ዋ̈ኒ̇ሳ 2 - ኦራ ጫ̈ቃ ማጻ̈ፋዬሱ̈ሲ ዋን ዎይና ጃ̇ ላ̈ሚ̇ዴ 1 ዓይዚ̇ ቃም̇፥ ጋሊላ ጋዳ̇ ዎ ቃ̈ና ጋ̈ዝ ካታሚን ጋርታ̇ ኢሲ̇ ዎዶ̈ን፥ ዬሱ̈ሳ ኢንዳ̇ሬ ኢና ኢሲ̇ን ጋርታ̇ ዎ። 2 ዬሱ̈ሳኬ ኢ ታማ̈ራንኬ ኢሲ̇ን ጋርታ̇ ዬ̈ምፔ̈ን ጼይጊንቲ̇ኔ። 3 ኢሳ̇ቦ ጋ̈ር ማስኪ̇ኖ ዎይና ጂ̇ን ዉሪንዶ̈ን፥ ዬሱ̈ሳ ኢንዳ̇ ዬሱ̈ሳኮ “ኢንታ̇ ዎይና ጂ̇ን ዉሪኒሽዋ!” ጋ̈ዴ። 4 ኢያር ኢዝኮ “ቴ ኢንዲንዴ! ዪ̈ዲፌ̈ኖ ባዝ ጋርታ̇ ኔ ታ̈ና ኣባብ ጌልሳ̈ራ? ቴ ኬሊ̇ን ቢርት ዬላ̇ካ̇ዬ” ጌይዴ። 5 ኢ ኢንዳ̇ር ኢና ዎ ኣሽካራንኮ “ኢ ዪንታ̇ክ ጋ̈ዚን ዎይ ኦ̈ብቴ̇” ጋ̈ዴ። 6 ኣይሁዳን ዋ̈ባር ፌ̈ና ቃሺ ጌ̈ሺ̇ዝ ዎጋ ኢንታ̇ብ ዎኮታ̇ቦ ዪኒ̇ቦ ሹችባር ኦ̈ንቲ̇ኖ ሌሂ ኮል ኢና ዎ፤ ፔቲ̇ ኮልን ፌ ቆማ̇ብ ናምኢ ዎይ ዓይዚ̇ ኦት ዋ̈ ኤ̈̇̈ሬ። 7 ዬሱ̈ሲ ኣሽካራንኮ “ኮልን ዋ̈ ኩምብቴ” ጌይን ኢንታ̇ር ኮልን ዋ̈ ኩምዴ። 8 ኢናፖ̇ ዬሱ̈ሲ ኣሽካራንኮ “ዪዚ ዱ̈ቃ̇ሪ ኢሲ̇ን ባ̈ባ̈ቦ ኢሚ̇ብቴ̇” ጌይን ኢንታ̇ር ኤ̈ጚ ኢ̈ብ ኢሚ̇ዴ። 9 ኢሲ̇ን ባ̈ባ̈ዳር ዎይና ጃ̇ ላ̈ሚንቲ̇ኖ ዋ̈ን ቁ̈ቂ̇ ቤቂ̇ዴ፥ ዎቲናካሬ ኢዛ ዎይዲፖ ዬይኖኮ ኤራካ̇ዬ። ዋ̈ን ዱ̈ቂ̇ኖ ኣሽካራን ሙታ̇ ኤሪ̈ሬ። ኢናፖ ኢ ኢሳ̇ ጼይጋሪ፥ 10 “ኣሲ ዎይ ቲ̈ን ኣሳብ ኮሽ ቃ̈ጺኖ ዎይና ጃ̇ ኢሚ̇̈ሬ፥ ኣሲ ኡሽኪ̇ ማሲቲኖፖ̇ ዓኒ ቃ̈ጺባ̈ስፌ̈ኖ ኢሚ̇̈ርዶ̈ን፥ ኔ̈ኒ ኮሽ ቃ̈ ዓኖ̇ ዬል ጋዳ̇ ዎባያ!” ጌይዴ። 11 ዬሱ̈ሲ ኦ̈ኖ ታ̈ሚ̇ራ̈ታን ጋርታ̇ፖ̇ ቲ̈ን ኦ̈ንቲ̇ኖንዳ̇ ኣና̇ ኢዞዶ̈ን፥ ኢ ዪኖ̇ ኦ̈ኖንዳ ጋሊላ ጋዳ̇ ቃ̈ና ጌይዝ ካታማ ጋርታ̇። ዪና̇ባር ኢ ፌ ቦንቺ̇ን ቤይሲዴ። ኢ ታማ̈ራንር ኢያ ኣማ̇ኒዴ። ዬሱ̈ሲ ጾ̈ሳ̇̇ ኬ̈ ጋርታ̇ ዛላ ዛልኢዝ ኣሳን ዳኪ̇ዴ ማ̈ቶ̈ሳ 21፡12-13 ፤ ማ̈ርቆ̈ሳ 11፡15-17 ፤ ሉቃ̈ሳ 19፡45-46 12 ዪኒ̇ፖ ዓኒ ዬሱ̈ሲ ፌ ኢንዲ̇ባራ ፌ ኢና̇ኣንባርኬ ፌ ታማ̈ራንባራ ዎልማ̈ቃ̇ሪ ቶ̈ራ ቂፊርና̈ሆ̈ም ሶ̈ባር ኢና ጊላ̇ ቃም ጋምኢዴ። 13 ኣይሁዳንቦ ፋ̈ሲጋ ባ̈ሊን ቦንቺ̇ዝ ቃሚ̇ ኡኪ̇ንዶ̈ን ዬሱ̈ሲ ፉዳ ዬሩሳ̈ላም ኬስኪ̇ዴ። 14 ጾ̈ሳ̇̇ ኬ̈ ጊቢ̇ን ጋርታ̇ሬ ጌ̈ን፣ ዶሪኬ፣ ዶላ ዎ̈ጚዝ ኣሳን ማ ሚ̈ሺ̇ ላሚ̇ዝ ኣሳንሬ ዶኣር ሚ̈ሺ̇ ላ̈ሚ̇ርዶ̈ን ኢንታ̇ ዲጚዴ። 15 ጋ̈ዲ ኤካ̇ር ዢራ̈ፋ ሱካ̇ሪ ዶራንኬ ሜሃን ዎይ ጾ̈ሳ̇̇ ኬ̈ ጊቢ̇ን ጋርታ̇ፖ̇ ዳኪ̇ዴ። ሚ̈ሺ̇ ላ̈ሚ̇ዝ ኣሳን ኢንታ̇ ሚ̈ሺ̇ንዳር ላ̈ሊ̇ዴ። ኢንታ̇ ጻርጴ̈ዛ̈ር ዎይ ሱጊ ቶጚዴ። 16 ዶላ ዎጚዝ ኣሳንካሬ “ዶላን ዓንር ዓንዳፖ̇ ኬሲ̇ብቴ̇። ቴ ባ̈ባ̈ ኣ̈ሊን ዛላ ዛልኢዝ ኣ̈ል ማሃፒ̇ቴ!” ጌይዴ። 17 ኢ ታማራ̈ን ዪኒ̇ባራ ጾ̈ሳ̇̇ ቃ̈ላ ጋልዳ̇ “ታ̈ብ ኔ ኣ̈ሊምቦ ዎ ካንንዳ̇ ታማፌ̈ን ታ̈ና ሚቻ̇̈ሬ” ጋ̈ር ጻ̈ፊኖን ኢንታ̇ክ ኤልቅ ጋ̈ዴ። 18 ኣይሁዳንር ኢ̈ኮ “ኔ̈ኒ ዪኖ̇ ዎታንዳ̇ቦ ሲልጣ̈ና ኔ̈ብ ዎን ኤርሳንዳቦ ኣብዝ ታ̈ሚራ̈ታ ባዝ ኦ̈ ኑ̈ና ቤይሳንዳ?” ጌይዴ። 19 ዬሱ̈ሳር ኢንታ̇ኮ “ዓና̇ ጾ̈ሳ̇̇ ኬ̈ን ዪርዲሲብቴ̇፥ ታ̈ኒ ዓይዚ̇ ቃምባራ ኢዞ ማሃ ኬ̈ጻ̇ንዳ̇” ጌይዴ። 20 ኣይሁዳንር ኢ̈ኮ “ዓና̇ ጾ̈ሳ̇̇ ኬ̈ን ኬ̈ጺ̇ ዉርሳንዳ̇ቦ ኦይዲ̇ ታጳ̇ ሌሂ ላይ ዉርሲ̇ኔ። ኔ ዓት ካኣ ኪን ኢዞ ዓይዚ̇ ቃምባራ ማሃ ኬ̈ጻ̇ራ?” ጌይዴ። 21 ዎቲናካር ዬሱ̈ሲ “ጾ̈ሳ̇̇ ኬ̈” ጌይኖንዳ ፌ̈ ጋሊ̇ንዶዶኬ ሜላባዝ ጊዳካ̇ዬ። 22 ዪ̈ኮታ̇ቦ፥ ዬሱ̈ሲ ዓይቃ ጋርታ̇ፖ̇ ዲንዲ̇ኖፖ̇ ዎሃ ኢ ታማ̈ራን ኢ ዓና̇ ሶ̈ሊኖን ኤልቅ ዎቲዴ። ማ ጌ̈ሻ̇ ማጻ̈ፋ ጋልዳ̇ ጻ̈ፊንቲ̇ኖንዲኬ ዬሱ̈ሲ ሶ̈ሊኖ ቃ̈ሊን ኣማ̇ኒዴ። 23 ዬሱ̈ሲ ፋ̈ሲጋ ባ̈ልባራ ዬሩሳ̈ላም ዎዶሪ፥ ኢ ዎቲኖ ታ̈ሚ̇ራ̈ቲ̇ን ቤቃ̇ሪ ዎይሊን ኣሲ ኢያ ኣማ̇ኒዴ። 24 ዎቲናካሬ ኢ ኣስ ጌይዛ ዎይ ኤሪዛኮታ̇ቦ ኢ ኢንታ̇ ኣማ̇ኒባ̈ሴ። 25 ኢ ኣሳ ቡ̈ዳ ጋርታ ዎ ባዝ ኤሪዛኮታ̇ቦ ኦ̈ናካር ኣሳ ባዝ ኢ̈ብ ሶ̈ላንዳ̇ብ ኮሺ̇ባ̈ሴ። |