2 ጢማ̈ 3 - ኦራ ጫ̈ቃ ማጻ̈ፋዉ̈ርሲ ቃም ጋርታ̇ ማ̈ቂ̇ዝ ኢ̈ት ባዛን 1 ዉ̈ርሲ ኬል̇ ጋልዳ ዋ̈ዪዝ ቃሚ̇ ዬ̈ዚን ኤራቤ፤ 2 ኣሳን ፌ̈ናሙታ ካዛን፣ ሚ̈ሻ̇ቦ ጋንዲ̇ዛን፣ ፌ ባዝ ኬርፊዛን፣ ኦቲርቂ̇ዛን፣ ኣስ ቆ̈ዛን፣ ፌ̈ና ዬሊኖንቦ ኪ̈ቲንቲ̇ባ̈ሶን፣ ኣሲ ኢንታ̇ብ ኮሽ ኦ̈ኖምቦ ጾ̈ሲ ኢሞ̇ ጋ̈ባሶን፣ ጌ̈ሺቲ ባዮ̇ን፣ 3 ካን ባ̈ዮን፣ ኣሳብ ኣቶ̇ ጋ̈ባሶን፣ ኣሳ ሱ̈ም ኢ̈ሲ̇ዛን፣ ፌ̈ና ኢ̈ት ባዝ ጋልዳፖ̇ ና̈ጊባ̈ሶን፣ ኣሳብ ሚጪንቲ̇ባ̈ሶን፥ ኮሽ ማ̈ቂኖ ባዝ ኢጺ̇ዛን፥ 4 ኣሳ ባዝ ኤካ̇ር ካ̈ዲዛን፣ ባርቢቲ̇ዛን፣ ኦቲራባራ ጋቢ̇ኖን፣ ጾ̈ሳ̇̇ፖ ሺ ፌ̈ና ኡፋይሲ̇ዝ ባዝ ካዛን ማ̈ቂ̇̈ሬ። 5 ኢንቲ ኣሲ ኢንታ ቤቃ̇ምባራ ጾ̈ሳ̇ብ ጎሽቲ̇ዛ ማይጺ̈ሬ፤ ዎቲናካር ጾ̈ሳ̇ ዎልቂን ካ̈ዲኔ፤ ዪንፌ̈ኖ ኣሳን ጋልዳፖ ጎታ̇ቤ። 6 ዪን ኣሳን ኣሳ ኣ̈ላ ጋርሳባር ኤሪንታካ̇ይ ጌሊሙታ ናጋራ ኢንታ ጋልዳ ካውቲኖ ኢ̈ታ ኢና̇ባር ኤ̈ንታ̇ር ዎ ፋባ̈ሶ ማጫ̇ን ጺሂሲ ኤ̈ሬ። 7 ዪንፌ̈ኖ ማጫ̇ን ዎይ ጋላስ ታማ̈ሪ̈ሬ፤ ዎቲናካር ኪንን ኣብዝኮ ኤራንዳብ ዳንዳኢባ̈ሴ። 8 ኢያ̈ኔሳኬ ኢያንቤሬ̈ሳኬ ሙ̈ሳኮን ኢጺ̇ኖንዲፌ̈ኒ ዪን ኣሳ̈ንር ኢንታ ቆፊን ኢ̈ቲኖኮታ̇ብኬ ኣማ̇ና ጎይን ጋልዳፖ ኬዲ̇ኖ ኣስ ማ̈ቂ̇ኖኮታ̇ቦ ኢንቲ ኪንን ኢጺ̇̈ሬ። 9 ኢያ̈ኔሳኬ ኢያንቤሬ̈ሳ ዳሺቲን ኣሳ ቲ̈ን ዎይ ፋላ̇ ጋልዳ ኬስኪ̇ኖንዲፌ̈ኒ ዓን ኣሳን ዳሺቲንዳሬ ፋላ̇ ጋልዳ ቤንቲ̇ዛኮታ̇ቦ ኢንታ̇ቦ ማ̈ቃ̇ባሴ። ዉርሲ ዞራ 10 ኔ̈ኒ ዎቲናካሬ ቴ ቲሚርቲ̇ንዶ፣ ቴ ዶኢንዶ፣ ቴ ቆፊንዶ፣ ቴ ኣማ̇ኒንዶ፣ ቴ ዳንዳኢንዶ፣ ቴ ካንንዶ፣ ታ ጋርዢኖ ጋርዢንዶ ኔ ኤሪኔ። 11 ማ ኣንጾ̈ካ፣ ኢቆ̈ናኬ ሊስጢራ ካታማን ጋርታ ታ̈ና ዬሊ̇ኖ ሜ̈ታንኬ ታ̈ናር ዪን ሜታን ጋርታ ዎዛርፌ̈ን ጋርዢኖኮ ኔ ኤራ̈ሬ፤ ዎቲናካር ጾ̈ሳ̇̇̈ዲ ታ̈ና ዎይፖ ቡ̈ቲሲኔ። 12 ኪንባር፥ ዬሱ̈ስ ክርስቶ̈ሳ ማይጻር ዶኣንዳብ ኮዪዝ ኣሳን ዎይ ሜታ ኢንታ ዬሊ̇̈ሬ። 13 ዎቲናካር ኢ̈ታ ኣሳንኬ ማይጺሳር ኣቂዝ ኣሳን ሜላን ባሊሙታ̇ኬ ፌ ቆሚ̇ምባር ባሊቲ̇ሙታ̇፥ ኢ̈ታ ባዝ ጋልዳ ኢ̈ታ ባዝ ጉጂ̇ሙታ̇ ሉኪ̇̈ሬ። 14 ዎቲናካር ኔ̈ ኦ ጋልዳፖ ታማ̈ሪኖኮ ኔ ኤራ̈ዚንኮታ̇ቦ ኔ ታማ̈ሪኖንባርኬ ኔ ኤሪኖ ኪንንባራ ሚ̈ጛር ኤቃ̇ቤ። 15 ማ ኔ̈ኒ ናኢቲፖ ኤ̈ራ ዬሱ̈ስ ክርስቶ̈ሳ ኣማ̇ናር ፋጺዝ ጎይ ኤርሲዝ ቲሚርታ ኢሚ̇ዝ ጌ̈ሻ̇ ማጻ̈ፋን ኤሪኔ። 16 ጌ̈ሻ̇ ማጻ̈ፊ ዎይ ጾ̈ሳ̇̇ ኣያ̇ና ቲ̈ኒን ጻ̈ፊንቲ̇ኔ፤ ዪና̇ ማጻ̈ፊንዳ ኪንን ታማ̈ርሳ̇ንዳቦ፥ ባሊቲ̇ኖን ጎይላር ማሃንዳቦ፥ ኪን ጎይን ቤይሳንዳብኬ ጺ̈ሊ̇ቲባር ዶኣዚን ታማ̈ርሳንዳቦ ማ̈ዳ̇̈ሬ። 17 ዪና̇ሬ ጾ̈ሳ̇ ኣማ̇ኒኖ ኣሲ ኮሻ ኦ̈ሳ ዎይቦ ታማ̈ራር ጊ̈ጊንቲ̇ኖ ማ̈ቃ̇ምፔ̈ኒዬ። |