ኢብ 5 - ኦራ ጫ̈ቃ ማጻ̈ፋ1 ቄ̈ሳ ኣላቃ ጌይዛ ዎይ ኣሳን ጊዳ̇ፖ ማራ̇ጺንታ̇ሪ ኢንታ ናጋሪን ጊሽ ጾ̈ሳ̇̈ቦ ኢሚ̇ዝ ባዝ ኢማ̇ንዳብኬ ኢ̈ብ ዣ̈ርሻ ሺ̈ሻ̇ንዳቦ ሹ̈ሚንቲ̇̈ሬ። 2 ዪ ቄ̈ሳ ኣላቃ̈ዲ ፌ ቆሚ̇ንቦ ናጋራ ኦ̈ባ̈ሶ ኣስ ማ̈ቃካ̇ዮኮታቦ ኤራ ኢንታ̇ብ ባዮ̇ ኣሳንቤኬ ባሊቲ̇ዛንቦ ሚጪንታ̇ንዳብ ዳንዳኢ̈ሬ። 3 ኢ ጋልዳር ማ̈ቂ̇ን ናጋራ ዪባ̈ሶኮታ̇ቦ ሜላንቦ ሙታ̇ ጊዳካ̇ይዶን ፌ ኦ̈ኖ ናጋሪንዳር ኣቶ̇ ጌይንታ̇ምፔ̈ኒ ዣ̈ርሻ ሺ̈ሻ̇ንዳብ ቤይሲ̈ሬ። 4 ኣ̈ሮናፌ̈ን ጾ̈ሲ ጼይጊኖ ኣስ ማ̈ቃካይ ኣቴ̇ጌይን ኦ̈ናካር ፌ ፌ̈ብ ዪኖ̇ ቦንቺ̇ን ዲጛንዳብ ዳንዳኢባ̈ሴ። 5 ዪዚ ዪና ̇ኢዝፌ̈ኒ ክርስቶ̈ሲ ቄ̈ሳንቦ ኣላቃ ማ̈ቃ̇ዝ ቦንቺ̇ን ፌ ሲልጣ̈ናባር ኤካካ̇ዬ፤ ዎቲናካሬ ኢ ቄ̈ሳንቦ ኣላቃ ማ̈ቃ̇ዝ ቦንቺ̇ን ዲጚኖንዳ፤ “ኔ̈ኒ ታ ናኤ፤ ታ ዓታ̇ብ ኔ̈ና ዬሊኔ” ጌይኖ ጾ̈ሳ̇̇ ጋልዳፖ። 6 ማ ሜላ ቤሳ̇ ጋልዳ̇ሬ ጾ̈ሳ̇̈̇ዲ፥ “ማልካጻ̈ዲቂ ቄ̈ሳ̈ ማ̈ቂ̇ኖንዲፌ̈ኒ፥ ኔ̈ናር ሜናቦ ቄ̈ሳ” ጌይሬ። 7 ዬሱ̈ሲ ኣስ ማ̈ቃ̇ሪ ሳ̈ዝ ጋልዳ ዶኢኖ ኬል̇ባራ ዓይቃ ጋልዳፖ ኢያ ፋንዳብ ዳንዳኢዛ ጾ̈ሳ̇̈ኮ ጴች ውይሳባርኬ ዎይሊን ዬ̈ፊባር ኢያ ዎ̈ሲ̇ዴ፤ ኢ ፌ̈ና ዪርክ ዎቲኖኮታ̇ብኬ ኢ̈ብ ኪ̈ቲንቲ̇ኖኮታ̇ቦ ጾ̈ሳ̇̇̈ዲ ኢ ዎ̈ሲን ሲስኪ̇ዴ። 8 ኢ ጾ̈ሳ̇̇ ናኢ ማ̈ቂ̇ናካሬ ፌ ኤኪ̇ኖ ሜቲ̇ን ጋርታ̇ ጾ̈ሳ̇̇ብ ኪ̈ቲንታ̇ዚን ታማ̈ሪዴ። 9 ዬሱ̈ሲ ፌ ኦ̈ንዳብ ኮሻ̇ዝ ባዚን ኦ̈ ፎቲኖፖ ዓኒ ኢ̈ብ ኪ̈ቲንቲ̇ዛን ዎይን ሜና ፋቲ ዲጛምፔ̈ኒ ጎይ ኢንታ̇ብ ፊርቂ̇ዴ። 10 ማ ጾ̈ሳ̇̇̈ዲ ማልካጻ̈ዲቃ ቄ̈ሳ ማሃሪ ሹ̈ሚኖንዲፌ̈ኒ ኢያ ቄ̈ሳ ኣላቃ ጋ̈ሪ ሹ̈ሚዴ። ኣሲ ፌ ኣማ̇ኒን ኣሻካዮ̈ዲፌ̈ኒ ዞሪኖ ዞራ 11 ባዝ ዪኒ̇ ጎይ ኑ ሶ̈ሊዝ ባዚ ዎይሊን ዎ ዎቲናካሬ ዪንታ̇ብ ኤሊ̇ ጌላባሶኮታቦ ዪንታ̇ብ ሶ̈ላር ጌልሳንዳቦ ዎይሊን ዋ̈ዪሬ። 12 ዎን ዓኖ̇ ዪንቲ̇ ኣስ ታማ̈ርሲዝ ኣስ ማ̈ቃ̇ንዳብ ኮሺ̇̈ርዶን፥ ዪንቲ̇ ማ̈ቃ̇ሪ ጎዳ ቢርት ኣማ̇ኒኖ ኣሲ ጾ̈ሳ̇ ቃ̈ሊን ጋልዳፖ ታማ̈ራዝ ቲሚርቲ̇ንዶ ቢርት ኣሲ ዪንታ̇ ታማ̈ርሳምፔ̈ን ኮዪ̈ሬ፤ ዪ̈ፌን ማ̈ቄ̇ጌዪን ዪንታ̇ቦ ኣቂሊ ናኢፌ̈ን ማ̈ ኡሽኪ̈ርዶኬ ሚን ፊ̈ሺ ሞ̈ንዳብ ዳንዳኣካ̇ዬ። 13 ማ̈ ሻ̈ሺንቺ̇ንቲዛ ዎይ ኣቂሊ ናኢ ማ̈ቂ̇ኖኮታቦ ኮሽ̇ ባዚን ዎኒ̇ኮ ዎይ ኢ̈ት ባዚን ዎኒ̇ኮ ኮሺንቺ̇ ኤሪባ̈ሴ። 14 ሚን ፊ̈ሽ ሞ̈ንዳብ ዳንዳኢዛን ዶምዛ ኣሳን፤ ኣባ ጌይን ኢንቲ̇ ቲ̈ናፖ ኤ̈̇ሪ ኮሽ ባዚን ዎኒ̇ኮ ዎይ ኢ̈ት ባዚን ዎኒ̇ኮ ኮሺ̇ንቺ ኤሪዛኮታ̇ቦ። |