ሃዋ̈ራታን ኦ̈ሳ 24 - ኦራ ጫ̈ቃ ማጻ̈ፋኣይሁዳን ጳውሎ̈ሳ ሞ̈ቲዴ 1 ኢሺ̇ን ቃማ̇ፖ ዎሃ ቄ̈ሳን ኣላቃ ሃና̈ኖ ፔቲ̇ ፔቲ̇ ጪጛሻንኬ ጣርጣሎስ ጌይዛ ጻባቃባር ዎልኣ ማ̈ቃ̇ር ቂሳ̈ራ ካታማ ሉኪ̇̇ዴ፤ ኢንታ̇ሬ ጋዲን ኣቂሲዝ ካ̈ታ ፊልካ̈ሳ ቲ̈ን ሺ̈ቃር ጳውሎ̈ሳ ሞ̈ቲዴ። 2 ጳውሎ̈ሲ ጼይጊንታር ዬይን ጣርጣሎ̈ሲ ጌይርዶሪ “ቦንቺንቲ̇ኖ ፊልኮ̈ሶ! ኔ ካዉቲኖፖ ዓኒ ኑ̈ኒ ሳሪቲ ዲጚኔ፤ ኔ̈ኒ ኮሽ ኣቂሳዚንዳ ኑ ዎርዣባር ኮሽባዝ ቤይሲኔ፤ 3 ቦንቺንቲ̇ኖ ፊልኮ̈ሶ! ዓና̇ ኔ̈ኮን ኮሽ̇ ኦ̈ሲን ዎይ ቤሳ̇ ጋልዳኬ ዎይ ጋላስ ዎይሊን ኣንጂሙታ ኑ̈ኒ ኤኪ̇̈ሬ። 4 ዓት ታ̈ኒ ኔ ጊዚን ሜላ̇ ዉርሳብዳ ቃቢንባር ቴ ሶ̈ላዝ ባዚን ኔ ሲስካምፔ̈ን ቴ ኔና ጌሻ̈ሬ፤ 5 ዓ ና̈ሳዲ ኢ̈ታ ዓርጋ ኑብ ማ̈ቂ̇ኔ፤ ኣላማ ጋልዳ ዎ ኣይሁዳን ዎይን ጋልዳ ዋች̇ ዲንሬ፤ ፌ̈ና ጾ̈ሳ̇̈ቦ ጌይ ኢሚ̇ኖ ና̈ዝራ̈ዋ ጌዪንቲዛን ቲ̈ኒዛ ኢያ ማ̈ቂ̇ኖን ኑ ኤሪኔ። 6 ዪኒ̇ፓር ኣ̈ሪ ጾ̈ሳ̇̈ ኬ̈̈ ቄንዳብ ዎታምባር ኑ ኢያ ኤ̈ኔ፤ ኑ ሂጊ̇ን ጋ̈ዚንዲፌ̈ን ኑ ኢ ጋልዳ ፊርዳንዳብ ኮዪንዶን፤ 7 ዎታዳራን ኣላቃ ሉ̈ሳ̈ሲ ዬ̈ሪ ዎልቃባር ጋቺ̇ ኑ ኩሽታፖ ኢያ ኤኪ̇ዴ። 8 ኢያ ሞ̈ቲዝ ኣሳንሬ ኔ̈ክ ዬምፔ̈ን ኪ̈ቲ̇ዴ፤ ዓኖ̇ ኑ ኢ ጋልዳ ሺ̈ሺ̇ኖ ሞ̈ቲን ዎይ ኪን ማ̈ቃ̇ዚን ኔ ኔ ቆሚ̇ን ኢያ ኮሺንቻ ኦይጫ̇ራ ኤራንዳብ ዳንዳኣ̈ሬ” ጋ̈ሪ ኢያ ሞ̈ቲ ኤ̈ዴ። 9 ኣይሁዳን “ዪ ዎይ ባዛ̈ዲ ኪን” ጌዪ ኢ ሞቲን ማ̈ዲ̇ዴ። ጳውሎ̈ሲ ፊልኮ̈ሳ ቲ̈ን ፌ̈ና ሞ̈ቲኖምቦ ማልሳ ሶ̈ሊዴ 10 ጋዲን ኣቂሲዛ ፊልኮ̈ሲ ጳውሎ̈ሳ ኦይጪ̇ን ኢ ጌይርዶሪ “ኔ̈ኒ ዎይሊን ላይ ዓና̇ ጋዲን ኣቂሲኖን ቴ ኤሪዛኮታቦ ታ ጋልዳ ሺ̈ቂኖ ሞ̈ቲምቦ ማልሳ ኤካ̇ር ኔ ቲ̈ን ሺ̈ቃምባ̇ራ ታ̈ና ዎይሊን ኡፋይሳ̇̈ሬ። 11 ታ̈ኒ ዬሩሳ̈ላማ ጾ̈ሳ̇̈ቦ ጎሽታ̇ንዳቦ ሉኪ̇ን ታጶ ናምኢ ቃማፖ ኣባሶ̈ን ኔ̈ኒ ኦይጫ̇ራ ኤራንዳብ ዳንዳኣ̈ሬ፤ 12 ጾ̈ሳ̇̈ ኬ̈̈ ጋርታ̇ር ማ̈ቂ̇ን ኣይሁዳን ዎ̈ሳ ኬ̈ ጋርታ ዎይ ካታማ ጋርታ ቴ ኦባርካር ዋጫምባር ዎይ ዎርዣ ዋቻ̇ብ ዲንምባር ኢንቲ ታ̈ና ዲጛካዬ። 13 ኢንቲ ዓት ታ ጋልዳ ሺ̈ሺ̇ኖ ሞ̈ቲምቦ ዎይ ኣባካር ማርካ ሺ̈ሻ̇ንዳብ ዳንዳኢባ̈ሴ። 14 ዎቲናካሬ ዪኖ̇ ቴ ኔ̈ብ ፋል ሶ̈ላንዳብ ኮያ̈ሬ፤ ሂጊ̇ን ጋልዳ ዎን ናባን ጻ̈ፊኖን ዎይ ኣማ̇ናራ ታ ባ̈ቢንታን ጾ̈ሳ̇̈ ኢንቲ “ኦራ ኣማ̇ና ጎይ” ጌዪ ጼይጋዚ ጎይንዲፌ̈ን ታ̈ኒ ጾ̈ሳ̇ ጎሽታ̇̈ሬ። 15 ኢንታ̇ር ታስፋ ዎታዚንዲፌ̈ኒ ታ̈̈̈ናሬ ጺላ̇ንኬ ዎርዳን ዓይቃ ጋርታፖ ዲንዳዚን ኣማ̇ና̈ሬ። 16 ዪ̈ኮታ̇ቦ ጾ̈ሳ̇̈ ቲ̈ንኬ ኣሳ ቲ̈ን ኮሽ̇ ቆፊ ታ̈ብ ዶኣምፔ̈ን ዎይ ጋላስ ሚ̈ጛሬ። 17 “ቴ ዬሩሳ̈ላማፖ ኬስኪ̇ን ዎይሊን ላይ ኣ̈ኖፖ ዓኒ ቴ ዎርዣቦ ማ̈ቂ̇ዝ ማ̈ዲ ሚ̈ሽኬ ጾ̈ሳ̇̈ቦ ማባ ሚ̈ሽ ኤ̈ራ ዬ̈ዴ። 18 ጾ̈ሳ̇̈ ኬ̈ ጋርታ̇ሬ ቴ ዪኖ̇ ኢዞ ዎታምባር ኢንቲ̇ ታ̈ና ዲጚኔ፤ ዪኒ̇ባራ ታ̈ኒ ጌ̈ዥጋዝ ዎጊን ኦ̈ ዉርሳራ ጌ̈ዥጋር ዎ፤ ዪና̇ ኢዝ ኬሊ̇ንባራ ታባር ዎይሊን ዎርዣር ባዬ̇፤ ማ ዋቻ̇ር ዲንዳካ̇ዬ። 19 ዎቲናካሬ ኢ̈ሳፖ ዬይኖ ኣይሁዳን ኢና ዎ፤ ኢንቲ ታ̈ና ሞ̈ቲዝ ባዚ ዎኮ ኔ ቲ̈ን ዬር ሶ̈ላጋቤ። 20 ዪኒ̇ፖ ዓኒ ኣይሁዳን ፊርድ ኣ̈ሎ ኣሳን ቲ̈ን ቴ ሺ̈ቂኖ ኬል̇ባራ ቴ ኢ̈ሲ̇ኖ ባዚ ዎኮ ዓን ሺ̈ቂኖ ኣሳን ሶ̈ላጋ̈ቤ። 21 ኪን ቴ ኢንታ ጊዳ̇ ኤቃ̇ራ ‘ዓይቂ̇ኖ ኣሳብ ዲንዶ ዎ ጌይኖንኮታቦ ዓታ̇̈ብ ቴ ዪንታ̇ ቲ̈ን ፊርዳብ ሺ̈ቂኔ’ ጋ̈ራ ቴ ቆን ሾክ̇ ዎታር ሶ̈ሊኔ፤ ዪዚ ዪኒ̇ዶኬ ሜላ ቴ ኦ̈ኖ ባዚ ባዬ̇” ጌይዴ። 22 ፊልካ̈ሲ ዎቲናካሬ ጾ̈ሳ̇̈ ጎይማ ኮሺንቺ ኤሪዛኮታ̇ቦ “ዎታ̇̈ዳራን ኣላቃ ሉሳ̈ሶ ዬዬጌዪን ቴ ዪንታ̇ ባዝ ሶ̈ላንዳ” ጋ̈ሪ ኢንታ ሚሺዴ። 23 ጳውሎ̈ሳ ና̈ጊዝ ማታላቃ̈ኮ “ዎይሊን ኢያ ዋይካ̇ይዶራ ኮሺንቻ̇ር ና̈ጋቤ፤ ኢ ላጋ̇ን ኢ̈ብ ኮሺ̇ዝ ባዝ ዎይ ኤኪ ዬዬጌዪን ካያፔ” ጌይዴ። ጳውሎ̈ሲ ፊልካ̈ሳኬ ዱሩሲ̈ላ ቲ̈ን ሺ̈ቂዴ 24 ጊላ̇ ቃማ̇ፖ ዓኒ ፊልካ̈ሶ ዱሩሲላ ጋ̈ዚን ኣይሁዳ ጋዶ̇ ኢ ማጪ̇ምባር ዬይዴ፤ ጳውሎ̈ሳ ጼይጊሳሪ ዬሱ̈ስ ክርስቶ̈ሳ ኣማ̇ኒዝ ጎይ ሶ̈ላምባር ሲስኪ̇ዴ። 25 ጳውሎ̈ሲ ጺሊቲ ጎይኬ ኣሲ ፌ̈ና ኢ̈ት ባዝ ጋልዳፖ ና̈ጊዝ ጎይ ቢርት ቲ̈ን ዬይዝ ፊርዳ ጎይ ሶ̈ሊን ፊልኮ̈ሲ ኢ̈ጫ̇ሪ “ዓት ሉካ̇ቤ ታ̈ብ ኮሽኪ̇ኖ ሜላ ቃም̇ ኔ̈ና ጼይጊሳንዳ” ጌይዴ። 26 ፊልኮ̈ሲ ጳውሎ̈ሳ ጋልዳፖ ጉባ̇ ኤካ̇ንዳብ ኮዪኖኮታ̇ቦ ዎይሊን ጎይ ጳውሎ̈ሳ ጼይጊሳሪ ኢባር ሶ̈ሊንቲ̇̈ሬ። 27 ና̈ምኢ ላይፖ ዓኒ ጶርቆስ ፊስጦ̈ሲ ፊልኮ̈ሳ ቤሲ̇ን ካዉቲዴ፤ ፊልኮሲ ኣይሁዳን ኡፋይሳንዳቦ ኮያሪ ጳውሎ̈ሳ ቃሺ ኣ̈ል ቃቺ̇ሻር ኣሺ̇ዴ። |