ዓይ 3 - ኦራ ጫ̈ቃ ማጻ̈ፋዪንታ̇ ኖ̈ኒን ናጊብቴ̇̈ 1 ቴ ኢሺንታ̇ን! ዪንታ̇ ጋርታ̇ፖ ዎይሊንን ኣስ ታማ̈ርሲዝ ኣስ ማ̈ቃፖ̇ ጋ̈ቤ̈። ኣባ ጌይን ኑ ኣስ ታማ̈ርሲዛን ዎይ̈ፖ̇ ሺኖ̈ ፊርዳ̇ ኤካ̇ዚን ዪንቲ̇ ኤሪ̈ሬ̈። 2 ኑ ዎይን ዎይሊን ባዝባር ባሊቲ̇̈ሬ። ፌ ሶ̈ሊንባር ባሊቲባ̈ሶ ኣሲ ዎኮ ኢ ፌ̈ና ና̈ጋንዳብ ዳንዳኢዝ ፎቲ ኣሴ። 3 ፋራ ኑ ኮዪኖ ጎይ ሉካ̇ምፔ̈ን ዎታንዳቦ ኢ ኖ̈ና ጋርታ ሉጋ̈ማ ባ̈ርሳሪ ኤ̈ጛንዳብ ዳንዳኢ̈ሬ። 4 ባሃ̈ራ ጋልዶ ጎጚ ኣባካር ጴች̇ ማ̈ቂናካሬ፥ ጴች ኣይጊ ኢያ ሱጊ ኤኪ̇ ሉኪ̇̈ርካራሬ፥ ኢዞ ዋ̇ዝ ና̈ሳ̈ዲ ዋ̈ ፋጊዝ ጊላ̇ ሚባራ ኢዞ ቲ̈ኒ ፌ ኮዪኖ ጎይ ኤኪ̇ ሉኪ̇̈ሬ። 5 ዪና̇ ኢዝፌ̈ኒ ኣሳ ኢርጺን ጊላ̇ዶ̈ራ ጴች ኦቲርቃ ሶ̈ላ̈ሬ። ጊላ̇ ታሞ ጴች ባስ ዎዛ̈ርፌ̈ን ሚቻ̇ ይሳ̈ርኮ ቆፒ̇ብቴ። 6 ኢርጺንር ታማፌ̈ኔ። ኢዛ ኢ̈ት ባዝባር ኩማር ኣሳ ጋልዳ ዎ̈ ባዜ። ኣስ ቄ̈ሬ፣ ማ ና̈ሳ ዬሊንቲኖምፖ̇ ኤ̈̇ር ኦ̈ኖ ኦ̈ሲን ኢ̈ሳ̇̈ሬ። ፌ ቆማ̇ባር ጋ̈ና̇ማ ጋርታ ጌላር ሚጫ̇ ያ̈ሬ። 7 ማ̈ታባዝ ጌይዛ ዎይ፥ ኣፋ ፋሪዝ ካፋር ማ̈ቆ̇ ሳ̈ዝ ጋልዳ ዬ̇ዝ ባዝኬ ዋ̈ ጋርታ̇ ዶኢዝ ኮቺ̇ንት ዎይ ኣሲ ኢንታ̇ ሴ̈ሪ ማሂንዶ̈ኒ፥ 8 ኢርጺን ሴ̈ሪ ማሂዝ ኣሲ ኦ̈ናካር ባዬ̇። ኢዛ ኣስ ዎ̇ዝ ጋ̈ላ̇ ኢዝ ጋርታ ኩሚኖ ሼም̇ፓ̇ር ዶኣባሶ ኢ̈ታ ባዜ። 9 ኑ ኑ ኢርጺንንባራ ጎዳ̈ዲኬ ጾ̈ሳ̇̇ ባ̈ባ ጋላቲ̈ሬ፤ ማ ኢዝባር ማሃሪ̈ ጾ̈ሳ̇̇ ፌ̈ና ማይጺሳር ኮቺ̇ኖ ኣሳን ባ̈ዲ̇̈ሬ። 10 ፔቲ̇ ኖ̈ና ጋርታ̇ፖ ኣንጃኬ ባ̈ዲኬ ኬስኪ̈̇ሬ። ቴ ኢሺንታ̇ን! ዪኒ̇ፌ̈ን ዎታንዳ̇ብ ኮሺ̇ባ̈ሴ̈። 11 ፔቲ̇ ዋ̈ ኣ̈ፍ ጋርታ̇ፖ̇ ኮሽ̇ ዋ̈ኬ̈ ኢ̈ት ዋ̈ ኬስኪ̇̈ራ? 12 ቴ ኢሺንታ̇ን! ዎሎ ኦች ኣ̈ፍ ዎይ ኦቺ̇ ሉ̈ቃ ካጻ̇ንዳብ ዳንዳኢ̈ራ̈? ዪና̇ ኢዝፌ̈ኒ ኡሽኪንቲባ̈ሶ ኢ̈ት ዋ̈ ጋርታፖ̇ ኡሽኪንቲዝ ኮሽ̇ ዋ̈ ኬስኪባ̈ሴ̈። ኣፎ̈ ኤራኬ ኣላሚን ዓኒ̇ ጋልዶ ኤራ 13 ዪንታ̇ ጋርታ̇ፖ ኤራ ማ̈ቂ̇ኖ̈ ኣሲ ኦ̈ኖ? ዎኮ ና̈ሳ ዪ̈ዲ ፌ̈ና ዪርክ ዎታርኬ ኤራባር ኦ̈ኖ ኦ̈ሲንዶ ፌ ኮሽ̇ ዶኢንባር ቤይሳ ጋ̈ቤ። 14 ዪንታ ጋርታ̇ ኢ̈ት ቂና̈ታኬ ዎይ ባዝ ታ̈ብ ማ̈ቆ̇̈ ጌይዝ ባዝ ዎኮ̈፥ ዪኒ̇ፌ̈ኖ ቆፊን ኤ̈̇ር ኦቲርቃፒ̇ቴ፤ ኪንን ኪን ባዬ̇̈ ጋ̈ፒ̇ቴ። 15 ዪኒ̇ፌ̈ኖ ኤሪንዳ ኣፋ ጾ̈ሳ̇̇ ጋልዳ̇ፖ ጊዳካ̇ዬ። ኢዛ ዓኒ̇ ኣላሚን ጋልዳ̇ፖ ኣሳ ጋልዳፖኬ ኢ̈ታ ኣያ̇ና ጋልዳፖ̇ ዬ̈ሬ። 16 ቂና̈ታኬ ዎይ ባዚ ታ̈ብ ማ̈ቆ̇ ጌይዝ ባዚ ዎ ቤስ̇ ጋልዳ̇ ኢና ዋች̇ኬ ኢ̈ታ ኦ̈ሶ ዪባ̈ሴ። 17 ኣፋ ጾ̈ሳ̇̇̈ፖ ማ̈ቂ̇ኖ ኤሪን ኢዛ ቲ̈ኒታር ጌ̈ሼ̇፤ ኢናፖ̇ ሳሪቲ ኮያዚንዶ፣ ዳንዳኣዚንዶ̇፣ ኪ̈ቲንታዚንዶ፣ ማ̈ሪቲኬ ኮሽ̇ ኦ̈ሳባር ኩሚኖንዶ፣ ፋጊቲኬ ማይጺስ ባዮ̇ንዶ። 18 ኣሳ ጊዳ̇ ሳሪቲባር ዬ̇ዝ ኣሲ ጾ̈ሳ̇̇ ቲ̈ን ፌ̈ቦ ኮሽ̇ ማ̈ቂ̇ኖ ኦ̈ስ ሺ̈ሺ̈ሬ። |