ጋላ̈ታ 4 - ኦራ ጫ̈ቃ ማጻ̈ፋ1 ዓት ቴ ዪንታ̇ክ ጋ̈ዚን ዓኖ̇፤ ጊዳክ ፌ ባ̈ባ̈ ቆሊንን ኤኪ̇ዛ̈ዲ ባዚ ዎይምቦ ላ̈ ማ̈ቂ̇ናካሬ ኢ ኣቂሎምባ̇ራ ኣባካርጌይን ኣይላፖ̇ ሺባሴ። 2 ዎቲናካር ባ̈ባ̈ ጌይኖ ኬሊ̇ን ዬሊ̇ዝ ዲራስ ኢያኬ ኢ̈ብ ዎ ቆሊንን ና̈ጊዝ ኣሳን ጻና ዶኢ̈ሬ። 3 ኑ̈ናር ዪና̇ ኢዝፌ̈ን ቢርት ኣቂሊ ናኢፌ̈ን ማ̈ቃ̇ር ዎ ኬሊ̇ምባ̇ራ ዓኒ̇ ኣላሚን ጋልዳ ዎ ዎጊምቦ̇ ኪ̈ቲንቲ̇ ኢዝቦ ኣይላ ማ̈ቂ̇ ጋምኢኔ። 4 ዎቲናካሬ ጌዪኖ ኬሊ̇ን ዬሊ̇ን ጾ̈ሳ̇̇̈ዲ ፌ ናኣ ኑ̈ብ ሚሺዴ። ኢያሬ ማጫ̇ ጋልዳፖ̇ ዬሊንቲ̇ኔ፤ ሙ̈ሳ ሂጊ̇ን ጻና ኣቂኔ። 5 ዪኖ ኢ ኦ̈ኖንዳ ሂጊ̇ምፖ ጻና ዎ ኣሳን ዎዛንዳ̇ብኬ ማ ኑ̈ናር ኢ̈ብ ናኢ ማ̈ቃ̇ምፔ̈ን ጋ̈ሪ ኦ̈ኔ። 6 ኑ̈ኒ ጾ̈ሳ̇̇ ና̈ኣን ማ̈ቂ̇ኖኮታ̇ቦ ጾ̈ሳ̇̇̈ዳ “ኣባ̈ቦ̇” ጌዪሙታ̇ ኢያ ጼይጊዝ ፌ ናኣ ኣያ̇ና ኑ̈ብ ሚሺዴ። 7 ዪ̈ኮታ̇ቦ ዓኒፖ̇ ጌዳ ኔ ጾ̈ሳ̇ ና̈ኢዶኬ ኣይላ ጊዳካ̇ዬ። ዪዚ ኔ ጾ̈ሳ̇ ናኢ ማ̈ቂ̇ኖኮታ̇ቦ ጾ̈ሳ̇ ፌ ና̈ኣንቦ ጊ̈ጊሲኖ ባዝ ዎይ ኔ̈ናር ኤካ̇̈ሬ። ጳውሎ̈ሲ ጋላ̈ታ ጋዶ̇ ኣሳን ጊሻ̇ብ ጫና̇ቂንቲ̇ዴ 8 ዪንቲ̇ ሚን ጾ̈ሳ̇ ኤራናፖ ቲ̈ን ጾ̈ስ ጊዳካ̇ዮ ባዛቦ ኣይላ ማ̈ቂ̇ ኪ̈ቲንቲ̇ሙታ̇ ጋምኢኔ። 9 ዓት ዎቲናካር ዪንቲ ጾ̈ሳ̇̇ ኤሪኔ፤ ዪፓ̇ር ሺ ጾ̈ሳ̇̇̈ዲ ዪንታ̇ ኤሪኔ፤ ዓት ዪዚ ዪንቲ̇ ማ̈ቃ̇ር ዪን ዪንታ̇ ማ̈ዲ̇ባ̈ሶ ኣላማ ጋልዶ ዎጋንኮ ዎዛ̈ርታ̇ር ማ̈ቂ̇ቴ? ማ ዎዛርታ̇ር ማ̈ቂ̇ ኢንታ̇ብ ኣይላ ማ̈ቃ̇ር ዶኣንዳብ ኮዪቴ? 10 ዱማ ማ̈ቂ̇ኖ ቃ̈ማን፣ ኣጋናን፣ ኬላ̇ንኬ ላይን ዪንቲ̇ ቦንቺ̇ሬ። 11 ቴ ዪንታ̇ብ ዋ̈ዪኖ ዋ̈ያ ሜላ̇ ኣታ̇ንዳዶ̈ኔ ጋ̈ራ ታ̈ኒ ኢ̈ጫ̇̈ሬ። 12 ቴ ኢሺንታን! ቴ ዪንታ̇ ጌሻ̈ሬ፤ ታ̈ኒ ሚን ዪንቲ̇ ዎንዲፌ̈ኒ ዪንታ̇ ማይጺኖኮታ̇ቦ ዓት ዪንታ̇ሬ “ኣይሁድ ዎጊን ና̈ጋንዳ ኮሺ̇̈ሬ” ጋ̈ዚን ኣሻ̇ሪ ታ̈ና ማይጺብቴ። ዪንቲ ታ̈ብ ኣባካር ኢ̈ሳ̇ካ̇ዬ። 13 ዪንቲ̇ ኤራዚንዲፌ̈ኒ ታ̈ኒ ዓኒ̇̈ፖ ቲ̈ን ዪንታ̇ብ ዎጛላ ሳባ̇ኪኖንዳ ታ̈ና ማሲኖን ጎይባራ። 14 ሜላ ኣቲ̇ን ታ ዓርጊን ዓና̇ኮታ̇ብ ዪንቲ̇ ታ̈ና ሌቃ̇ንዳብ ዳንዳኢ̈ርዶን ዎቲናካር ዪንቲ̇ ታ̈ና ሺሪንታካይዶር ጾ̈ሳ̇ ኪታ̇ንቻ̇ ሞኪ̇ዛዲፌን ዎይ ዬሱ̈ስ ክርስቶ̈ሳ ሞኪ̇ዛ̈ዲፌ̈ን ታ̈ና ሞኪ̇ኔ። 15 ዓኒ̇ፖ ቲ̈ን ዪንታ̇ብ ዎ ኡፋይሳ ዎይ ዎይዲ ሉኬ̇? ዪንታ̇ብ ዳንዳኢንቲ̇ዝ ባዝፌ̈ንኮ ሜላ ኣቲ̇ን ዪንቲ̇ ዪንታ̇ ኣ̈ፊን ኬሳ̇ር ታ̈ብ ኢሚ̇̈ርካርዶ̈ን ዪንቲ̇ ኢጺባ̈ሶን ታ ዪንታ̇ብ ማርኪ̇ታ̈ሬ። 16 ታ̈ኒ ዪንታ̇ብ ኪንን ሶ̈ሊኖኮታ̇ቦ ዓት ዪንታ̇ብ ጻላ̈ታ ማ̈ቃ̇ር ቤንቴ̇? 17 ዪን ኣይሁድ ዎጊን ና̈ጋንዳ̇ብ ኮሺ̇̈ሬ ጌይዝ ኣሳን ዪንታ̇ ፌዪ ማ̈ሳንዳብ ዎይሊን ኢኒ̇ቲ̈ሬ፤ ማ̈ቂ̇ናካሬ ዪና̇ ኢንቲ ዎታዚንዳ̇ ኮሻ̇ብ ጊዳካ̇ዬ፤ ኢንቲ ኮያዚንዳ ዪንቲ ኑ ጋልዳፖ̇ ፋጊንታ̇ሪ ኢንታ̇ብ ቆፓ̇̇ምፔ̈ን ዎታንዳቦ ኮያሪዬ። 18 ዪንታ̇ ቆፊን ኮሽ ባዛብ ማ̈ቄ̇ጌዪን ዪንቲ ሚ̈ጛዚንዳ ኮሼ̇፤ ዎቲናካሬ ዪና̇ ዪንቲ ሚጛዝ ሚ̈ንንዳ ቴ ዪንታ̇ባር ዎ ኬ̈ልባር ሙታ̇ ማ̈ቃፖጋ̈ቤ̇። 19 ታ ካን ናኣን! ዪንቲ ክርስቶ̈ሳ ማይጺዝ ዲራስ ታ̈ኒ ዪንታ̇ኮታ̇ቦ ማጫ̇ብ ዬላ ኬ̈ሊ ዬሊ̇ን ጋርስ ቂን ጫና̇ቂንታ̇ዛንዲፌ̈ኒ ታ̈ናር ጫና̇ቂንታ̇̈ሬ። 20 ታ̈ኒ ዪንታ̇ ባዚ ማላ ጋሚን ዎይሊን ሜቲንቲኖኮታ̇ቦ ቴ ዪንታ̇ክ ሉካ̇ራ ቴ ኖ̈ኒንባር ኮሺንቻ ዎይባዝ ዪንታ̇ብ ሶ̈ላርኮ̇ ካ̈ሬ። ኣጋ̇̈ሪኬ ሳ̈ሪክ ሚሳ̇̈ሊ 21 ዪንቲ ሙ̈ሳ ሂጊ̇ን ጻና ዶኣንዳ̇ብ ኮዪዝ ኣሳን! ዪንቲ ታ̈ብ ሶ̈ሊንቴ፤ ሂጊ̇ን ኣብዝ ጋ̈ርኮ ዪንቲ̇ ሲስካካ̇ያ? 22 ኣብራሃ̈ማብ ና̈ምኢ ናኢ ዎ፤ ፔታ̇ና̈ዲ ኣይሊን ጋልዳፖ̇ ዬሊንቲ̇ኔ ሜላዲ ኣ̈ል ኢንዲ̇ን ጋልዳ̇ፖ̇ ዬሊንቲ̇ኔ ጋ̈ሪ ጌ̈ሻ̇ ማጻፋ ጋልዳ ጻ̈ፊንቲ̇ኔ። 23 ኣይሊን ጋልዳ̇ፖ̇ ዬሊንቲ̇ኖ̈ዲ፥ ኣሲ ዎይ ዬሊዛ̈ዲፌ̈ን ዬሊንቲ̇ኔ፥ ኣ̈ል ኣንዲ̇ን ጋልዳፖ̇ ዬሊንቲ̇ኖ̈ዲ ጾ̈ሲ ኢንታ̇ብ ናኢ ኢማ̇ንዳ ጋ̈ሪ ቃ̈ላ ጌሊን ዬሊንቲ̇ኖ ናኤ። 24 ዪ̈ዳሬ ዪን ናምኢ ማጫ̇ን ጾ̈ሳ̇ ጫቃ ቃ̈ላን ናምኣንቦ ሚሳ̇̈ሊ ማ̈ቂ̇̈ሬ። ጫ̈ቃ ፔታ̇ኒንዳ ሲ̈ና ጋ̈ዝ ኢንዲ̇ን ጋልዳ ኢሚንቲ̇ኖንዶ ኢዝ ሚሳ̇ሊንዳ ኣጋ̇̈ሮ፤ ኢዛ ኣይሊቲብ ናኢ ዬሊኔ። 25 ኣጋ̇̈ራ ኣራብ ጋዳ̇ ዎ ሲ̈ና ኢንዲ̇ንቦ ሚሳ̈̇ሊዬ፤ ኢዛ ዓት ሳ̈ዝ ጋልዳ ዎ ዬሩሳ̈ላማ ካታሚን ማይጻ̈ሬ። ኣባ ጌይን ኢዛ ፌ ናኣንባር ዎልኣ ኣይሊቲ ጋርታ̇ ዎ። 26-27 ጌ̈ሻ ማጻ̈ፋ ጋልዳ “ኣ̈ሽ ኔ ናኢ ዬላባሶ ሚ̈ንንዴ! ኔ̈ብ ኡፋይስ ማ̈ቆ̇! ኣ̈ሽ ዬላ ባንታ̇ ኤራባሶንዴ! ኢሊ̇ስባር ዉይሳቤ፤ ኣስኒ ዎንፖ̇ ሺ፥ ኣስኒ ባዪዶን ፌ̈ብ ዎ ኣሲምቦ ናኢ ዎይሊዴ” ጋ̈ሪ ጻ̈ፊንቲ̇ኖንዲፌ̈ኒ ፉዳ ኣፋ ዎን ዬሩሳ̈ላማ ኣይላ ጊዳካዬ፤ ኢዛ ኑ ኢንዶ̇። 28 ዪዚ ቴ ኢሺንታ̇ን! ዪንታ̇ሬ ዪሳ̈ቃፌ̈ን ታስፋ ቃ̈ላባር ዬሊንቲ̇ኖ ናኣን። 29 ዪና ኢዝባራ፥ ኣሲ ዎይ ዬሊንቲ̇ዛ̈ዲፌ̈ን ዬሊንቲ̇ኖ̈ዲ ጾ̈ሳ̇ ኣያ̇ና ጌይኖ̈ዲፌ̈ን ዬሊንቲ̇ኖ ና̈ኣ ዳኪ̇ኖንዲፌ̈ኒ ዓታ̇ር ኢዝፌ̈ኔ። 30 ዎቲናካሬ ጌ̈ሻ̇ ማጻ̈ፋ ጋልዳ ዎዛር ጌይራ? ጌ̈ሻ̇ ማጻ̈ፋ ጋልዳ “ኣይሊን ዬሊኖ ናኣ̈ዲ ኣ̈ል ኢንዲ̇ን ናኣባር ዎልኣ ቆሊን ፋጋር ኤካ̇ንዳብ ዳንዳኢባ̈ሶኮታ̇ቦ ኣሽካሪንዲክ ኢዝ ናኣ̈ዲኬ ዎልኣ ዳካ̇ ኬሳ̇ቤ” ጌይሬ። 31 ዪ̈ኮታ̇ቦ ቴ ኢሺንታን! ኑ̈ኒ ኣ̈ል ኢንዲ̇ን ናኢዶኬ ኣሽካሪን ናኢ ጊዳካ̇ዬ። |