2 ቆሮ 9 - ኦራ ጫ̈ቃ ማጻ̈ፋ

ኣማ̇ኒዝ ኣሳንቦ ኬሲ̇ኖ ሚ̈ሽ

¹ ዬሩሳ̈ላም ካታማ ጋርታ̇ ዎ ኣማ̇ኒዝ ኣሳን ማ̈ዳ̇ዝ ኦ̈ሲን ጎይ ቴ ዪንታ̇̇ብ ጻ̈ፋንዳብ ኮሺባ̈ሴ።

² ዪንቲ ማ̈ዳ̇ንዳብ ኢና̇ ዪንታ̇̇ብ ዎን ቴ ቤቂ̇ኔ ዪ̈ኮታ̇ቦ “ኣካ̇̈ዮ ኣሳን ሚ̈ሻ̈̇ባር ማ̈ዳ̇ንዳቦ ዚኔቤራፖ ኤ̈ር ጊ̈ጊንታ̇ር ዎ” ጋ̈ራ ሜቂዶ̈ና ኣሳንኮ ዪንታ̇ ባዝ ቴ ኬርፊኔ፤ ዪንቲ̇ ኣስ ማ̈ዳ̇ንዳብ ዎ ኢኒ̇ንዳ ዎይሊንን ዲንኔ።

³ ዪዚ ባዝ ዓኒ̇ባራ ኑ ዪንታ̇ባር ኦቲርቂኖንዳ ሜላ̇ ዓሪ ኣታካ̇ዮ̈ዲፌ̈ኒ ዓን ኑ ኢሺንታን ቴ ዪንታ̇̇ክ ሚሻ̈ሬ፤ ዪንታ̇̇ሬ ታ̈ኒ ዓኒፖ̇ ቲ̈ን ቴ ዪንታ̇ባዝ ሶ̈ሊኖንዲፌ̈ኒ ጊ̈ጊንታ̇ሪ ና̈ጋምፔ̈ኔ።

⁴ ሜቂዶ̈ና ካታሚን ጋርቶ ኣሳን ታባር ዎልኣ ዪንታ̇ክ ዬ̈ዚምባራ ዪንቲ̇ ጊ̈ጊንታካ̇ዮ ኣስ ማ̈ቃ̇ር ዎኮ ኑ ዪንታ̇̇ባር ኦቲርቂኖን ሜላ̇ ዓሪ ማ̈ቂ̇ን ኑ̈ናር ዪንታ̇̇ር ዎይ ዬ̈ልቂ̈ሬ።

⁵ ዪ̈ኮታ̇ቦ ዪንቲ̇ ኢማ̇ንዳቦ ጋ̈ሪ ቃ̈ላ ጌሊኖን ቲ̈ኒታር ጊ̈ጊሳምፔ̈ን ዪንታ̇ ቆፊሳምፔ̈ኒ ጋ̈ሪ ዓን ኑ ኢሺንታን ታ̈ፖ̇ ቲ̈ኒታር ዪንታ̇ክ ዬንዳብ ኮሺ̈ሬ ጌያ ቆፒ̇ኔ፤ ዪዚ ቴ ዬ̈ዚምባራ ዪንቲ̇ ዶሳር ኢማ̇ዝ ባዚንዳ ጊ̈ጊንታ̇ር ዶኣ̈ሬ። ዪዚ ዪንቲ̇ ኢሚ̇ኖንዳ ዎልቃባር ጊዳካ̇ይዶን ዶሳር ኢሚ̇ኖ ባዝ ማ̈ቃ̇̈ሬ።

⁶ ጊላ̇ ዜርቂኖ̈ዲ ጊላ̇ ካ ሺ̈ሺ̈ሬ፤ ዎይሊን ዜርቂኖ̈ዲ ዎይሊን ካ ሺ̈ሻ̈̇ዚን ዪኖ̇ ቆፒ̇ብቴ።

⁷ ጾ̈ሲ ኡፋይስባር ኢሚ̇ዝ ና̈ሳ ዶሲዛ ማ̈ቂ̇ኖኮታ̇ቦ ዎይን ፌ ዶሲኖን ፌ ቡ̈ዳ ጋርታ ቆፓ̇ር ኡፋይስባር ኢሞ̇ጋብዶኬ ኢማ̇ኔቤ ኣታ̇ኖ ጌዪሙታ̇ ዎልቃባር ኢማ̇ፖ̇።

⁸ ዎይ ጋላስ ዎይ ባዝባር ዪንቲ̇ ዪንታ̇̇ብ ኮሻ̇ዝ ባዚን ዲጛሪ ማ ዪንታ̇ፖ ሺን ሜላንቦ ኮሻ ኦ̈ሳ ኦ̈ንዳብ ዳንዳኣምፔ̈ኒ ጾ̈ሲ ኣንጃ ዎይ ዪንታ̇ብ ኢማ̇ንዳብ ዳንዳኢሬ።

⁹ ዪ̈ዳሬ፦ “ዎርባያንቦ ዎይሊሳር ኢሚ̇ዴ፤ ኢ ኮሻ̇ ኦ̈ሲንዳሬ ቦቲጚንታካ̇ይ ሜናብ ዶኣ̈ሬ” ጋ̈ሪ ጻ̈ፊንቲ̇ኖንዲፌ̈ኔ።

¹⁰ ዜርቂዛቦ ዜር፣ ሞ̈ንዳቦ ኣሳብ ፊ̈ሺ ኢሚ̇ዝ ጾ̈ሳ̇̈ዲ ዪንቲ̇ ዜርቃ̇ዝ ዜርን ዎይሊሳር ዪንታ̇ብ ኢሚ̇̈ሬ፤ ዪዚ ዪንቲ̇ ሺ ኮሽባዝ ኦ̈ምፔ̈ኒ ማ̈ሲ̈ሬ።

¹¹ ዪንቲ̇ ዶሳር ኢማ̇ዝ ባዚን ኑ ጎይባር ኤኪ̇ዝ ኣሳን ጾ̈ሳ̇ ጋላታምፔ̈ኒ ዎይ ጋላስ ዪንቲ̇ ኢማ̇ምፔ̈ን ጾ̈ሲ ዎይ ባዝባር ዪንታ̇ ዱሪሲ̈ሬ።

¹² ዪና̇ ዪንቲ̇ ዶሳር ኣስ ማ̈ዳ̇ዝ ኦ̈ሲንዳ ኣማ̇ኒዝ ኣሳን ኢንታ̇ ሜቲን ጋርታ̇ፖ̇ ኢንታ̇ ኬሲ̇ዛ ሙታ ጊዳካ̇ይዶን ኣሳን ጾ̈ሳ̇ቦ ዎይሊን ጋላታ ሺሻ̈ምፔ̈ን ዎታ̈ሬ።

¹³ ዪና̇ ዪንቲ̇ ዶሳር ኣስ ማ̈ዳ̇ዝ ኦ̈ሲንዳ ዪንቲ̇ ክርስቶ̈ሳ ዎጛሊን ኤካ̇ሪ ኪ̈ቲንቲ̇ኖን ቤይሳ̈ሬ፤ ዪ̈ኮታ̇ቦ ኢንታ̇ብኬ ሜላንቦ ዎይ ዪንቲ̇ ዶሳር ኢሚ̇ኖን ቤቂ̇ሙታ̇ ዎይን ጾ̈ሳ̇ ጋላቲ̈ሬ።

¹⁴ ኢንቲ̇ ዪንታ̇̇ብ ዎ̈ሳምባራ ጾ̈ሳ̇ ዪንታ̇̇ብ ኢሚ̇ኖ ጴች ኮሺቲኮታ̇ቦ ዪንታ̇ ቤቃ̇ንዳብ ሹ̈ኒቲ̈ሬ።

¹⁵ ኣሲ ሶ̈ላር ዉርሳንዳብ ዳንዳኢ̈ባ̈ሶ ኪልሳኮታ̇ቦ ጾ̈ሳ̇̈ቦ ጋላታ ማ̈ቆ̇።