ኢብ 11 - ኦራ ጫ̈ቃ ማጻ̈ፋኣማ̇ና 1 ኣማ̇ና ጌይንቲ̇ዛ̈ዲ ኑ ታስፋ ጋዲ̇ኖ ባዚንዶ “ኣዓ ኪን ማ̈ቃ̇̈ሬ” ጋ̈̈ር ና̈ጊዛ̈ዳ፤ ማ ኣ̈ፍባር ቤቂ̇ን ቤንታ̇ባሶ ባዚንዶ ቤንቲዛ̈ዲፌ̈ን ማሃር ፋይዲዛ̈ዳ። 2 ሚኖ ባ̈ቢንታ̈ን ጾ̈ሲ ኢንታ̇ባዝ ማርኪቲኖ̈ዲ ኢንታ ኣማ̇ኒንጊሼ። 3 ኣላሚንዳ ጾ̈ሳ̇ ቃ̈ላባራ ኮቺንቲ̇ኖን ኑ ኤራዚንዳ ኣማ̇ናባራ፤ ዪ̈ኮታ̇ቦ ኣ̈ፍባር ቤንቲ̇ዝ ባዚ ዎይ ኣ̈ፍባር ቤንቲ̇ባ̈ሶ ባዝ ጋልዳፖ ኮቺንቲ̇ኖን ኑ ኤሪ̈ሬ። 4 ኣ̈ቤ̈ሊ ቃዬ̈ሊ ሺ̈ሺ̇̈ኖ ዣ̈ርሺምፖ ሺ ጾ̈ሳ̇̇̈ቦ ዣ̈ርሻ ሺ̈ሺ̇ኖ̈ዲ ኣማ̇ናባራ፤ ጾ̈ሳ̇ዲ ኣ̈ቤ̈ላኮን ዣ̈ርሺን ኡፋይስባር ኤኪ̇ን ኣ̈ቤ̈ሊ ፌ ኣማ̇ኒምባር ጺላ̇ ማ̈ቂ̇ኖን ጾ̈ሲ ኢ̈ብ ማርኪቲዴ፤ ኣ̈ቤ̈ሊ ዓይቂ̇ናካርዶን ኢ ፌ ኣማ̇ኒን ጎይባራ ዓታ̇ር ሶ̈ሊንቲሙታ ዎ። 5 ሄ̈ኖ̈ኪ ዓይቃ ኢያ ዬላ̇ካ̇ይፌ̈ኒ ፉዳ ኣፋ ኤኪንቲ̇ኖ̈ዲ ኣማ̇ናባራ፤ ጾ̈ሲ ኢያ ፌ̈ክ ኤኪ̇ኖኮታቦ ኢ ቤንታካ̇ዬ፤ ጾ̈ሲ ኢያ ኤካዚምፖ ቲ̈ን ኢ ጾ̈ሳ̇ ኡፋይሲ̇ኖን ጾ̈ሲ ኢ̈ብ ማርኪ̇ቲኔ። 6 ኣማ̇ና ባዪዶን ጾ̈ሳ̇ ኡፋይሳ̇ንዳብ ዳንዳኢንቲ̇ባ̈ሴ፤ ጾ̈ሳ̇ክ ሺ̈ቂዝ ኣሲ ጾ̈ሲ ዎንዴኬ ማ ኢያ ቡ̈ዳ ጋርታ̇ፖ ኮዪዝ ኣሳንቦ ኢንታ̇ ጋቲን ኢንታ̇ብ ኢሚ̇ዛ ማ̈ቂኖን ኣማ̇ናንዳብ ኮሺ̇̈ሬ። 7 ቢርት ኣ̈ፍባር ቤንታ̇ካዮ ባዛቦ ጾ̈ሲ ኢ̈ብ ሶ̈ሊኖ ኬል̇ ኖ̈ሂ ጾ̈ሳ̇̇̈ቦ ኢ̈ጫ̇ሪ ፌ ኣ̈ሎ ኣሳን ፋንዳቦ ጎጛ ኮቺ̇ኖንዳ ኣማ̇ናባራ፤ ኖ̈ሂ ኣማ̇ኒምባራ ኣላሚንዳ ናጋራንቻ ማ̈ቂ̇ኖን ኤሪንታራ ፊርዲንቲ̇ኔ፤ ኖ̈ሂ ኣማ̇ናባር ቤንታ̇ዝ ጺሊ̇ቲን ኤኪ̇ዴ። 8 ኣብራሃ̈ሚ ፌ̈ብ ኢሪስታ ማሃር ኤካ̇ዝ ቤሲ̇ንኮ ሉካ̇ምፔ̈ን ጼይጊንቲ̇ኖ ኬል̇ባራ ኢ ዎይዲ ሉኪ̈ርካር ኤራካ̇ይዶር ኣማ̇ናባር ኪ̈ቲንታ̇ር ኬስካ̇ር ሉኪ̇ዴ። 9 ኢባር ዎልኣ ጾ̈ሲ ኢሚ̇ኖ ታስፋ ቃ̈ሊን ኤኪ̇ዛን ዪሳቃፌ̈ንኬ ዓይቆባፌ̈ኒ ታስፋባር ኢሚ̇ንቲ̇ኖ ጋዲን ጋርታ ዛቃ̇ ማ̈ቃ̇ሪ ዱንካ̈ና ጋርታ ዶኢኖንዳ ኣማ̇ናባራ። 10 ኢ ዪኖ̇ ዎቲኖንዳ ጾ̈ሳ̇ዲ ኢ̈ብ ቆፓ̇ር ኮቺ̇ኖ ያባሶ ካታማ ጊዳክ ዲጛንዳቦ ታስፋባር ና̈ጋዚንኮታቦ። 11 ሳ̈ራሬ ኢዝቦ ታስፋ ኢሚ̇ኖ ጾ̈ሳ̇̇̈ዲ ኣማ̇ኒንቲኖ ማ̈ቂ̇ኖን ኤሪኖኮታ̇ቦ ኢዛ ጪጛራ ዬላንዳ̇ብ ዳንዳባሶ ኣስ ማ̈ቂ̇ናካር ዎዳጻ̇ንዳብ ዳንዳኢኖንዳ ኣማ̇ናባራ። 12 ዪ̈ኮታ̇ቦ ዓይቂ̇ኖ ኣስፌ̈ን ፋይዲንቲ̇ኖ ፔታ̇ና ኣብራሃ̈ማ ጋልዳፖ ኣፎ ቤርሳንፌ̈ንኬ ባሃ̈ራ ቡጊድ ጋልዳ ዎ ሻ̈ማፌ̈ን ፋይዲንቲባሶ ዜር ቤንቲ̇ዴ። 13 ዪን ዎይ ጾ̈ሲ ኢንታ̇ብ ኢማ̇ንዳ ጌይኖን ቤኣካ̇ይዶር ፌ ኣማ̇ኒን ና̈ጊኖንዲፌ̈ን ዶኢ̈ርዶር ዓይቂ̇ዴ፤ ዎቲናካሬ ጾ̈ሲ ኢንታ̇ብ ኢማ̇ንዳብ ቃ̈ላ ጌሊኖ ባዛን ጎትዶር ቤቃ̇ሪ ዲጚኖ̈ዲፌ̈ን ፋይዳር ኡፋይቲ̇ዴ። ሳ̈ዝ ጋልዳ ኢንቲ ዛቃ̇ኬ ቤት ማ̈ቂ̇ኖን ኤሪዴ። 14 ዪፌ̈ን ሶ̈ሊዝ ኣሳን ፌዪ ማ̈ቂ̇ኖ ጋዲን ጊዳክ ዲጛንዳብ ና̈ጋዚን ኤርሲ̈ሬ። 15 ዪና̇ ሚን ኢንቲ ኣሻ̇ር ኬስኪ̇ኖን ጋዲን ማ̈ቃ̇ር ቆፒ̇̈ርፌንኮ ዎን ኢና ማ̈ቃር ሉካ̇ንዳብ ዳንዳኢ̈ርዶን። 16 ዓት ዎቲናካሬ ኢንቲ ሺዚን ኣፋ ዎ ጋዲን ቤቃ̇ንዳብ ሹ̈ኒቲ̈ሬ፤ ዪ̈ኮታ̇ቦ ጾ̈ሳ̇ዲ ካታማ ኢንታብ ጊ̈ጊሲኖኮታቦ ኢ “ኢንታ ጾ̈ሴ” ጌይዪንታ̇ር ጼይጊንታ̇ንዳቦ ዬልቂ̇ባ̈ሴ። 17-18 ኣብራሃማ ጾ̈ሳ̇ብ ኪ̈ቲንቲ̈ርኮ ዎይ ኪ̈ቲንቲ̇ባ̈ስኮ ኤራንዳቦ ጾ̈ሲ ኢያ ፋታ̇ኒኖ ኬሊንባራ ኢ ፌ ናኣ ዪሳ̈ቃ ዣርሻ ሹካ̇ንዳብ ሺ̈ሺ̇ኖንዳ ኣማ̇ናባራ፤ ጾ̈ሲ ኣብራሃ̈ማኮ “ኔ ዜር ጼይጊንቲ̇ዛ̈ዲ ዪሳ̈ቃ ጎይባራ” ጌይኔካሬ፥ ታስፋ ቃ̈ላ ኤኪ̇ኖ ኣብራሃ̈ሚ ፌ ናኣ ፔታ̇ና ኢያ ዣርሻ ሹካ̇ንዳብ ጊ̈ጊንቲ̇ኔ። 19 ጾ̈ሳ̇̈ዲ ዪሳ̈ቃ ሜላ ኣቲ̇ን ዓይቃ ጋርታፖ ዲንንዳብ ዳንዳ̇ኢዝ ዎልቃ ኢ̈ብ ዎን ኣብራሃ̈ሚ ኣማ̇ኒኖኮታቦ ዓይቃ ጋርታፖ ዲንዲኖዲፌ̈ን ማሃር ዪሳ̈ቃ ኤኪ̇ዴ። 20 ዪሳ̈ቂ ቢርት ጊዳክ ማ̈ቃ̇ዝ ባዚን ቆፓ̇ሪ ዓይቆ̈ባኬ ኤ̈ሳክ ኣንጂኖንዳ ኣማ̇ናባራ። 21 ዓይቆ̈ቢ ፌ ዓይቃ̇ዝ ቃሚ̇ን ኡካ̇ምባራ ዮ̈ሴፋ ናኣን ዎይ ኣንጃሪ ፌ ጉፊን ጋልዳ ኣጚታር ጾ̈ሳ̇̈ቦ ጎሽቲ̇ኖንዳ ኣማ̇ናራ። 22 ዮ̈ሴፋሬ ፌ ዓይቃ̇ዝ ቃሚ̇ን ኡካ̇ምባራ ኢስሬ̈ላ ናኣን ጊብጻ ጋዳ̇ፖ ኬስኪ̈̇ሬ ጌዪ ሶ̈ሊኖንዳ ማ ኢንቲ ኢ ሜቃን ጊብጻ ጋዳፖ ኤካ̇ር ኬስካምፔ̈ኒ ኢንታ̇ ኪ̈ቲ̇ኖንዳ ኣማ̇ናባራ። 23 ሙ̈ሶ ዬሊንቲ̇ኖንባራ ኢ ባ̈ባ̈ዲኬ ኢ ኢንዲንዲክ ኢ ኮሽ ቆይሲዝ ናኢ ማ̈ቂ̇ኖን ቤቃ̇ሪ ካ̈ታ ኪ̈ቲምቦ ኢ̈ጫካ̇ይዶር ዓይዚ̇ ኣጋን ኢያ ኣ̈ቺ̇ኖንዳ ኣማ̇ናባራ። 24 ሙ̈ሳሬ ዲጪ̇ኖፖ ዓኒ “ፋ̈ሮናብ ናኣ ናእ” ጌዪንታ̇ር ጼይጊንታዚን ኢጺ̇ኖንዳ ኣማ̇ናባራ። 25 ዪ̈ኮታ̇ቦ ኢ ናጋራባር ቤንታ̇ዝ ዎይ ጋላስ ዶኣባሶ ኡፋይሲምፖ ጾ̈ሳ̇ ዎርዣባር ሜታ ኤካ̇ዚን ኮዪዴ። 26 ጊዳክ ፌ ኤካ̇ዝ ጋቲን ቤቂ̇ኖኮታቦ ጊብጻ ጋዶ̇ ቆሊንምፖ ሺ ክርስቶ̈ሳ ጊሻ̇ቦ ጋ̈ሪ ሌቂንታ̇ዚንዳ ሺ ማ̈ቂ̇ኖን ቆፒ̇ዴ። 27 ኢ ካ̈ታ̈ ጎይሊምቦ ኢ̈ጫካ̇ይዶር ጊብጻ ጋዳ̇ፖ ኬስኪ̇ኖንዳ ኣማ̇ናባራ፤ ኣ̈ፍባር ቤንቲ̇ባ̈ሶ ጾ̈ሳ̇ ኣፍባር ቤቂ̇ኖዲፌ̈ን ማ̈ቃ̇ሪ ፌ ቆፊን ጋልዳ ሚ̈ጛር ኤቂ̇ዴ። 28 ኡስ̇ ናኣን ዎንዳብ ኪ̈ቲንቲ̇ኖ ኪ̈ታንቻዲ ኢስሬ̈ላንቦ ኡስ̇ ናኣን ዎካይፌ̈ን ጋ̈ሪ ፋ̈ሲጋ ባ̈ሊን ቦንቺኖንዲኬ ፌ ኣ̈ል ካሪን ሾ̈ንቺ̇ን ጋልዳ ሱ̈ስ ዉርጺኖንዳ ኣማ̇ናባራ። 29 ኢስሬ̈ላ ዎርዣ̈ዲ ዋ̈ ባዮ̇ ሳ̈ዝ ጋልዳ ዬዛ̈ዲፌ̈ኒ ኤርቲራ ባሃ̈ሪን ፊ̈ጚኖንዳ ኣማ̇ናባራ፤ ጊብጻ ጋዶ̇ ኣሳን ኢንታ̇ፌ̈ን ዎቲ̈ሬ ጋ̈ሪ ዎይን ዋ̈ ኢንታ ሙይኔ። 30 ኢስሬ̈ላ ኣሳን ኢያርካ ጋ̈ዝ ካታሚን ኣጺሪን ቡጉዲምባር ታብዛ ቃም̇ ቢሪንቲ̇ኖፖ ዓኒ ኣጺራን ላ̈ሊ̇ኖንዳ ኣማ̇ናባራ። 31 ኦሎላባር ኣቃ ዎን ራ̈ቢ ጋ̈ዚንዳ ኢዝ ጋዲን ጋርታ ሜ̈ዛ ሉኪ̇ኖ ኣሳን ኮሽባር ሞካ̇ ኤኪ̇ኖኮታቦ ጾ̈ሳ̇̇̈ብ ኪ̈ቲንቲባሶ ኣሳንባር ዎልኣ ዓይቃ̇ዚን ጋርታፖ ቡ̈ቲ̇ኖንዳ ኣማ̇ናባራ። 32 ዪዚ ቴ ሜላ ኣብዝ ጋ̈ኖ? ጌ̈ዶና ባዝ፣ ባ̈ራ̈ቃ ባዝ፣ ሳምሶ̈ና ባዝ፣ ዮ̈ፊታሃ ባዝ፣ ዳ̈ዊታ ባዝ፣ ሳ̈ሞ̈ላ ባዝ፣ ናባን ባዛር ዎይ ዪንታ̇ብ ሶ̈ላንዳቦ ታ̈ብ ሳኣ̈ታ ጉጺ̇̈ሬ። 33 ኢንቲ ኣማ̇ናባራ ካ̈ቲንታን ኦላር ጋሚኔ፤ ፌ ኣሳንር ኮሽ̇ ኣቂሲኔ፤ ጾ̈ሲ ኢማ̇ንዳ ጌይኖ ታስፊንዳር ዲጚዴ፤ ዞብ̇ ኖ̈ናር ዪብጺ̇ዴ፤ 34 ታማ ዎልቃር ጋሚዴ፤ ማሻ̇ ጋልዳፓ̇ር ቡ̈ቲ̇ዴ፤ ፌ ዳ̈ቡርሲን ጋልዳፓር ሚ̈ጚዴ፤ ኦልባራር ኢንታ ጋሚዝ ኣሲ ዪዴ፤ ኢንታ ጋዲን ኦላንዳብ ዬይኖ ጻላ̈ታን ዳኪ̇ዴ። 35 ማጫ̇ን ዓይቂ̇ኖ ፌ ዳባ̇ን ዓይቃ ጋርታፖ ዲንዲን ቤቂ̇ዴ። ሜላንሬ ዓኒ̇ፖ ሺ ዲንዳ ዲጛንዳብ ቆፓ̇ሪ ዱማ ዱማ ሜታ ኤኪ̇ዴ፤ ቃሺ ኣ̈ላፖ ኬስካ̇ንዳባር ኮያካ̇ዬ። 36 ማ ሜላን ኣሲ ኢንታ ጋልዳ ቃልዲ ኢንታ ጋራ̇ፊዴ፤ ሜላን ቶሃ ካ̈ቲናባር ቃቺንታ̇ሪ ቃሺ ኣ̈ል ጌሊዴ። 37 ሹችባር ቆጺንቲ̇ዴ፤ ማጋ̈ዛባር ቆ̈ቂንቲ̇ዴ፤ ማሻ̇ባር ዓይቂ̇ዴ፤ ዶሪኬ ዶርቲክ ሻ̈ች ማኣር ዓኒክ ጌዳክ ቢሪንቲ ቢጻ ቤቂ̇ዴ፤ ዎርባያኬ ቤት ማ̈ቃ̇ሪ ዎይሊን ዋ̈ዪዴ። 38 ባራሃ ጋርሳባራ፤ ኢንዳ ጋልባራ፤ ጋዊ ጋርታኬ ዶቻ̇ ጋርታ ዶኢዴ። ኣላሚን ዓና̇ ኢንታ̇ብ ማ̈ቃካ̇ዬ። 39 ዪን ዎይ ኢንታ ኣማ̇ኒንኮታ̇ቦ ጾ̈ሲ ኢንታ̇ብ ማርኪ̇ቲናካሬ ኢንታ̇ብ ኢሚንቲ̇ኖ ታስፊን ቢርት ኢንቲ̇ ዲጛካዬ። 40 ጾ̈ሲ ኑ̈ቦ ሺ ኮሽ̇ ባዝ ኢማ̇ንዳብ ቆፒ̇ኖኮታቦ ኢንቲ ኑባር ማ̈ቃ̇ርዶኬ ፌ̈ብ ሙታ̇ዶር ጾ̈ሲ ኢንታ̇ብ ቆፒ̇ኖ ባዚን ፎቲ ዲጚባ̈ሴ። |