ዓይ 4 - ኦራ ጫ̈ቃ ማጻ̈ፋዓና̇ ኣላሚን ጋልዳ ዎ ኢ̈ት ባዛን ዶሳፒ̇ቴ 1 ዪንታ̇ ጊዳ̇ ዎ̈ ጎይሊንዲኬ̈ ዋቺ̇ን ዎይዲፖ ዬይና? ዪንቲ̇ ኢ̈ት ኦ̈ምፔ̈ን ዪንታ ጋርታ̇ ኦላዝ ኢ̈ት ኢኒ̇ምፖ ባያ? 2 ዪንቲ̇ ኮዪኖ ባዚን ዲጛንዳ̇ብ ዪንታ̇ ጋሚ ኣስ ዎ̈ሬ። ዪንቲ̇ ዎይሊን ኢኒ̇ታዝ ባዚን ዲጛንዳ̇ብ ዪንታ̇ ጋሚ ዎልዎልኣ ጎይሊንቲ ዎልዎልኣ ዎ̈ሬ። ዪንቲ̇ ዎ̈ሲባ̈ሶኮታ̇ቦ ዪንቲ̇ ኮዪኖ ባዚን ዲጚባ̈ሴ። 3 ዪንቲ̇ ዎ̈ሲናካራሬ ዲጚባ̈ሶን ኣባቦ ጌዬጌይን፥ ዪንቲ̇ ዪንታ̇ ኢኒ̇ን ኩምንዳብ ጋ̈ሪ ኢ̈ታ ቆፊባር ዎ̈ሲ̇ዛ̈ኮታ̇ቦ። 4 ጾ̈ሳ̇̇ብ ኣማ̇ኒንቲባ̈ሶ ኣሳን! ዓኒ̇ ኣላሚን ጋልዳ ዎ̈ ኢ̈ታ ባዛን ዶሲዝ ኣሳን ጾ̈ሳ̇̇ባር ጎይል ማ̈ቂኖን ኤሪባ̈ሳ። ዪ̈ኮታ̇ቦ̈ ኣላሚን ዓኖ̇ ዶሲዝ ኣሲ ጾ̈ሳ̇̇ባር ጎይሌ̈። 5 “ጾ̈ሳ̇̇ ዪንታ̇ ጋርታ̇ ጋዲ̇ኖ ኣያ̇ና̈ዲ ዪንቲ̇ ጾ̈ሳ̇̇̈ ኢ̈ብ ሙታ̇ ማ̈ቃ̇ምፔ̈ኒ ዎይሊን ኢኒ̇ቲ̈ሬ” ጋ̈ር ጾ̈ሳ̇̇ ቃ̈ላ ጋልዳ ጻ̈ፊንቲኖ̈ ዪንታ̇ክ ሜላ̇ ማይጺ̈ራ? 6 “ጾ̈ሳ̇̇ ፌ̈ና ሾክ̇ ሾክ̇ ዎቲዝ ኣሳን ኢጺ̇̈ሬ̈፤ ፌ̈ና ዪርክ ዪርክ ዎቲዛንቦ ፌ ኮሺቲ ሺ ቤይሲ̈ሬ” ጋ̈ሪ̈ ጾ̈ሳ̇̇ ቃ̈ላ ጋልዳ ጻ̈ፊንቲኖ̈ኮታ̇ቦ̈ ጾ̈ሳ̇̇ ኢሚ̇ዝ ኮሺቲ̇̈ዲ ዎይፖ ሺ̈ሬ። 7 ዪዚ ዪንቲ̇ ጾ̈ሳ̇̇̈ቦ ኣቂብቴ̇፤ ሴ̈ጣና ኢጺ̇ብቴ̈ ኢ ዪንታ ጋልዳፖ ጎቲ̇̈ሬ። 8 ዪንቲ̇ ጾ̈ሳ̇̇̈ኮ ኡኪ̇ብቴ̇፤ ኢያሬ̈ ዪንታ̇ኮ ኡኪ̇̈ሬ። ናጋራንቻ̇ን! ዪንቲ̇ ናጋራ ኦ̈ዚን ኣሺ̇ብቴ̇። ናምኢ ቆፊባር ጌዳክ ዓኒክ ጌይዛን! ዪንታ̇ ቡ̈ዲ̇ን ጾ̈ሳ̇̇̈ክ ማ̈ሂብቴ̇። 9 ዪንታ̇ ናጋራ̈ምቦ̇ ጫና̇ቂንቲ̇ብቴ፤ ኣዛ̇ኒብቴ̇፤ ዬ̈ኪ̇ብቴ፤ ዪንታ̇ ሚ̈ቺ̇ን ዬ̈ፊ፤ ዪንታ̇ ኡፋይሲ̇ንዳሬ̈ ኣዛና ማ̈ቃ̇ ጋ̈ቤ̈። 10 ጎዳ ቲ̈ን ዪንታ̇ ዪርክ ዪርክ ዎቲብቴ̇፤ ኢ ዪንታ̇ ሾክ̇ ሾክ̇ ዎቲ̈ሬ። 11 ቴ ኢሺንታ̇ን! ዎልዎልኣ ጌስታ̇ፒቴ። ፌ ላጋ̇ ጋልዳ̇ ኢ̈ት ሶ̈ሊ ኢ ጋልዳ ፊርዲዝ ኣሲ ጾ̈ሳ̇̇ ሂጊ̇ን ጋልዳ ኢ̈ት ሶ̈ሊ ፋራ̇ዲ̈ሬ። ሂጊ̇ን ጋልዳ ኢ̈ት ሶ̈ሊ ፊርዲ̇ ዎቲዝ ኣሲ ሂጊ̇ን ጋልዳ ፋራ̇ዲዝ ኣስዶኬ ሂጊ̇ንቦ̈ ኪ̈ቲንቲዝ ኣስ ጊዳካ̇ዬ። 12 ሂጋ̇ ኬሲ̇፥ ፊርዲ ዎቲዛ̈ዲ ይሳ̇ንዳብኬ̈ ጋዳ̇ንዳብ ዳንዳኢዛ ፔቲ̇ ጾ̈ሳ̇̇ ሙታ̇። ዓት ዪ̈ዶኮ ኣሳ ጋልዳ ፋራ̇ዲዛ ኔ ኦ̈ኖ? ጊያ̈ቦ ባዛብ ዓታ̇̈ብ ኬርፋፒ̇ቴ 13 ዓታ̇̈ቦ ዎይ ጊያ̈ቦ ሜላ ጋዳ̇ ሉካ̇ሪ ፔቲ̇ ላይ ኢና ዶኣንዳ ዛልኢ ዱሪታንዳ ጌይዝ ኣሳን! ዪንታ̇ ኣዬ̇። 14 ጊያ̈ብ ሳ̈ዚ ዎዛርፌ̈ን ዎንቲ̈ርኮ ዪንቲ̇ ኤሪባ̈ሴ። ዪንታ̇ ሼምፒ̇ንዳ̇ ጌ̈ሽ̇ ቤንታ̇ር ጋላስ ዬላምባ̇ር ያዝ ጫልኪ̇ንዲፌ̈ን ባያ? 15 “ጾ̈ሲ̇ ጌይን ኑ ሼምፓባር ዶኣዶኮ̈ ባዝ ዓና̇ሬ̈ ዪና̇ሬ̈ ኦ̈ንዳ̇” ጋ̈ንዳብ ኮሺ̈ሬ። 16 ዪንቲ ዪዚ ዪኒ̇ፌ̈ን ጋ̈ዚን ኣሻ̇ሪ ኦቲራባር ኬርፊ̈ሬ። ዪ̈ ፌ̈ኖ ኬራፋ ኢ̈ቴ። 17 ዪዚ ኮሽ̇ ማ̈ቂ̇ኖ ባዝ ኦ̈ንዳብ ኮሻ̇ዚን ኤሪ ሙታ̇ ኦ̈ባ̈ሶ ኣሲ̈ ናጋራ ኦ̈ኔ። |