ኢብ 1 - ኦራ ጫ̈ቃ ማጻ̈ፋጾ̈ሳ̇̈ ናኣ̈ዲ ጾ̈ሳ̇ ኪ̈ታንቻ̇ንፖ ሺ̈ሬ 1 ጾ̈ ሚኖ ኬል̇ባራ ዱማ ዱማ ጎይባራ ናባን ኖ̈ናባር ባ̈ቢንታንቦ ዎይሊን ጎይ ሶ̈ሊኔ። 2 ዎቲናካሬ ዓት ዓና̇ ውርሲ ኬሊ̇ን ጋልዳ ዎይ ባዝ ኢ̈ብ ኢሚ̇ዛ ማ ዓና̇ ኣላሚንዳሬ ኢ ጎይባር ኮቺ̇ኖ ፌ ናኣ̈ ጎይባር ማ̈ቃ̇ር ኑ̈ብ ሶ̈ሊኔ። 3 ጾ̈ሳ̇̈ ቦንቺ̇ን ዎዛርፌ̈ን ጴችኮ ቤይሲዛ ኢያ፤ ማ ኢ ዎይ ባዝባራ ጾ̈ሳ̇ ባ̈ባ ማይጺ̈ሬ፤ ኢ ዎልቃባሮ ፌ ቃ̈ላባራ ኣላሚን ሚ̈ንር ኤ̈ኔ፤ ኢ ኣሳ ናጋራ ዎይ ጌ̈ሺ̇̈ኖፖ ዓኒ ጴቻ̈ ጾ̈ሳ̇̈ቦ ኡሻች ጎይ ዶኢኔ። 4 ጾ̈ሳ̇ ኢ̈ብ ኢሚ̇ኖ ሱም̈ዲ ኪ̈ታንቻ̇ን ሱምፖ ሺ ማ̈ቂኖንዲፌ̈ኒ ኢ ፌ ቆሚ̇ንዳሬ ኪ̈ታንቻንፖ ጴች ሺሬ። 5 ጾ̈ሳ̇̈ዲ ኪ̈ታንቻን ጋርታፖ፥ “ኔ ቴ ና̈ኤ፤ ዓ̈ታቦ ቴ ኔና̈ ዬ̈ሊኔ፤” ዎይ “ቴ ኢ̈ቦ ባ̈ባ ማ̈ቃ̇ንዳ ኢያር ታ̈ብ ናኢ ማ̈ቂ̇ሬ” ኦ̈ክ ጌይና? 6 ጾ̈ሲ ፌ ና̈ኣ ኡሳ̇ ኣላሚን ጋልዳ ሚሺ̈ርዶሪ፥ “ጾ̈ሳ̇̈ ኪ̈̈ታንቻን ዎይ ኢ̈ብ ጎሽቶ” ጌይሬ። 7 ጾ̈ሳ̇̇̈ዲ ኪ̈ታንቻን ባዝ ሶ̈ሊ̈ርዶሪ፥ “ኢ ፌ ኪ̈ታንቻን ኣይጊ ማሂ̈ሬ፥ ማ ፌ ኣሽካ̇ራን ታ̈ማ ላፌ̈ን ማሂ̈ሬ” ጌይሬ። 8 ዎቲናካሬ ፌ ና̈ኣ ባዝ ሶ̈ሊርዶሪ፤ “ጾ̈ሳ̇̈ዶ! ኔ ካ̈ቲቲንዳ ሜናብ ዶኣ̈ሬ፤ ኔ̈ኒ ኔ ዎርዣ ጺሊ̇ቲ ጎይባር ቲ̈ናር ኣቂሳ̈ሬ፤ 9 ኔ̈ኒ ጺሊ̇ቲ ካዴ፤ ውጫ ኢጻ̇ዴ፤ ዪኒ̇ ጊሻ̇ቦ ጾ̈ሳ̇̈ ኔ̈ና ኡፋይሲዝ ዛይታ ዲርካሪ፤ ኔ ላ̈ጋን ጋርታፖ ኔና ሾክ̇ ሾክ̇ ዎቲዴ” ጌይሬ። 10 ማ ጾ̈ሳ̇̈ዲ ጌይርዶሪ፥ “ጎዳ̈ዶ! ኔ ቲ̈ኒታራ ሳ̈ዶ̇ ሳ̈ዚን ኮቻ̇ዴ፤ ኣፎ ሳ̈ዚንዳር ኔ ኩሺምባር ኮቻ̇ዴ። 11 ዪን ዎይ ዪ̈ሬ፤ ኔ̈ኒ ዶኣ̈ሬ፤ ኢንቲ̈ ዎይ ኣፊላፌ̈ን ሲሊቲ̈ሬ፤ 12 ኔ ኢንታ̈ ኣፊላፌ̈ን ቁራ̈ሬ፤ ኢንቲ ኣፊላፌን ኦ̈ሂንቲ̈ሬ፤ ኔ ሜናብ ዶኣ̈ሬ፤ ኔ ላይንዳር ውራባሴ” ጌይሬ። 13 ጾ̈ሲ ኪ̈ታንቻ̇ን ጋርታፖ፥ “ቴ ኔ ጻ̈ላ̈ታን ኔ ጻና ኣ̈ዝ ዲራስ፥ ዓይዲ ታ̈ብ ኡሻች ጎይ ዶኣቤ” ኦ̈ክ ጌይና? 14 ዓት̇ ዪዶኮ፥ ኪ̈ታንቻ̈ን ዎይ ፋቲ ዲጚዝ ኣሳን ማ̈ዳ̇ንዳቦ ኪ̈ቲንቲዛ ጾ̈ሳ̇̈ብ ኣይላ ማ̈ቂ̇ኖ ኣያ̇ናን ጊዳካ̇ያ? |