ኢብ 3 - ኦራ ጫ̈ቃ ማጻ̈ፋዬ̈ሱ̈ሲ ሙ̈ሳፖ ሺሬ 1 ዪ̈ኮታ̇ቦ ጾ̈ሲ ዪንታ̇ ጼይጊኖ ቴ ኢሺንታ̇ን! ኑ ሶ̈ላዝ ኣማ̇ኒንቦ ጾ̈ሲ̇ ኢያ ኪ̈ታ̇ር ሚሺኖ ቄ̈ሳ̈ን ኣላቃ̈ ዬ̈ሱ̈ሳ ቆፒ̇ብቴ። 2 ሙ̈̈ሶ ጾ̈ሳ̇̇ ኬ̈ ጋርታ ፌ ኦ̈ሳ ዎይባር ኣማ̇ኒንቲኖንዲፌ̈ኒ ዬሱ̈ሳር ፌ̈ና ሹ̈ሚኖ ጾ̈ሳ̇̇̈ቦ ኣማ̇ኒንቲ̇ኔ። 3 ኬ̈ ኬ̈ጺ̇ዝ ና̈ሳ̈ዲ ኢ ኬ̈ጺ̇ኖ ኬ̈ንፖ ሺ ቦንቺ̈ ኢብ ዎንዲፌ̈ኒ ዬሱ̈ሳባሬ ሙ̈ሳፖ ሺ ቦንቺ̈ ዶኣንዳብ ኮሺ̇ዛ ማ̈ቃ̇ር ቤንቲ̇ኔ። 4 ኬ̈ ጌይዛን ዎይ ኬ̈ጺዝ ኣሲ ዎ፤ ዎቲ̈ናካሬ ዎይ ባዝ ኮቺ̇ኖ̈ዲ ጾ̈ሴ̇። 5 ሙ̈ሶ̈ ጊዳክ ሶ̈ሊንቲ̈ዝ ባዛንቦ ማ̈ርኪቲሙ̈ታዶሪ ጾ̈ሳ̇̈ ኣ̈ሊን ጋርታ ዎይ ኣማ̈ኒንቲ̇ኖ ኣይላ ማ̈ቂ̇ኔ። 6 ክርስቶ̈ሲ ዎቲናካር ጾ̈ሳ̇ ኬ̈ሳ̇ ጋርታ ኣማ̈ኒንቲኖዲ ጾ̈ሳ̇̈ቦ ናኢፌ̈ን ማ̈ቃ̈ሪዬ፤ ኑ̈ናሬ ኑ ኣማ̇ኒንታ̇ዚንዲኬ ኑ ኬርፋዝ ኑ ታስፊንዶ ሚ̈ንክ ኤጌይንዶ ኑ ኢ̈ብ ኬ̈። ጾ̈ሳ̇ ዎርዣ̈ቦ ኢሚንቲ̇ኖ ዞራ 7 ዪዚ ጌ̈ሻ̈ ኣያ̈ና ጋ̈ዚንዲፌን፤ “ዪንቲ̈ ኢ ጋ̈ዚን ዓታ̇̈ብ ሲስኪ̇̈ርኮ፥ 8 ዚቃንታ̇ ባራሃ ጋርታ ዪንቲ̇ ታ̈ና ፋታ̇ኒኖባራ፤ ዪንቲ̈ ዉጫባር ኦ̈ኖንዲፌ̈ን፤ ዓት ዪንታ̇ ቡ̈ዲን ዛብሳፒ̇ቴ። 9 ኢና ዪንታ̇̈ ባ̈ቢንታን ታ̈ና ፋታ̈ኒዴ፤ ታባር ኦሊንቲ̈ዴ፤ ኦይዲ ታጳ ላይ ቴ ኦ̈ኖን ኢንቲ ቤቂ̈ዴ” ጌይሬ ጾ̈ሳ̇̈ዲ። 10 “ዪዚ ዪን ዓቴ̇ቤሮ ናኣን ቴ ጎይላዴ፤ ‘ኢንታ̈ ቡዲን ዎይ ጋላስ ባሊ̇ታ̈̇ሬ፤ ቴ ጎይሚንዳሬ ኢንቲ ኤራካ̇ዬ’ ጋ̈ዴ።” 11 ዪኮታ̈ቦ፥ “ ‘ታ̈ኒ ኢንታ̇ብ ኢማዝ ሼምፓ ቤሲን፤ ዉርሲ ኢንቲ ጌሊባ̈ሴ!’ ጋ̈ራ ቴ ጎይሊምባ̇ር ጫ̈ቂ̈ኔ።” 12 ታ ላጋ̇ን! ዪንታ̇ ጊዳ̇ ኦ̈ናካሬ ሜናብ ዶኢዝ ጾ̈ሳ̇̈ ጋልዳፖ ጎቲሲ ፋጊዛ̈ዳ ኢ̈ት ኣማ̈ኒባሶ ቡ̈ዳ̈ ዶኣካዮዲፌ̈ን ና̈ጊንቲ̇ብቴ። 13 ዎቲናካሬ ዪንታ̇̈ ጋርታ ኦ̈ናካሬ ናጋራባር ባሊታ̇ሪ ኪ̈ቲንታካ̇ይ ኣታካ̇ዮ̈ዲፌ̈ን ዓታ̇ቦ ጊያ̈ቦ ጋ̈ካ̇ይዶ̈ር ዎይ ጋላስ ዎል ዎልኣ ሚ̈ንብቴ። 14 ቲ̈ኒታር ኑ̈ብ ዎ ኣማ̇ኒን ውርሲ ሚ̈ን ኤ̈ጌይን ኑ̈ናር ክርስቶ̈ሲ ኤኪ̇ኖ ቤሲ̇ን ኤኪ̇ዛን ማ̈ቂ̇ሬ። 15 ዪ̈ዳሬ ጌ̈ሻ̈ ማጻ̈ፋ ጋልዳ፤ “ዪንቲ̈ ኢ ጋ̈ዚን፤ ዓታብ ሲስኪ̈ርኮ፤ ዪና̇ ኢዝባራ ዪንቲ̇ ዉጫባር ኦ̈ኖንዲፌ̈ኒ፤ ዪንታ̇ ቡዲን ዛቢሳፒቴ” ጋ̈ር ሶ̈ሊንቲ̇ኖንዲፌ̈ኔ። 16 ዪን ኢንቲ ቃ̈ሊን ሲስኪኖፖ ዓኒ ዉጪቲኖን ኢንቲ ኦናዶኔ? ኢንቲ ሙ̈ሶ ኢንታ ቲ̈ኒሙታ̇ ጊብጻፖ ኬስኪ̇ኖንባያ? 17 ጾ̈ሳ̇̈ዳ ኦይዲ ታ̈ጳ̈ ላ̈ይ ኩም ጎይሊሲሙታ ጋምኢኖን ኢንቲ ኦ̈ናዶኔ? ኢንቲ ናጋራ ኦ̈ኖን ኢንታ ኣሂን ባራሃ ጋርታ ኬዳ̇ር ኣቲ̈ኖንባያ? 18 ማ̈ ዪን ኪቲ̈ንታብዳ ጌዪ ኢጺ̇ኖንፖ ሜላ “ቴ ሼምፒ̇ዝ ቤሲ̇ን ጌሊባ̈ሴ” ጋ̈ሪ ጫ̈ቂ̇ኖን ኦ̈ባዶኔ? 19 ዪዚ ጌላንዳ̇ብ ዳንዳኣካ̇ዮን ኢንቲ ኣማ̇ናካይ ኣቲ̇ኖኮታ̇ቦ ማ̈ቂ̈ኖን ኑ ቤቂ̈̇ሬ። |