2 ጢማ̈ 4 - ኦራ ጫ̈ቃ ማጻ̈ፋ1 ጾ̈ሳ̇ ቲ̈ንኬ ማ ሼምፓባር ዎን ጋልዳኬ ዓይቂ̇ኖን ጋልዳ ፊርዳንዳብ ዬይዛ ዬሱ̈ስ ክርስቶ̈ሳ ቲ̈ን፥ ኢ ዬንቲ̇ንዲኬ ኢ ካ̈ቲቲን ቆፓሙታ ዓና̇ ባዚን ቴ ኔ̈ብ ዓዳራ ጋ̈ሬ፤ 2 ቃ̈ሊን ሳ̈ባ̇ካቤ፤ ኬሊ̇ን ኮሽኪ̇ናር ኢቲ̇ናር ጊ̈ጊንታ̇ር ዶኣቤ፤ ጴች ዳንዳኣባራኬ ቲሚርታባራ ዎቢ̇ኖ ጺት ዎታቤ፥ ማ ጎይላቤ ሚ̈ንቤ። 3 ኣሲ ሼ̈ምፓ ኢማ̇ዝ ቲምርቲ̇ን ኢጺ̇ዚ ኬሊ̇ ዬይሬ፤ ዪኒ̇ፖ ፌ̈ብ ኮሽኪ̇ዝ ባዝሙታ ሶ̈ሊዝ ኣስታማ̈ሪ ፌ̈ብ ሺ̈ሺ̈ሬ። 4 ዪ̈ኮታ̇ቦ ኪን ባዝ ሲስካ̇ዚን ኣሻ̇ሪ ቶሳፌ̈ኖ ሶ̈ላ ሲስካ̇ንዳብ ኮዪ̈ሬ። 5 ዎቲናካር ኔ̈ኒ ዎይ ባዝባራ ኔ̈ና ና̈ጋቤ፤ ሜ̈ታ ጋርታ ጋርዣቤ፤ ዎጛላ ኦ̈ሲን ኦ̈ቤ፤ ኔ̈ብ ኢሚንቲ̇ኖ ኦ̈ሲን ኦ̈ ፎታቤ። 6 ታ̈ኒ ዣ̈ርሻ ማ̈ቃ̇ንዳብ ኡኪ̇ኔ፤ ዓኒ̇ ኣላሚን ኣሻ̇ራ ቴ ሉካ̇ዚ ኬሊ̇ን ዬሊ̇ኔ። 7 ታ̈ኒ ኮሻ̇ ኦሊን ኦሊኔ፤ ዎን ዎጻ̇ር ዉ̈ርሲኔ፤ ቴ ኣማኒ̇ንዶ ና̈ጊኔ። 8 ዓኒፖ̈ ጌ̈ዳ ጺሊ̇ቲ ኣኪሊላ ጊ̈ጊንታ̇ር ታ̈ብ ዶኢኔ፤ ዪና̇ ኣኪሊሊንዶ ኪን ፊርዳ ፊርዲዝ ጎዳ̈ዲ ዪና̇ ኢዝ ጋላስ ታ̈̈ብ ኢሚ̇̈ሬ፤ ማ ታ̈ብ ሙታ ጊዳካ̇ይዶን ኢ ዬንቲ̇ን ኢኒ̇ቲሙታ̇ ዎንቦ ዎይ ኢሚ̇̈ሬ። 9 ኔ̈ኒ ኤሊራ ታ̈ክ ዬ̈ቤ። 10 ዴ̈ማሲ ዓኒ̇ ኣላሚን ካሪ ታ̈ና ኣሻ̇ር ታሳሎንቃ ሉኪ̇ኔ፤ ቂርቄ̈ሲ ጋላ̈ታ ሉኪ̇ዴ፤ ቲ̈ታ̇ር ዳልማ̈ጣ ሉኪ̇ዴ። 11 ታባር ሉቃ̈ሲ ሙታ̇ ዎ፤ ማ̈ርቆ̈ሳ ቴ ኦ̈ዝ ኦ̈ሲምቦ ታ̈ብ ኮሺ̇ዝ ኣስ ማ̈ቂ̇ኖኮታ̇ቦ ኔባር ኢያ ኮያር ታ̈ብ ኤካ̇ ዬ̈ቤ። 12 ታ̈ኒ ቲኪቆ̈ሳ ኤፍሶ̈ና ጋዳ̇ ሚሺኔ። 13 ኔ̈ ዬ̈ርዶ̇ራ ጢሮ̈ዳ ጋዳ̇ ካ̈ርፑሳ ኣ̈ል ታ ኣሺ̇ኖን ታ ኮ̈ቲን ታ̈ብ ኤካ̇ር ዬ̈ቤ፥ ማ ማጻ̈ፋንር ዎይፖ ሺ ቢራና ማጻፋን ታ̈ብ ኤካ̇ር ዬ̈ቤ። 14 ሲላ ቆጺ̇ዛ ናሳ ኢስኪንዲሮ̈ስ ጴች ሜታ ቴ ጋ̈ልዳ ዬልኔ፤ ጾ̈ሲ ኢ ኦ̈ሲንዲፌ̈ን ኢ̈ብ ኢሞ̇ጋ̈ቤ። 15 ኢ ኑ ሶ̈ላዝ ሶ̈ሊን ዎይ ዎይሊን ኢጺ̇ዛኮታ̇ቦ ኔ ኔ ቆሚ̇ንቦ ና̈ሳ ዪ ጋልዳፖ ና̈ጊንታ̇ቤ። 16 ታ̈ና ሞ̈ቲኖ ባዚምቦ ታ̈ኒ ማልሳ ኢሚ̇ኖ ጋላሲ̇ን ዎይን ታ̈ና ኣሻ̇ር ሉኪ̇ንዶኬ ታ̈ና ማ̈ዳ̇ንዳብ ዬይኖ ኣሲ ኦ̈ናካር ባዬ። ጾ̈ሲ ዪኖ̇ ኢንታ̇ብ ኣቶ ጌዮ ጋ̈ቤ። 17 ዎቲናካሬ ጎዳ ፌ ኪ̈ቲን ዎይ ቴ ጎይባራ ኣይሁድ ዜር ማ̈ቃካዮ̈ን ዎይ ሲስካ̇ምፔ̈ኒ ታባር ማ̈ቃር ታ̈ና ሚ̇ን ኤሲ̇ዴ፤ ዞብ̇ ኖ̈ና ጋርታፖ ታ̈ና ቡ̈ቲሲዴ። 18 ጎዳ ታ̈ና ኢ̈ታ ባዝ ዎይ ጋልዳፖ ቡ̈ቲሲ̈ሬ፤ ኣፎ ካ̈ቲቲምቦ ታ̈ና ዬል̈ሬ፤ ሜናብ ኢ̈ብ ቦንች ማ̈ቆ̇! ኣሚንኤ። ዉርሲ ሳሪቲ 19 ጲርስቂላ̈ኬ ኣቂ̈ላኬ ማ ኦኒስፖ̈ራ ኣ̈ሎ ኣሳንር ታ̈ብ ሳሮ ጋ̈ቤ። 20 ኣራስጦ̈ሲ ቆ̈ርንቶ̈ስ ካታማ ጋርታ ኣቲ̇ኔ፤ ጣራፊሞ̈ሲ ማኖኮታ̇ቦ ማ̈ሊጢ ዴሴቲን ጋ̈ልዳ ቴ ኢያ ኣሺ̇ኔ። 21 ባ̈ርጊ ጌላካ̇ይዶን ኔ ታ̈ኮ ኤሊ̇ ዬ̈ቤ። ኤ̈ጊሎሲ፥ ጱዴሲ ማ ቄላውዲኬ ኣማ̇ኒኖ ኣሳን ዎይን ዪንታ̇ ሳሮ ጌይኔ። 22 ጎዳ ኔባር ማ̈ቆ̇ጋ̈ቤ። ጾ̈ሳ̇ ካንን ዪንታ̇ባራ ማ̈ቆ̇ጋ̈ቤ። |