ኢብ 12 - ኦራ ጫ̈ቃ ማጻ̈ፋጾ̈ሳ̇̈ዲ ኑ ባ̈ባ 1 ዪዚ ዪንፌ̈ኖ ዎይሊን ማርካን ሻ̈ራፌ̈ን ኑ ቡጊዲምባር ዎኮታ̇ቦ ኑ̈ብ ቶ̈ፊፌ̈ን ማ̈ቂ̇ኖ ባዛን ዎይ፥ ኑ ጋልዳ ኑ̈ና ባቂ̇ ኤ̈ኖ ናጋሪን ፋይሪ ኑ ቲ̈ን ዎን ዎን ሚ̈ጛር ዎጺ̇ስቶ። 2 ኑ ዎጻ̇ዚንዳሬ ኑ ኣማ̇ኒምቦ ዋና̇ ቲ̈ኖዳሬ ጋስ ውርሲዳሬ ኢያ ማ̈ቂ̇ኖ ዬሱ̈ሳ ቤቃ̇ሪዬ፤ ኢ ፌ ቲ̈ኖ ኢያ ና̈ጊኖ ኡፋይሲንኮታቦ ማስቃላ ጋልዶ ዬ̈ላ̇ ዓይቂን ኣባካር ማሂ ፋይዳካይዶር ዪና̇ ሜቲንዲኬ ዓይቂን ጋርዣሪ ጾ̈ሳ̇̇̈ቦ ኡሻች ጎይ ዶኢ̈ዴ። 3 ዪዚ ቦ̈ሳካ̇ይዶርኬ ታስፋ ቃጻካ̇ይዶሪ፥ ናጋራንቻ̇ንቺ ኢያ ኢጻ̇ዚምባራ ዪኖ̇ ዎይ ጋርዢኖ ዬሱ̈ሳ ቤቂ̇ብቴ። 4 ዪንቲ ናጋራ ጋማንዳ̇ብ ኦሊንታ̇ዝ ኦሊን ጋርታ ቢርት ሱ̈ ውሊንቲ̇ዝ ዲራስ ኦሊንታካ̇ዬ። 5 ጾ̈ሲ̇ ፌ ናእፌ̈ን ማሃሪ ዪንታ̇ ዞሪኖ ዞሪን ዪንቲ ቦቲጚኔ፤ ኢ ጌይርዶሪ “ታ ናኣዶ! ጎዳ ጎይሊን ሌቃ̇ፔ፤ ኢ ጎይሌጌይን ታስፋ ቃጻፔ፤ 6 ጎዳ̈ዲ ፌ ካዛ ዓጊ̇̈ሬ፤ ፌ ናኢፌን ማሃር ቤቂ̇ዛ̈ዳ ጎይሊሬ” ጌይኔ። 7 ጾ̈ሲ̇ ዪንታ ፌ ናኣንፌ̈ን ፋይዲዛኮታ̇ቦ ኢ ጎይሊን ጋርዣር ኤኪ̇ብቴ፤ ባ̈ቦ ጎይሊባ̈ሶ ናኢ ዎ? 8 ኢ ናእ ማ̈ቂ̇ኖን ዎይ ኤካ̇ዝ ጎይሊን ዪንታ̇ር ኤካካ̇ይ ኣቴ̇ጌይን ዪንቲ ሜላ ኣሳ ጋልዳፖ ዬሊንታ̇ር ዬይኖ ናኢዶኬ ኢ ናኢ ጊዳካዬ። 9 ማ ዪኒ̇ ጋልዳ ኑ ዎይንቦ ኑ̈ና ጎይሊዝ ሳ̈ዝ ጋልዳ ኑ̈ና ዬሊኖ ባ̈ባ ዎ፤ ኑ ኢንታ ቦንቺ̈ርባያ? ዓት ዪዶኮ ኑ ሼምፓባር ዶኣንዳቦ ኑባ̈ባ ኣፎ̈ቦ ዎርዛፌ̈ን ኪ̈ቲንታንዳቦ ኮሺ̇̈ራ! 10 ኢንታ̇ብ ኮሽ̇ ማይጻር ቤንቲ̇ኖንዲፌ̈ኒ ሙቃ̇ ጊዛብ ኑ̈ና ጎይሊኔ፤ ዎቲናካሬ ኢ ጌሽ̇ ማ̈ቂ̇ኖንዲፌ̈ኒ ኑ̈ናር ጌ̈ሽ̇ ማ̈ቃ̇ምፔ̈ን ኑ̈ቦ ጌዪ ኑ̈ና ጎይሊ̈ሬ። 11 ጎይሊ ዎይ ፌ ኬሊ̇ምባራ ሺን̇ ዎቲ̈ርዶኬ ኡፋይሲዛ ማይጺባ̈ሴ፤ ዎቲናካሬ ዎሃ ማ̈ቃ̇ሪ ኢዝባር ሎሲኖ ኣሳንቦ ኣ̈ፍ ካጻ̇̈ሬ ዪና̇ሬ ጺሊ̇ቲኬ ሳሪቲኬ። ዞራኬ ጎይልኬ 12 ዪ̈ኮታ̇ቦ ሊ̈ቂኖ ዪንታ̇ ኩሺንዲኬ ዳቡሪኖ ዪንታ̇ ዎልቂ̇ን ሚ̈ንብቴ። 13 ዎቢ̇ኖ ቶሂ ፋጻምፔ̈ንዶኬ ውርሲ ኢ̈ታር ኣታካ̇ዮ̈ዲፌ̈ኒ ዪንቲ̇ ዬዝ ጎይን ኮሺንቺ̇ብቴ። 14 ጌ̈ሺቲ ባይ ማ̈ቄጌይን ኦ̈ናካር ጎዳ ቤቃ̇ንዳብ ዳንዳኢባሶኮታ̇ቦ ኣስ ዎይባር ሳሪቲባር ዶኢብቴ፤ ጌ̈ሺቲባር ዶኣንዳቦ ሚ̈ጚብቴ። 15 ዪንታ̇ ጋርታፖ ኦናካር ጾ̈ሳ̇̈ ኮሺቲ ኢ ጋልዳፖ ጉ̈ጻካ̇ዮ̈ዲፌ̈ን ና̈ጊንቲ̇ብቴ፤ ማ ዪንታ̇ ጋርታ̇ፖ ኦ̈ናካር ጫ̈ጚዝ ኣ̈ፍ ካጺ̇ዝ ሚፌ̈ን ማ̈ቃ̇ሪ ዪንታ̇ ዋ̈ዪካዮ̈ዲፌ̈ንኬ ማ ዪንታ̇ ጋርታ̇ፖ ዎይሊንን ቄካዮዲፌ̈ን ና̈ጊንቲ̇ብቴ። 16 ዪንታ̇ ጋርታ̇ ኦ̈ናካር ዓት ዪንዳ ኢና ሙይን ውራዝ ፊ̈ሺምቦ ጋ̈ሪ ፌ ባይሪቲን ዎ̈ጚኖ ጾ̈ሳ̇̇ ቦንቺ̇ባ̈ሶ ኤ̈ሳፌ̈ን ቦ̈̈ዛ ማ̈ቂኖ ኣሲ ዶኣካይፌ̈ኒ ና̈ጊንቲ̇ብቴ። 17 ዎሃ ማ̈ቃ̈ሪ ኤ̈ሶ ኣንጃ ኤካ̇ንዳ ኮዪን ካዪንቲ̇ኖን ዪንቲ ኤሪ̈ሬ፤ ዬኪ̇ሙታዶሪ ኮዪናር ዲጛንዳብ ዳንዳኣካዬ፤ ማ̈ሪቲ̇ር ጌላንዳብ ኢ̈ብ ማ̈ቃካ̇ይዬ። 18 ዪንቲ ኢስሬ̈ላ ናኣንፌ̈ኒ ኣሲ ኩሽባር ኤንዳብ ዳንዳኢዛ ታማ ኢ ጋል ኣፋ ኤይቲ̇ዝ ሲ̈ና ኢንዲን ጋልዳ ዬላ̇ካ̇ዬ፤ ሚ̇ንኮ፣ ቃ̈ይቃዪንኮ፣ ውርጊንኮ ዬላ̇ካ̇ዬ። 19 ሞ̈ይዛ ጊርሲ ሲስኪ̇ንታ̇ዚንኮ ዎይ ጾ̈ሳ̇ ቆ̈ን ሲስኪንቲ̇ዝ ቤሲ̇ን ዪንቲ ዬላ̇ካዬ ዪና ኢ ቆ̈ን ሲስኪ̇ኖ ኣሳን “ዓኒ̇ፖ ጌዳ ጉጃር ሜላ ሶ̈ላፖ” ጋ̈ሪ ጌሺኔ። 20 “ሜሆ ኢንዲን ዎሼጌይን ሹችባር ቆጺንቲ ዓይቆ” ጋ̈ዝ ኪ̈ቲን ኢንታ̇ብ ጴች ዴ̈ጺ̇ኔ። 21 ኢና ቤንቲ̇ኖ ባዚንዳ ዎይሊን ኢ̈ቺ̇ዛኮታቦ ሜላ ኣቲን ሙ̈ሶ፤ “ቴ ኢጫዴ፤ ታ̈ና ጋንዲሳዴ” ጌይኔ። 22 ዪንቲ ዎቲናካሬ ጺዮ̈ና ኢንዲንኮ ኡኪ̇ኔ፤ ኢዛሬ ሜናብ ዶኢዛ ጾ̈ሳ̇̈ ካታ̈ማ፥ ኣፎ ዬሩሳ̈ላሞ፤ ኡፋይስባር ሺቂኖንኮ፥ ዎይሊን ሙኩላ ማ̈ቂ̇ዝ ኪ̈ታንቻንኮ ዪንቲ ኡኪ̇ኔ። 23 ኢንታ ሱ̈ምን ኣፋ ጻ̈ፊንቲኖን ዎል ፔቲ̇ ቤስ̇ ሺ̈ቂኖ ኡስ̇ ናኣን ሺ̈ቂንኮ፥ ማ ዎይ ፊርዲዛ ጾ̈ሳ̇̈ኬኬ ኢንታ ጋልዳ ማዛ ባዮ̇ ኣፋ ዎ ጌ̈ሽ ኣሳንኮ ኡኪ̇ኔ። 24 ኦራ ጫ̈ቂምቦ ጊዳ̇ ጋርታ ኢጊንዝ ኣስ ማ̈ቂ̇ኖ ዬ̈ሱ̈ሳኮ ማ ኣ̈ቤ̈ላ ሱ̈ምፖ ሺ ኮሽ̇ ታስፋ ኢማ̇ዚንኮ ዉሊንቲ̇ኖ ኢ ሱ̈ንኮ ዪንቲ ኡኪ̇ኔ። 25 ዪንታ̇ብ ሶ̈ሊዝ ጾ̈ሳ̇ ዪንቲ̇ ሲስኪባዳ̈ ጋካዮዲፌ̈ኒ ና̈ጊንቲ̇ብቴ፤ ዪን ጾ̈ሳ̇̈ዲ ኣሳ ጎይባራ ሳ̈ዳ̇ፖ ሶ̈ላምባ̇ራ ሲስካ̇ብዳ ጌይኖን ቡ̈ታካ̇ይ ኣቴ̇ጌይን፥ ኑ̈ኒ ኣፋፖ ኑ̈ብ ሶ̈ሊንታ̇ዚን ሲስካካ̇ይ ኣቴ̇ጌይንዶ ኑ ዎዛ̈ርታር ቡ̈ቲ̇ራ! 26 ዚቃንታ ዪና̇ ኢዝባራ ኢ ቃ̈ላ̈ዲ ሳዚን ኤንኢሲኔ፤ ዓት ዎቲናካሬ “ሳ̈ዚን ሙታ̇ ጊዳካ̇ይዶን ፔቲ ቶህ ኣፋ ሳ̈ዚንዳር ጉጃ̇ር ቴ ኤንኢሳንዳ” ጋ̈ሪ ቃ̈ላ ጌሊኔ። 27 ዪና̇ “ፔቲ̇ ቶህ ጉጃ̇ራ” ጋ̈ዝ ቃ̈ሊን ኤንኢባሶ ባዛን ሚ̈ጛር ዶኣዚንዶ ኤንኢዛን ዎይ ኮቺንቲ̇ኖ ባዛን ፋካ̇ር ያዚንዶ ቤይሲ̈ሬ። 28 ዪዚ ኑ̈ኒ ኤንኢባሶ ካ̈ቲቲን ኤኪዛኮታቦ ጾ̈ሳ̇̈ ጋላቲስቶ፤ ኢያ ኡፋይሲዝ ጎይባራ ኢያ ቦንቺሙታ ኢ̈ችባር ኢ̈ብ ኦ̈ስቶ። 29 ኣባ ጌይን ኑ ጾ̈ሳ̇̈ዲ ሚቺ̇ዝ ታማፌ̈ኔ። |