2 ጴጥ 3 - ኦራ ጫ̈ቃ ማጻ̈ፋጎዳ ዬሱ̈ሲ ዬ̈ዝ ታስፊንዶ 1 ታ ላጋ̇ንሶ! ታ ዓና̇ ዪንታ̇ብ ጻ̈ፋዚንዳ ናምኢ ኪ̈ቲንዶ፤ ዪን ናምኢ ኪ̈ታን ዪንታ̇ብ ጻ̈ፊኖንዳ፥ ዪንታ̇ቦ ኮሽ ቆፊ ዶኣምፔ̈ኒ ቲ̈ኒታር ባርኪንዳቦ። 2 ዓኒ̇ፖ ቲ̈ን ጌ̈ሻ̇ ናባን ሶ̈ሊኖ ቃ̈ሊንዲኬ ማ ዪንታ̇ ሃዋ̈ራታን ጎይባራ ዲጚኖ ኑ ጎዳ ኑ̈ና ፋዛ ኪ̈ቲን ቆፓ̇ምፔ̈ኒ ቴ ኮያ̈ሬ። 3 ዎይ ባዛፖ ቲ̈ን ዪንቲ ዪኖ̇ ቆፒ̇ብቴ፤ ዉርሲ ላይን ጋርታ̇ ዪንታ̇ ጋልዳ ቃልዳ ቃልዲዝ ኣሳንኬ ኢንታ̇ ኢ̈ታ ኢኒ̇ን ጋ̈ዚን ኦ̈ሙታ ዬዝ ኣሳን ዬይሬ። 4 ዪን ኣሳን “ጎዳ ዬሱ̈ሲ ዬይኔ ጋ̈ካ? ዓት ዎይዳ? ቲ̇ኖ ባቢንታ̇ን ዓይቂ̇ኖፖ ኤ̈ሪ ዎይ ባዚ ሚን ጾ̈ሲ̇ ኮቺ̇ኖንዲፌ̈ን ዎ” ጌይሬ። 5 ኣፎ ሳ̈ዚን ሚን ጾ̈ሳ̇ ቃ̈ላባር ኮቺንቲ̇ኖንዲኬ፥ ሳ̈ዶ̇ ሳ̈ዚንዳር ኮቺንቲ̇ኖንዳ ዋ̈ ጋርታ̇ፓኬ ዋ̈ባራ ማ̈ቂ̇ኖን ኤሪ̈ርዶሪ ካ̈ዲ̈ሬ። 6 ሚን ዎ ኣላሚንዳ ዋ̈ባር ቆ̈ንታ̇ር ዪኔ። 7 ዪና̇ ቃ̈ሊን ኢዝባራ ዓት ዎ ኣፎ ሳ̈ዛንኬ ሳ̈ዶ̇ ሳ̈ዚንዳ፥ ጾ̈ሳ̇̇ ጎሽቲባ̈ሶ ኣሳን ያዝ ፊርዳ ቃሚ̇ን ዬሊ̇ዚ ዲራስ ታማባር ሚጫ̇ንዳቦ ና̈ጊንታ̇ር ዎ። 8 ታ ላጋ̇ን! ጎዳ ቲ̈ን ፔቲ̇ ቃሚ̇ ሙኩላ ላይፌ̈ኒ፥ ሙኩላ ላይ ፔቲ̇ ቃምፔ̈ን ማ̈ቂ̇ኖን ዪኖ̇ ቦቲጛፒ̇ቴ። 9 ፔቲ̇ ፔቲ̇ ኣሳን ቆፓ̇ዚንዲፌ̈ኒ ጎዳ ሶ̈ሊኖ ታስፋ ቃ̈ሊን ፎታንዳቦ ጋምኢባ̈ሴ፤ ዎቲናካር ኣሲ ዎይ ማ̈ሪቲባር ማ̈ቃ̇ምፔ̈ንኬ ኦ̈ናካር ያካ̇ይፌ̈ኒ ኮያሪ ዪንታ̇ኮታ̇ቦ ጋርዢኔ። 10 ጎዳ ዬንቲ̇ንዳ ሶ̈ላፌ̈ኒ ኣሲ ቆፓካይዶ̈ን ዬ̈ሬ፤ ዪና̇ ጋላሲ̇ን ኣፎ ሳ̈ዚንዳ ጴች ጊርስባር ያ̈ሬ፤ ኢዝ ጋርታ̇ ዎ ባዚ ዎይ ታማባር ሚጫ̇ር ዪ̈ሬ። ሳ̈ዶ ሳ̈ዚንዲኬ ኢዝ ጋልዳ ዎ ባዝ ዎይ ሚጪ̇̈ሬ። 11 ዪዚ ዪን ዎይ ዪ̈ፌ̈ን ዪ̈ርኮ ዪንቲ̇ ጌ̈ሺ̇ቲባርኬ ጾ̈ሳ̇̇̈ቦ ኢ̈ጪ̇ሙታ ዶኣንዳቦ ኮሺ̇ባ̈ሳ? 12 ዪዚ ዪንቲ̇ ጾ̈ሳ̇ ቃሚ̇ን ዬንቲ̇ን ሹ̈ናባር ና̈ጊዛንኬ ኤሊ̇ ዬ̈ምፔ̈ኒ ኦ̈ዝ ኣስ ማ̈ቂ̇ብቴ፤ ዪና̇ ቃሚ̇ን ጋላስ ኣፎ ሳ̈ዚን ታማባር ሚጫ̇ር ያ̈ሬ፤ ኢዝ ጋርታ̇ ዎባዚ ዎይ ታማ ሶ̈ላባር ቴልጊ ዪ̈ሬ። 13 ዎቲናካር ጾ̈ሲ ኑ̈ብ ኢሚ̇ኖ ታስፊንዲፌ̈ኒ ጺሊ̇ቲ ኢዝ ጋርታ ዶኢዝ ኦራስ ኣፎ ሳ̈ዝኬ ሳ̈ዶ̇ ሳ̈ዝ ኑ ና̈ጊ̈ሬ። 14 ዪ̈ኮታ̇ቦ ታ ላጋ̇ን! ዪና̇ ዎይ ማ̈ቃ̇ዝ ቃሚ̇ን ዪንቲ̇ ናጋ ጋልዳ ዎኮ፥ ዪንቲ ኢ̈ታ ባዝኬ ማዛ ባዝ ዪንታ̇ ጋልዳ ባይዶን ኢባር ኮሽ ዎዶን ዪንታ̇ ዲጛምፔ̈ኒ ሚ̈ጛር ዶኢብቴ። 15 ጎዳ ዬ̈ካ̇ይ ጋምኢኖንዳ ኣሲ ፋጻምፔ̈ኒ ማ̈ቂ̇ኖን ኤሪብቴ፤ ካንቲ̇ኖ ኑ ኢሻ ጳውሎ̈ሲ ኢ̈ቦ ኢሚንቲ̇ኖ ኤሪንዲፌ̈ኒ ዪንታ̇ብ ጻ̈ፊኖንዳ ዓኖ̇። 16 ኢ ፌ ጻ̈ፊኖ ኪ̈ታን ጋልዳ ዓን ባዛን ጻ̈ፊኔ። ኢ ኪ̈ታን ፔታ̇ን ፔታ̇ናን ጋርታ ኣሳብ ኤሊ̇ ጌሊባ̈ሶ ባዚ ዎ። ኤሪ ጉ̈ጺኖንኬ ጌዳክ ዓኒክ ጌይዝ ኣሳን ሜላ ጌ̈ሻ ማጻ̈ፋን ዎቢ̇ሳዚንዲፌ̈ኒ ዓን ኢ̈ኮንር ዎቢ̇ሲ̈ሬ፤ ኢንቲ̇ ዓኖ̇ ዎታዚንዳ ዪቦ። 17 ዪ̈ኮታ̇ቦ ታ ላጋ̇ን! ዪኖ̇ ዪንቲ̇ ቲ̈ኒታሪ ኤሪኖኮታ̇ቦ ውጫ ኣሳን ዪንታ̇ ባሊንዳብ ኮያዚምባራ ዪንቲ̇ ሚ̈ጛር ኤቂ̇ኖን ጋልዳፖ ኬዳካ̇ዮ̈ዲፌ̈ኒ ና̈ጊንቲ̇ብቴ። 18 ዪኒ̇ፓ ኑ ጎዳ ኑ̈ና ፋዛ ዬሱ̈ስ ክርስቶ̈ሳ ኮሺ̇ቲንዲኬ ኢያ ኤሪሙታ ዪንባር ዲጪ̇ብቴ፤ ኢ̈ቦ ዓታ̇ር ማ̈ቂ̇ን ሜናብ ቦንች ማ̈ቆ̇! ኣሚንኤ። |