ጋላ̈ታ 6 - ኦራ ጫ̈ቃ ማጻ̈ፋዎልዎልኣ ማ̈ዳ̇ንዳብ ኮሺ̇̈ሬ 1 ቴ ኢሺንታ̇ን! ኣሲ ኦ̈ናካሬ ናጋራባር ኬዴ̇ጌይንዶ̇፥ ዪንቲ̇ ጌ̈ሻ̇ ኣያ̇ናባር ዬ̇ዛን ዪ̈ዲፌ̈ኖ ና̈ሳ̈ዳ ኣሽኪቲባራ ኢያ ማሂብቴ̇። ማ ኔ̈ናር ናጋራ ጋርታ ኬዳካ̇ዮ̈ዲፌ̈ን ኔ ቆሚ̇ን ና̈ጋቤ። 2 ፔታ̇ና ሜላኮን ዴ̈ጺ̇ዝ ቶ̈ፊን ቶ̈ካ̇ጋ̈ቤ፤ ዪንቲ̇ ዪኖ̇ ኦ̈ዚንዳ ክርስቶ̈ሳኮን ሂጊ̇ን ፎቲ̈ሬ። 3 ኦ̈ናካር ኣሲ ኢ ሜላ̈ፖ̇ ሺዝ ባዚ ባይዶ̈ን ፌ̈ና “ቴ ሜላንፖ̇ ሺ̈ሬ” ጋ̈ሪ ቆፔ̇ጌዪን ኢ ፌ̈ና ማቂ̇̈ሬ። 4 ኣሲ ዎይ ፌ ፌ̈ብ ፌ ኦ̈ሲ̇ን ፋ̈ጪ̇ ቤቃ̇ጋቤ፤ ዪኒ̇ፖ̇ ዓኒ ፌ ቆሚ̇ን ሜላ ኣሳንባር ካሚሳር ጊዳካ̇ይዶሪ ፌ ኦ̈ሲን ጋርታ̇ፖ̇ ፌ̈ና ኬርፊሲዝ ባዝ ዲጚ̈ሬ። 5 ኣሲ ዎይ ፌ ቶ̈ፊን ቶ̈ካ̇ንዳብ ኮሺ̇̈ሬ። 6 ጾ̈ሳ̇̇ ቃ̈ላ ታማ̈ሪዝ ኣሲ ኦ̈ናካር ማ̈ቂ̇ን ኮሽ̇ ማ̈ቂ̇ኖ ባዝ ዎይ ፌ ኣስታማ̈ራባር ፋጊንቲ ኤኮ̇። 7 ዪንቲ̇ ዪንታ̇ ቆሚ̇ን ዳሺቻ̇ፒቴ̇፤ ኦናካር ጾ̈ሳ̇ ጋልዳ ቃልዳንዳብ ዳንዳኢባ̈ሴ። ኣሲ ፌ ዜርቂ̇ኖን ኢዞ ማሂ ቴይሲ̇̈ሬ። 8 ናጋራ ኣሲቲን ኡፋይሳ̇ንዳብ ዜርቂዝ ኣሲ ኢዝ ጋርታፖ̇ ዓይቃ ቴይሲ̇ ኤኪ̇̈ሬ፤ ጌ̈ሻ̇ ኣያ̇ና ኡፋይሳ̇ንዳብ ዜርቂዝ ኣሲ ጌ̈ሻ̇ ኣያ̇ና ጋልዳፖ̇ ሜናብ ሼምፓባር ዶኢ ቴይሲ̇ ኤኪ̇̈ሬ። 9 ኮሻ̇ ባዝ ኦ̈ንዳቦ ዳቡርባ̈ዳ፤ ኑ ቦ̈ዛካ̇ይዶር ኦ̈ጌዪን ኬ̈ሊን ዬላ̇ምባራ ዜርቂኖን ቴይሲ̇ ኤኪ̇̈ሬ። 10 ዪ̈ኮታ̇ቦ ኑ̈ኒ ኮሽ̇ ባዝ ኦ̈ንዳቦ ኑ̈ብ ዳንዳኢንቲ̇ኖ ኬል̇ባር ዎይ ኣስ ጌይዛ ዎይ̈ቦ ማ ዎይፖ̇ ሺ ክርስቶ̈ሳ ኣማ̇ኒዝ ኣሳንቦ ኮሽ̇ ባዝ ኦ̈ስቶ። ዉርሲ ዞራኬ ሳሪቲኬ 11 ታ̈ኒ ቴ ኩሽ ጌ̈ቲምባር ዪንታ̇ብ ዎዛርፌ̈ን ጴች ፊዳላባራ ጻ̈ፊኖኮ ቤቂ̇ብቴ። 12 ዪንቲ ጋራ̇ዚንታ̇ምፔ̈ን ዪንታ̇ ዋ̈ዪዝ ኣሳን ኣሳ ቲ̈ን ኮሽ ማይጻር ቤንታ̇ንዳብ ኮዪዝ ኣሴ። ዪኖ̇ ዎቲዛን ክርስቶ̈ሳ ማስቃሊንኮታ̇ቦ ዳ̈ሲ̇ ኢንታ̇ ዬላ̇ካዮ̈ዲፌ̈ኒ ጋ̈ሪ ዎቲ̈ሬ። 13 ዪንቲ ጋራ̇ዚንቴ̇ጌይን ኢንቲ̇ ዪ̈ኒባራ ኬርፋንዳቦ ጋ̈ሪ ዎቲ̈ርዶኬ ጋራ̇ዚ̇ንቲ̇ኖ ኣሳን ፌ ቆሚ̇ንዳር ሂጊ̇ን ና̈ጊባ̈ሴ። 14 ኑ ጎዳ ዬሱ̈ስ ክርስቶ̈ሲ ማስቃላ ጋልዳ ዓይቃ̇ር ታ̈ብ ኦ̈ኖ ኦ̈ሲምፖ̇ ሜላ ታ̈ና ኬርፊሲዝ ባዚ ዎኮ ታ ጋልዳፖ̇ ጎቶ̇። ዬሱ̈ሲ ማስቃላ ጋልዳ̇ ኦ̈ኖ ኦ̈ሲን ጎይባራ ታ̈ኒ ኣላሚን ጋልዳፖ ፋጊንቲ̇ኔ ኣላሚንዳር ታጋልዳፖ ፋጊንቲ̇ኔ። 15 ጋራ̇ዚንቲ̇ናር ጋራ̇ዚንታ̇ካይ ኣቴጌይናር ኣባካር ማ̈ዲ̇ባ̈ሴ፤ ዬሱ̈ስ ክርስቶ̈ሳባር ኦራ ኣስ ማ̈ቃ̇ዚን ሙታ̇ ማ̈ዳ̇̈ሬ። 16 ኪ̈ቲን ዓኖ̇ ና̈ጊዝ ኣሳን ዎይንብኬ ጾ̈ሳ̇̇ ኣስ ማ̈ቂ̇ኖ ኢስሬ̈ል ናኣንቦ ጾ̈ሳ̇̇ ሳሪቲዲኬ ማ̈ሪቲ ኢንታ̇ብ ማ̈ቆ̇። 17 ዉርሲ ጋልዳ ቴ ሶ̈ላንዳብ ኮያዚንዳ̇፥ ታ̈ኒ ዬሱ̈ሳ ኣይላ ማ̈ቃ̇ር ኢ ጊሻ̇ብ ቡኪንቲ̇ኖን ኤርሲዝ ዲ̈ ቴ ጋልዳ ዎኮታ̇ቦ ዓኒ̇ፖ̇ ጌዳ ኦ̈ናካር ታ̈ ጋልዳ ሜላ ሜታ ጉጃፖጋ̈ቤ። 18 ቴ ኢሺንታ̇ን! ኑ ጎዳ ዬሱ̈ስ ክርስቶ̈ሳ ኮሺቲ ዪንታ̇ባር ማ̈ቆ̇! ኣሚ̇ንኤ። |