ሃዋ̈ራታን ኦ̈ሳ 11 - ኦራ ጫ̈ቃ ማጻ̈ፋጴ̈ጥሮ̈ሲ ኣይሁድ ባዮ̇ ኣሳን ኣ̈ል ኣባብ ጌሊኖኮ ሶ̈ሊዴ 1 ማ ኣይሁድ ባዮ̇ ኣሳን ጾ̈ሳ̇ ቃ̈ሊን ሲስኪ ኣማ̇ኒኖን ሃዋ̈ራታንኬ ይሁዳ ጋዳ̇ ዎ ኣማ̇ኒኖ ኣሳን ሲስኪ̇ዴ። 2 ጴ̈ጥሮ̈ሲ ፉዳ ዬሩሳ̈ላማ ማ̈ቂ̇ ሉኪ̇ኖምባራ ኣማ̇ኒዝ ኣይሁዳን፤ 3 “ኔ̈ኒ ጋራ̇ዚንታ̇ካ̇ዮ ኣሳን ኣ̈ል ጌላር ኣባብ ኢንታ̇ባር ፊ̈ሽ ሙዪ?” ዪዝ ጋ̈ሪ ኢያ ንኪዴ። 4 ጴ̈ጥሮ̈ሲ ሶ̈ሊን ፔታ̇ን ፔታ̇ን ኢንታብ ሶ̈ሊ̈ርዶሪ፥ 5 “ታ̈ኒ ዮ̈ጳ̇ ካታ̇ሚን ጋርታ ዎዶራ ጾ̈ሳ̇ ዎ̈ሳ̇ምባራ ኢና ሳጻ ቤቃ̇ዴ፤ ቴ ቤቂ̇ኖንዳ፥ ጴች ማጋ̈ራዣ ጫርቃ ማይጺዝ ባዝ ኦይዲ ጎይባር ኤ̈ንታ̇ር ኣፋፖ̇ ቴ ዎ ቤሲ̇ን ጋልዳ ሶ̈ባምባ̇ር ቤቃ̇ዴ። 6 ቴ ኮ̈ት̇ ዎታር ባዝ ዪኖ ቤቃምባ̇ራ ኦይዲ ቶሂ ዎ ሜሃ፤ ማ̈ታ ባዚ ሳ̈ዝ ጋልዳ ፌ ሚልባር ዬዝ ኮቺ̇ንቲኬ ኣፋ ፋሪዝ ካ̈ፋን ቤቃ̇ዴ። 7 ዪና̇ ኢዝባራ ‘ጴ̈ጥሮ̈ሶ ዲንዳ̇ራ ሹ̈ካ̇ር ሞ̈ቤ̇’ ዪዝ ጌይዝ ጊርስ ሲስካ̇ዴ። 8 “ታ̈ናሬ ‘ጎዳ̈ዶ! ዪ̈ ማ̈ቂ̇ባ̈ሴ፤ ታ̈ኒ ቄ ባዝ ዎይ ጌ̈ሽ ማ̈ቃካዮ ባዝ ዉርሳ ቴ ኖ̈ኒታ̇ ኣ̈ ኤራባሴ’ ጋ̈ዴ። 9 “ዪና̇ ጊርሲን ናምኢ ማ̈ቃ̇ራ ‘ጾ̈ሲ̇ ጌ̈ሼ̇ ጌይኖ ባዝ ኔ̈ኒ ቄ ባዝፌ̈ን ፋይዳፔ̇’ ጋ̈ዚን ኣፋፖ̇ ሲስካ̇ዴ። 10 ዪኒ̇ፌ̈ኒ ዓይዚ̇ ጎይ ማ̈ቃ̇ር ማ̈ቃ̇ር ቤንቲ̇ኖፖ̇ ዓኒ ዪና̇ ጫርቃ ማይጻዚንዳ̇ ፉዳ ኣፋ ሉካ̇ዴ። 11 “ዪዚ ዪና̇ ኢዝባራ ዓይዚ̇ ኣሳን ቂሳ̈ራፖ̇ ታ̈ክ ኪ̈ቲንታ̇ር ዬ̈ሪ ቴ ዎ ኬ̈ን ካሪን ጋልዳ ኤቂ̇ዴ። 12 ጌ̈ሻ̇ ኣያ̇ና̈ዳሬ ታ ኣባካር ጌዳር ዓናር ጋ̈ካ̇ይዶር ኢንታባር ሉካ̇ምፔ̈ን ታ̈ክ ሶ̈ሊዴ። ዪን ሌሂ ኣማ̇ኒኖ ኣሳንሬ ታባር ሉኪ̇ን ኑ ዎልኣ ና̈ሳ ኣ̈ል ጌሊዴ። 13 ኢያሬ ጾ̈ሳ̇̇ ኪ̈ታ̇ንቻ̈ዲ ኢ ኣ̈ል ኬ̈ ጋርታ ኤቃ̇ር ቤንቲ̇ኖንዲኬ ‘ዮ̈ጳ̇ ኣስ ሚሻራ ና̈ሳ ጴ̈ጥሮ̈ስ ጌዪንቲ̇ኖ ሲሞ̈ና ጼጊሳቤ። 14 ኢያር ኔ̈ናኬ ኔ ኣ̈ሎ ኣሳን ዎይ ፋጻዝ ቃ̈ሊን ኔ̈ብ ሶ̈ሊ̈ሬ’ ጌይኖን ኑ̈ብ ሶ̈ሊዴ። 15 ታ̈ናር ቢርት ሶ̈ላ ኤ̈̇ምባራ ጌ̈ሻ̇ ኣያ̇ኖ ቲ̈ኒታር ኑ ጋልዳ ሶ̈ቢኖንዲፌ̈ኒ ኢንታ̇ ጋልዳ̇ር ሶ̈ቢዴ። 16 ዪና ኢዝባራ ‘ዋ̈ኒ̇ሲ ዋ̈ባር ጻማ̇ቂኔ ዪንቲ̇ ጌ̈ሻ̇ ኣያ̇ናባር ጻማቂንቲ̈ሬ’ ጋ̈ሪ ጎዳ ዬሱ̈ሲ ሶ̈ሊኖ ቃ̈ሊን ታክ ኤልቅ ጋ̈ዴ። 17 ዪዚ ጾ̈ሲ ኑ̈ኒ ጎዳ ዬሱ̈ስ ክርስቶ̈ሳ ሱ̈ምምባር ኣማ̇ኒን ኑ̈ብ ኢሚ̇ኖ ኢሚቲዳ ኢንታ̇ቦ ኢሜ̇ጌይንዶ ዪዚ ጾ̈ሳ̇ ካያንዳቦ ዳንዳኢዛ ቴ ኦ̈ኖ” ጌይዴ። 18 ዪኖ̇ ሲስኪ̇ኖፖ̇ ዓኒ ኢንታ ጌይዝ ባዚ ዪን ዚም ጌይዴ “ዪዚ ጾ̈ሲ ኣይሁድ ባዮ̇ንባሬ ኦራ ሼምፓብ ዬልዝ ማ̈ሪቲ ኢሚ̇ኔ” ጋ̈ሪ ጾ̈ሳ̇ ጋላቲዴ። ኣማ̇ኒኖ ኣሳን ኣንጾ̈ካ ጋርታ̇ ክሪስታ̈ና ጌዪ ጼይጊንቲ̇ዴ 19 ኢስጣፋ̈ኖ̈ሳ ጋልዳ ዬ̈ሊኖ ዳሳ̇ኮታ̇ቦ ላ̈ሊንቲ̇ኖ ኣማ̇ናን ጾ̈ሳ̇̇ ቃ̈ሊንዶ ኣይሁዳንቦ ሙታ̇ ሶ̈ሊኬዳ ዓጛር ፊንቄ፣ ቆጵሮ̈ስኬ ኣንጾ̈ካ ዬላ̇ዚን ዎይ ፎቲዴ። 20 ቆጵሮ̈ሳፕኬ ቄሬ̈ናፖ̇ ዬይኖ ፔቲ̇ ፔቲ̇ ኣሳን ኣንጾ̈ካ ሉካ̇ሪ ኣይሁድ ባዮ̇ ኣሳንባር ኣታካይ ጎዳ ዬሱ̈ሳ ዎጛሊን ኢንታ̇ብ ሳባ̇ኪዴ። 21 ጎዳ̈ዳሬ ኢንታ ማ̈ዲ̇ዴ፤ ዎይሊን ኣሳር ኣማ̇ናር ጎዳ̈ክ ማ̈ቂ̇ዴ። 22 ዬሩሳ̈ላም ዎ ኣማ̇ኒኖ ኣሳን ዪኖ̇ ሲስኪ̇ኖኮታ̇ቦ ባርናባ̈ሳ ኣንጾ̈ካ ሚሺዴ። 23 ኢያሬ ሉኪ̇ ኢና ዬላ̇ሪ ጾ̈ሲ ዎርዣ̈ቦ ዎዛርፌ̈ን ፌ ኣንጃ ዎይሊሲኖኮ ቤቃ̇ሪ ኡፋይቲ̇ዴ፤ ዎይን ፎቲ ቡ̈ዳባራ ሚ̈ጛሪ ጎዳ̈ቦ ኣማኒንቲ̇ኖ ማ̈ቃ̇ር ዶኣምፔ̈ን ኢንታ̇ ዞሪዴ። 24 ኢያሬ ጌ̈ሻ̇ ኣያ̇ናባርኬ ኣማ̇ና ኩሚኖ ኮሽ̇ ኣስ ማ̈ቂ̇ኖኮታ̇ቦ ዎይሊን ዎርዦ ጎዳ ኣማ̇ኒዴ። 25 ዪኒፖ̇ ዓኒ ባርናባ̈ሲ ሳ̈ኦ̈ላ ኮዪ ጤርሴስ ካታሚን ጋርታ ሉኪ̇ዴ። 26 ኢያ ዲጛሪ ኣንጾ̈ካ ኤኪ̇ ዬይዴ። ኢንቲ ናምኣን ዎልኣ ኢና ዎ ኣማ̇ኒዝ ኣሳንባር ማ̈ቃ̇ሪ ፔቲ̇ ላይ ኩም ዎይሊን ዎርዣ ታማ̈ርሲዴ። ኣማ̇ኒዝ ኣሳንቦ ኣንጾ̈ካ ጋርታ̇ “ክሪስታ̈ና” ጌይዝ ሱም ኢሚንቲ̇ዴ። 27 ዪና̇ ኢዝባራ ፔቲ̇ ፔቲ̇ ናባን ዬሩሳላማፖ̇ ቶ̈ራ ኣንጾ̈ካ ዬይዴ። 28 ኢንታ ጋርታፖ̇ ፔታ̇ና ኣጋ̈ቦ̈ሳ ጌይዛ ዲንዳሪ ኣላሚን ዓና ዎይን ጋልዳ ጴች ጋፊ ዬ̈ዚን ጌ̈ሻ̇ ኣያ̇ና ኢያ ቲ̈ኒን ካ̈ያ ካ̈ዪዴ። ኢ ሶ̈ሊኖንዳ̇ ሮ̈ማ ካ̈ታ ቄላዉዶ̈ስ ቄ̈ሳራ ኬል̇ባር ፎቲንቲ̇ኔ። 29 ኣንጾ̈ካ ዎ ኣማ̇ኒዝ ኣሳን “ኑ̈ብ ዳንዳኢንቲ̇ኖ̈ንዲፌ̈ኒ ሚ̈ሺ̇ ኬሳ̇ሪ ይሁዳ ዎ ኣማ̇ናን ማ̈ዲ̇ስቶ” ጋ̈ሪ ሶ̈ሊንቲ̇ዴ። 30 ሚሺ̇ን ኬሲ̇ ሺ̈ሻ̇ሪ ባርናባ̈ስኬ ሳ̈ኦ̈ላ ኩሽባር ጪጛሻንቦ ሚሺዴ። |