ሃዋ̈ራታን ኦ̈ሳ 28 - ኦራ ጫ̈ቃ ማጻ̈ፋጳውሎ̈ሲ ማ̈ልታ ዴሴ̈ቲን ዬሊ̇ዴ 1 ኑ̈ኒ ባሃ̈ሪን ጋርታ̇ፖ ቡጊድ ሳ̈ዝ ጋልዳ ኮሽ̇ ዬሊ̇ኖፖ ዓኒ ኑ ዬሊ̇ኖ ቤሲ̇ንዳ ማ̈ልታ ጌይዝ ሳ̈ዝ ማ̈ቂ̇ኖን ኤሪዴ። 2 ዪና̇ ጋዲን ጋርታ ዶኢዝ ኣሳን ኑ̈ቦ ዎይሊን ኮሽ̇ባዝ ኦ̈ዴ፤ ዪና̇ ኢዝ ኬሊ̇ንዳ ኢሪ ኬዳ̇ር ሳ̈ዚ ዛ̈ኪ̇ዛኮታ̇ቦ ታማ ኤይር ኑ̈ና ሞኪ̇ ኤኪ̇ዴ። 3 ጳውሎ̈ሲ ዣፋ ሺ̈ሻ̇ሪ ታማ ጋርታ ሚሻምባ̇ራ ታማ̈ ሚቺ̇ዛኮታ̇ቦ ፔቲ ሾ̈ሽዶ̈ር ኬስካ̇ራ ኢ ኩሺን ቃራ ኢ ጋልዳ ሾላዴ። 4 ማ̈ልቶ ኣሳን ሾ̈ሺ̇ ጳውሎ̈ሳ ኩሺን ጋልዳ ሾሊኖን ቤቃ̇ሪ “ዓ ና̈ሳ̈ዲ ኪን ሼምፓ ዎኖ ኣሴ! ባሃ̈ሪን ውርጊን ጋልዳፖ ኮሽ̇ ኬስኪ̇ናካሬ ጾ̈ሳ̇ ፊርዳ ጋልዳፖ ቡ̈ታ̇ሪ ሼምፓ̇ባር ዶኣንዳብ ዳንዳኣካ̇ዬ” ጌይዴ። 5 ጳውሎ̈ሲ ዎቲናካሬ ሾ̈ሺ̇ን ቲቂሳር ታማ ጋርታ ቶጚዴ፤ ኢያ ኣባካር ዬላ̇ካይ ኣቲ̇ዴ። 6 ኣሳንሬ “ኣ̈ንታፖ ኣ̈ንታ ኢ ጋላ̇ ኪጺ̇̈ራ፤ ዎይ ዓይቃ̇ር ኬዲ̇̈ራ” ጋ̈ሪ ዎይሊን ሳኣ̈ታ ና̈ጊን ኣባካር ኢያ ዎታካ̇ዮን ቤቃ̇ሪ ፌ ቆፊን ኦ̈ሃሪ “ዓ̈ዲ ጾ̈ሴ̇!” ጌይዴ። 7 ኢና ኑ ዎ ቤሲ̇ን ላፍ ጋዲን ኢዞ ኣቂሲዛ ፑፒሎ̈ሳ ጌይዝ ና̈ሳ ሳ̈ዝ ዎ። ዪ̈ ና̈ሳ̈ዲ ኑ̈ና ፌ ኣ̈ል ጌልሳሪ ዓይዚ̇ ቃም ኮሺንቺ̇ ሞኪ̇ዴ። 8 ዪና̇ ኢዝባራ ፑፕሎ̈ሳ ባ̈ባ ቆምባር ሙንትኬ ጋርሳርቃ ኢያ ኤ̈̇ን ማ ሱርቂ̈ኔ፤ ጳውሎ̈ሲ ኢ̈ክ ጌላሪ ፌ ኩሽ ኢ ጋልዳ ጋዳ̇ር ዎ̈ሳ̇ር ፋዴ። 9 ዪ ማ̈ቂ̇ኖፖ ዓኒ ጋዲን ኢዝ ጋርታ ዶኢዝ ኣሳን ሜላን ማዛን ዬ̈ሪ ፋጺዴ። 10 ኣሳን ዎይሊን ኑ̈ና ቦንቺ̇ዴ፤ ኑ̈ኒ ማርካ̇ባባር ሉካ̇ንዳብ ዲንዲን ኑ̈ብ ኮሻ̇ዝ ባዚን ዎይ ማርካ̇ባ ጋልዳ ኑ̈ብ ጫ̈ኒዴ። ጳውሎ̈ሲ ማ̈ልታፖ ሮ̈ማ ዬሊ̇ዴ 11 ኑ̈ኒ ዓይዚ̇ ኣጋን ማ̈ልታ ዶኢኖፖ ዓኒ፥ ባርጊን ኬሊ̇ን ዎይ ኢና ኤቃ̇ር ኣ̈ኖ ኢስኪንዲራ ማርካቢን ጋርታ̇ ጌላሪ ዲንዲዴ፤ ማርካ̇ቢን ዪኒ ጋልዳ ዲዮስቆሮ̈ሳ ጌይዛ ሜንቲ ጾ̈ሳ̇ ማላ̇ ዎ። 12 ሲራኩሳ ጋ̈ዝ ካታሚን ዬላ̇ሪ ኢና ዓይዚ̇ ቃም̇ ኣቂዴ። 13 ኢናፖ ማርካባባር ሬ̈ጉማ ካታማ ዬላ̇ሪ ኢና ፔቲ̇ ቃም̇ ኣ̈ኖፖ ዓኒ ሲጛሎ ኣይጊ ባቂ̇ን ናምኢ ቃሚንባራ ፑቶሎ̈ሳ ካታሚን ዬሊ̇ዴ። 14 ኢና ኣማኒ̇ኖ ፔቲ̇ ፔቲ̇ ኣስ ዲጚን ኢንታባራ ታብዛ ቃም ዶኣምፔን ኑ̈ና ጌሺዴ፤ ዪኒ̇ፖ ዓኒ ኑ̈ኒ ሮ̈ማ ሉኪ̇ዴ። 15 ሮ̈ማ ዎ ኣማ̈ናን ኑ ባዝ ሲስኪ̇ኖፖ ዓኒ ኣ̈ፊዮስ ጋቢ ጋ̈ዚንዲኬ ዓይዚ ኣቂ ቤሳ̇ን ጌይዝ ቤሳ̇ን ዲራስ ኑ̈ና ኤካ̇ንዳብ ዬይዴ፤ ጳውሎ̈ሲ ኢንታ ቤቃ̇ሪ ጾ̈ሳ̇ ጋላታሪ ሚ̈ጚንቲ̇ዴ። ጳውሎ̈ሲ ሮ̈ማ ካታማ ጋርታ̇ ታማ̈ርሲዴ 16 ኑ̈ኒ ሮ̈ማ ጌሊኖፖ ዓኒ ጳውሎ̈ሳ ና̈ጊዝ ዎታ̇̈ዳራ ፔታ̇ን ኢማ̇ሪ ኢ ፌ̈ብ ዶኣምፔ̈ኒ ጌይዴ። 17 ዓይዚ̇ ቃማ̇ፖ ዓኒ ጳውሎ̈ሲ ሮ̈ማ ካታሚን ጋርታ ዶኢዛን ጴች ጴች ኣይሁድ ኣሳን ጼይጊሲዴ፤ ኢንቲ̇ ሺ̈ቂኖፖ ዓኒ ኢንታ̇ኮ “ቴ ዳባ̇ን! ኢስሬ̈ላ ዎርዣ ጋልዳኬ ባ̈ቢንታን ዎጋ ጋልዳ ቴ ዎቲኖ ኢ̈ታ ባዚ ኣባካር ባዬ̇፤ ማ̈ቂ̇ናካሬ ዬሩሳ̈ላም ጋርታ ታ̈ና ቃቻ̇ሪ ሮ̈ማ ጋዶ̇ ካ̈ታ̈ቦ ኣ̈ ኢሚ̇ዴ። 18 ኢንታ̈ር ታ̈ና ኦይጪ̇ኖፖ ዓኒ ዓይቃብ ታ̈ና ዬ̈ልዝ ኢ̈ታ ኦ̈ሳ ታ ጋልዳ ዲጛካዮኮታ̇ቦ ታ̈ና ቢላ̇ንዳ ኮዪዴ። 19 ኣይሁዳን ‘ኢ ሜላ̇ ቢሊንቲ̇ዛ ዪ ኣባ?’ ጌይን ታ̈ኒ ሮ̈ማ ካ̈ታ ቲ̈ን ታ̈ና ሺ̈ሻ̇ምፔ̈ን ጋ̈ዶ̇ኬ ቴ ቴ ዎርዣ ሞ̈ቲዝ ባዚ ባዬ̇። 20 ዪዚ ዪኒ̇ኮታ̇ቦ ቴ ዪንታ̇ ጼይጊሲኖንዲኬ ዪንታ̇ ቤቃ̇ንዳብ ኮዪኖንዳ፤ ታ̈ኒ ሳንላታባር ቃቺንቲ̇ኖንዳ ጾ̈ሲ̇ ኢስሬ̈ላንቦ ኢሚ̇ኖ ታስፋ ቃ̈ሊን ሳባ̇ኪኖኮታ̇ቦ” ጌይዴ። 21 ኢንታ̇ሬ ኢ̈ኮ “ይሁዳ ጋዳ̇ፖ ‘ኢ ዪስቲ̇ኔ’ ጌይዝ ባዝ ጻ̈ፊንቲ̇ኖ ዳባዳ̈ቢ̇ ኑ̈ና ዬሊ̇ኖ ባዚ ባዬ̇፤ ዓይዲ ዬ̈ዪኖ ኣሳን ጋርታፖ ኦ̈ናካር ኔ ባዝ ኑ̈ብ ሺ̈ሺ̇ኖ ኣሲ ዎይ ኢ̈ት ሶ̈ሊኖ ኣሲ ባዬ̇። 22 ዓና̇ ኔ̈ኒ ኣማ̇ናዝ ኣማ̇ኒን ጎይ ዎይ ቤስ̇̇ ጋልዳ ኣሳን ዎይ ኢዞ ኢጻ̇ዚን ኑ ኤሪ̈ሬ፤ ዪኒ̇ቦ ኔ ቆፊን ዎዛርፌ̈ንኮ ኑ̈ ኔ ጋልዳፖ ሲስካ̇ንዳብ ኮዪ̈ሬ” ጌይዴ። 23 ኢንቲ ኢ̈ብ ኬ̈ሪጚኖፖ ዓኒ ዎይሊን ኣስ ማ̈ቃ̇ር ኢ̈ክ ኣ̈ል ዬ̈ይዴ፤ ኢያሬ ጌ̈ሻ̈ፖ ኦማ ዬሊ̇ዝ ዲራስ ጾ̈ሳ̇̈ ካ̈ቲቲኮ ጎይ ኢንታ̇ብ ማርኪቲሙታ̇ኬ ታማ̈ርሲሙታ ፌ̈ሽኪ̇ዴ፤ ኢንታ ዬሱ̈ሳ ጎይ ኣማ̇ንንዳ̇ቦ ሙ̈ሳ ሂጋ̇ኬ ናባን ማጻ̈ፋ ጋልዳ̇ፖ ዲንሙታ̇ዶር ታማ̈ርሲ̇ዴ። 24 ፔታ̇ን ፔታ̇ናን ኢ ሶ̈ሊኖ ቃ̈ሊን ኣማ̇ኒዴ፤ ሜላን ኣማ̇ናካ̇ዬ። 25 ኢንታ̇ር ዎል ዎልኣ ሳማ̈ማ̇ኣካይዶር ኣቲ̇ዴ ኢናፖ ጳውሎ̈ሲ ዉርሲ ቃ̈ላ ኢንታ̇ብ ሶ̈ሊኖፖ ዓኒ ኢንቲ̇ ሉኪ̇ዴ፤ ኢ ኢንታክ ጌይርዶሪ “ጌ̈ሻ̇ ኣያ̇ኖ ናባ ኢሳ̈ሳ ጎይባራ ዪንታ̇ ባ̈ቢንታንቦ ሶ̈ሊኖንዳ ኪን! 26 ኢ ሶ̈ሊኖ ቃ̈ሊንዳ̇ሬ፦ “ኔ̈ኒ ዪን ኣሳንኮ ሉካ̇ራ፥ ‘ዪንቲ̇ ሲሲ̇ን ሲስኪ̈ሬ፤ ዎቲናካር ኤልቅ ዎቲባ̈ሴ፤ ቤቂን ቤቂ̇̈ሬ፤ ዎቲናካሬ ቤቃ̇ር ዲጚባ̈ሴ’ ጋ̈ቤ። 27 ዓን ኣሳን ቡ̈ዲን ዛቢኔ፤ ኢንታ ዋ̈ይንዳር ሲስካ̇ባሴ፤ ኣ̈ፊንዳ̇ሬ ጊጲኔ፤ ዪ̈ፌ̈ን ማ̈ቃካ̇ይኮ፥ ፌ ኣ̈ፊንባር ቤቃ̇ሪ፥ ፌ ዋ̈ይምባር ሲስካ̇ሪ፥ ፌ ቡ̈ዲምባር ቆፓ̇ሪ፥ ታ̈ክ ማ̈ቂ̇̈ርዶ̈ን፥ ታ̈ናር ኢንታ ፋ̈ርዶን። 28 “ዪዚ ጾ̈ሳ̇̈ ፋቲ ኪ̈ታ ኣይሁድ ባዮ̇ ኣሳንቦ ዬይኖን ዪንቲ ኤሪብቴ፤ ኢንታ̇ር ኤ̈ኤ ጌዪ ኤኪ̇̈ሬ!” ጌይዴ። 29 [ጳውሎ̈ሲ ዪኖ̇ ሶ̈ሊኖፖ ዓኒ ኣይሁዳን ዎይሊን ዋ̈ጫር ኢናፖ ኬስካ̇ር ሉኪ̈ዴ።] 30 ጳውሎ̈ሲ ኪራያ ኤኪ̇ኖ ኬ̈ን ጋርታ ናምኢ ላይ ኩም ዶኢዴ፤ ፌ̈ክ ዬይዝ ኣሳን ዎይ ሞኪ̇ ኤኪ̇̈ሬ። 31 ጾ̈ሳ̇ ካ̈ቲቲ̈ ጎይኬ ጎዳ ዬሱ̈ስ ክርስቶ̈ሳ ጎይን ሳባ̇ኪሙታ̇ ኦ̈ናካር ኢያ ካያካይዶ̈ንኬ ኢ̈ች ቤይ ታማ̈ርሲዴ። |