ሃዋ̈ራታን ኦ̈ሳ 20 - ኦራ ጫ̈ቃ ማጻ̈ፋጳውሎ̈ሲ ማቂዶ̈ናኬ ግሪ̈ክ ጋዳ̇ ሉኪ̇ዴ 1 ዋቺ̇ን ኤቂ̇ኖንዲፌ̈ን ጳውሎ̈ሲ ኣማ̇ኒዝ ኣሳን ጼይጊሳሪ ኢንታ̇ ዞሪዴ። ኢናፖ̇ ኢንታ̇ ሳሪሪ ማቂዶ̈ና ሉካ̇ንዳብ ዴንዲ̇ዴ። 2 ኢ ኣ̈̇ኖ ቤስ̇ ዎይ ዎርዣ̈ ዎይሊን ዞሪ ሚ̈ንሙታ̇ዶ̈ሪ ግሪ̈ክ ዬሊ̇ዴ። 3 ኢና ዓይዚ̇ ኣጋን ዶኣሪ ኢናፖ̇ ሶ̈ራ ጋዳ̇ ማርካባባር ሉካ̇ንዳ̇ብ ጊ̈ጊንታ̇ምባራ፥ ኣይሁዳን ኢ̈ታ ባዝ ኢ ጋልዳ ዎታንዳ̇ብ ዞሪንቲ̇ኖ̈ኮታ̇ቦ ማቂዶ̈ና ጎይባር ማ̈ቂ̇ ሉካ̇ንዳብ ቆፒ̇ዴ። 4 ቤ̈ራ ጋዶ̇̈ ጳ̈ሮ̈ሳ ናኣ̈ ሶጳ̈ጥራ፣ ታሳሎንቃ ጋዶ̇ን ኣሪስቲኮ̈ሳኬ ሲኮንዶ̈ሳ ዴርባ̈ና ጌይዝ ጋዶ̇̈ ጋዮ̇̈ሳ፣ ኢ̈ሳ ጋዳ̇ፖ ዬይኖን ቲኪቆ̈ሳኬ ጥሪፊሞ̈ሳ ማ ጢሞ̈ቶ̈ሳሬ ዪን ዎይ ጳውሎ̈ሳባር ዎልኣ ሉኪ̇ዴ። 5 ኢንቲ̇ ኑ̈ፖ̇ ቲ̈ኒታሪ̈ ጢሮ̈ዳ ጋዳ̇ ኑ̈ና ና̈ጊዴ። 6 ኑ ማ ኣይሁዳን ቂጻ̇ ሙይዝ ባ̈ሊን ኣ̈̇ኖፖ̇ ዓኒ ማርካባባር ፊልጲሶ̈ሳፖ̇ ዲንዳሪ ኢሺ̇ን ቃማ̇ፖ ዎሃ ሜላን ጢሮ̈ዳ ጋርታ̇ ዬሊ̇ዴ፤ ኢና ኑ̈ኒ ታብዛ ቃም̇ ዶኢዴ። ጳውሎ̈ሲ ጢሮ̈ዳ ሉኪ̇ዴ 7 ዎጊ̇ ጋላስ ኑ̈ኒ ዎልኣ ቡና ኡሽካ̇ንዳብ ዎል ፔታ̇ን ሺ̈ቂንዶን ጳውሎ̈ሲ ኢዝ ዎንን ጎይ ሉካ̇ንዳብ ኮዪኖኮታ̇ቦ ሺ̈ቂኖ ኣሳንቦ ሶ̈ላ ሶ̈ሊሙታ̇ ጊዲ̇ቢላ ዬሊ̇ዴ። 8 ኑ ሺ̈ቃር ዎ ፎ̈ቃ ኬ̈ን ጋርታ̇ ዎይሊን ፎኢን ዎ። 9 ኣውጣኪ̈ሳ ጌይዛ ፔቲ̇ ናኢቲዶሪ ማስኮ̈ታ ካራ ጋልዳ ዶኢኔ፤ ጳውሎ̈ሲ ሶ̈ሊን ጳሪንኖኮታ̇ቦ ና̈ራ ጊሲ ኢያ ኤ̈̇ዴ፤ ጊሲን ኢያ ጋሚን ዓይዚ̇ ፎ̈ቃ ጋልዳፖ̇ ቶ̈ራ ኬዲ̇ዴ። ኣሳን ኢያ ዲንምባራ ዓይቂ̇ኔ። 10 ጳውሎ̈ሲ ቶ̈ራ ሶ̈ባሪ ና̈ራ ጋልዳ ጉፕ ጋ̈ር ኬዳ̇ር ኢያ ኢሪጛሪ “ኢ̈ጫፒ̇ቴ! ና̈ራ ዓይቃካ̇ዬ!” ጌይዴ። 11 ኢ ማ̈ቂ̇ ፎ̈ቃ ጋልዳ ፉዳ ኬስካ̇ሪ ኣማ̇ኒኖ ኣሳንባር ዎልኣ ሶ̈ላ̇ ሙይዴ። ሳ̈ዚ ዎንቲ̇ዝ ዲራስ ኣሳንባር ሶ̈ሊንቲ̇ሙታ̇ ጋምኣሪ ኬስካ̇ር ሉኪ̇ዴ። 12 ኣሳንር ፋጺኖ ና̈ኣ̈ዳ ኣ̈ል ኤኪ̇ ሉኪ̇ዴ፤ ኢ ፋጺኖንኮታ̇ቦ ኢንቲ ዎይሊን ኡፋይቲ̇ዴ። ጳውሎ̈ሲ ጢሮ̈ዳፖ̇ ሚሊ̈ጣ ሉኪ̇ዴ 13 ጳውሎ̈ሳ ማርካ̇ባ ጋርታ̇ ጌልሳ̇ር ኣሻ̇ንዳብ ኮዪኖኮታ̇ቦ ኑ̈ኒ ቲ̈ኒታሪ ኣሶ̈ስ ጌይዝ ቤስ̇ ሉኪ̇ዴ። ኑ ዪና̇ ዎቲኖንዳ̇ ጳውሎ̈ሲ ኣሶ̈ስ ዬሊ̇ዝ ዲራስ ቶህባር ዬ ሉካ̇ንዳብ ኮዪኖኮታ̇ብኬ ኑ ዪኖ̇ ዎታምፔ̈ኒ ኢ ኑ̈ና ኪ̈ቲ̇ኖኮታ̇ቦ። 14 ኣሶ̈ስ ጋርታ ኑ ዎል ዬሊ̇ኖፖ̇ ዓኒ ዎልኣ ማ̈ቃ̇ር ማርካባባራ ሚጢሊ̈ና ሉኪ̇ዴ። 15 ኢዝ ዎንን ኢናፖ̇ ዲንዳ̇ሪ ኪዮ̈ሳ ጋ̈ዝ ቤሲ̇ን ቲ̈ን ጎይ ዎ ቤሲ̇ን ማርካባባር ዬሊ̇ዴ። ማ ኢዝ ዎንን ሳ̈ሞስ ጌይዝ ቤሲ̇ን ፊ̈ጛሪ ኢዝ ዎንን ሚሊ̈ጣ ዬሊ̇ዴ። 16 ጳውሎ̈ሳሬ ኢ̈ሳ ጋዳ̇ ዎይሊን ጋምኣንዳ̇ብ ኮያካ̇ዮኮታ̇ቦ ኤፍሶ̈ና ካታማ ኣ̈ካ̇ይዶር ሉካ̇ንዳብ ኮዪዴ። ኣባጌይንዶ̇̈ ኣይሁዳን ቦንቺ̇ዛ ፋ̈ሲጋ ባ̈ሊን ኣ̈̇ኖፖ ኢሺ̇ን ታጳ̇ ቃምባር ቦንቻ̇ዚን ጴ̈ንጤቆ̈ስጣ ጋ̈ዝ ባ̈ሊን ዬሩሳ̈ላም ዬላ̇ሪ ኢና ኣ̈ንዳ̇ ባርቢቲ̇ኖኮታ̇ቦ። ጳውሎ̈ሲ ኤፍሶ̈ና ጋርታ̇ ዎ ዎ̈ሳ ኬ̈ ጪጛሻንቦ ሶ̈ሊኖ ሶ̈ላ 17 ጳውሎ̈ሲ ሚሊጦ̈ናፖ̇ ኣስ ሚሻሪ ኤፌሶ̈ና ዎ̈ሳ ኬ̈ ጪ̇ጛሻን ፌ̈ክ ጼይጊሲዴ። 18 ኢንቲ̇ ዬይኖፖ̇ ዓኒ ኢንታ̇ኮ “ቴ ኢ̈ሳ ጋዳ̇ ዬያ ጌሊኖ ቃሚ̇ንፖ ኤ̈̇ር ዎይ̈ ጋላስ ቴ ዪንታ̇ባር ዎዛርፌ̈ን ዶኢኖኮ ዪንቲ̇ ኤሪ̈ሬ። 19 ኣይሁዳን ዎል ዞሪንታ̇ሪ ቴ ጋልዳ̇ ኢ̈ታ ባዝ ዎታንዳ̇ብ ቆፒ̇ኖ̈ኮታ̇ቦ ሜታ ታ̈ና ዬሊ̇ናካሬ ኢዝ ጋርታ ዪርክ ጋ̈ርኬ ኣብባራ ጎዳ̈ቦ ኦ̈ዚን ኣሻ̇ካ̇ዬ። 20 ኣሲ ሺ̈ቂዝ ቤሳ̇ ጋልዳ̇ር ማ̈ቂ̇ን ዪንታ̇ ኣ̈ል ጋርታ̇ር ታማ̈ርሳ̈ርዶራ ዪንታ̇ ማ̈ዲ̇ዝባዝ ዎይ ዪንታ̇ብ ሶ̈ላዶ̇ኬ ኣባካር ኣሺ̇ኖባዝ ባዬ̇። 21 ኢንቲ̇ ማ̈ሪቲ ጌላሪ ጾ̈ሳ̇̇̈ኮ ማ̈ቃምፔ̈ንኬ ኑ ጎዳ ዬሱ̈ሳ ኣማ̇ናንፔ̈ኒ ኣይሁድ ኣሳንብኬ ኣይሁድ ዜር ማ̈ቃካ̇ዮ ኣሳንቦ ኮሺንቻ̇ ማርኪቲኔ። 22 ዓታ̇ር ቴ ኢና ዬሊ̇ን ቴ ጋልዳ ዬ̈ዝ ባዚን ኣብዝኮ ቴ ኤራባስካርዶናሬ ጌ̈ሻ̇ ኣያ̇ናባር ኪ̈ቲንታ̇ራ ቴ ዬሩሳ̈ላም ሉካ̇̈ሬ። 23 ቴ ሉካ̇ዝ ካታሚን ዎይ̈ን ጋርታ̇ ቃሺኬ ሜታኬ ታ̈ና ዬላ̇ዚን ጌ̈ሻ̇ ኣያ̇ና ታ̈ብ ሶ̈ሊኔ። 24 ጾ̈ሳ̇̇ ኮሺቲ ዎጛሊን ታማ̈ርሳንዳ̇ቦ ታ̈ኒ ጎዳ ዬሱ̈ሳ ጋልዳፖ ኤኪ̇ኖ ኪ̈ቲን ኦ̈ር ፎቴጌይንዶ ቴ ዓይቄ̇ጌይናር ታ̈ና ሚቻ̇ባሴ፤ ቴ ሼምፒ̇ንባር ቴ ቆይታ̇ባሴ። 25 “ዓኖ̇ ዬላ̇ር ቴ ዪንታ̇ ጊዳ̇ባር ቢሪንታ ጾ̈ሳ̇̇ ካ̈ቲቲን ጎይ ሳባ̇ኪንዶኒ ዓኒ̇ፖ̇ ጌዳ ዪንታ̇ ጋርታ̇ፖ̇ ኦ̈ናካር ማ̈ቂ̇ን ታ̈ና ዲጚባ̈ሶን ቴ ኤራ̈ሬ። 26 ዪ̈ኮታ̇ቦ ዪንታ ጋርታ̇ፖ ሜላ ኣቲ̇ን ፔቲ̇ ኣሲ ዪዝባዝ ማ̈ቄ̈ጌንዶ̇ ቴ ኦይጪንታ̇ባሶን ዓታ̈̇ብ ቴ ዪንታ̇ብ ሶ̈ላሬ̈። 27 ኣባ ጌይን ጾ̈ሳ̇̇ ቆፊን ዎይ ቴ ዪንታ̇ብ ሶ̈ላዴ፤ ቴ ዪንታ̇ብ ሶ̈ላካ̇ይ ኣሺ̇ኖ̈ ባዚ̈ ኣባካር ባዬ̇̈። 28 ጌ̈ሻ̇ ኣያ̇ናዲ ፌ ዎርዣ̈ ና̈ጎ ጋ̈̈ር ዪንታ ማራ̇ጺኖ̈ኮታ̇ቦ ዪዚ ዪንቲ̇ ዪንታ ቆሚንዲኬ ዎርዣ ኮሺንቻር ና̈ጊብቴ̇፤ ኢ ፌ ሱ̈ምባር ዎዚኖ ዎ̈ሳ ኬ̈ን ና̈ጊብቴ። 29 ቴ ሉኪ̇ኖፖ̇ ዎሃ ኣማ̇ኒኖ ኣሳንቦ ሚጪንቲ̇ባ̈ሶ ዬ̈ያፌ̈ኖ ኢ̈ት ውጫ ኣሳን ዪንታ̇ ጋርታ̇ ጌላዚን ቴ ኤራ̈ሬ። 30 ሜላ ኣቲ̇ን ዪንታ̇ ጊዳ̇ ኢናፖ ዲንዳሪ ፔቲ̇ ፔቲ̇ ኣሳን ማቃ ቲሚርታ̇ ታማ̈ርሲሙታ̇ ኣማ̇ኒዝ ኣስ ዎይሊን ፌ̈ክ ኤኪ̇̈ሬ። 31 ዪ̈ኮታ̇ቦ ዪንቲ̇ ዪንታ ና̈ጊብቴ! ቴ ዓይዚ ላይ ዎይ ቃም̇ኬ ጋላስኬ ዬ̈ካ̇ ኣብጻ̇ሙታ̇ ዪንታ̇ ዞሪኖ ዞሪን ቆፒ̇ብቴ። 32 “ዓታ̇ሬ ዪንታ̇ ሚ̈ንንዳብኬ ጌ̈ሻ̇ ኣሳንስ ጊዳ̇ ቤሲ̇ ዪንታ̇ብ ኢማ̇ንዳብ ዳንዳኢዛ ጾ̈ሳ̇̇̈ብኬ ኢ ኮሺ̇ቲ ቃ̈ሊምቦ̇ ቴ ዪንታ̇ ዓዳራ ኢሚ̇ኔ። 33 ታ̈ኒ ኦ ቢራካሬ ዎርቃር ማ̈ቂ̇ን ዎይ ኣፊላር ማ̈ቂ̇ን ኢኒ̇ታካ̇ዬ። 34 ቴ ቴ ቆሚ̇ንዳር ማቂ̇ን ቴባር ኦ̈ዝ ኣሳንር ማ̈ዲ̇ኖንዳ ቴ ኩሽ ጌ̈ቲንባር ኦ̈ራ ማ̈ቂ̇ኖን ዪንቲ̇ ኤሪ̈ሬ። 35 ‘ዓኒ ኤኪ̇ዛ̈ፖ ጌዳ ኢሚ̇ዛ̈ዲ ኣንጂንቲኖ ኣሴ’ ጋ̈ዚን ጎዳ ዬሱ̈ሳ ቃ̈ሊን ቆፒ̇ ሙታ̇ዶ̈ሪ ኑ ኩሽባር ኦ̈ ሙታ̇ ዳ̈ቡሪኖን ማ̈ዳ̇ንዳብ ኮሻ̇ዚን ዎይሊን ጎይባራ ቴ ዪንታ̇ ቤይሲኔ” ጌይዴ። 36 ኢ ዪኖ̇ ጌይኖፖ ዓኒ ዎይንባር ቡቂንታ̇ር ዎ̈ሲ̇ዴ። 37 ዎይ ዬ̈ኪ̇ሙታ ኢያ ኢሪጛር ዬርቂ̇ዴ። 38 ዎይ̈ፖ ሺ ኢንታ̇ ሚቺ̇ኖንዳ̇ “ዪንቲ̇ ዓኒ̇ፖ ዎሃ ታ̈ና ዲጚባ̈ሴ” ጌይኖንዶ̇፤ ኢናፖ̇ ማርካቢን ዎ ቤሲ̇ን ዬሊ̇ዝ ዲራስ ኢያ ኣ̈ዴ። |