ሉቃ̈ሳ 20 - ኦራ ጫ̈ቃ ማጻ̈ፋዬሱ̈ሲ ኣ ሲልጣ̈ናባር ኦ̈̈ርኮ̇ ኣሳን ኢያ ኦይጪ̇ዴ ማ̈ቶ̈ሳ 21፡23-27 ፤ ማ̈ርቆ̈ሳ 11፡27-33 1 ፔቲ̇ ጋላስ ዬሱ̈ሲ ጾ̈ሳ̇̇ ኬ̈ ጋርታ̇ ዎርዣ ታማ̈ርሲ̇ ዎጛላ ኢንታ̇ብ ሳባ̇ካምባ̇ራ ቄ̈ሳ ኣላቃን፥ ሙ̈ሳ ሂጋ̇ ታማ̈ርሲዛንኬ ጋድ ጪጛሻን ዎል ሺ̈ቃር ኢ̈ክ ዬይዴ። 2 ኢንታ̇ር ኢ̈ኮ “ኔ ባዝ ዓን ኣ ሲልጣ̈ናባር ኦ̈̈ራ? ኑ̈ብ ሶ̈ላቤ። ኢዛ ዓና̇ ሲልጣ̈ኒን ኔ̈ብ ኢሚ̇ኖ ኢ ኦ̈ኖ” ጋ̈ር ኦይጪ̇ዴ። 3 ዬሱ̈ሲ ኢንታ̇ኮ “ቴ ማ ዪንታ̇ ፔቲ̇ ባዝ ኦይጫ̇ስቶ̇ ዪንቲ̇ ታ̈ብ ኢዞ ማሂንቴ፥ 4 ዋ̈ኒ̇ሲ ኣስ ጻማ̇ቃምፔ̈ኒ ኢ̈ብ ሲልጣ̈ና ኢሚ̇ኖ ኦ̈ኖ? ጾ̈ስ̇ቤ̈ ኣሳ? 5 ኢንታ̇ር ዎል ዎልኣ ዞሪንታ̇ር ጌዪ፥ ኑ ‘ኣፋ ጾ̈ሳ̇̇̈ፖ̇’ ጌዬጌይን፥ ዓት ዪ̈ዶኮ ‘ኣባብ ዪንቲ̇ ኢ̈ኮን ኣማ̇ኒባ̈ሳ?’ ጌይዝዳ̇። 6 ‘ኣሳፖ̇’ ጌዬጌይንዶ̇፥ ዎርዣ ዎይ ዋ̈ኒ̇ሲ ኪንባር ናቢ ማ̈ቂ̇ኖን ኣማ̇ኒዛኮታ̇ቦ ኑ̈ና ሹችባር ቆጺ̇ ዎ̈ሬ” ጌይዴ። 7 ዪ̈ኮታ̇ቦ “ጻማ̇ቃዝ ሲልጣ̈ኒን ኢ̈ብ ኦ ኢሚ̇ኖኮ ኑ ኤሪባ̈ሴ” ጋ̈ሪ ማሂዴ። 8 ዬሱ̈ሲ ኢንታ̇ኮ “ዓት ዪ̈ዶኮ ታ̈ናር ኣ ሲልጣ̈ናባር ዪን ፌ̈ኖ ባዛን ኦ̈̈ርኮ̇ ዪንታ̇ብ ሶ̈ላባሴ” ጌይዴ። ዎይና ታ̈ኪልቲ̇ን ጋርታ̇ ኦ̈ዝ ኣሳን ሚሳ̇̈ሊ ማ̈ቶ̈ሳ 21፡33-46 ፤ ማ̈ርቆ̈ሳ 12፡1-12 9 ኢናፖ̇ ዓኒ ዬሱ̈ሲ ዪኖ̇ ሚሳ̇̈ሊን ዎርዣ̈ቦ ሶ̈ሊ̈ርዶሪ “ፔቲ̇ ና̈ሲዶ̈ር ዎይና ታ̈ኪልታ̇ ቶካ̇ሪ ኦ̈ዝ ኣሳቦ ኪራያ ኢማ̇ሪ ሜላ ጋዳ̇ ሉካ̇ሪ ዎይሊን ኬል̇ ጋምኢ̇ዴ። 10 ዎይና ካጺ̇ዝ ኬሊ̇ ዬሊ̇ን ዎይና ኣ̈ፊን ጋርታ̇ፖ̇ ኢያ ዬላ̇ዚን ፌ̈ብ ሚሾ ጋ̈ሪ ላ̈̈ዲ ፔቲ̇ ኣይላ ዪን ኣሳንኮ ሚሺን ኣሳን ዪ ኣይላ ኤ̈̇ ቡኪ̇ ቡካ̇ር ሜላ̇ ማሂ ሚሺዴ። 11 ዓታ̇ር ኢናፖ̇ ዎሃ ሜላ ኣይላ ፔታ̇ን ኢንታ̇ክ ሚሺን ኢንቲ̇ ኢያ ኤ̈̇ር ቡኪ̇ ቡካ̇ር ዬ̈ሊ̇ር ሜላ̇ ማሂ ሚሺዴ። 12 ዓታ̇ር ላ̈̈ዲ ዓይዚ̇ ኣይላ ኢንታ̇ክ ሚሺን ኢንቲ̇ ኢያ ቡኪ̇ ቆ̈ቃ̇ር ታ̈ኪልቲ̇ምፖ̇ ቡጊድ ኬሳ̇ር ቶጚዴ። 13 ኢናፖ̇ ዎይን ታ̈ኪልቲ̇ን ላ̈ዲ ‘ዪዚ ቴ ዎዛርቲ̇ን ታብ ኮሻ̇? ቴ ካዝ ናኣ ኢንታ̇ክ ሚሻንዳ ኢያ ዎይ ኢንቲ ቦንቺ̇ስታ̇’ ጌይዴ። 14 ዎይኒን ና̈ጊዝ ኣሳን ናኣ ቤቃ̇ሪ ‘ዓ ኢ ቤሲ̇ን ኤኪ̇ዛ̈ዲሽዋ፤ ዓይ ዬብቴ̇ ቤሲ̇ን ኑ̈ብ ኣታ̇ምፔ̈ኒ ኑ ኢያ ዎስቶ’ ጋ̈ር ዎልኣ ዞሪንቲ̇ዴ። 15 ኢናፖ̇ ናኣ ዎይና ታ̈ኪልቲ̇ን ቤሲ̇ን ጋርታ̇ፖ̇ ጌዳ ቡጊድ ኬሳ̇ር ዎዴ። ዪዚ ዎይና ታ̈ኪልቲ̇ን ላ̈ዲ ኣሳን ዪን ኣብዝ ዎቲዛ ዪንታ̇ክ ማይጺ̈ራ? 16 ላ̈ ዬ̈ሪ ዪን ኣሳን ዎ̈ሬ። ዎይና ታ̈ኪልቲ̇ንዳሬ ሜላንቦ ኢሚ̇̈ሬ” ጌይዴ። ዎርዣ ዪ ሲስካ̇ሪ “ዪ̈ዲፌ̈ኖ ባዝ ጾ̈ሲ̇ ቴቆ̇” ጌይዴ። 17 ዬሱ̈ሲ ኢንታ̇ ቤቃ̇ሪ “ዓት ዪ̈ዶኮ ‘ሹች ኬ̈ ኬ̈ጺ̇ዛን ሌቃ̇ር ኣሺ̇ኖ ሹች ኢዛ ኬ̈ምቦ̇ ዎይ̈ፖ̇ ኮዪንቲ̇ዛ ማ̈ቃ̇ዴ’ ዪዝ ጌዪ ጻ̈ፊንቲ̇ኖ̈ን ኢዝ ቢርሺቺ̇ን ኣብዛ? 18 “ዪና̇ ሹቺ̇ን ጋልዳ ኬዲ̇ዝ ኣሲ ዎይ ሜቂ̇̈ሬ፤ ሹቺ̇ን ኢ ጋልዳ ኬዲ̇ዝ ኣሲ ዎይ ዳ̈ጺንቲ̇̈ሬ” ጌይዴ። 19 ሙ̈ሳ ሂጋ̇ ታማ̈ርሲዛንኬ ቄ̈ሳ ኣላቃን ዬሱ̈ሲ ዪኖ̇ ሶ̈ሊኖ ሚሳ̇̈ሊን ኢንታ̇ ጋልዳ ማ̈ቂ̇ኖን ኤሪኖኮታ̇ቦ ዪና̇ ኢዝ ሳኣ̈ቲንባር ኢያ ኤ̈̇ንዳብ ኮዪንዶ̈ን ዎርዣ̈ብ ኢ̈ጫ̇ር ኣሺ̇ዴ። ሮማ ካ̈ታ ቄ̈ሳ̈ራብ ጊ̈ር ጊ̈ራንዳ̇ ኮሺ̇̈ርቤ ኮሺባ̈ሳ? ማ̈ቶ̈ሳ 22፡15-22 ፤ ማ̈ርቆ̈ሳ 12፡13-17 20 ኢንቲ̇ ዬሱ̈ሳ ኤ̈̇ ጋዲን ኣቂሲዝ ጋዣቦ ኣ̈ ኢማ̇ንዳ̇ብ ኮያሪ ኢ ሶ̈ላዝ ሶ̈ሊንባር ኢያ ኮራምፔ̇̈ን ጋ̈ሪ ኮሽ ኣስ ማይጺዝ ሜ̈ዛ ኣሳን ኢ̈ክ ሚሺዴ። 21 ኢንታ̇ር ዬሱ̈ሳክ ዬ̈ሪ “ኣስታማ̈ራ̈ዶ! ኔ̈ኒ ኪን ባዝ ሶ̈ላዚንዲኬ ታማ̈ርሳ̇ዚን ዪኒ̇ፓ̇ር ኣ̈̇ር ጾ̈ሳ̇̇̈ኮ ጎይን ኪን ታማ̈ርሳ̇ዚንዲኬ ኔ ኦ̈ናካር ፔታ̇ና ዪርክ ዎታ ፔታ̇ና ሾክ ዎታር ቤቃ̇ባሶን ኑ ኤሪ̈ሬ። 22 ዓት ኑ ኔ̈ና ኦይጫ̇ዚንዳ̇ ኑ ሂጊ̇ን ጋልዳ̇ ቄ̈ሳ̈ራብ ጊ̈ራ ጊ̈ራንዳብ ኮሺ̈ርቤ ኮሺባ̈ሳ?” ጌዪ ኦይጪ̇ዴ። 23 ዬሱ̈ሲ ኢንታ̇ ኢ̈ታ ቆፊን ኤራሪ ኢንታ̇ኮ፥ 24 “ዎይዲቴ ዪንቲ̇ ታ̈ብ ፔቲ̇ ሳንቲ̇ ኬሲ̇ ቤይሲብቴ̇፥ ኢዝ ጋልዳ ዎ ሚሲላ̈ዲክ ሱምዲክ ኦያ̇?” ጌይዴ። 25 ኢንታ̇ር “ቄ̈ሳ̈ራዬ” ጋር ማሂዴ። “ዪ̈ዲኮ ቄ̈ሳ̈ርኮን ቄ̈ሳ̈ራቦ ጾ̈ሳ̇̇̈ኮን ጾ̈ሳ̇̇̈ብ ኢሚ̇ብቴ̇” ጌይዴ። 26 ዪና̇ ኢ ሶ̈ሊኖ ሶ̈ሊንባር ኣሳ ቲ̈ን ኢያ ኮራንዳ̇ብ ዳንዳኣካ̇ዬ። ኢ ኢንታ̇ብ ማሂኖ ማልሲንባር ጋራ̇ሚንታ̇ር ዚምዶኢዴ። ዓይቃ ጋርታ̇ፖ̇ ዲንዲዝ ጎይ ኦይጪ̇ኖ ኦይች ማ̈ቶ̈ሳ 22፡23-33 ፤ ማ̈ርቆ̈ሳ 12፡18-27 27 ዓይቂ̇ኖ ኣሲ ዲንዲ̇ባ̈ሴ ዪዝ ጌይዝ ፔቲ̇ ፔቲ̇ ሳዱቃን ዬሱ̈ሳክ ዬ̈ር ኢያ ኦይጪ̇̈ርዶሪ፥ 28 “ኣስታማ̈ራ̈ዶ! ሙ̈ሳ ኑ̈ብ ጻ̈ፊ̈ርዶሪ ‘ፔቲ̇ ኣሲ ማጫ̇ ኤካ̇ሪ ናኢ ዬላካ̇ይዶ̈ር ዓይቄጌይን ኢ ጌ̈ዳዲ ኢ ማጪ̇ን ማሂ ኤካ̇ር ናኢ ዬላሪ ፌ ኢሻ ሱምን ጼይጊሳጋ̈ቤ’ ጌይኔ። 29 ዓት ዪ̈ዶኮ ፔቲ̇ ኢንዲ̇ ናእ ማ̈ቂ̇ኖ ታብዛ ኣሳን ዎዶሪ ኢንታ̇ ጋርታ̇ፖ̇ ኢሻ ባይራ̈ዲ ማጫ̇ ኤካ̇ር ናኢ ዬላካ̇ይዶ̈ር ዓይቂ̇ዴ። 30 ኢ ኡንኪ̇ን ጋልዶ̇̈ዳሬ ኣሲን ኢዞ ማሂ ኤካ̇ሪ ና̈ኢ ዬላካ̇ይዶ̈ር ዓይቂ̇ዴ። 31 ዓይዚ̇̈ዳሬ ማ ኢዞ ማሂ ኤካ̇ሪ ኢያር ዓይቂ̇ዴ። ዪዝ ዎቲ ሙታ̇ ታብዛን ዎይ ናኢ ዬላካ̇ይዶ̈ሪ ዓይቂ̇ዴ። 32 ዉርሲ ጋልዳ̇ ኣሲንዳ̇ር ዓይቃ̇ዴ። 33 ዪዚ ታብዛን ዎይ ኢዞ ኤኪ̇ኖኮታ̇ቦ ኢንቲ̇ ዓይቃ ጋርታ̇ፖ̇ ዲንዲዝ ቃምባራ ኢዛ ዎ̈ቦ ማጫ̇ ማ̈ቃ̇̈ራ?” ጋ̈ር ኦይጪ̇ዴ። 34 ዬሱ̈ሲ ኢንታ̇ኮ “ዓና̇ ሳ̈ዚን ጋልዳ̇ ዎ ኣሳን ኣቲኖ ማጫ̇ ኤኪ̇̈ሬ ማጫ̇ር ኣቲና ኣ̈ል ኢስቲ̈ሬ። 35 ዓይቃ ጋርታ̇ፖ̇ ዲንዳ̇ሪ ዬ̈ዝ ኦራ ኣላሚን ጋርታ̇ ዶኣንዳ̇ብ ኮሺዛን ኣቲናር ማጫ̇ ኤኪ̇ባ̈ሲ ማጫ̇ር ኣቲን ኣ̈ል ኢስታ̇ባ̈ሴ። 36 ኢንቲ̇ ኪ̈ታንቻ̇ንፌ̈ን ማ̈ቂ̇ኖኮታ̇ቦ ኢናፖ̇ ዎሃ ኢንቲ̇ ዓይቂ̇ባ̈ሴ። ጾ̈ሲ̇ ኢንታ̇ ዓይቃ ጋርታ̇ፖ̇ ዲንሪ ሼምፓባር ጋዲ̇ኖኮታ̇ቦ ኢንቲ̇ ጾ̈ሳ̇̇ ናኤ። 37 ዓይቂ̇ኖ ኣሲ ዓይቃ ጋርታ̇ፖ̇ ዲንዳዚን ሙ̈ሶ ቆን ጋርታ̇ ታማ ኤይታ̇ራ ቆን ሚጫ̇ካ̇ይ ኣቲ̇ኖ̈ኮን ታ̈ሪኪን ጻ̈ፊኖን ጋልዳ̇ ኤሪሲኔ። ዪና̇ሬ ኢ ጾ̈ሳ̇̇̈ዳ ‘ኣብራሃ̈ማ ጾ̈ሳ̇̈ዶ፣ ዪሳ̈ቃ ጾ̈ሳ̇̈ዶ፣ ዓይቆ̈ባ ጾ̈ሳ̇̈ዶ’ ጌዪ ጼይጊኔ። 38 ኢንቲ̇ ዎይን ኢ̈ቦ ሼምፓባሮ ኣስ ማ̈ቂ̇ኖኮታ̇ቦ ኢ ሼምፓባሮንቦ ጾ̈ስዶኬ ዓይቂ̇ኖን ጾ̈ስ̇ ጊዳካ̇ዬ” ዪዝ ጋ̈ር ኢንታ̇ብ ማሂዴ። 39 ፔቲ̇ ፔቲ̇ ሙ̈ሳ ሂጋ̇ ታማ̈ርሲዛን ኢ̈ኮ “ኣስታማ̈ራ̈ዶ! ኔ ዓት ኮሽ ሶ̈ላዴ” ጌይዴ። 40 ዪኒ̇ፖ ዓኒ ኦ̈ናካር ኢያ ኦይች ኦይጫንዳ̇ቦ ኢ̈ጪ̇ዴ። ክርስቶ̈ሲ ኦ ናኣ? ማ̈ቶ̈ሳ 22፡41-46 ፤ ማ̈ርቆ̈ሳ 12፡35-37 41 ኢናፖ̇ ዓኒ ዬሱ̈ሲ ኢንታኮ “ኣሳን ክርስቶ̈ሳ ዎዛር ‘ዳ̈ዊታ ናኤ’ ጌይራ? 42-43 ዳ̈ዊቲ ፌ ቆሚ̇ምቦ̇ ማዝሙራ ማጻ̈ፋ ጋልዳ̇፥ “ ‘ጎዳ̈ዲ ቴ ጎዳ̈ኮ፥ ቴ ኔ ጻላ̈ታን ቶ̈ራ ኔ ቶህ ጻና ኣ̈ዝ ዲራ̈ስ ኔ ታ̈ብ ኡሻች ጎይ ቦንቻ̇ ቤስ̇ ዶኣቤ ጌይኔ’ ጌይሬ። 44 ዪዚ ዳ̈ዊቲ ክርስቶ̈ሳ ‘ጎዳ’ ጌዪ ጼይጋምባ̇ራ ዎዛርፌ̈ን ኢ ዳ̈ዊ̈ታብ ናኢ ማ̈ቃ̇ንዳቦ ዳንዳኢ̈ራ?” ጌይዴ። 45 ዎርዣ ዎይ ኢ̈ኮን ሲስካ̇ምባራ ዬሱ̈ሲ ፌ ታማ̈ራንኮ፥ 46 “ጳሪን ኣፊላ ማኣር ጌዳክ ዓኒክ ዬ̇ ዶሲዛንፖ̇፣ ጋቢ ጋልዳ̇ ኣሲ ኢንታ̇ብ ዪርክ ጌዪ ሳሮ ጋ̈ምፔ̈ን ኮዪዛንፕኬ ኣይሁድ ዎ̈ሳ ኬ̈ ጋርታ̇ ቦንች ቤሲ̇፣ ዲጊ̇ሳ ቤስ̇ ጋርታ̇ ቦንች ቤሲ̇ ኮዪዛን ሙ̈ሳ ሂጋ̇ ታ̈ርሲ̇ዝ ኣሳን ጋልዳፖ ዪንቲ̇ ዪንታ̇ ና̈ጊብቴ̇። 47 ኢንቲ̇ ኣስኒ ዓይቂ̇ኖ ማጫ̇ን ኣ̈ሊን ዳሂ̈ሬ፤ ኣሲ ፌ̈ና ቤቆ̇ ጋ̈ሪ ዎ̈ሳ ጳሪን̈ሬ፤ ዪን ኣሳን ኣስ ዎይ̈ፖ̇ ሺ ፊርዳ ኤኪ̇̈ሬ” ጌይዴ። |