ጋላ̈ታ 1 - ኦራ ጫ̈ቃ ማጻ̈ፋ

^1-2 ኣሲ ኪ̈ቲን ጊዳካ̇ይዶ̈ን ዬሱ̈ስ ክርስቶ̈ሳኬ ኢያ ዓይቃ ጋርታ̇ፖ̇ ዲንኖ ጾ̈ሳ̇̇ ባ̈ባ̈ዲ ሃዋ̈ራ ማ̈ሲን ማ̈ቂ̇ኖ ታ ጳውሎ̈ሳኬ ታባር ዎን ኣማ̇ኒኖ ኣሳን ዎይ ጋላ̈ታ ካታማ ጋርታ̇ ዎ ዎ̈ሳ ኬ̈ን ጋርታ̇ ዓና̇ ኪ̈ቲን ሚሺኔ።

³ ጾ̈ሳ̇ ኑ ባ̈ባ̈ዲኬ ኑ ጎዳ ዬሱ̈ስ ክርስቶ̈ሲ ዪንታ̇̇ቦ ፌ ኮሺቲንዲኬ ፌ ሳሪቲን ኢሞ̇ ጋ̈ቤ።

⁴ ኑ ጾ̈ሳ̇ ኑ ባ̈ባ̈ ጌይኖንዲፌ̈ን ዓና̇ ኢ̈ታ̇ ኣላሚን ጋልዳፖ̇ ኑ̈ና ፋንዳቦ ኑ ናጋራ ጊሻ̇ብ ዬሱ̈ሲ ፌ̈ና ኣ̈ ኢሚ̇ዴ።

⁵ ሜናብ ጾ̈ሳ̇̇ቦ ቦንች ማ̈ቆ̇። ኣሚንኤ!

ኪን ዎጛሊንዳ̇ ፔታ̇ኔ

⁶ ክርስቶ̈ሳ ካንንባር ዪንታ̇̇ ጼይጊኖ ጾ̈ሳ̇ ኤሊር ኣሻ̇ሪ ሜላ ዎጛላኮ ሉኪ̇ኖንዳ ታ̈ና ጋራ̇ሚሳ̈ሬ።

⁷ ዪና̇ ታ ጌይኖንዳ ክርስቶ̈ሳ ዎጛሊን ዎቢ̇ሳንዳብኬ ዪንታ̇̇ብ ጎይ ይሳ̇ንዳብ ኮዪዝ ፔቲ̇ ፔቲ̇ ኣሲ ዎን ኮታ̇ብዶኬ ዎጛሎ ሜላ ባዬ̈።

⁸ ማ̈ቂ̇ናካሬ ሜላ ኣቲ̇ን ኑ̈ናር ማ̈ቂ̇ን ኣፎ ኪታንቻ̇ር ማ̈ቂ̇ን ኑ ዪንታ̇̇ ሳባ̇ኪኖ ዎጛሊምፖ̇ ሜላ ዎጛላ ሳባ̇ኪኖዲ ሜናብ ባ̈ዲንቲ̇ኖ ማ̈ቆ̇።

⁹ ዓኒፖ̇ ቲ̈ን ቴ ዪንታ̇̇ክ ጌይኖንዲፌ̈ኒ ዓታ̇ር ቴ ዪንታ̇̇ክ ማሃር ጋ̈ሬ፥ ዪንቲ̇ ቲ̈ን ሲስኪኖንፖ̇ ሜላ ዎጛላ ኦ̈ናካር ዪንታ̇̇ ሳባ̇ኬጌዪን ኢ ባ̈ዲንቲኖ ማ̈ቆ̇።

¹⁰ ዪዶኮ ዓት ታ̈ኒ ኮሼ̇ ጌዪንታ̇ንዳብ ኮያዚን ኣሳን ቲ̈ንቤ ዎይ ጾ̈ሳ̇ ቲ̈ና? ዎይ ታ̈ኒ ኣስ ኡፋይሳ̇ንዳብ ዋያ̈ራ? ታ ኣስ ኡፋይሳ̇ንዳብ ዋያ̈ርፌ̈ንኮ ክርስቶ̈ሳ ኣይላ ማ̈ቃ̇ንዳብ ዳንዳ̈ኣባሴ።

ሃዋ̈ራ ጳውሎ̈ሲ ጾ̈ሳ̇ ኦ̈ሳቦ ጼ̈ይጊንቲ̇ዴ

¹¹ ቴ ኢሺንታ̇ን! ቴ ዪንታ̇ ሳባ̇ኪኖ ዎጛሊንዳ ኣሲ ኦ̈ኖ ባዝ ባይ ማ̈ቂ̇ኖን ዪንቲ ኤራምፔ̈ን ቴ ኮያ̈ሬ።

¹² ታ̈ና ዓና̇ ዎጛሊንዶ̇ ዬሱ̈ስ ክርስቶ̈ሲ ቤይሲንዶኬ ታ̈ኒ ኦ ጋልዳፓካር ኤካካ̇ዬ፥ ኦ̈ናካር ኣሲ ታ̈ና ታማ̈ርሳካ̇ዬ።

¹³ ታ̈ኒ ቲ̈ን ኣይሁድ ኣማ̇ናባራ ዎዛርፌ̈ን ዶኢኖኮ፥ ኣማ̇ኒዝ ኣሳን ላ̈ላ̇ ይሳንዳብ ዎዛርፌን ቡ̈ቲቲኖኮ ዪንቲ̇ ሲስኪ̇ኔ።

¹⁴ ኣይሁዳን ኣማ̇ኒን ና̈ጋባራ ታ ላይምባራ ዎ ዎይሊን ኣይሁድ ታ ዳባ̇ንፖ̇ ቴ ሺ̈ሬ፤ ባ̈ቢንታን ዎጊን ና̈ጋንዳ̇ቦ ዎይሊን ቂና̈ታ ታ̈ብ ዎ።

¹⁵ ዎቲናካሬ ቴ ዬሊንታ̇ናፖ̇ ቲ̈ን ጾ̈ሲ ታ̈ና ማራ̇ጺ̇ዴ፥ ፌ ካንባር ታ̈ና ጼይጊዴ።

¹⁶ ታ̈ኒ ኣይሁድ ባዮ̇ ኣሳን ጋርታ ጾ̈ሳ̇̇ ናኣ ባዝ ሳባ̇ካኒፌን ጾ̈ሲ ኢያ ታ̈ና ኤሪሳንዳብ ኮዪኖ ኬል̇ባራ ታ̈ኒ ኦባርካር ዞሪንታካ̇ዬ።

¹⁷ ታ̈ፖ̇ ቲ̈ን ሃዋ̈ራ ማ̈ቂ̇ኖ ኣሳንባር ዞሪንታ̇ንዳብ ዬሩሳ̈ላማር ሉካ̇ካዬ፤ ቴ ቲ̈ኒታራ ኣራብ ጋዳ̇ ሉካ̇ዴ ኢናፖ̇ ዳማ̈ስቃ̈ ማ̈ቃ̇ ሉካ̇ዴ።

¹⁸ ኢናፖ̇ ዓይዚ̇ ላይፖ̇ ዎሃ ጴ̈ጥሮ̈ሳ ዬላ̇ንዳቦ ጋ̈ራ ፉዳ ዬሩሳ̈ላም ሉካ̇ራ ኢና ኢባር ታ̈ጶ ኢሺ̇ን ቃም̇ ዶኣዴ።

¹⁹ ዎቲናካር ሃዋ̈ራታን ጋርታፖ̇ ጎዳ ኢን̇ናኣ ዓይቆ̈ባ ሙታ̇ ቤቃ̇ዶ̇ኬ ሜላ ኦ̈ናካር ቤቃካ̇ዬ።

²⁰ ዪና̇ ቴ ዪንታ̇ብ ጻ̈ፋዚን ኪን ማ̈ቂ̇ኖን ጾ̈ሳ̇ ቲ̈ን ቴ ዪንታ̇ብ ሶ̈ላ̈ሬ።

²¹ ዪኒፖ̇ ዎሃ ታ̈ኒ ሶ̈ራ ጋዳ̇ኬ ኪልቃ ጋዳ̇ ሉካ̇ዴ።

²² ክርስቶ̈ሳ ኣማ̇ናር ዎ ይሁዳ ጋዶ̇ ኣሳን ዓኒ̇ፖ̇ ቲ̈ን ታ̈ና ቤቂ̇ ኤራካ̇ዬ።

²³ ኢንቲ̇ “ዪ̈ ቲ̈ን ኑ̈ና ቡኪ̇ ዳኪ̇ ዎ ና̈ሳ̈ዲ ዓኒ̇ፖ̇ ቲ̈ን ይሳ̇ንዳብ ኮያዝ ኣማ̇ኒን ኢዞ ዓት ሳባ̇ኪ̈ሬ” ጋ̈ዝ ቃ̈ሊን ሙታ̇ ሲስኪ̇ኔ።

²⁴ ቴኮታ̇ቦ ጾ̈ሳ̇ ጋላቲ̈ሬ።