ዓይ 2 - ኦራ ጫ̈ቃ ማጻ̈ፋዱራ ቦንቺ̇ ዎርባያ ሌቃ̇ንዳብ ኮሺ̇ባ̈ሴ 1 ቴ ኢሺንታ̇ን! ዪንቲ̇ ቦንቺ̇ንቲ̇ኖ ጎዳ ዬሱ̈ስ ክርስቶ̈ሳ ኣማ̇ኒዛኮታ̇ቦ̈ ፔታ̇ና ፔታ̇ና̈ፖ ሺ̈ሬ ዪዝ ጋ̈ካ̇ይዶ̈ሪ ኣስ ዎይ ዎልፌ̈ን ቤቂ̇ብቴ̈። 2 ዎርቃ ፌ ኩሽታ ኣ̈፥ ኮሽ̇ ኣፊላ ማኢ ዎቲኖ ኣሲ ዪንቲ ሺ̈ቂኖ ቤስ̇ ዬዬጌይን፤ ማ ማ̈ላ̇ ኣፊላ ማኢኖ ፔቲ ዎርባያ ዬዬጌይን፤ 3 ኮሽ̇ ኣፊላ ማኢኖ̈ዳ ቦንቺ̇ ኢያ ኮሽ̇ ኩልማ ጋልዳ ዶኣቤ̈ ጋ̈ሪ፥ ዎርባያ ማ̈ላ̇ ኣፊላ ማኢኖ̈ዳ “ኔ ጌዳ ኣ̈̇ር ኤቃ̇ቤ̈ ዎይ ጋርስ ኣ̈̇ር ቤስ̇ ኮያር ዶኣቤ” ጌዬጌይን 4 ዪና̇ ዪንታ̇ ጊዳ̇ ዎል ዎልኣ ፋጊቲ ጊዳካ̇ያ̈? ኢ̈ት ቆፊባር ኩማር ፋራ̇ዲዛንፌ̈ን ማ̈ቂ ጊዳካ̇ያ? 5 ዶሲንቲ̇ኖ ቴ ኢሺንታ̇ን! ዪኖ̇ ሲስኪብቴ̇፤ ጾ̈ሲ̇ ፌ̈ና ካዝ ኣሳንቦ̈ ኢማ̇ንዳ ጌይኖ̈ ካ̈ቲቲን ኤካ̇ምፔ̈ንኬ፥ ኣማ̇ናባር ዱር ማ̈ቃ̇ምፔ̈ኒ፥ ዓኒ̇ ኣላሚን ጋልዳ ዎ ዎርባያን ማራጻካያ? 6 ዪንቲ̇ ዎርባያን ሌቂ̇̈ሬ̈፤ ዪንታ̇ ዋዪዛንኬ̈ ፊርዳ̇ብ ዪንታ̇ ሺ̈ሺ̈ዛን ዱራን ጊዳካ̇ያ̈? 7 ቦንቺ̇ንቲ̇ኖ̈ ዪንታ̇ ጎዳ ሱምን ቆ̈ዛን ኢንታ ባያ? 8 ጾ̈ሳ̇̇ ቃ̈ላ ጋልዳ “ኔ ኔ̈ና ካዚንዲፌ̈ኒ ኔ ላጋ̇ ካቤ” ጋ̈ዚንዲፌ̈ኒ ጾ̈ሳ̇̇ ሂጊ̇ን ዪንቲ̇ ፎቴጌይን ኮሽ̇ ኦ̈ኔ። 9 ፔታ̇ና ሌቂ̇ ፔታ̇ና ቦንቺ̇ ዎቴጌይን ዪ̈ ናጋራ። ጾ̈ሳ̇̇ ሂጊ̇ንባሬ ኪ̈ቲንታ̇ካ̇ዮ̈ ኣስፌ̈ን ፋይዲንቲ̈ሬ። 10 ኣባ ጌይን ጾ̈ሳ̇̇ ሂጊ̇ን ዎይ̈ንቦ ኪ̈ቲንታ̇ሪ̈፥ ፔታ̇ኒምቦ̇ ኪ̈ቲንታ̇ካ̇ይ ኣቴ̇ጌይንዶ ዎይንቦ ኪ̈ቲንታካ̇ዮ̈ዲፌ̈ን ፋይዲቲ̈̇ሬ። 11 ኦሎላፔ ጌይኖ ጾ̈ሳ̇̇̈ዲ ዎፓ̇ራር ጌይኔ̈። ኔ̈ኒ ኦሎላፔ ጋ̈ዝ ሂጊ̇ምቦ̇ ኪ̈ቲንታ̇ ሙታ̇ዶ̈ራ ኣስ ዎፔ̇ ጋ̈ዝ ሂጊ̇ምቦ̇ ኪ̈ቲንታ̇ካ̇ይ ኣቴ̇ጌይንዶ̇ ኔ̈ኒ ጾ̈ሳ̇̇̈ቦ ኪ̈ቲንታካ̇ዬ። 12 ዪንቲ̇ ሶ̈ሊርዶራር ማ̈ቂ̇ን ፔቲ̇ ባዝ ኦ̈ርዶሪ፥ ናጻ ኬሲ̇ዝ ጾ̈ሳ̇̇ ሂጋ̇ ዪንታ̇ ጋልዳ ዓኒ ፊርዳዚን ኤሪ ሙታ̇ዶ̈ር ኦ̈ብቴ̇። 13 ኣባ ጌይን ኣስ ማ̈ሪባ̈ሶ ኣሲ ኢ̈ብ ማ̈ሪቲ ቤዪ ኢ ጋልዳ ፋራ̇ዲንቲ̈ሬ፤ ኣስ ማ̈ሪዝ ኣሲ ፊርዳ ቃም̇ ኣባካር ኢ̈ጪ̇ባ̈ሴ። ኣማ̇ናኬ ኮሽ̇ ኦ̈ሳኬ 14 ቴ ኢሺንታ̇ን! ፔቲ̇ ኣሲ “ቴ ጾ̈ሳ̇̇ ኣማ̇ና̈ሬ” ጌዪሙታ̇ ኮሽ̇ ኦ̈ሳ ኦ̈ባ̈ስኮ ኢ ኣማ̇ኒን ኢያ ኣ ማ̈ዳ̈̇ራ? ዪኒ̇ፌ̈ኖ ኣማ̇ኒን ኢያ ፋንዳብ ዳንዳኣ̈ራ? 15 ፔቲ̇ ኣሲ ማጫ̇ ማ̈ቆ̇ ዎይ ኣቲና፥ ሙይዝ ባዝኬ ማኢዝ ባዝ ኢንታ̇ብ ባዪኮ፥ 16 ዪንታ ጋርታ̇ፖ ፔታ̇ና̈ዲ ኢንታ̇ብ ማኢዝ ባዝ ዎይ ሙይዝ ባዝ ኢማ̇ካ̇ይዶር ሜላ̇ “ሳሮ ሉኪ̇ብቴ̇! ዪንታ̇ ዛ̈ካፖ̇ ጋ̈ቤ! ሙዪ ሚሽኪ̇ብቴ̈! ጋ̈ር ሚሼጌይን ኢንታ̇ ኣ ማ̈ዳ̇̈ራ? 17 ዪና̇ ኢዝፌ̈ኒ ኮሽ̇ ኦ̈ሳባር ቤንታካ̇ዮ̈ ኣማ̇ኖ ፌቆማ̇ብ ዓይቂ̇ኖ̈ ባዜ̈። 18 “ኔ̈ብ ኣማ̇ና ዎ፤ ታ̈ቦ ኮሽ̇ ኦ̈ሲ ዎ̈” ዪዝ ጌይዝ ኣሲ ዎኮ̈ “ኔ ኣማ̇ኒን ኦ̈ሲ ቤዪ ታ̈ና ቤይሳቤ̈፤ ታ̈ናሬ ታ ኣማ̇ኒን ኮሽ̇ ኦ̈ሳባር ኔ̈ና ቤይሳንዳ̇” ኢ̈ክ ጋ̈ሬ። 19 ፔቲ̇ ጾ̈ሲ̇ ዎን ኔ ኣማ̇ና̈ሬ፤ ዪ̈ ኮሼ̇፤ ዎቲናካር ዪኒ̇ፌ̈ኖ ኣማ̇ኒንዶ̇ ኢ̈ታ ኣያ̇ናንር ኣማ̇ኒ̈ሬ፤ ማ ኢ̈ጫ̇ራር ጋንዲ̇̈ሬ። 20 ኣን ና̈ሳ ዳሻ̈ዶ! ኦ̈ሳ ባዮ̇ ኣማ̇ኒን ኣባካር ማ̈ዳ̇ባሶን ኤራንዳ̇ብ ኮያ̈ራ? 21 ኑ ባ̈ባ ኣብራሃ̈ሞ ፌ ናኣ ዪሳ̈ቃ ጾ̈ሳ̇̇̈ቦ ዣ̈ርሻ ሺ̈ሺ̇ኖ ኬሊ̇ ዪና̇ ኮሽ̇ ኦ̈ሲምባ̇ር ባያ̈ ጺ̇ላ̇̈ ጌዪ ጼ̈ጊንቲኖ̈ዲ? 22 ዪኒ̇ባራ ኢ ኣማ̇ኒንዲኬ̈ ኢ ኮሻ̇ ኦ̈ሲንዳ ዎልኣ ኦ̈ ሙታ̇ ቤንቲኔ̈። ኢ ኦ̈ሲንዳ̇ ኢ ኣማ̇ኒን ፎቲ ማ̈ሲኔ። 23 ጾ̈ሳ̇̇ ቃ̈ላ ጋልዳ “ኣብራሃ̈ሚ ጾ̈ሳ̇̇ ኣማ̇ኒዴ፤ ኢ ኣማ̇ኒንዳ̇ር ኢ̈ቦ ጺ̇ላ̇ ማ̈ቃ̇ር ፋይዲንታዴ̈” ጌዪ ጻ̈ፊንቲ̇ኖ ቃ̈ላ ፎቲንቲዴ̈። ኢያሬ ጾ̈ሳ̇̇ ኣሴ̈ ጌይንቲዴ። 24 ዪዚ ኣሲ ኣማ̇ናባር ሙታ̇ ጊዳካ̇ይዶ̈ን ኦ̈ሳባር ዎልኣ ጺላ̇ ማ̈ቃዚን ቤቃ̇ር ባያ̈። 25 ማ ዪና̇ ኢዝፌ̈ኒ ራ̈ባ ጋ̈ዝ ቡድኒንዳ̇ ሜ̈ዛብ ኪ̈ቲንታ̇ር ዬይኖ ኣሳን ሞካ̇ ኤካ̇ራ̈ ባዪሳር ሜላ ጎይባር ሚሺኖ̈ኮታ̇ቦ̈ ኢዛ ፌ ኦ̈ሲንባራ ጺላ̇ ጌያ ፋይዲንታካ? 26 ካሳ ኬስኪ̇ኖ̈ፖ ዓኒ ኣሲ ዓይቂ̇ኔ̈ ጋ̈ዚንዲፌ̈ኒ፥ ኮሽ̇ ኦ̈ሳ ባይ ኣማ̇ኒንዳ̇ ዓይቂ̇ኖ̈ ባዜ̈። |