ቆላ̈ሳ̈ሳ 2 - ኦራ ጫ̈ቃ ማጻ̈ፋ1 ዪንታ̇ኮታ̇ቦ፥ ሎዶ̈ቃ ካታሚን ጋርታ̇ ዎ ኣሳንብኬ ታ̈ና ቤቂ̇ ኤሪባ̈ሶ ኣሳን ዎይ ማ̈ዳ̇ንዳቦ ጋ̈ራ ታ̈ኒ ዎዛርፌ̈ን ዋ̈ያሙታ ዎኮ ዪንቲ̇ ኤራምፔ̈ን ቴ ኮያ̈ሬ። 2 ዪና̇ ቴ ዎታዚንዳ ኢንቲ̇ ኢንታ̇ ቡ̈ዲንባር ሚ̈ጛርኬ ካንባራ ዎል ፔታ̇ን ማ̈ቃ̇ሪ፤ ኩም ማ̈ቂ̇ኖ ኤራ ዱሪቲን ዲጛሪ፥ ጾ̈ሳ̇ ሚስጢ̇ራ ማ̈ቂ̇ኖ ክርስቶ̈ሳ ኤራምፔ̈ኒ ዋ̈ያ̈ሬ። 3 ጾ̈ሲ ኣ̈ቻ̇ር ጋዲ̇ኖ ጴች̇ ኤራኬ ኤጪቲ ዱርቲ ዎይ ክርስቶ̈ሳክ ዎ። 4 ቴ ዪኖ̇ ጋ̈ዚንዳ ኦ̈ናካር ዪንታ̇ ኪን ማይጺዝ ሶ̈ላባራ ባሊካ̇ዮ̈ዲፌ̈ኔ። 5 ታ̈ኒ ዓት ዪንታ̇ ጋርታ̇ ኢና ዪንታ̇ባር ባዪካሬ ቆፊባር ዪንታ̇ባር ዎ፤ ዪንቲ ጾ̈ሳ̇̇ ቃ̈ሊን ኪ̈ታ̇ዚንዲፌ̈ኒ ዎቲሙታ̇ኬ ክርስቶ̈ሳባር ዪንታ̇ብ ዎ ኣማ̇ኒንባር ሚ̈ጛር ኤቂ̇ኖን ቤቃ̇ራ ታ̈ኒ ኡፋይቲ̇ኔ። ክርስቶ̈ሳ ጎይባራ ቤንቲዝ ኩም ማ̈ቂ̇ኖ ሼምፓ 6 ዪዚ ዪንቲ̇ ጎዳ ዬሱ̈ስ ክርስቶ̈ሳ ኣማ̇ኒኖንዲፌ̈ኒ ኢባ̈ራ ዶኢብቴ። 7 ዪንቲ̇ ኢ ጋልዳ ጻጳ ሚሻርኬ ሚ̈ጛር ኤቂ̇ብቴ፤ ዪንቲ ታማ̈ሪኖ ቲሚርቲ̇ንዲፌ̈ኒ ጌዳክ ዓኒክ ጋ̈ካ̇ይ ዪንታ̇ ኣማ̇ኒንባር ሚ̈ጛር ዶኢብቴ̇፤ ዎይ ባዝባራ ጋላታ ኩሚኖ ኣስ ማ̈ቂ̇̈ብቴ። 8 ክርስቶ̈ሳ ጋልዳ ጊዳካ̇ይዶን ኣሲ ኬሲ̇ኖ ዎጋኬ ዓኒ̇ ኣላሚን ጋልዶ ኣሳን ኬሲ̇ኖ ፋባ̈ሶ ዎጋ ጋልዳ ኤቂ̇ኖ ቲሚርታባራ ማ ሜላ̇ ዓሪ ማቃባር ኦ̈ናካር ዪንታ̇ ኮራር ፌ̈ክ ኤካካ̇ዮ̈ዲፌ̈ኒ ና̈ጊንቲ̇ብቴ̇። 9 ኣባ ጌይን ክርስቶ̈ሳ ኣሲቲን ጋልዳ ጾ̈ሲቲ ኩም ዎ። 10 ዪንታ̇ሬ ዎይ ባዝ ዪንታ̇ብ ኩሚኖንዳ ላ̈ንታ̇ንብኬ ጋዣንቦ ዎይ ቆም̇ ማ̈ቂ̇̈ኖ ክርስቶ̈ሳ ጋልዳፖ̇። 11 ዪንቲ ክርስቶ̈ሳ ኣማ̇ኒኖኮታ̇ቦ ጋራ̇ዚንቲ̇ኔ፤ ዪና̇ ና̈ጋራንቻ ማ̈ቂ̇ኖ ዪንታ̇ ኣሲቲን ይሳ̇ንዳቦ ክርስቶ̈ሳ ኩሽባር ጋራ̇ዚንቲንዶኬ ኣሳ ኩ̈ሽባራ ጋራ̇ዚንታ̇ካ̇ዬ። 12 ዪንቲ̇ ጻማ̇ቂንቲ̇ኖንባራ ክርስቶ̈ስባራ ዱ̈ኪንቲ̇ኔ፤ ክርስቶ̈ሳ ዓይቃ ጋርታፖ̇ ዲንኖ ጾ̈ሳ̇ ዎልቂ̈ን ዪንቲ̇ ኣማ̇ኒኖኮታ̇ቦ ኢባራ ዓይቃ ጋርታ̇ፖ ዲንዲ̇ኔ። 13 ዪንቲ̇ ናጋራንቻ ማ̈ቃ̇ር ዎንባርኬ ናጋራንቻ ማ̈ቂ̇ኖ ዪንታ̇ ኣሲቲን ጋራ̇ዚንታ̇ካ̇ዮኮታ̇ቦ ዓይቂ̇ኖንዶን፤ ዎቲናካር ዓት ጾ̈ሳ̇̇̈ዲ ዪንታ̇ ክርስቶ̈ሳ ጎይባር ሼምፓ̇ባር ዶኢዝ ኣስ ማሂኔ፤ ዪንታ ና̈ጋሪንዳር ዎይ ዪንታ̇ቦ ኣቶ̇ ጌይኔ። 14 ኑ̈ና ሞ̈ታ ኑ̈ና ታቆ̈ማዝ ሂጊ̇ን ጋልዳ ዎ ኣጫ ጹ̈ፊንዶ ቁቻ̇ር ይሲ̇ዴ፤ ማ ኢዞ ማስቃላ ጋልዳ ሶታ̇ሪ ኑ ጋልዳፖ ፋይዴ። 15 ኢ ዎልቃባሮንኬ ሲልጣ̇̈ናባሮን ማስቃ̇̈ላ ጋልዳ ኦ̈ኖ ኦ̈ሳባራ ኢንታ ጋማር ኢንታ̇ ካ̈ታ̇ሪ ካ̈ቲንቲ̇ኖን ፋላ̇ ጋልዳ ኬስካ̇ር ቤንታ̈ኒፌ̈ን ዎቲዴ። 16 ዪዚ ዪንታ̇ጋልዳ ኣሲ ኦ̈ናካሬ ሙንት ጎይባርኬ ኡሽ ጎይባራ፣ ዎይ ባ̈ል ቦንቺ̇ዝ ጎይ ዎይ ኣጋኒ ጼ̈ሪኖ ቃሚ̇ን ቦንቺ̇ዝ ጎይኬ ሳምባታ ቦንቺ̇ዝ ጎይ ዪንታ̇ ጋልዳ ፊርዳፖጋ̈ቤ። 17 ዪን ዎይ ዚቃንታ̇ ዬይኖ ባዛንቦ ኤ̈ሻ̇ፌ̈ኔ፤ ዎቲናካሬ ኪንን ቤንታ̇ዚንዳ ክርስቶ̈ሳ ጎይባራ። 18 ማቃባር ፌ̈ና ዪርክ ዪርክ ዎቲሙታ̇ኬ ማ ጾ̈ሳ̇ ኪ̈ታንቻን̇ብ ጎሽቲ̇ዛኮታ̇ቦ ኬርፊዝ ኣሲ ኦ̈ናካሬ ዪንቲ ጾ̈ሳ̇ ጋልዳፖ̇ ዲጚዝ ባዝ ጋልዳፖ ሜላ̇ ዪንታ̇ ኣሻ̇ካዮ̈ዲፌ̈ኒ ና̈ጊንቲ̇ብቴ፤ ዪ̈ፌ̈ኖ ና̈ሳዲ ታ̈ኒ ሳጻ ቤቂ̇ኔ ጌዪ ሙታ̇ ሜላ̇ ዓሪ ማ̈ዲ̇̇ባሶ ቆፊባራ ኦቲርቂ̈ሬ። 19 ዪ ና̈ሳ̈ዲ ቆም̇ ማ̈ቂ̇ኖ ክሪቶ̈ሳባር ኣባካር ፔቲቲ ኢ̈ብ ባዬ̇። ጋሊ̇ ዎይ ሻሽ̇ባራ ዎል ዬልሪ ጾ̈ሲ ኢሚ̇ኖ ዲቺ̇ንዲፌ̈ኒ ዲቺ̇ዛ̈ዲ ቆማ̈̇ዳ። ኣስ ባ̈ልዝ ቲሚርታ ጋልዳፖ̇ ና̈ጊንቲ̇ብቴ 20-21 ዪንቲ ክርስቶ̈ሳባራ ዓይቃ̇ር ዓኒ̇ ኣላሚን ጋልዳ ዎጋን ጋልዳፖ̇ ዉርሲ ፋጊንቲ̇ኔ፤ ዓት ዪ̈ዶኮ ዓኒ̇ ኣላሚን ጋልዶ ዎጋን ጋልዳፖ ፋጊንታ̇ካ̇ዮ ኣስፌ̈ን “ኤ̈ፔ̇፣ ኔ ኖ̈ና ኤይፔ፣ ዎ̈ሻፔ” ጌይዝ ዎጋንቦ ኣባብ ኪ̈ቲንቲ̇̈ራ? 22 ዪን ዎይ ኣሲ ኬሲ̇ኖ ዎጋኬ ኣሲ ኬሲ̇ኖ ቲሚርታ̇ ማ̈ቂ̇ኖኮታቦ ኦ̈ሳ ጋልዳ ፌ̈ሽኪ̇ኖፖ ዓኒ ያንዳብ ዎ። 23 ዪን ኪ̈ታን ኣሲ ፌ ጋልዳፖ ኮቺ̇ ኬሳ̇ሪ ጎሽቲዛ̈ዳኬ ማቃ̇ር ፌ̈ና ዪርክ ዪርክ ዎታሪ ፌ̈ና ማንቂሲሙታ ዎታዚንዳ ኢንታ̇ብ ኤጪቲ ዎ ማይጻ̈ርዶን ዎቲናካሬ ኢንቲ ፌ ኣይሺ̇ን ማንቂ̇ሳዚንዳ ኢንታ̇ ኢ̈ታ ኢኒ̇ን ኢንታ̇ ጋልዳፖ̇ ይሳንዳቦ ኣባካር ኢንታ̇ ማ̈ዳ̇ባሴ። |