ኢብ 7 - ኦራ ጫ̈ቃ ማጻ̈ፋቄ̈ሳ ማልካጻ̈ዲቃ 1 ማልካጻ̈ዲቂ ሳ̈ሌማ ካታሚንቦ ካ̈ቲኬ ዎይፖ ሾክ̇ ጌይኖ ጾ̈ሳ̇̈ቦ ቄ̈ሳ፤ ዪ ማልካጻ̈ዲቂ ኣብራሃ̈ሚ ካ̈ቲንታን ኦሊ ጋማሪ ማ̈ቃዚምባራ ጎይም ጋልዳ ዬላ̇ሪ ኢያ ኣንጂዴ። 2 ኣብራሃ̈ማሬ ፌ ዲጚኖ ዎይ ባዝ ጋልዳ ታጳ ኩሽ ጋልዳፖ ፔቲ̇ ኩሽ ኬሳ̇ሪ ኢ̈ብ ኢሚ̇ዴ፤ ማልካጻ̈ዲቃ ጋ̈ዚን ኢ ሱምን ቢርሺቺን ፔታ̇ኒንዳ “ጺሊቲ ካ̈ቴ” ጌንቴ፤ ሜሊንዳ “ሳ̈ሌማ ካ̈ቴ” ዎይ “ሳሪቲ ካ̈ቴ” ጌንቴ። 3 ማልካጻ̈ዲቂ ኢ̈ብ ኤሪንቲ̇ኖ ባ̈ባ ዎይ ኢንዶ ዎይ ዜር ባዬ፤ ኢ ዬሊንቲ̇ኖንዳሬ ዓይቂ̇ኖንዳሬ ኣ̈ንታ̇ኮ ኤሪንቲ̇ዝ ባዚ ባዬ፤ ዪ ማልካጻ̈ዲቂ ጾ̈ሳ̇ ናኣ ዬሱ̈ሳ ሚሳ̇̈ሊ ማ̈ቃ̇ሪ ሜናቦ ቄ̈ሳ̈ ማ̈ቃ̇ር ዶኢ̈ሬ። 4 ዪ ና̈ሳ̈ዲ ዎዛርፌ̈ን ጴችኮ ቤቂ̇ብቴ፤ ሜላ ኣቲ̇ን ኢስሬ̈ላ ዜርን ዎይንቦ ባ̈ባ ማ̈ቂ̇ኖ ኣብራሃ̈ሚ ካ̈ታ̇ር ዲጚኖባዝ ጋልዳፖ ታጳ ኩሽ ጋርታ̇ፖ ፔቲ̇ ኩሽ ኬሳ̇ሪ ኢሚ̇ኔ። 5 ዪን ቄ̈ሳ̈ ኦ̈ሳ ኦዝ ሌዊ ዜርን ዎርዣ ጋልዳፖ ዎይ ፌ ኢሺንታ̇ን ኣብራማ ዜርን ጋልዳፖ ታጳ ኩሽ ጋልዳፖ ፔቲ̇ ኩሽ ኤካ̇ምፔን ሂጊ̇ን ኢንታ̇ብ ኪ̈ቲ̇ኔ። 6 ዪ ማልካጻ̈ዲቂ ሌዊ ዜር ጊዳካ̇ይካሬ ኣብራሃ̈ማ ጋልዳፖ ታጳ ኩሽ ጋልዳፖ ፔቲ̇ ኩሽ ኤኪ̇ኔ፤ ማ ጾ̈ሲ ታስፋ ቃ̈ላ ኢ̈ብ ኢሚ̇ኖ ኣብራሃማ ኣንጂዴ። 7 ኣንጂዛ̈ዲ ኣንጂን ኤኪ̇ዛ̈ፖ ሺዛ ኤሪንቲ̇ኖ ባዜ። 8 ፔቲ̇ ጎይባራ ቤቃ̇ምባራ፥ ታጳ ኩሽ ጋልዳፖ ፔቲ̇ ኩሽ ኤኪ̇ዛን ዓይቂዝ ኣሳን፤ ማ ሜላ ጎይባራ ቤቃ̇ምባራ፥ ታጳ ኩሽ ጋልዳፖ ፔቲ̇ ኩሽ ኤኪ̇ዛ̈ዲ ሼምፓባር ማ̈ቃ̇ር ዶኢዛ ማልካጻ̈ዲቃ። 9 ዪና̇ ኢዝፌ̈ኒ ኣስራ̈ታ ኤኪ̇ዛ ሌ̈ዊ ፌ ቆሚ̇ን ኣብራሃ̈ማ ጎይባራ ታጳ ኩሽ ጋልዳፖ ፔቲ̇ ኩሽ ጪጊ̇ኔ ጋ̈ንዳብ ዳንዳኢ̈ሬ። 10 ኣባ ጌይን ማልካጻ̈ዲቂ ኣብራሃ̈ማ ዬላ̇ምባራ ሌ̈ዊ ቢርት ዬሊንታካ̇ዬ፥ ፌ ባ̈ባ ኣብራሃ̈ማ ቡቅ ጋርታ ዎ። 11 ዪዚ ዎርዣ̈ቦ ሂጋ̇ ኢሚንቲ̇ኖ̈ዲ ሌ̈ዊ ቄ̈ሲቲን ጎይባራ፤ ዪን ሌ̈ዋን ቄ̈ሲቲንዳ ፎቲ ማ̈ቃ̇ር ቤንቲ̇ኖኮ ዎን ኣ̈ሮና ቄ̈ሲቲን ኣታ̇ራ ማልካጻ̈ዲቃ ቄ̈ሲቲንዲፌ̈ኒ ቄ̈ሲቲ ኢ̈ብ ዎ ሜላ ቄ̈ሳ ዬ̈ንዳብ ኮሺባ̈ስዶን። 12 ቄ̈ሲቲ ኦ̈ሲን ላሚንቴ̇ጌዪን ሂጊ̇ንዳር ላ̈ሚንታ̇ንዳብ ኮሻ̇̈ሬ። 13 ዪ ዎይ ኢባዝ ሶ̈ሊንቲ̇ኖ̈ ቄ̈ሳ̈ዲ ሜ̈ላ ዜር፤ ዪን ዜርን ጋርታፖ ኦ̈ናካር ዣ̈ርሻ ቤሲ̇ንኮ ኡካ̇ሪ ኦ̈ኖ ኣሲ ባዬ̇። 14 ኑ ጎዳ ዬሱ̈ሲ ዪሁዳ ዜር ጋርታፖ ዬሊንቲ̇ኖን ኤሪንቲ̇ኖ ባዜ፤ ማ̈ቂ̇ናካሬ ሙ̈ሶ ቄ̈ሲቲ ኦ̈ሳባዝ ሶ̈ሊ̈ርዶሪ ዪሁዳ ዜር ባዝ ሶ̈ሊኖ ባዚ ኣባካር ባዬ̇። ክርስቶ̈ሳ ቄ̈ሲቲንዳ ማልካጻ̈ዲቃ ቄ̈ሲቲንዲፌ̈ኒዬ 15 ኑ ሶ̈ሊኖ ባዚን ዓና̇ ዓት ሺ ኮሺንቻ ኤሪንታ̈ሬ፤ ኣባ ጌይን ማልካጻ̈ዲቂፌኖ ሜላ ቄ̈ሳ ቤንቲ̇ኔ። 16 ኢ ቄ̈ሳ ማ̈ቂ̇ኖንዳ ዓይቃ̇ር ዪባ̈ሶ ሼምፓ ዎልቃ̇ባርዶኬ ኢ ዜር ጋርታፖ ኢያ ዬሊ̇ኖ ዎጋባር ጊዳካ̇ዬ። 17 ጌ̈ሻ̈ ማ̈ጻፋ ጋልዳ፥ “ማልካጻ̈ዲቃ ቄ̈ሲቲንዲፌ̈ኒ፤ ኔ̈ኒ ሜናብ ቄ̈ሳ ማ̈ቃ̇̈ሬ” ጋ̈ር ኢባዝ ማርኪቲኔ። 18 ሚኖ ኪ̈ታን ማ̈ዲባ̈ሶ ባዝ ማ̈ቂ̇ኖኮታቦ ኣቲ̇ኔ። 19 ሙ̈ሳ ሂጊ̇ንዳ ኦ̈ናካር ፎቲ ማሃንዳብ ዳንዳኣካ̇ዬ፤ ዓት ኑ̈ኒ ጾ̈ሳ̇ኮ ኡኪ̇ዝ ሺ ኮሽ ታስፋ ኑ̈ብ ኢሚ̇ንቲኔ። 20 ዪና̇ ቄ̈ሲቲንዳ ጾ̈ሲ ጫ̈ቃካ̇ይዶን ማ̈ቂ̇ኖባዝ ጊዳካ̇ዬ፤ ዓኒ̇ፖ ቲ̈ን ቄ̈ሳ ማ̈ቂ̇ኖን ጫ̈ቃቤይ ቄ̈ሳ ማ̈ቂ̇ኔ። 21 ዬሱ̈ሲ ቄ̈ሳ ማ̈ቂ̇ኖ̈ዲ፥ “ጎዳ̈ዲ ኢ̈ኮ ‘ኔ̈ኒ ሜናብ ቄ̈ሳ’ ጋ̈ር ጫ̈ቂኔ፤ ፌ ጌይኖን ላሚ̇ባ̈ሴ” ጋ̈ሪ ጫ̈ቂ̇ኖንዲፌ̈ኒዬ። 22 ዪና̇ ጫ̈ቂን ጊሻ̇ቦ ዬሱ̈ሲ ዎይፖ ኣ̈ዝ ጫ̈ቂምቦ ዋ̈ሳ ማ̈ቂ̇ኔ። 23 ቄ̈ሶ ፌ ኦ̈ሲን ጋልዳ ሜናብ ዶኣካ̇ይፌ̈ኒ ዓይቃ ኢያ ካያዚንኮታ̇ቦ ሚን ቄ̈ሳ ማ̈ቂ̇ኖን ዎይሊን። 24 ዎቲናካር ዬሱ̈ሲ ሜናብ ዶኢዛ ማ̈ቂ̇ኖኮታ̇ቦ ኢ ቄ̈ሲቲንዳ ላ̈ሚንታ̇ባሴ። 25 ዪ̈ኮታቦ ኢ ኢንታ ጊሽ ̇ጪጛሽ ማ̈ቃ̇ር ጌሻንዳቦ ሜናብ ሼምፓባር ማ̈ቃ̇ር ዶኢዛኮታቦ ኢ ጎይባራ ጾ̈ሳ̇ኮ ዬይዛን ዎይ ዉርሲ ፋንዳብ ዳንዳኢ̈ሬ። 26 ዪ̈ፌን ጌ̈ሽ፣ ኢ ጋልዳ ማ̈ዛ̈ ባዮ፣ ዪርጭ ጋ̈ር ጌ̈ዥጊኖ̈ዳ ናጋራንቻን ጋልዳፖ ጎቲ̇ኖዳ፣ ኣፋፖ ፉዳ ሾክ̇ ጌይኖ ቄ̈ሳ ኣላቃ ኑ̈ብ ኮሺ̇̈ሬ። 27 ኢ ሜላ ቄ̈ሳ ኣላቃንፌ̈ኒ ቲ̈ኒታር ፌ ናጋሪንቦ፥ ዎሃ ዎርዣ ናጋራ̈ቦ ዎይ ጋላስ ዣርሻ ሺ̈ሻ̇ንዳብ ኮሺ̇ባ̈ሴ፤ ኢ ፌ̈ና ዣርሻ ማሃር ኣ ኢሚ̇ኖ ኬል̇ባራ ኢንታ ናጋሪምቦ ማ̈ቂ̇ዝ ባዝ ፔቲ̇ ቶህ ዎይ ባዝ ውርሲኔ። 28 ሂጎ̇፥ ዳ̈ቡራንዳብ ዳንዳኢዝ ኣሳን ቄ̈ሳ ኣላቃ ማሃር ጋዲ̇̈ሬ፤ ዎቲናካሬ ሂጋ̇ፖ ዎሃ ዬይኖ ጫ̈ቃ ቃ̈ሊንዳ ሜናብ ፎቲ ማ̈ቂኖ ጾ̈ሳ̇ ናኣ ዬሱ̈ሳ ቄ̈ሳ ኣላቃ ማሂኔ። |