2 ጴጥ 1 - ኦራ ጫ̈ቃ ማጻ̈ፋ1 ኑ ጾ̈ሳ̇ፔኬ ኑ̈ና ፋዛ ዬሱ̈ስ ክርስቶ̈ሳ ጋልዳፖ ቤንቲ̇ዝ ጺሊ̇ቲ ጎይባራ ኑ̈ኮንዲፌ̈ኒ ቦንቺ̇ንቲኖ ኣማ̇ና ዲጚኖንቦ፥ ዬሱ̈ስ ክርስቶ̈ሳቦ ኣይላኬ ሃዋ̈ራኬ ማ̈ቂ̇ኖ ቴ ሲሞ̈ን ጴ̈ጥሮ̈ሲ ዓና̇ ዪንታ̇ብ ጻ̈ፊኔ። 2 ዪንቲ̇ ጾ̈ሳ̇̈̇ዳኬ ኑ ጎዳ ዬሱ̈ሳ ኤሪዝ ኤሪባራ ካንኬ ሳሪቲ ዪንታ̇ቦ ዎይሎጋ̈ቤ። ጾ̈ሳ̇̇ ጼይጋዚንዲኬ ማራ̇ጻዚንዶ 3 ፌ ቦንችባርኬ ፌ ኮሺ̇ቲንባራ ኑ̈ና ጼይጊኖ ጾ̈ሳ̇̇ ኢያ ኑ ኤሪኖኮታ̇ቦ ኢ ጾ̈ሲቲ ዎልቂንዳ ሼምፓ ዲጛንዳብኬ ጾ̈ሳ̇ቦ ጎሽታ̇ንዳብ ኮሺ̇ዝ ባዛን ዎይ ኑ̈ብ ኢሚ̇ኔ። 4 ኑ̈ኒ ኢ ቦንቺ̇ንባርኬ ኢ ኣሽኪቲንባራ ዎይሊን ጴችኬ ቦንቺንቲ̇ኖ ታስፋ ዲጚኔ፤ ዪኒ ጎይባራ ዪንቲ̇ ኢ̈ታ ኢናንኮታ̇ ጾ̈ሲ ዓኒ̇ ኣላሚን ጋልዳ ኤሄይዝ ጎይሊን ጋልዳፖ ቡ̈ታ̇ሪ ጾ̈ሳ̇ ጾ̈ሲቲን ጋልዳፖ ኤኪ̇ዝ ኣስ ማ̈ቂ̇ኔ። 5 ዪኒ̇ኮታ̇ቦ ዪንታ̇ ኣማ̇ኒን ጋልዳ ኮሺ̇ቲ፣ ኮሽቲ̇ን ጋ̈ልዳ ኤራ፣ 6 ኤሪን ጋልዳ ፌ̈ና ኢ̈ታ ባዝ ጋልዳፖ ና̈ጊ፣ ማ ኢዝ ጋልዳ ዳ̈ንዳኣ፣ ዳንዳኢን ጋ̈ልዳ ጾ̈ሳ̇̇̈ቦ ጎሽቲ፣ 7 ጾ̈ሳ̇̇̈ቦ ጎሽታዚን ጋልዳ ዎልዎልኣ ካንቲ፣ ዎልዎልኣ ካንታ̇ዚን ጋልዳ ኣስ ዎይ ካ ጉጂ̇ብቴ̇። 8 ዪን ባዛን ዪንታ̇ቦ ዎይሊን ዎኮ ዪንቲ ኑ ጎዳ ዬሱ̈ስ ክርስቶ̈ሳ ኤራምፔ̈ኒ ኣ̈ፍ ካጺ̇ባ̈ሶ ኣስ ማ̈ቃካ̇ዮ̈ድፌ̈ኒ ዪንታ̇ ና̈ጊ̈ሬ። 9 ባዝ ዪን ኢ̈ንታ̇ብ ባዮ̇ ኣሳን ጎት ዎባዝ ቤቃ̇ንዳብ ዳንዳኢባ̈ሶ ኣ̈ፊ ዎቤ̇። ሚን ኢ ጋልዳ ዎ ናጋራን ጋርታፖ̇ ጌ̈ዥጊኖንዳር ቦቲጚኔ። 10 ዪ̈ኮታ̇ቦ ቴ ኢሺንታ̇ንሶ! ዪንቲ̇ ጼይጊንቲ̇ኖንዴኬ ማራጺንቲ̇ኖን ሚ̈ንንዳቦ ቲ̈ኖንፖ ሺ ሚ̈ጚብቴ̇፤ ዪንቲ̇ ዪኖ̇ ዎቴጌይንዶ ዉ̈ርሲ ዪንታ̇ ኣማ̇ኒን ጋልዳፖ ኬዲ̇ባ̈ሴ። 11 ዪኒ̇ ጎይባራ ሜናብ ዶኣዝ ኑ ጎዳ̈ዲኬ ኑ ጋ̈ላ̇ ዬሱ̈ስ ክርስ̇ቶ̈ሳ ካ̈ቲቲን ጋርታ ጌላንዳቦ ኩም ሲልጣ̈ና ዪንታ̇ብ ኢሚንቲ̇̈ሬ። 12 ዪን ባዛን ዪንቲ ኤራሪ ዪንቲ̇ ኤ̈ኖ ኪንንባር ሚ̈ጛር ዶኢኖ ማ̈ቂ̇ናካሬ ታ̈ኒ ዪን ባዛን ዪንታ̇ ቆፊሳዚን ኣሻ̇ባሴ። 13 ታ̈ኒ ሼ̈ምፓ̇ባር ዎ ኬሊ̇ንባር ዎይ ዎይ ጋ̈ላስ ዪንታ̇ ባርኪ̇ዚንዳ ኮሽ ማይጻር ታ̈ብ ቤንታ̇̈ሬ። 14 ኑ ጎዳ ዬሱ̈ስ ክርስቶ̈ሲ ታ̈ና ቤይሲኖንዲፌ̈ኒ ቴ ጋ̇ምኣካ̇ይ ዓይቃ̇ዚን ኤራ̈ሬ። 15 ቴ ዓት ዋ̈ያዚንዳ ዓይቃባር ቴ ዪንታ̇ ጋልዳፖ ፋጊንቲ̇ናሬ ዪንቲ̇ ዪን ባዛን ዎይ ጋላስ ቆፓ̇ምፔ̈ኔ። 16 ኑ̈ኒ ኑ ጎዳ ዬሱ̈ስ ክርስቶ̈ሳ ዎልቂ̇ንዲኬ ኢ ዬ̈ዚን ዪንታ̇ብ ሶ̈ሊኖንዳ ኢ ቦንቺ̇ንዶ ኑ ኣ̈ፊንባር ቤቃ̇ርዶኬ ኣሲ ኬሲ̇ኖ ቶሳ ሲስካ̇ር ጊዳካ̇ዬ። 17 ኣፋፖ “ቴ ኢባር ኡፋይቲዛ ቴ ካዝ ናኣ ዓ̈ዳ!” ጌይዝ ጊርሲ ኢ̈ብ ዬይኖምባራ ኢ ጾ̈ሳ̇ ባ̈ባ̈ ጋልዳፖ ቦንችኬ ጴቺቲ ዲጚኔ። 18 ኑ̈ኒ ኢባራ ኣንጂንቲ̇ኖ ኢንዲ̇ን ጋ̈ልዳ ዎንባራ ዪና̇ ኣፋፖ̇ ዬይኖ ጊርሲን ኑ ኑ ቆሚ̇ን ሲስኪ̇ኔ። 19 ባዝ ዪን ዎይ ናባን ኑ̈ብ ሶ̈ሊኖ ባዛን ኪን ማ̈ቂ̇ኖን ኤርሲ̈ሬ፤ ዪ̈ኮታ̇ቦ ዪንቲ̇ ም ቤስ̇ ጋርታ ጋዲ̇ኖ ፎኢንን ያካ̇ዮ̈ዲፌ̈ን ና̈ጋዚንዲፌ̈ኒ ናባን ሶ̈ሊኖ ባዚን ዪና̇ ኢዝፌ̈ኒ ኮሺንቻክ ና̈ጊብቴ̇፤ ዪንቲ̇ ዪኖ̇ ዎታዚንዳ ጋማ ዳርኢዝ ዲራስኬ ሳ̈ዚ ዎንታ̇ንዳቦ ዎታዚምባራ ቤ̈ንታ̇ዝ ቤ̈ርሲ̇ን ዪንታ̇ ቡ̈ዲን ጋርታ ቤንቲ̇ዝ ዲራሴ። 20 ዪንቲ ባዝ ዎይፖ ቲ̈ን ቆፓ̇ንዳብ ኮሻ̇ዚንዳ ጌ̈ሻ̇ ማጻ̈ፋ ጋልዳ ጻ̈ፊንቲ̇ኖ ካ̈ያን ዎይ ኦ̈ናካር ፌ̈ብ ማይጺኖንዲፌ̈ን ቢላ̇ንዳብ ዳንዳኢባ̈ሶንዶ። 21 ኣባ ጌይን ካ̈ያ ጌይዛ ዎይ ኣሳ ቆፊባር ዬ̈ካ̇ዬ፤ ዎቲናካሬ ኣሳን ጌ̈ሻ̇ ኣያ̇ና ኢንታ̇ ቲ̈ኒን ጾ̈ሳ̇̇ ጋልዳፖ ኤካ̇ር ሶ̈ሊኖ ባዜ። |