2 ጢማ̈ 2 - ኦራ ጫ̈ቃ ማጻ̈ፋክርስቶ̈ሳብ ኣማ̇ኒንቲ̇ኖ ዎታ̇̈ዳራ ማ̈ቃ̇ር ኦ̈ሲ 1 ዪዚ ቴ ናኣ̈ዶ! ኔ̈ኒ ዬሱ̈ስ ክርስቶ̈ሲ ኔ̈ብ ኢማ̇ዝ ዎልቂንባራ ሚ̈ጛቤ። 2 ዎይሊን ማርካ ቲ̈ን ኔ̈ ታ ጋልዳፖ ሲስኪ̇ኖ ቲሚርቲ̇ን ሜላን ታማ̈ርሳንዳ̇ቦ ዳንዳኢዝ ኤራ ዎንቦ ኣማ̇ኒንቲ̇ኖ ኣሳንቦ ዓዳራ ኢማ̇ቤ። 3 ኔ̈ናሬ ዬሱ̈ስ ክርስቶ̈ሳብ ኮሽ ዎታ̇ዳራፌ̈ን ማ̈ቃ̇ራ ታባር ዎልኣ ሜታ ኤካ̇ቤ። 4 ዎታ̇ዳራ ማ̈ቃ̇ር ኦ̈ዝ ኣሲ ፌ̈ና ኪ̈ቲ̇ዛ ፌ ኣላቃ ኡፋይሳ̇ንዳብ ጊ̈ጊንቲ̇ኖ ማ̈ቃንዳብ ኮሺ̇̈ርዶኬ ዎታ̇ዳራ ኦ̈ሳ ማ̈ቃካ̇ዮ ባዝ ጋርታ ፌ̈ና ቡሺባ̈ሴ። 5 ዪና̇ ኢዝፌ̈ን ጋማንዳብ ዎጺ̇ዝ ኣሲ ዎን ሂጊ̇ን ና̈ጋካ̇ይ ኣታ̇ር ዎጼ̇ጌይን ሺሊ̇ማ̈ቲን ዲጚባሴ። 6 ዎት ዎቲ ዳቡሪዝ ና̈ሳ̈ዲ ፌ ኦ̈ኖ ኦ̈ሲምፖ ቤንታ̇ዝ ኣ̈ፊንዶ ቲ̈ኖን ኢ ዲጛ̈ንዳቦ ኮሺ̈̇ሬ። 7 ጎዳ̈ዲ ባዝ ዎይባራ ኔ̈ቦ ኤራ ኢሚ̇ዛኮታ̇ቦ ቴ ኔ̈ክ ጋ̈ዚን ጌ̈ዚንር ቆፓ̇ቤ። 8 ዓይቃ ጋማ̈ር ዲንዲኖ፥ ዳ̈ዊታ ዜ̈ር ማ̈ቂ̇ኖ ዬሱ̈ስ ክርስቶ̈ሳ ቆፓ̇ቤ፤ ታ̈ናሬ ሳ̈ባ̇ካዝ ዎጛሊን ዓና̇ ኢዞ። 9 ታ̈ናር ዓና̈ ዎጛሊን ጊሽ ኢ̈ታ ባዝ ኦ̈ኖ ኣስፌ̈ኒ ቃቺንታ̇ራ ሜታ ኤካ̇ሙታ ዎ፤ ዎቲናካር ጾ̈ሳ̇ ቃ̈ሊን ቃቺንታ̇ባሴ። 10 ዪ̈ኮታ̇ቦ ኢንቲ ዬሱ̈ስ ክርስቶ̈ሳ ጎይባራ ቤንቲ̇ዝ ፋቲንዲኬ ሜናቦ ዶኣዝ ቦንቺ̇ን ዲጛ̈ምፔ̈ኒ ጾ̈ሳ̇ ማራ̇ጺኖ ኣሳንቦ ጋ̈ራ ታ̈ኒ ዎይ ባዝ ጋ̈ርዣ̈ሬ። 11 ዓንዲዝ ጋ̈ዝ ሶ̈ሊንዳ ኣማ̇ኒንቲ̇ኖ ሶ̈ላ፦ “ኑኒ ኢባ̈ራ ዓይቄ̇ጌይንዶ፥ ኢባራ ማ ሼምፓባር ዶኢ̈ሬ። 12 ኑ̈ኒ ጋርዣር ኢባር ሚ̈ጜጌይን፥ ኢባር ዎልኣ ካውቲ̈ሬ። ኑ ኢያ ካ̈ዴጌይንዶ ኢያር ማ ኑ̈ና ካ̈̈ዲ̈ሬ። 13 ኑ̈ኒ ኣማ̇ኒንትባ̈ሶን ማ̈ቃ̇ር ቤንቴጌይን ኢ ፌ̈ና ካ̈ዲባ̈ሶኮታ̇ቦ ዎይ ጋ̈ላስ ኣማ̇ኒንቲ̇ኖ ማ̈ቃ̇ር ዶኢ̈ሬ፤” ጾ̈ሲ ኢ̈ብ ማርኪቲኖ ኦ̈ስ ኣስ 14 ማ ዪን ባዛን ኢንታ̇ብ ሚ̈ንር ቆፊሳቤ፤ ቃ̈ላ ጎይ ዋጫካ̇ዮዲፌ̈ን ጾ̈ሳ̇ ቲ̈ን ኢንታ ዞራቤ፤ ዪኒ̇ፌ̈ኖ ዋቺ̇ንዳ ሲስኪ̇ዝ ኣሳን ይሳ̇̈ርዶኬ ኣባካር ማ̈ዳ̇ባሴ። 15 ፌ ኦ̈ሲንባር ዬልቂባ̈ሶ፥ ኪን ቃ̈ሊን ዎቢ̇ሳካ̇ይ ሶ̈ሊዝ ኣስ ማ̈ቃ̇ራ ኔ ኔ̈ና ጾ̈ሳ̇ ቲ̈ን ሺ̈ሻ̇ንዳብ ሚ̈ጛቤ። 16 ጾ̈ሳ̇ ቦንቺሺባ̈ሶ ፋባ̈ሶ ሶ̈ላ ጋልዳፖ ጎታ̇ቤ፤ ዪንፌ̈ኖ ፋባ̈ሶ ሶ̈ላን ጾ̈ሳ̇ ጋልዳፖ ኤሳ ኣስ ጎቲ̇ሲ̈ሬ። 17 ዪንፌኖ ኣሳን ቲሚርቲ̇ንዳ ኮ̈ያፌ̈ን ሞ̈ሬ፤ ዪንፌ̈ኖ ኣሳን ጊዳ ሄሜኖ̈ሴኬ ፊልጦ̈ሴኬ ዎ። 18 ዪን ኣሳን “ዓይቃ ጋርታ̇ፖ ዲንዳዛ̈ዲ ሚን ማቂ̇ ኣ̈ኔ” ጌይ ዋጪሙታ̇ ኪንን ጋልዳፖ ጎቲ̇ኔ፤ ማ ፔቲ̇ ፔቲ̇ ኣሳን ኣማ̇ኒንዳር ሊ̈ቂሲ̈ሬ። 19 ዎቲናካር “ጎዳ̈ዲ ፌዪ ማ̈ቂ̇ኖን ኤሪ̈ሬ፤” ማ “ጎዳ ሱምን ጼይጊዝ ኣሲ ዎይ ኢ̈ት ባዝ ጋልዳፖ ጎቶ̇” ጌይዝ ማይታማ ኢዝ ጋልዳ ጋዲ̇ኖ ጾ̈ሲ ቶሊኖ ቱ̈ሲን ኤንኣባሴ። 20 ዱራ ኣሳ ኣ̈ል ጋርታ ዎርቃ̇ባርኬ ቢራባር ኮቺ̇ንቲኖ ኢቃሙታ̇ ጊዳካ̇ይዶን ሚባርኬ ቶቅላባር ኮቺ̇ኖ ኢቃር ዎ፤ ዪን ኢቃን ጋርታ̇ፖ ዶካ̇ን ቦንቺ̇ንቲኖ ኦ̈ሳብ ፌ̈ሽኪ̇ን ዶካን ቦንቺ ባዮ̇ ኦ̈ሳብ ፌ̈ሽኪ̇̈ሬ። 21 ዪዚ ኣሲ ኦ̈ናካሬ ቴ ዪን ጌይኖ ኢ̈ታ ባዛን ጋልዳፖ ፌ̈ና ጌ̈ሼጌይንዶ ቦንቺንቲ̇ኖ ኦ̈ሳቦ ፌ̈ሽኪዝ፥ ጌ̈ሽ ማ̈ቂ̇ኖ ፌ ጎዳ̈ብ ማ̈ዲ̇ዝ ኮሻ ኦ̈ሳብ ዎይ ጊ̈ጊንቲ̇ኖ ኢቃ ማ̈ቂ̇̈ሬ። 22 ናኢቲ ኢ̈ታ ኢኒ̇ን ጋልዳፖ̇ ጎታ̇ቤ፤ ጌ̈ሻ ቡ̈ዳባራ ጎዳ ጼይጊዝ ኣሳንባራ ማቃራ ጺሊቲ፣ ኣማ̇ና፣ ካንኬ ሳሪቲ ጎይን ዬቤ። 23 ጎይላ ኤሄዚን ኤራራ ቦ̈ዚቲ ጋልዳፔኬ ፋባ̈ሶ ዋች ጋልዳፖ ጎታ̇ቤ። 24 ጎዳ ዬሱ̈ሳቦ ኣይላ ማ̈ቂ̇ኖ ኣሲ ዎይ ኣሳ ቲ̈ን ኣሽካ፥ ታማ̈ርሳንዳ̇ቦ ዳንዳኢዛዲኬ ዳንዳኣ ኢ̈ብ ዎ ኣስ ማ̈ቃ̇ንዳቦ ኮሺ̈ርዶኬ ኣሳባር ጎይል ጎይሊዝ ኣስ ማ̈ቃ̇ንዳብ ኮሺ̇ባ̈ሴ። 25 ኢያ ኢጺ̇ዝ ኣሳንቦ ኢ ቡ̈ዳ ዳልግ ማ̈ቃ̇ር ታማ̈ርሲ ማሃንዳብ ኮሺ̈ሬ፤ ኦ ኤሬ ኢንቲ ኪንን ኤራምፔ̈ን ጾ̈ሳ̇ ኢንታ̇ብ ማ̈ሪቲ ጌላምፔ̈ን ዎታንዳብ ዳንዳኢ̈ሬ። 26 ዪኒ̇ ጎይባራ ኢንታ ቆፊን ኢንታ ጋልዳ ማ̈ቂ̇ን ሴጣ̈ኒ ኢንታ ፌ ባዝ ኦ̈ሳንዳብ ኢንታ̇ ኤኖ ጺሂን ጋርታፖ̇ ቡ̈ቲ̇̈ሬ። |