ኢብ 4 - ኦራ ጫ̈ቃ ማጻ̈ፋ

¹ ዪ̈ኮታ̇ቦ ኢ ኑ̈ብ ኢማ̇ንዳ ጌይኖ ሼምፓ̇ዝ ቤሲ̇ን ጋርታ ኑ ጌላዚን ኤሪንቲ̇ኖባዝ ማ̈ቂ̇ኖኮታ̇ቦ ዪንታ ጋርታፖ ኦ̈ናካር ቤስ̇ ኢና ጌላካ̇ይ ኣታካ̇ይፌ̈ን ኑ ኑ̈ና ና̈ጊስቶ።

² ኢንቲ ሲስኪ̇ኖ ዎጛላ ቃ̈ሊንዶ ኑ̈ናር ሲስኪ̇ኔ፤ ዎቲናካሬ ኢንቲ̇ ፌ ሲስኪ̇ኖ ቃ̈ሊንዶ ኣማ̇ናባራ ኤካካ̇ዮኮታቦ ኢንታ ማ̈ዳካ̇ዬ።

^3-4 ታብዚ ቃሚ̇ን ጎይ ፔቲ̇ ቤስ̇ ጋልዳ “ታብዚ ቃሚ̇ንባራ ጾ̈ሳ̇̈ዲ ኦ̈ሳ ዎይ ጋልዳፖ ሼምፒ̇ኔ” ጌይዛኮታ̇ቦ ጾ̈ሳ̇ ኦ̈ሳ̈ዲ ዓኒ̇ ኣላሚን ኮቺንቲ̇ኖፖ ኤ̈ሪ ውሪኔ፤ ማ̈ቂ̇ናካሬ ኢ ጌይርዶሪ፥ “ ‘ቴ ኢንታ ጌልሳዝ ሼምፓዝ ቤሲ̇ን ውርሲ ኢንቲ ጌሊባሴ’ ጋ̈ራ ታ̈ኒ ጎይላር ጫ̈ቂ̇ኔ” ጌይኖንዲፌ̈ኒ፤ ዓታ̇ር ማ̈ቂ̇ን ኑ ኣማ̇ኒኖ ኣሳን ጾ̈ሲ̇ ኑ̈ብ ኢማ̇ዝ ሼምፓዝ ቤሲ̇ን ጋርታ ኑ̈ኒ ጌሊ̈ሬ።

⁵ ማ ዓታ̇ር ዓና̇ ቤሲ̇ን ጋልዳ ማ̈ቃ̇ሪ፥ “ቴ ኢንታ̇ብ ኢማ̇ዝ ሼምፓ ቤሲ̇ን ጋርታ̇ ኢንቲ̇ ዉርሲ ጌሊባ̈ሴ” ጌይሬ።

⁶ ዪን ቲ̈ን ዎጛላ ቃ̈ሊን ሲስኪ̇ኖ ኣሳን ኣማ̇ናካ̇ይ ኣቲ̇ኖኮታ̇ቦ ጾ̈ሳ̇ ኢማ̇ዝ ሼምፓ ቤሲ̇ን ጋርታ ጌላካ̇ይ ኣቲ̇ኔ። ዎቲናካሬ ሼምፓ ቤሲ̇ን ጋርታ ኢና ጌሊዝ ፔቲ̇ ፔቲ̇ ኣሳን ዎ።

⁷ ዪ̈ዳሬ ዓኒ̇ፖ ቲ̈ን ጌዪንቲ̇ኖንዲፌ̈ኒ፥ “ዪንቲ̇ ዓታ̇ብ ኢ ጋ̈ዚን ሲስኪ̇̈ርዶሪ፥ ዪንታ̇ቡ̈ዲን ዛቢሳፒ̇ቴ” ጋ̈ሪ ጾ̈ሲ ዎይሊን ላይፖ ዎሃ ዳ̈ዊታ ኖ̈ናባር “ዓታ̇̈ቦ” ዪዝጌዪ ጼይጊንቲ̇ዝ ቃም̇ ኢሚ̇ንቲ̇ኖንባራ ኤሪንቲ̇ኔ።

⁸ ጾ̈ሲ ኢንታ̇ብ ኢማ̇ንዳ ጌይኖ ሼምፓ ቤሲ̇ን ጋርታ ኢያሶ ዎን ኢንታ ጌልሲኖኮ ጾ̈ሲ ማ̈ቃ̇ሪ ሜላ ቃም̇ ባዝ ሶ̈ሊባ̈ስዶን።

⁹ ጾ̈ሲ ታብዚ ቃሚ̇ንባራ ሼምፒ̇ኖንዲፌ̈ኒ ጾ̈ሳ̇ ዎርዣ̈ባሬ ሼምፒ̇ዝ ኬሊ̇ ዎ።

¹⁰ ጾ̈ሲ ፌ ኦ̈ሲን ዎይን ጋልዳፖ ሼምፒ̇ኖንዲፌ̈ኒ ጾ̈ሳ̇ ኢሚ̇ዝ ሼምፓ ቤሲ̇ን ጋርታ ጌሊዝ ኣሲ ዎይ ፌ ኦ̈ሲን ጋርታ̇ፖ ሼምፒ̇̈ሬ።

¹¹ ዪ̈ኮታ̇ቦ ኦ̈ናካር ኣሲ ኣሳን ሴካን ኣማ̇ናካ̇ይ ኣታ̇ሪ ኬዲ̇ኖንዲፌ̈ኒ ኬዳ̇ር ኣታካ̇ዮ̈ዲፌ̈ኒ ሼምፓ ቤሲ̇ን ጋርታ ጌላንዳቦ ሚ̈ጚስቶ።

¹² ጾ̈ሳ̇ ቃ̈ላ̈ዲ ዎይ ጋላስ ዶኢዛ̈ዳ፤ ማ ኦ̈ዛ̈ዳ፤ ናምኢ ጎይን ዎይ ሌ̈ፊንቲ̇ኖ ማሽፌ̈ን ኣጪንቼ፤ ኣሳ ሼምፓኬ ኣሳ ኣያ̇ናኬ ማ ኣሳ ሻሽ̇ኬ ኣሳ ሜቃ ፋጊዝ ዲራስ ቃጺ̇̈ሬ፤ ኣሳ ቡ̈ዳ ጋርታ ዎ ኢናን̇ኬ ቆፋን ዎይ ቤቂ̇ ኤራር ፋራ̇ዲ̈ሬ።

¹³ ጾ̈ሳ̇̇ ቲ̈ን ጋርታ ኣ̈ቺንቲ̇ኖ ባዚ ኣባካር ባዬ̇፤ ኑ̈ኒ ሶ̈ላር ማሃንዳብ ኮሻ̈ዝ ኢ ቲ̈ኒን ጋርታ̇፥ ዎይ ባዚ ፋል̇ኬ ካላ̇ ማ̈ቃ̇ር ቤንቲ̇̈ሬ።

ጴች ቄ̈ሳ ኣላቃ̈ ዬሱ̈ሳ

¹⁴ ዪዚ ኣፋ ጾ̈ሳ̇ ቲ̈ን ሉኪ̇ኖ ቄ̈ሳንቦ ዎይ ጴቻ ኣላቃ፥ ጾ̈ሳ̇ ናኣ ዬሱ̈ሲ፥ ኑ̈ብ ዎኮታ̇ቦ ኑ ኣማ̇ኒን ሚ̈ንር ኤ̈ስቶ።

¹⁵ ኑ̈ብ ዎ ቄ̈ሳ ኣላቃ̈ዲ ኑ ዳ̈ቡርሲምባራ ኑ̈ብ ሚጪንቲ̇ባ̈ሶ ጊዳካ̇ዬ፤ ኢ ዎይ ባዝባራ ኑፌ̈ን ፋታ̇ኒንቲ̇ኔ፤ ዎቲናካሬ ኣባካር ናጋራ ኦ̈ካዬ።

¹⁶ ዪዚ ኑ̈ኒ ማ̈ሪቲ ኤካ̇ንዳብኬ ኑ̈ብ ኮሺ̇ኖ ኬል̇ባራ ኑ̈ና ማ̈ዲ̇ዛ ጾ̈ሳ̇ ኮሺቲን ዲጛንዳቦ ኢ ኮሺቲን ቤንታ̇ዝ ኢ ቲ̈ኒንኮ ሺ̈ቂስቶ።