̈ን ኢ ኢንታ ካዪዴ።

ዬሱ̈ሲ ጌ̈ማ ቤስ̇ ኣ̈̇ር ዎ̈ሲዴ

³⁵ ዬሱ̈ሲ ጌ̈ሽ ቃም ጋማ ዳርኣካ̇ይዶ̈ን ዲንዳ̇ር ኣ̈ላፖ̇ ኬስካር ፔቲ̇ ጌ̈ማ ቤስ̇ ሉካ̇ሪ ዎ̈ሳ ኤ̈̇ዴ።

³⁶ ሲሞ̈ኒ ፌ ላጋ̇ንባር ዎል ማ̈ቃሪ ኢ ዎሂን ሉካ̇ር ኢያ ኮዪ ኤ̈̇ዴ።

³⁷ ኢያ ኮዪ ዲጛሪ ኢ̈ኮ “ኣሲ ዎይ ኔ̈ና ኮዪርሽዋ” ጌይዴ።

³⁸ ኢ ጌይርዶ̈ሪ “ዓንዳፖ̇ ዲንዳ̇ሪ ጌዳ ኡክ ዎ ቤሳ̇ን ሉኪ̇ስቶ፥ ቴ ኢና ታማ̈ርሳንዳ፥ ቴ ዬይኖንዳሬ ኢዝቦ ባያ?” ጌይዴ።

³⁹ ዪ̈ኮታ̇ቦ ኣይሁዳን ዎ̈ሳ ኬ̈ ጋርታ̇ ታማ̇ርሲሙታ̇ኬ ኢ̈ታ ኣያ̇ና ኬሲ̇ ሙታ̇ ጋሊላ ጋዲን ዎይ̈ን ጋርታ ቢሪንቲ̇ ኤ̈̇ዴ።

ዬሱ̈ሲ ፔቲ̇ ሹያ ባሮ ኣስ ፋዴ

⁴⁰ ሹያባሮ ፔቲ̇ ኣሲ ዬሱ̈ሳ ቲ̈ን ዬ̈ር ቡቂንታ̇ሪ “ኔ ታ̈ና ማ̈ዳንዳብ ኮያዶኮ፥ ታ̈ና ፋንዳብ ዳንዳኣ̈ርሽዋ” ጋ̈ር ጌሺዴ።

⁴¹ ዬሱ̈ሳር ኢ̈ብ ሚጪንታ̇ሪ፥ ፌ ኩሺን ኢ ጋልዳ ጋዲኖፖ ዓኒ “ቴ ኔ̈ና ፋንዳብ ኮያ̈ሬ ፋጻቤ” ጌይን፥

⁴² ና̈ሳ ፌ ሹዪምፖ ኤሊ̇ባር ፋጺዴ።

⁴³ ዬሱ̈ሲ ና̈ሳ ሚሺ̈ርዶ̈ሪ ኢ̈ብ ሚ̈ን ሶ̈ሊ̈ርዶር ጌዪ፥

⁴⁴ “ኔ ዓርጊን ዓኒ̇ ጋልዳፖ̇ ፋጺኖን ኢንታ̇ቦ ማርካ̇ ማ̈ቃ̇ምፔ̇̈ኒ፥ ኔ ኔ̈ና ቄ̈ሳብ ቤይሳቤ፤ ኔ ፋጺኖምቦ̇ ሙ̈ሶ ኪ̈ቲኖን ዣ̈ርሺን ሺ̈ሻብዶኬ ኦ̈ባካር ፔቲ̇ ባዝ ሶ̈ላካይፌ̈ኒ ና̈ጊንታቤ” ጌይዴ።

⁴⁵ ና̈ሳ̈ዲ ጌይኖን ኣሻ̇ሪ ሉኪ̇ኖ ቤስ̇ ጋልዳ ዎይ ሶ̈ሊ ኤ̈̇ዴ። ዪ̈ኮታ̇ቦ ዬሱ̈ሲ ዎይዲካር ካታማ ጋርታ̇ ኣሲ ኢያ ቤቃ̇ምባር ጌላንዳ̇ብ ዳንዳኣካ̇ዮኮታ̇ቦ ካታማ ጋርታፖ̇ ኬስካ̇ሪ ጌ̈ማ ቤስ̇ ዶኢ ኤ̈̇ዴ። ማ̈ቂ̇ናካሬ ኣሳ̈ዲ ዎይ ቤሳ̇̈ፖ ኢ̈ክ ዬንቲ̇ን ኣሻካ̇ዬ።