ሉቃ̈ሳ 15 - ኦራ ጫ̈ቃ ማጻ̈ፋያር ቤንቲ̇ኖ ዶሪ ሚሳ̇̈ሊ ማ̈ቶ̈ሳ 18፡12-14 1 ፔቲ̇ ጋላስ ቃራጻ ቃጺሲዛንኬ ናጋራንቻ̇ ጌይንቲ̇ኖን ዎይ ዬሱ̈ሲ ሶ̈ላዚን ሲስካ̇ንዳ̇ቦ ኢ ቡጊድባር ሺ̈ቂዴ። 2 ፋራሳ̈ዋንኬ ሙ̈ሳ ሂጋ̇ ታማ̈ርሲዛን “ዓ ና̈ሳ ናጋራንቻን ኢ̈ክ ዬይን ኢጺ̇ባ̈ሲ ማ ኢንታባር ዎልኣ ሙይሬ” ዪዝ ጋ̈ሪ ዬሱ̈ሳ ጋልዳ ጉንዲሚዴ። 3 ዬሱ̈ሲ ዪኖ̇ ሚሳ̈̇ሊባር ኢንታ̇ብ ሶ̈ሊ̈ርዶሪ፦ 4 “ዪንታ̇ ጋርታ̇ፖ ፔታ̇ና̈ቦ ጼ̈ታ ዶሪ ዎኮ ዪን ጋርታ̇ፖ ፔታ̇ኒ ዬጌይን ሳ̈ካሊ ታጶ̇ ሳ̈ካላን ቡጫ ጋልዳ̇ ኣሻ̇ሪ ዪኖ ፔታ̇ኒን ዲጚዝ ዲራ̈ስ ኮያንዳብ ሉኪ̇ባ̈ሶ ኦ̈ኖ? 5 ኮያር ዲጚኖፖ̇ ዓኒ ኢ̈ክ ኮሽካ̇ክ ዓይቂ̇ን ፌ ካ̈ላ̇ ጋልዳ ቶ̈ካ̇ሪ 6 ፌ ኣ̈ል ማ̈ቂ̇̈ሬ። ኢናፖ̇ ፌ ላጋ̇ንኬ ፌ ዶ̈ን ዎይ ጼይጋሪ ‘ቴ ዶራ ዪኖ ቴ ዲጛዴ፤ ታ̈ኒ ኡፋይቲ̇ኔ ዪንታ̇ር ኡፋይቲ̇ብቴ’ ጌይሬ። 7 ዪዚ ቴ ዪንታ̇ብ ሶ̈ላዚን ኣባ ጌይን፥ ማ̈ሪቲ ኮሺባ̈ሶ ሳ̈ካሊ ታጶ̇ ሳ̈ካሊ ጺ̇ላ̇ ኣሳንፖ̇ ፌ ናጋሪም̇ፖ̇ ማ̈ቃ̇ር ማ̈ሪቲ ጌሊዝ ፔቲ̇ ናጋራንቻ̇ባራ ኣፋ ጾ̈ሳ̇̇ ቲ̈ን ኡፋይስ ማ̈ቂ̇̈ሬ” ጌይዴ። ያር ቤንቲ̇ኖ ሳንቲ̇ን ሚሳ̇̈ሊ 8 “ማ ቢራፖ̇ ኦ̈ንቲ̇ኖ ታጳ̇ ሳንቲ̇ ኢዝቦ ዎ ፔቲ̇ ማጪ̇ንዳ̇ ኢዝ ሳንታ̇ን ታጳ̇ን ጋርታ̇ፖ̇ ፔታ̇ኒን ዬጌይን ኢዞ ዲጚዝ ዲራ̈ስ ታማ ፎ̈ኢሳ ኬ̈ ጋርሲ̇ን ፊታ̇ ኮሺንቻ̇ ኮያባሶ ኣሲን ኢዛ ኦ̈ኖ? 9 ኢዛ ኮያ̇ር ዲጚኖፖ̇ ዓኒ ፌ ላጋ̇ንኬ ፌ ዶ̈ን ዎይ ጼይጋራ ‘ቴ ቴ ሳንቲ̇ን ዪኖን ዲጛዴ፤ ታ̈ኒ ኡፋይቲ̇ኔ ዪንታ̇ር ኡፋይቲ̇ብቴ’ ጋ̈ሬ። 10 ዪና̇ ኢዝፌ̈ኒ ፔቲ̇ ናጋራንቻ ኣሲ ማ̈ሪቲ ጌሌጌይን ጾ̈ሳ̇̇ ኪ̈ታንቻን ቲ̈ን ኡፋስ̇ ማቂ̇̈̇̈ሬ” ጌይዴ። ያር ቤንቲ̇ኖ ናኣ ሚሳ̇̈ሊ 11 ማ ማ̈ቃ̇ር ዬሱ̈ሲ ኢንታ̇ኮ “ፔቲ̇ ና̈ሳ̈ቦ ናምኢ ናኢ ዎዶ̈ን፥ 12 ኢንታ̇ ጋርታ̇ፖ̇ ና̈ራ ጌ̈ዳዲ ፌ ባ̈ባ̈ኮ ‘ኣባቦ! ኔ ኔ ቆሊን ጋርታ̇ፖ̇ ታ̈ና ዬላ̇ዚን ታ̈ብ ኢማ̇ቤ’ ጌይን ባ̈ባ̈ዲ ፌ ቆሊን ፌ ናኣንቦ ፋጋር ኢሚ̇ዴ። 13 ዎይሊን ጋምኣካ̇ይዶ̈ሪ ና̈ራ ጌ̈ዳ ፌ̈ና ዬሊ̇ኖን ዎይ ሺ̈ሺ̇ ኤካ̇ሪ ጎት ጋዳ̇ ሉኪ̇ዴ። ኢና ፌ ሚ̈ሻ̇ ዎይ ሜላ̇ ፋባ̈ሶ ባዛብ ላ̈ላ̇ር ይሲ̇ዴ። 14 ኢያር ፌ̈ብ ዎን ዎይ ዉርሲኖፖ̇ ዓኒ ኢ ዎ ጋዲን ጋርታ̇ ሲጛ ጌላር ሙይዝ ባዚ ዪን ዎይሊን ሜቲንቲ̇ዴ። 15 ኢናፖ ኢና ዎ ኣሳን ጋርታ̇ፖ ፔታ̇ና̈ኮ ሉኪ̇ን ና̈ሳ ኢያ ጉዲን ፌ̈ብ ዬ̈ጚዝ ኣስ ማሂዴ። 16 ኢ ጉዲንን ሞ̈ዝ ዓፊኒን ኢያ ሙዮ ሙዮ ጋ̈ዚምባ̇ራ ኢዛር ኢ̈ብ ኢሚ̇ዝ ኣሲ ዪዴ። 17 ዪኒ̇ባራ ኢ ባሊኖን ኢ̈ብ ሲስኪንቲ̇ ‘ታ ባ̈ባ ኣ̈ል ኦ̈ዝ ኣሳን ፊ̈ሺ ሙዪ ሙዪ ኢንታ ጋሚን ሺሺ ኣሺ̇ዛን ኣ̈ፊና! ታ ዓት ዓይዲ ጋፍባር ዓይቃ̇ንዳ̇ብ ዬላ̇ዴ። 18 ቴ ዪዚ ዓንዳ̇ፖ ዲንዳ̇ ቴ ባ̈ባ ኣ̈ል ሉካ̇ራ “ኣባቦ! ቴ ኣፋ ጾ̈ሳ̇ዳክ̇ ኔ̈ናክ ባሊኔ። 19 ዓኒ̇ፖ̇ ጌዳ ቴ ኔ ናኤ ጌይንታ̇ ጼይጊንታ̇ንዳቦ ታ̈ብ ኮሺ̇ባ̈ሴ። ኔ ኣ̈ል ኦ̈ዝ ኣሳን ጋርታ̇ፖ̇ ፔታ̇ና̈ዲፌ̈ኒ ታ̈ና ቤቃ̇ቤ ጋ̈ንዳ’ ” ጌይዴ። 20 ኢናፖ̇ ዲንዳ̇ሪ ፌ ባ̈ባ ኣ̈ል ሉኪ̇ዴ። ኢ ቢርት ጎት ዎዶ̈ን ባ̈ባ ኢያ ቤቂ̇ ሚጪንታ̇ር ኢ̈ክ ዎባር ሉካ̇ሪ ኢያ ኢሪጛር ዬርቂ̇ዴ። 21 “ና̈ራ̈ዳሬ ‘ኣባ̈ቦ̇! ቴ ጾ̈ሳ̇ዳክ ኔ̈ናክ ባሊኔ፤ ዓኒ̇ፖ̇ ጌዳ ኔ ናኤ ጌዪንታ̇ ጼይጊንታ̇ንዳቦ ታ̈ብ ኮሺ̇ባ̈ሴ’ ጌይዴ። 22 “ባ̈ባ̈ዲ ፌ ኣይላንኮ ‘ዎይ̈ፖ̇ ኮሽ ማ̈ቂ̇ኖ ኣፊላ ኤሊ̇ባር ኤኪ̇ ዬ̈ሪ ታ̈ብ ኢያ ማኢሲብቴ̇፤ ኢ ኩሽታ̇ ዎርቃ̇ ኢ ቶሂታ̇ሬ ጫ̈ማ̇ ኣ̈ሲብቴ፤ 23 ኮሽ ዱዲ̇ኖ ጌ̈ን ኤሄ̈ሪ ሹኪ̇ብቴ፤ ኑ ሙይስቶ፤ ኡፋይቲ̇ስቶ። 24 ቴ ናኣ ዓ̈ ኣይቂ̇ንዶ̈ሪ ዓት ፋጺኔ፤ ዪንዶ̈ሪ ዓት ቤንቲ̇ኔ’ ዪዝ ጋ̈ሪ ዎልኣ ኡፋይቲ̇ ኤ̈̇ዴ። 25 ዪና̇ ኢዝባራ ና̈ራ ኢሻ ዎት ጋዳ̇ ዎዶ̈ሪ ኢናፖ ማ̈ቃ̇ር ኣ̈ል ቡጊድ ዬላ̇ምባራ ኣሳ ዬጺ̇ዛ̈ዲክ ዶ̈ጚዛ̈ዲክ ሲስኪዴ። 26 ኢያሬ ኣይላን ጋርታ̇ፖ ፔታ̇ና ጼይጋሪ “ኣን ዪ ኣብዛ̈?” ጋ̈ር ኦይጪ̇ን፥ 27 ኣይላ̈ዲ “ኔ ጌ̈ዳ ዪኖ ኮሽባር ዬይኖኮታ̇ቦ ኔ ባ̈ቦ ዱዲ̇ኖ ጌ̈ን ኢ̈ብ ሹኪ̇ኔ” ጌይዴ። 28 “ና̈ራ ኢሻ̈ዲ ዛልቃ̇ሪ ኣ̈ል ጌላብዳ̇ ጌይን ባ̈ባ ዛ̈ና ኬስካ̇ሪ ኬ̈ ጌላምፔ̈ን ኢያ ጌሺዴ። 29 ኢያር ፌ ባ̈ባ̈ኮ ‘ዓዲሼ ቴ ዓ̈ፌኖ ላይ ዎይ ኣይላፌ̈ን ኔ̈ብ ኦ̈ኔ። ኔ ጌይኖ ባዝ ዎይ ቴ ፎታካ̇ይ ኣሺ̇ኖ ባዪዶ̈ን ቴ ቴ ላጋ̇ንባር ኡፋይታ̇ምፔ̈ኒ ሜላ ኣቲ̇ን ዴይሻ ናኢ ፔታ̇ን ኔ ታ̈ብ ኢማ̇ካ̇ይዶራ፥ 30 ዪ ኔ ናኣ̈ዲ ኔ ቆሊን ዎይ ቡድና ጋልዳ̇ ዉርሳ̇ር ዬ̈ዚምባራ ኔ ኢ̈ብ ዱዲ̇ኖ ጌ̈ን ሹካ̇ዴ’ ጌይዴ። 31 “ባ̈ባ̈ዳሬ ‘ቴ ናኣ̈ዶ! ኔ ዎይ ጋላስ ታባር ዎ፤ ቴ ባዝ ማ̈ቂ̇ኖ ዎይ ኔዬ። 32 ዪ ኔ ጌ̈ዳ̈ዲ ዓይቂ̇ንዶ̈ሪ ዓት ፋጺኔ፤ ዪንዶ̈ሪ ዓት ቤንቲ̇ኔ፤ ዪ̈ኮታ̇ቦ ኑ̈ኒ ዎይሊን ኡፋይታ̇ንዳ̇ብ ኮሺ̇̈ሬ’ ” ጌይዴ። |