2 ጴጥ 2 - ኦራ ጫ̈ቃ ማጻ̈ፋ

ማቃ ቲሚርታ ታማ̈ርዝ ኣሳንኬ ኢንታ ውርሲንዲክ

¹ ሚኖ ኬል̇ባራ ዎ̈ርዣን ጊዳ̇ ማቃ ናቢ ዎንዲፌ̈ኒ፤ ዓት ዪንታ̇ ጊዳ̇ሬ ማቃ ቲሚርታ ታማ̈ርሲዝ ኣሳን ዬይሬ፤ ኢንቲ̇ ኣስ ይሲዝ ማቃ ቲሚርታ ኣሲ ኤራካ̇ዮ ጎይባራ ዎይ ቤስ̇ ዬልሲ̇̈ሬ፤ ኢንታ̇ ፋኖ ጎዳ ካ̈ዳሪ ኤሪንታ̇ካይ ኤሊ̇ባር ዬይዝ ጎይላ ፌ ጋልዳ ኤሄይሬ።

² ዎይሊንን ኢንታኮን ኣስ ዬ̈ሊ̇ዝ ጎይን ዬሬ፤ ኢንታ ጊሻ̇ቦ ኪን ጎይን ቆ̈ንታ̇̈ሬ።

³ ዪን ማቃ ኣስታማ̈ራን ሚ̈ሻ̇ቦ ጋንዲ̇ዛኮታ̇ቦ ፌ ጋልዳፖ ኬሲ̇ኖ ማቃ ሶ̈ላ ሶ̈ሊሙታ̇ ዪንታ̇ባዝ ቡሪ̈ሬ፤ ዎይሊን ላይፖ ቲ̈ን ኢንታ̇ብ ፊርዳ ጊ̈ጊኔ፤ ዪ ኢንታ ና̈ጊኔ።

⁴ ጾ̈ሳ̇̈̇ዲ ሜላ ኣቲ̇ን ናጋራ ኦ̈ኖ ኪ̈ታንቻ̇ንቦ ሚጪንታ̇ካ̇ይዶር ም ማ̈ቂ̇ኖ ጴች ዶ̈ቻ ጋርታ ዶኣሪ ፌ ፊርዳ ና̈ጋምፔ̈ን ጋ̈ና̇ማ ጋርታ ኢንታ̇ ቶጚኔ።

⁵ ማ ጺ̇ላ̇ ጎይን ሳባ̇ኪኖ ኖ̈ሃኬ ኢባር ዎ ሜላ ታብዛ ኣሳን ቡ̈ቲሳሪ ሜላን ጾ̈ሳ̇̇̈ብ ኢጪባ̈ሶን ዎይ ዋ̈ባር ይሲ̈ርዶሪ ዪን ሚኖ ኣሳንቦ ቡ̈ታ̇ምፔ̈ን ዎታካ̇ዬ።

⁶ ማ ጾ̈ሲ ሶዶማኬ ጋሞ̈ራ ጌይዝ ካታማን ቡዳ ማ̈ቂ̇ ዪዝ ዲራስ ታማባር ሚቻ̇ር ይሲኖ̈ዲ ኢንቲ̇ ጾ̈ሳ̇ብ ጎሽቲባ̈ሶ ኣሳንቦ ሚሳ̈̇ሊ ማ̈ቃ̇ምፔ̈ኔ።

⁷ ዎቲናካር ኢና ጋዶ̇ ኣሳን ኦ̈ሙታ ዎ ኣስ ዬልቂዝ ኢ̈ታ ኦ̈ሲንኮታ̇ ጫና̇ቂንቲ̇ ሙታ ዎ ጺ̇ላ ማ̈ቂ̇ኖ ሎ̈ጢ ጌይዝ ና̈ሳ ቡ̈ቲሲዴ።

⁸ ዪ ጺላ̇ ና̈ሳ̈ዲ ኢንታ ጊዳ̇ ዶኢ̈ርዶር ዎይ ጋላስ ኢንቲ̇ ዎታዝ ኢ̈ታ ኦ̈ሲን ቤቂ̇ሙታ̇ኬ ሲስኪ̇ሙታ ጺላ̇ ማ̈ቂ̇ኖ ኢ ቡ̈ዲንዳ ዎይሊን ጫና̇ቂ̇ንቲ̇ኔ።

⁹ ዪዚ ጾ̈ሳ̇̇̈ዲ ኪንባር ኢያ ጎሽቲ̇ሙታ ዎ ኣሳን ኢ̈ታ ባዝ ጋርታፖ ኢንታ ቡ̈ቲሳዚንዶ ማ ና̈ጋራንቻን ቃጣኢሙታ ፊርዳ ቃማ̇ቦ ዎዛርታ̇ር ና̈ጊ ጋዲ̈ርኮ ኤሪ̈ሬ ጌንቴ̇።

¹⁰ ማ ዎይፓ ሺ ዪን ፌ ኢ̈ታ ኢኒ̇ን ጋ̈ዚን ኦ̈ሙታ ጾ̈ሳ̇̇ ሲልጣ̈ኒን ሌቂ̇ዝ ኣሳን ኢ ፊርዳ ቃማ̇ብ ኢንታ ና̈ጊ ጋዲ̇ኔ። ዪን ማቃ ታማ̈ርሲዛን ኢ̈ጪ̇ባ̈ሶ ኦቲራባር ኩሚኖ ኣስ ማ̈ቂ̇ኖኮታ̇ቦ ኣፋ ዎ ሲልጣ̈ናባሮን ዬ̈ልቃካ̇ይ ቆ̈ሬ።

¹¹ ጾ̈ሳ̇ ኪ̈ታንቻ̇ንሲ ዎልቃባርኬ ሲልጣ̈ናባር ኢንታ ጋልዳፖ ሺ̈ርዶሪ ጎዳ ቲ̈ን ቆ̈ሙታ ኢንታ ሞ̈ቲባ̈ሴ።

¹² ማ̈ቂ̇ናካሬ ዪን ማቃ ኣስታማ̈ራን ኤሪባ̈ሶ ባዝ ጋርታ̇ ጌሊሙታ ቆ̈ሬ፤ ኢንቲ̇ ኣሲ ኢንታ ኦይታ̇ር ዎዝ ቆፒ̇ ቢሪን ቤቂ̇ዝ ቡ̈ዳባዮ̇ ማ̈ታባዝፌ̈ኒዬ። ዪን ማ̈ታ ባዛን ያዚንዲፌ̈ኒ ኢንታ̇ር ዪ̈ሬ።

¹³ ኢንቲ ኢ̈ታ ባዝ ኦ̈ኖኮታ̇ቦ ፌ ኦ̈ኖምቦ̇ ፌ ቂጣ̈ቲን ኤኪ̇̈ሬ፤ ኢንታ ኡፋይሳ̇ዚንዳ ጋላስ̇ ኣዋ ኩሉላባር ማሲታዚንዲኬ ዶንኬ፤ ዪንታ̇ባር ሞ̈ንዳብኬ ኡሽካ̇ንዳብኬ ዶኢ̈ርዶሪ ናጋራባር ኩሚ̇ኖ ቄጺ̇ኖ ኣስዶ̈ሪ ዪንታ̇ባር ዶኢ̈ሬ።

¹⁴ ቤቃ̇ዝ ኢንታ̇ ኣ̈ፊንዳ ኦሎላ ኢና̇ባር ኩሚኔ፤ ናጋራ ኦ̈ ሚሽኪባ̈ሴ፤ ኣማ̇ናባር ሚ̈ጛካ̇ዮ ኣሳን ዳሺቺ̈ሬ፤ ሚ̈ሻ̈ብ ጋንዲ̈ሬ፤ ኢንቲ̇ ባ̈ዲንቲ̇ኖ ኣሴ።

¹⁵ ኢንቲ ኮሽ ጎይን ኣሻ̇ር ዪኔ፤ ኢ̈ታ ባዝ ኦ̈ር ዲጛ̈ዝ ሚ̈ሺ̇ን ካ̈ኖ ቢኦ̈ራ ናኣ ባ̈ላማፌ̈ን ባሊቲ̇ኔ።

¹⁶ ባ̈ላ̈ሚ ፌ ኦ̈ኖ ና̈ጋ̈ሪምቦ ሶ̈ላንዳብ ዳንዳኢባ̈ሶ ዬሮ ኣስፌ̈ን ሶ̈ላራ ና̈ባ ዪ ዣ̈ሽታር ኦ̈ኖ ኦ̈ሲን ኢያ ኣሺሺኔ።

¹⁷ ዪን ኣሳ̈ን ሚጪ̇ኖ ዶቃ ዋ̈ፌ̈ኔ፤ ኣይጊ ባቂ̇ ኤኪ̇ ሉኪ̇ዝ ሻ̈ራፌ̈ኒዬ፤ ጊልዲጊልድ ጌይኖ ሚ̇ ኢንታ ና̈ጊ̈ሬ።

¹⁸ ባሊዝ ቲሚርታ ጋርታፖ̇ ዬ̈ር ቢርት ሚ̈ጛካ̇ዮ ኣሳን ፋባ̈ሶ ኦቲራ ሶ̈ላ ሶ̈ሊሙታ̇ ኢ̈ታ ናጋራ ኢና̇ባርኬ ኦሎላባር ኢንታ ጪ̈ጪንቺሙታ̇ ኢንታ ባሊሬ።

¹⁹ ኢንቲ ፌ ቆሚንቦ ና̈ጋራብ ኣይላ ማ̈ቃ̇ር ዎሪ “ኑ ዪንታ̇ ኣይሊቲ ጋርታፖ̇ ኬሳ̇ንዳ” ጌዪ ኢንታቦ ታስፋ ኢሚ̇̈ሬ። ኣሲ ኢያ ጋሚኖ ባዚን ኢዝቦ ኣይላ።

²⁰ ኑ ጎዳ ኑ̈ና ፋዛ ዬሱ̈ስ ክርስቶ̈ሳ ኤራሪ ዓኒ̇ ኣላሚን ጋልዶ ኢ̈ታ ናጋሪን ጋልዳፖ ቡ̈ቲ̇ኖፖ̇ ዓኒ ማ̈ቃ̇ሪ ሚኖ ፌ ናጋሪን ጋርታ̇ ጌሌጌይንዶ ቲ̈ን ኢንቲ̇ ዶኢኖምፖ̇ ዎሆ ዶኢን ሺ ኢ̈ት ማ̈ቃ̇̈ሬ።

²¹ ጾ̈ሳ̇ ጎይን ኤሪኖፖ ዎሃ ኢንታብ ኢሚ̇ንቲ̇ኖ ጌ̈ሻ ኪ̈ቲምፖ ጋስ ማ̈ቃ̇ናፖ ጾ̈ሳ̇ ጎይን ኤራካ̇ይ ኣቲ̇ኖኮ ኢንታ̇ብ ኮሽዶን።

²² “ካኖ ፌ ጮ̈ሺ̇ን ላኣንዳብ ጋስ ማ̈ቂ̇̈ሬ” ዪኒፌ̈ኒ “ጉዲን ፌ ጋሊ̇ን ሜ̈ጪንታ̇ሪ ማ̈ቃ̇ር ቶቅላ ጋርታ ፊሪ̈ሬ” ጋ̈ር ሶ̈ሊኖ ሚሳ̇̈ላን ኪን ኢንታ ዬሊ̇ኔ።