2 ጢማ̈ 1 - ኦራ ጫ̈ቃ ማጻ̈ፋ

^1-2 ዬሱ̈ስ ክርስቶ̈ስ ጎይባራ ቤንቲ̇ኖ ሼ̈ምፓ ታስፊንዲፌ̈ኒ ጾ̈ሳ̇ ቆፊፌ̈ን ዬሱ̈ስ ክርስቶ̈ሳቦ ሃዋ̈ራ ማ̈ቂ̇ኖ ታ ጳውሎ̈ሲ ቴ ካዝ ናኣ ጢማ̈ቶ̈ሳብ ሚሺኖ ኪ̈ታ፤ ጾ̈ሳ̇ ባ̈ባ ጋልዳፔኬ ዬሱ̈ስ ክርስቶ̈ሳ ጋልዳፖ ኢ ኮሺ̇ቲንዳ ማ̈ሪቲንዲኬ ሳርቲን ኔ̈ብ ማ̈ቆ̇።

ጢማ̈ቶሳብ ኢሚ̇ኖ ዞራ

³ ታ̈ኒ ዎይ ጋላስ ጾ̈ሳ̇ ዎሳ̈ርዶራ ኔ̈ና ቆፓ̇ራ ሚን ታ ባ̈ቢንታን ዎቲኖንዲፌ̈ኒ ታ̈ናር ጌ̈ሻ ቡ̈ዳባራ ጎሽቲ̇ዝ ቴ ጾ̈ሳ̇ ጋላታ̈ሬ።

⁴ ኔ ኣብጻ̇ዝ ኣብን ታ̈ክ ኤልቅ ጋ̈ሬ፤ ዪ̈ኮታ̇ቦ ቴ ኡፋይታ̇ምፔ̈ኒ ኔ̈ና ቤቃ̇ንዳብ ኢኒ̇ታ̈ሬ።

⁵ ኔ ጋርታ ዎን ኪን ኣማ̇ኒን ታ̈ክ ኤልቅ ጋ̈ሬ፤ ዪኒ̇ፌ̈ኖ ኣማ̇ኒንዳ ቲ̈ን ኔ ኣ̈ኪ̇ን ሎ̈ይዲኬ ኔ ኢንዲን ኣዉ̈ንቃኮ ዎ፤ ማ ዪና̇ ኔ ጋርታር ዎን ቴ ኤራ̈ሬ።

⁶ ዪኒኮታ̇ቦ ታ̈ኒ ቴ ኩ̈ሺን ኔ ጋልዳ ጋዲ̇ን ኔ̈ቦ ኢሚ̇ንቲኖንዲኬ ታማፌ̈ን ኤይታ̇ሙታ̇ ኔ ጋ̈ርታ ዎ ጾ̈ሳ̇ ኪልሲ̇ንዶ ማሃራ ዲንምፔ̈ን ቴ ኔ̈ና ቆፊሳ̈ሬ።

⁷ ኣባ ጌይን ጾ̈ሳ̇ ኑ̈ብ ኢሚ̇ኖ ኣያ̇ና̈ዲ ዎልቃ፥ ካንኬ ኣሲ ፌ̈ና ኢ̈ት ባዝ ጋልዳፖ ና̈ጋ̈ምፔ̈ን ዎቲዝ ኣያ̇ናዶኬ ኢ̈ች ኢጫ̇ምፔ̈ን ዎቲዝ ኣያ̇ና ጊዳካ̇ዬ።

⁸ ዪዚ ኔ̈ኒ ኑ ጎዳ ዬሱ̈ስ ክርስቶ̈ሳባዝ ማርኪታንዳ̇ቦ ዬ̈ልቃፔ፤ ኢኮታ̇ቦ ጋ̈ራ ቃቺንቲ̇ኖ ታባራር ማ̈ቂ̇ን ዬልቃፔ̇፤ ጾ̈ሳ̇̇ ኔ̈ብ ኢማ̇ዝ ዎልቂንባራ ዎጛላኮታ̇ ታባር ሜታ ኤካ̇ቤ።

⁹ ኑ ኦ̈ኖ ኮሻ̇ ኦ̈ሲንኮታ̇ቦ ጊዳካ̇ይዶን ኢ ፌ ጌይኖንዲፌ̈ንኬ ፌ ካንንባር ኑ̈ና ፋዴ፤ ኑ ጌ̈ሽ ኣስ ማ̈ቃ̇ምፔ̈ኒ ኑ̈ና ጼይጊዴ፤ ዪና̇ ኮሺቲንዶ ሚን ሳ̈ዝ ሲሳፖ ዬሱ̈ስ ክርስቶ̈ሳ ጎይባራ ኑ̈ብ ኢሚ̇ኔ።

¹⁰ ዪና̇ ኢ ካንንዳ ኑ̈ና ፋዛ ዬሱ̈ስ ክርስቶ̈ሲ ዬይን ዓት ቤንታ̇ዴ። ኢያሬ ዓይቃ ዎልቂን ይሳ̇ሪ ዎጛላ ጎይባራ ዓይቂ ባዮ̇ ሜና̈ቦ ሼምፓባር ዶኢ ኑ̈ና ቤይሲዴ።

¹¹ ታ̈ናሬ ዓና̇ ዎጛሊን ሳባ̈ኪዝ ኣስ፥ ሃዋ̈ራኬ ኣስታማ̈ሪ ማ̈ቃ̇ር ሹ̈ሚንቲ̇ኔ።

¹² ታ ዓና̇ ሜቲን ኤካ̇ሙታ ዎንዳሬ ዪኒ ጊሻ̇ቦ፤ ዎቲናካሬ ታ ኦ̈ና ኣማ̇ኒኖኮ ኤሪዛኮታ̇ቦ ኢባር ዬ̈ልቃባሴ፤ ኢ ታ̈ቦ ኢሚ̇ኖ ዓዳሪንዶ ኢ ጌይኖ ቃሚ̇ን ዬሊ̇ዝ ዲራስ ና̈ጋንዳቦ ዳንዳኣዚን ቴ ኤሪኔ።

¹³ ኔ̈ኒ ታ ጋልዳፖ ታማ̈ሪኖ ኮሽ ቃ̈ሊንዶ ሚሳ̇̈ሊፌ̈ን ዎታራ ዬሱ̈ስ ክርስቶ̈ሳባራ ኑ̈ብ ዎ ኣማ̇ኒንዴኬ ካንን ያካ̇ይፌ̈ን ና̈ጋቤ።

¹⁴ ኑ ጋርታ̇ ዶኢዛ ጌ̈ሻ ኣያ̇ና ጎይባራ ኔ̈ብ ኢሚ̇ንቲ̇ኖ ኮሻ ዓዳሪን ና̈ጋቤ።

¹⁵ ኢ̈ሳ ጋ̈ዳ ዎን ዎይ ታና̈ ኣሻር ሉኪ̇ኖን ኔ̈ ኤራ̈ሬ፤ ዪን ኣሳን ጋርታ̇ፖ ናምኣን ፊጋሎሳኬ ሄርሞጌ̈ኔ̈ሳኬ።

¹⁶ ጾ̈ሳ̇ዲ ኦናሲፎ̈ራ ኣ̈ሎ ኣሳ̈ንቦ ፌ ማ̈ሪቲን ኢሞ̇ጋ̈ቤ፤ ኦናሲፎ̈ሪ ዎይሊን ጋ̈ላስ ታ̈ና ማ̈ዲ̈ኔ፤ ቴ ቃቺንቲ̇ናሬ ኢ ታባር ዬልቃካ̇ዬ።

¹⁷ ማ ኢ ሮ̈ማ ካታማ ዬይኖምባራ ቴ ዎ ቤሲ̇ን ኮዪ ዳ̈ቡራር ታ̈ና ዲጚኔ።

¹⁸ ዉ̈ርሲ ቃሚ̇ንባራ ጾ̈ሲ ማ̈ሪቲ ኢ̈ብ ኢሞ̇ጋ̈ቤ፤ ታ̈ኒ ኤፍሶ̈ና ጋ̈ዳ ዎምባራ ኢ ታ̈ና ዎዛርፌ̈ን ማ̈ዲኖኮ ኔ ኔ ቆማ̇ቦ ኢዞ ኮሺንቻ ኤራ̈ሬ።