ኢብ 2 - ኦራ ጫ̈ቃ ማጻ̈ፋዪንቲ̇ ሲስኪ̇ኖ ኪን ቲሚርቲ̇ን ኮሺንቻ̇ር ና̈ጊብቴ 1 ዪ̈ኮታ̈ቦ ኑ ሲስኪ̇ኖ ኪን ቲሚርቲ̇ን ጋልዳፖ ሾርት ጋ̈ር ኬዳካ̇ዮ̈ዲፌ̈ን ኑ ሲስኪ̇ኖ ባዛን ኮሺንቻ̇ር ና̈ጋንዳብ ኮሺ̇̈ሬ። 2 ኪ̈ታንቻ̈ ጎይባራ ሶ̈ሊንቲ̈ኖ ቃላ̈ ኪን ማ̈ቂኖኮ፤ ማ ዪና ቃ̈ሊን ሌቂ̇ ኢዝቦ ኪ̈ቲንቲ̇ባ̈ሶ ኣሲ ኢ̈ብ ኮሻ̇ዝ ቂጣ̈ቲን ኤኪ̇̈ርኮ፥ 3 ዪዚ ኑ̈ኒ ዪ̈ዲፌ̈ኖ ጴች ፋቲ̈ ጎይን ቦቲጚዝባዝ ማ̈ቄ̇ጌይን ዎዛርታር ፊርዳ ጋልዳፖ ቡቲ̇̈ራ? ዪና̇ ፋቲ̈ን ቲ̈ኒታር ኣሳብ ኤርሲኖ̈ዲ ጎዳ̈ዳ፤ ማ ኢ ጋልዳፖ ሲስኪ̇ኖ ኣሳንሬ ኢዛ ኪን ማ̈ቂ̇ኖን ኑ̈ና ቤይሲኔ። 4 ጾ̈ሲ ማ ማላ̇፣ ጋራ̇ሚሲዝ ባዚ፣ ዱማ ዱማ ታ̈ሚ̇ራ̈ታን ኦ̈ሙታ̇ዶ̈ሪ ኢ ፌ ኮዪኖንዲፌ̈ኒ ፋጋር ኢሚ̇ኖ ጌ̈ሻ̈ ኣያ̈ና ኪልሳን ጎይባራ ኢንታ ማርኪቲ̈ን ኪን ማ̈ቂ̇ኖን ኤርሲ̇ኔ። ኣሳ ዜር ዎይ ፋቲ ጎይ ቲ̈ኒዛ̈ዲ ዬሱ̈ሳ 5 ጊዳክ ቢርት ዬ̈ሬ ጌዪ ኑ ሶ̈ሊሙታ ዎ ኣላሚንዶ ጾ̈ሲ ኪታንቻ̈ን ጻና ኣቂሳካ̇ዬ። 6 ጌ̈ሻ̈ ማጻ̈ፋ ጋርታ ፔቲ̇ ቤሳ̇ ጋልዳ፤ “ኔ̈ኒ ኢ ባዝ ቆፓ̇ንዳቦ ኣስ ጌይዝ ባዚ ኣብዛ? ዎይ ኔ̈ኒ ኢ ባዝ ቆፓ̇ንዳቦ ኣሳ ዜር ጌይዝ ባዚ ኣብዛ? 7 ኔ̈ኒ ኪ̈ታንቻ̈ንፖ ኢያ ጊላ̇ ጉ̈ዴ፤ ቦንችኬ ጋላታ̈ኬ ኢ̈ብ ኢማ̇ዴ፤ [ኔ ኩሽባር ኦ̈ኖ ባዛን ጋልዳ ኢያ ሹ̈ማዴ፤] 8 ኔ̈ኒ ዎይ ባዚ ኢ̈ብ ጻና̈ ኣቃምፔን ዎታ̈ዴ” ጌይሬ። ጾ̈ሲ ዎይ ባዚ ኣሳ ናኣብ ጻና̈ ኣቃ̈ምፔን ዎቲ̈ርዶሪ ኢ̈ብ ጻና̈ ኣቂሳካ̇ይዶር ኣሺ̇ኖ ባዚ ኣባካር ባዬ̇። ዎቲናካሬ ዓት ዎይ ባዚ ቢርት ኢ ጻና̈ ኣቃካ̇ዬ። 9 ዎቲናካሬ ኪ̈ታንቻ̈ንፖ ጊላ̇ ጉ̈ጺ̇ኖ ዬሱ̈ሲ፥ ጾ̈ሳ̇̈ ካንንባራ ኑ ዎይንጊሻቦ ዓይቃ ሜታ ኤኪ̇ኖኮታ̈ቦ፥ ጾ̈ሲ ኢያ ቦንቺሺኖን ኑ ቤቂ̇ኔ። 10 ዎይ ባዚ ኢባርኬ ኢ̈ቦ ኮቺንቲ̇ኖ ጾ̈ሳ̇̈̇ዲ ዬሱ̈ሳ ኣማ̇ኒዝ ኣሳን ዎይ ቦንቺሳንዳቦ ኢንታ ፋቲ ጎይ ቲ̈ኒዛ ዬሱ̈ሲ ሜታባር ፎቲ ማ̈ቃ̇ምፔ̈ን ዎታንዳቦ ኢ̈ብ ኮሺ̇ዴ። 11 ኣስ ጌ̈ሽ ማሂዛ̈ዲኬ ማ ኢባር ጌ̈ሽ ማ̈ቂ̇ዝ ኣሳን ዎልኣ ፔቲ̇ ባ̈ባ ናኤ፤ ዪ̈ኮታ̇ቦ ዬሱሲ “ኢንቲ̇ ቴ ኢሺንታ̇ን” ጋ̈ንዳቦ ዬልቂ̇ባ̈ሴ። 12 ዪኮታ̈ቦ ጌ̈ሻ̈ ማጻ̈ፋ ጋልዳ፤ “ቴ ኔ ሱምን ቴ ኢሺንታንቦ ሶ̈ላንዳ፤ ዎርዣ ጊዳ̇ሬ ዬባር ቴ ኔ̈ና ጋላታንዳ” ጌይሬ። 13 ማ “ታ̈ኒ ኢያ ኣማ̇ና̈ሬ” ጌይሬ፤ ማ “ታ̈ናኬ ጾ̈ሲ ታ̈ብ ኢሚ̇ኖ ናኣንኬ ዎልኣ ዓንሼ” ጌይሬ። 14 ዪን ናኣን ኣሳ ናእ ማ̈ቂ̇ኖኮታ̇ቦ ዬሱ̈ሳር ኢንታ̇ፌን ኣስ ማ̈ቂ̇ዴ፤ ኢ ዪኖ̇ ዎቲ̈ኖንዳ ፌ ዓይቂ̈ን ጎይባራ ዓይቃ̈ ጋልዳ ሲልጣና̈ ዎ ሴ̈ጣና ይሳ̇ንዳቦ፤ 15 ማ ፌ ዶኢ ላይን ዎይ ዓይቃብ ኢ̈ችባራ ኣይላ ማ̈ቃር ዎን ዓይቃ ኣይሊቲ ጋርታፖ ኬሳ̇ንዳቦ። 16 ኣባ ጌይን ዬሱ̈ሲ ኪ̈ታንቻ̇ን ጊዳካ̇ይዶን ኣብራሃ̈ማ ዜርን ማ̈ዳ̇ንዳብ ኮዪኖን ኤሪንቲ̇ኖ ባዜ። 17 ዪ̈ኮታ̇ቦ ዎይ ባዝባራ ኢ ፌ ኢሺንታንፌን ማ̈ቃንዳቦ ኢ̈ብ ኮሺ̇̈ኔ፤ ዪኒ̇ ጎይባራ ኢ ኣሳ ናኣን ናጋራ ኣቶ̇ ጋ̈ንዳቦ ኦ̈ዝ ኣማ̇ኒንቲ̇ኖዲኬ ኣሳብ ኣቶ̇ ጌይዝ ቄ̈ሳ ኣላቃ ማ̈ቂ̇ዴ። 18 ኢ ፌ ቆሚ̇ን ፋታ̇ኒንቲ̇ኖኬል̇ባራ ሜታ ኤኪ̇ኖኮታቦ ፋታ̇ኒንቲ̇ዝ ኣሳን ማ̈ዳ̇ንዳብ ዳንዳኢ̈ሬ። |