2 ዋ̈ኒ̇ 1 - ኦራ ጫ̈ቃ ማጻ̈ፋ1 ታ ሙታ̇ ጊዳካ̇ይዶን ኪንን ኤሪዛን ዎይ ኢንታ ካዛን ማራ̇ጺንቲ̇ኖ ጎዳቲ̇ንዲኬ ኢዝ ናኣንቦ ታ ዶምዛ ጻ̈ፋ ሚሺኖ ኪ̈ታ፦ 2 ዪና̇ ኪንንዳ ኑ ጊዳ̇ ዎ ማ ሜናባሬ ኑባር ዶኣ̈ሬ። 3 ጾ̈ሳ̇ ባ̈ባ̈ፔኬ ናኣ ዬሱ̈ስ ክርስቶ̈ሳ ኮሺቲን፥ ኢ ማ̈ሪቲ̇ንዲኬ ሳሪቲ̇ንዳ ኪንባርኬ ካንባራ ኑባር ማ̈ቆ̇። ኪንኬ ካንኬ 4 ኔ ናኣን ጋርታፖ ፔታ̇ን ፔታ̇ናን ጾ̈ሳ̇ ኑ̈ና ኪ̈ቲ̇ኖንዲፌ̈ኒ ኪን ጎይንባር ዬሙታ ዎኮታ̇ቦ ታ̈ና ች ኡፋይሲ̇ኔ። 5 ዓታ̇ር ጎዳቲ̇ንዴ! ሚናፖ ዎንዲዶኬ ቴ ኔ̈ቦ ኦራ ኪ̈ታ ጻ̈ፋባሴ፥ ቴ ኔ̈ብ ጻ̈ፋዚንዳ “ኑ ዎልዎልኣ ካንቲ̇ስቶ” ጋ̈ዚን ሚናፖ ኑ ጊዳ ዎ ኪ̈ቲንዶ። 6 ኪን ካን ጋ̈ዚንዳ ጾ̈ሳ̇ ኪ̈ቲን ፎታዚንዶ፤ ዪና̇ ኪ̈ቲንዳሬ ዪንቲ̇ ቲ̈ናፖ ሲስኪ̇ኖንዲፌ̈ኒ “ዎል ዎልኣ ካንባር ዶኢብቴ” ጋ̈ዚንዶ። 7 ዬሱ̈ስ ክርስቶ̈ስ ኣስ ማ̈ቃ̇ር ሳ̈ዚን ዓኒ̇ ጋልዳ ዬይኖንዶ ኣማ̇ኒባ̈ሶ ዎይሊን ኣስ ባሊዝ ኣሳን ዲንዲ̇ኔ። ዪ̈ዲፌ̈ኖ ና̈ሳ̈ዲ ኣስ ባሊዝ ኣስኬ ክርስቶ̈ሳ ኢጺ̇ዝ ኣሴ። 8 ዎቲናካሬ ዪንቲ̇ ዪንታ̇ብ ጊ̈ጊንቲ̇ኖ ጋቲን ኩም ኤካ̇ንዳቦ ሚ̈ጚብቴ፤ ዪንቲ ኦ̈ኖ ኦ̈ሲን ዪንታ̇ ጋልዳፖ̇ ያካ̇ዮ̈ዲፌ̈ኒ ጌ̈ዚንር ና̈ጊብቴ። 9 ክርስቶ̈ሳ ቲሚርቲ̇ንባራ ሚ̈ጛር ዶኢባ̈ሶ ፌ ኮዪኖ ጎይ ዬዝ ኣሲ ጾ̈ሲ ኢባር ባዬ̇፤ ክርስቶ̈ሳ ቲሚርቲንባር ዶኢዛ̈ዲ ጾ̈ሳ̇ ባ̈ባ̈ዴኬ ና̈ኣዳሬ ኢባር ዶኢ̈ሬ። 10 ዪና̇ ቲሚርቲ̇ን ኣሻ̈ር ሜላ ባዝ ዪንታ̇ክ ኤካ̇ር ዬይዝ ኣሲ ዎኮ ዪንቲ̇ ዪንታ ኣ̈ል ኢያ ሞኪ̇ ኤካፒ̇ቴ፤ ዪፌ̈ኖ ኣሲ ሜላ ኣቲ̇ን ሳራ̈ር ኢያ ጋ̈ፒ̇ቴ። 11 ዪፌ̈ኖ ኣስ ሳሮ ጌ̈ይዝ ኣሲ ኢ ኢ̈ታ ኦሲን ኮሼ̇ ጌይ ኤኪ̇̈ሬ። 12 ቴ ዪንታ̇̈ብ ጻ̈ፊዝ ባዚ ዎይሊን ዎዶን ዎይን ዳብዳቢ̇ባር ጻ̈ፋንዳብ ኮያባሴ፤ ዪኒ̇ፖ ኑ ኡፋይሲን ዎይላምፔ̈ኒ ቴ ዪንታ̇ኮ ሉካ̇ራ ዪንታ̇ብ ኖ̈ናባር ሶ̈ላንዳብ ታስፋ ጋዲ̇ኔ። 13 ማራ̇ጺንቲ̇ኖ ኔ ሚ̇ሺን ናኣን ኔ̈ና ሳሮ ጌይኔ። |