ሃዋ̈ራታን ኦ̈ሳ 19 - ኦራ ጫ̈ቃ ማጻ̈ፋጳውሎ̈ሲ ኤፍሶ̈ና ሉኪ̇ዴ 1 ኣጵሎ̈ሲ ቆሮንቶ̈ሳ ካታሚን ጋርታ ዎዶን ጳውሎ̈ሲ ፉዳ ጊዶ̇ ጋዲን ጋርሲምባር ኣ̈̇ሪ ኤፍሶ̈ና ዬሊ̇ዴ፤ ኢና ኣማ̇ኒኖ ኣሲ ሙቃ̈ ዬላ̇ሪ 2 ኢንታኮ “ዪንቲ̇ ኣማኒኖ ኬል̇ባራ ጌ̈ሻ̈ ኣያ̇ና ኤኪ̇ና?” ጋ̈ር ኢንታ ኦይጪ̇ዴ፤ ኢንታር ኢ̈ኮ “ኑ ኤካካ̇ዬ፤ ሜላ ኣቲን ጌ̈ሻ̈ ኣያ̇ና ጌይዝ ባዝ ዎንዳር ኑ ሲስካካ̇ዬ” ጋ̈ር ማሂዴ። 3 ጳውሎ̈ሳር ኢንታኮ “ዓት ዪዶኮ! ዪንቲ ኣ ጺንቃታ ጻማ̇ቂንቲ̇ቴ?” ጌይን ኢንታ̇ር ኢ̈ኮ “ኑ̈ኒ ዋ̈ኒ̇ሳ ታማ̈ርሲ̇ኖ ጺንቃቲን ጻማ̇ቂን̇ቲኔ” ጌይዴ። 4 ጳውሎ̈ሳር ኢንታ̇ኮ “ዋ̈ኒ̇ሳ ጺንቃቲንዳ ኣሲ ማ̈ሪቲ ጌላምፔ̈ን ኦ̈ንቲኖ ባዜ፤ ዋ̈ኒ̇ሲ ፌ ቆማ̇ብ ጌይርዶሪ ‘ታ̈ፖ ጋስ ዬ̈ይዛ ዬ̈ሱ̈ሳ ኢያ ኣማ̇ኒብቴ’ ጋሪ ዎርዣ̈ቦ ሶ̈ሊኔ” ጌይዴ። 5 ኢንታር ዪኖ̇ ሲስካ̇ሪ ጎዳ ዬ̈ሱ̈ስ ሱ̈ምባር ጻማ̇ቂንቲ̇ዴ። 6 ጳውሎ̈ሳር ፌ ኩሽ ኢንታ ጋልዳ ጋዲ̇ን ጌ̈ሻ̇ ኣያ̇ና ኢንታ ጋልዳ ሶ̈ቢን ኢንታር ዱ̈ማ ዱ̈ማ ኖ̈ና ሶ̈ሊዴ፤ ማ ካ̈ያር ካ̈ዪ ኤ̈ዴ። 7 ኢና ዎ ኣሳንሬ ታጶ ናምኢ ኣስ ማ̈ቃ̇ምፔ̈ኔ። 8 ጳውሎ̈ሲ ኣይሁዳን ዎ̈ሳ ኬ̈ ጋርታ ጌላሪ ዓይዚ̇ ኣጋና ማ̈ቃ̇ምፔ̈ኖ ኬል̇ ጾ̈ሳ̇̈ ካቲ̈ቲ ጎይ ፋላሚ ኢንታ̇ ጋሚሙታ̇ ኢ̈ጫካይዶር ዎርዣ ታማ̈ርሲዴ። 9 ኢንታ ጋርታፖ ፔቲ̇ ፔቲ̇ ኣሳን ጎዳ ጎይን ሺሪንቲ፤ ዎርዣ ቲ̈ን ቆ̈ ዎታሪ ኣማናብዳ ጌዪ ቅ ኢጺ̇ን ጳውሎ̈ሲ ኢንታ ኣሺ̇ዴ፤ ኣማ̇ኒኖ ኣሳን ዱማ ኤካ̇ሪ ጢራ̈ኖስ ጌይዝ ቲሚርታ ኬ̈ን ጋርታ ዎይ ጋላስ ኢንታ̇ ታማርሲ̈̇ሬ። 10 ጳውሎ̈ሲ ዪኖ̇ ኦ̈ሲን ናምኢ ላይ ኦ̈ኔ፤ ዪዚ ዪኒ̇ባራ ኢ̈ሳ ጋዳ̇ ዎ ኣይሁዳንኬ ኣይሁድ ባዮ̇̇ ኣሳን ዎይ ጎዳ ቃ̈ሊን ሲስካ̇ንዳብ ዳንዳኢዴ። 11 ጾ̈ሳ̇̈ዲ ዎይሊን ጋራ̇ሚሲዝ ባዝ ጳውሎ̈ሳ ጎይባር ኦ̈ዴ። 12 ዪ̈ኮታ̇ቦ ሜላ ኣቲ̇ን ጳውሎ̈ሳ ጋሊ̇ን ኤ̈ኖ ጫርቃ ማ̈ቆ ዎይ ማ̈ራ̈ባ ኤካ̇ሪ ማኖ ኣሳን ዬልጌይን ማኖ ናሳ̈ዲ ፌ ዓርጊን ጋርታፖ ፋጺ̈ሬ፤ ኢ̈ታ ኣያ̇ናር ኬስኪ̇̈ሬ። 13 ፔቲ̇ ፔቲ̇ ኣይሁዳን ኢ̈ታ ኣያ̇ና ኬሲ̇ሙታ ዱማ ዱማ ቤስ̇ ቢሪንቲዛን “ጳውሎ̈ሲ ሳባ̇ኪዛ ጎዳ ዬ̈ሱ̈ሳ ሱ̈ምባር ኬስካምፔ̈ን ኑ ዪንታ̇ ኪቲሬ” ጌዪሙታ̇ ኢ̈ታ ኣያ̇ና ኣሳን ጋልዳፖ ኬሳ̇ንዳቦ ሞካ̇ሪዴ። 14 ኣይሁድ ቄ̈ሳንቦ ኣላቃ̈ቦ ኣላቃ ማ̈ቂ̇ኖ ኣስቃዋ ጌይዛ ናኣን ታብዛን ዪና̇ ኢዝፌ̈ን ዎቲ̈ሬ። 15 ዎቲናካሬ ኢ̈ታ ኣያ̇ና̈ዲ ኢንታ̇ኮ “ቴ ዬ̈ሱ̈ሳ ኤራ̈ሬ! ጳውሎ̈ሳር ኤራ̈ሬ! ዓት ዪንቲ̇ ኦ̈ኖ?” ጌይዴ። 16 ኢ̈ታ ኣያ̇ና ኤ̈ጲኖ ፔቲ̇ ኣስዶሪ ኢንታ ጋልዳ ዶ̈ጚ ኬዳ̇̇ር ኢንታ ጩሊ̇ዴ፤ ኢንታ̇ ቡኪ ቡኪ̇ ኣሺ̇̇ን ፌ ሱ̈ ኤካ̇ር ጺ̈ሪ ካላ̇ ዎጻ̇ር ኣላፖ ኬሲኪዴ። 17 ባዝ ዪና̇ሬ ኤፍሶ̈ና ካታማ ጋርታ ዎ ኣይሁዳንኬ ኣይሁድ ባዮ̇ ኣሳን ሲስካ̇ሪ ዎይ ኢ̈ጪ̇ዴ፤ ዪኒ̇ባራ ጎዳ ዬ̈ሱ̈ሳ ሱምን ዎይሊን ጴች ቦንቺንታ̇ዴ። 18 ኣማ̇ኒኖ ኣሳን ጋርታፓር ዎይሊንን ፌ ኢ̈ታ ኦ̈ሲን ፋ̈ጺ̇ሙታ ዬይሬ። 19 ቢታ ቢቲዝ ኣሳን ፌ ቢታ ማጻ̈ፋን ሺ̈ሻ̇̈ሪ ዎርዣ ዎይ ቲ̈ን ሚቺ̇ዴ፤ ማጻ̈ፋን ዋ̈ጊን ኣ̈ፊን ማ̈ቂ̇̈ርኮ ቆፓ̇ምባራ ኢሺ̇ን ታጳ ሙኩላ ቢራ ማቃ̇ዴ። 20 ዪ̈ፌ̈ኖ ጎይባራ ጎዳ ቃ̈ላ ዎይሊን ዳልጊሙታ̇ኬ ዲጪ̇ሙታ ሉኪ̇ዴ። ኤፍሶ̈ና ጋዳ̇ ዋቺ̇ ዲንዲዴ 21 ዪ ዎይ ማ̈ቂ̇ኖፖ ዓኒ ጳውሎ̈ሲ ሜቂዶናኬ ኣካ̈ያ ጎይባር ዬሩሳ̈ላም ሉካ̈ንዳቦ ቆፓ̇ሪ ማ ኢና ዬ̈ሊኖፖ ዓኒ ሮማ ሉካ̈ንዳ ጌይዴ። 22 ኢ ፌ̈ና ማ̈ዲዛን ጋርታፖ ናምኣን፤ ጢማ̈ቶሳኬ ኤራስጦ̈ሳክ ዎልኣ ማቂዶና ኪ̈ቲ̇ ሚሻሪ ኢ ፌ ቆሚ̇ን ኢ̈ሳ ጋዳ̇ ጊላ̇ ቃም̇ ጋምኢዴ። 23 ዪና̇ ኢዝባራ ጎዳ ኣማ̇ናዚን ጎይ ጴች ዋ̈ቺ ኤፍሶ̈ና ጋዳ ኬስኪ̇ዴ። 24 ቢራ ቆጺ̇ዝ ፔቲ ኣሲ ዲማጢሮ̈ሳ ጌይዛ̈ዲ ኣሪጢሚሳ ዛቢ̇ን ሚሲሊን ሹች ቢራባር ኦ̈ሪ ዎይሊን ሚ̈ሽ ጌልሲ̈ሬ። 25 ዪ̈ኮታ̇ቦ ዪ ና̈ሳ̈ዲ ቢራ ቆጺ̇ዝ ኣሳንኬ ኢንታኮንዲፌ̈ን ኦ̈ዝ ሜላ ኣሳን ዎይ ሺ̈ሻ̇ሪ ኢንታኮ “ኣሳን! ኑ̈ኒ ቆሊን ዲጛዚንዳ ዓኒ̇ ኦ̈ሲምባር ማ̈ቂ̇̇ኖን ዪንቲ̇ ኤሪ̈ሬ። 26 ዪ ና̈ሳ ጳውሎ̈ሲ ‘ኣሳ ኩሽባር ኦ̈ሲንቲ̇ኖ ሚሲላን ጾ̈ስ ጊዳካ̇ዬ’ ጌዪ ሙ̈ታ ኤፍሶ̈ና ካታሚን ጋርታ ሙታ̇ ጊዳካ̇ይዶን ኢ̈ሳ ጋርታ ፌ̈ብ ጊላ̇ ጋዲ ኣቲኔኮማ̈ሬ ዎይን ጋርታ ዎይሊን ኣስ ኣማን ባሊኖን ዪንቲ ሲስኪ ቤቂ̇ኖንዶ። 27 ዪ̈ፌ̈ን ማ̈ቄ̇ጌዪን ዓና̇ ኑ̈ኮ ኮሻ ኦ̈ሲን ሌቂንታ̇̈ሬ ዪ ሙታ̇̇ ጊዳካ̇ይዶን ኢ̈ሳ ጋዳ̇ኬ ኣላማ ጋልዳ ኣሲ ዎይ ጎሽታዚን ጴች ጾ̈ሲ̇ን ኣርጣሚሳ ዛቢ̇ን ሜላ̇ ዓሪ ኣታ̇̈ሬ፤ ማ ኢዝ ቦንቺ̇ንዳር ኣታ̇̈ሬ።” 28 ኣሳንሬ ዪኖ̇ ሲስካ̇ሪ ጎይሊዴ “ኤፍሶ̈ና ጋዳ̇ ዎን ኣርጣሚሳ ጴቼ!” ጌዪሙታ̇ ዉይሲዴ። 29 ካታሚን ዎይ ዋ̈ችባር ኩማዴ፤ ዎርዣ̈ዳሬ ማቂዶ̈ና ጋዶ̇ ኣስ ማ̈ቂ̇ኖን ናምኣን ጳውሎ̈ሲ ሉኪ̇ዝ ቤስ̇ ዎይ ኢባር ሉኪ̇ዛን ጋ̈ዮ̈ሳኬ ኣርስጢሮኮ̈ሳ ኤ̈ር ጎ̈ቺ̇ሙታ̇ዶር ዎርዣ ሺ̈ቂዝ ቤስ̇ ዎጺ̇ዴ። 30 ጳውሎ̈ሲ ዎርዣ̈ክ ሉካ̇ንዳብ ኮዪንዶን ኣማ̇ኒዝ ኣሳን ኢ ሉካካ̇ይፌ̈ን ኢያ ካዪዴ። 31 ኢ̈ሳ ጋዳ̇ ዎ ዳይናን ጋርታፖ ጳውሎ̈ሳብ ላጋ̇ ማ̈ቂ̇ኖ ፔቲ̇ ፔቲ̇ ኢ̈ክ ጳውሎ̈ሳክ ኣስ ሚሻሪ “ዎርዣ ሺ̈ቂዝ ቤሳ̇ ጋልዳ ሉካ̇ር ኢንታባር ቤንታፔ” ጋ̈ሪ ኢያ ጌሺዴ። 32 ኢንቲ ኣብዛብ ሺ̈ቂኔኮ ዎይሊን ኣሳን ኤሪባ̈ሴ፤ ፔታ̇ና̈ዲ ፔቲ̇ ባዝ ጋ̈ሪ ዉይሲን ማ̈ ሜላ̈ዲ ሜላ ባዝ ጌዪሙታ ዉይሲ̈ሬ ዪ̈ኮታ̇ቦ ኢና ሺ̈ቂኖ ዎርዣ ጊዳ̇ ጴች ዋቺ̇ ዎ። 33 ፔቲ̇ ፔቲ̇ ኣይሁድ ኣሳን ኢስኪንዲ̇ራ ጌይዛ ና̈ሳ ዎርዣ ጊዳ̇ፖ ሱጋሪ ኢያ ቲ̈ን ኬሲ̇ዴ፤ ዎርዣ ጊዳፖ ፔታ̇ን ፔታ̇ናን ኢ ኢንታ̇ብ ኮሺንቺ ዋጫምፔ̈ን ኢያ ዞሪዴ፤ ኢያሬ ዎርዣ ዚም ዶኣምፔ̈ኒ ፌ ኩሽባር ማላ̇ ቤይሳሪ ኢንታ ጊሽ ዋጫንዳቦ ጊ̈ጊንቲ̇ዴ። 34 ዎቲናካሬ ኢስኪንዲሪ ኣይሁዳ ኣስ ማ̈ቂኖን ኣሳንሲ ዎይ ኤራሪ “ኤፍሶ̈ና ጋዶ̇ ኣርጣሚ̈ሳ ጴቼ!” ጌዪሙታ̇ ናምኢ ሳኣታ ማ̈ቃምፔ̈ን ዎይን ፔቲ̇ ቃ̈ላባር ዉይሲዴ። 35 ዉርሲ ጋልዳ ካታሚን ጋርቶ ጻ̈ፋዲ፤ ዎርዣ̈ኮ ዚምዶኣምፔ̈ን ዎታሪ ኢንታ̇ኮ “ኤፍሶ̈ና ጋዶ̇ ኣሳን! ኤፍሶ̈ና ካታሚን ጋርታ ዶኢዝ ኣሳን ጴቺን ኣርጣሚሲ ዛቢ̇ንዲኬ ኣፋፖ ሶ̈ቢኖ ኢዝ ሚሲሊን ና̈ጋዚን ዎይ ኣሲ ኤሪ̈ሬ። 36 ዪኖ̇ ቴ ኤራባሴ ጌይዝ ኣሲ ኦ̈ናካር ባዮ̇ኮታ̇ቦ ዚም ዶኣምፔ̈ንኬ ባርቢባር ኢ̈ታ ባዝ ኦ̈ካይፌ̈ን ና̈ጊንታ̇ንዳብ ኮሺ̇̈ሬ። 37 ዛባ̇ ጋርቶ ባዝ ቡራካ̇ዮንኬ ኑ ጾ̈ሲ̇ን ቆ̈ካዮ ኣሳን ዓን ዪንቲ̇ ዓይዲ ኤሄይኔ። 38 ዲማ̈ጥሮሳኬ ኢባር ዎን ሲላ ቆ̈ጺዝ ኣሳን፥ ኢንቲ ሞ̈ቲዝ ኣሲ ዎኮ ዳይናን ፊርዲዝ ቃሚ̇ ዎ፤ ዳይናንር ዎ ኢና ዎልኣ ሞ̈ቶጋ̈ቤ። 39 ሜላ ዪንቲ ኮዪዝ ባዚ ዎኮ ሂጋ̇ ቲ̈ን ቤንቲ̇̈ሬ። 40 ዪ ባዪኮ ዓታ̇ብ ኦ̈ንቲ̇ኖ ዓና̇ ዋቺ̇ንኮታ̇ቦ ኑ̈ና ‘ኢንቲ̇ ዋች ዲንኔ’ ጋ̈ሪ ሞ̈ቲዝዳ ጋ̈ር ኑ ኢ̈ጪ̇̈ሬ፤ ዪ ዋቻ̇̈ዲ ኣ ጊሻ̇ብ ዲንዴ ጋ̈ር ኦይጬጌይን ኑ ኢሚ̇ዝ ማልሳ ኑ̈ብ ባዬ̇። 41 ዪኖ̇ ሶ̈ላሪ ሺ̈ቂኖ ኣሳን ላ̈ሊንታምፔ̈ን ዎቲዴ። |