2 ቆሮ 4 - ኦራ ጫ̈ቃ ማጻ̈ፋ

ቶቅላባር ኮቺ̇ኖ ኢቃ ጋርታ ጋዲ̇ኖ ቦንቺንቲ̇ኖ ባዝ

¹ ጾ̈ሲ ፌ ማ̈ሪቲምባራ ዓና̇ ኦ̈ሲን ኑ̈ብ ኢሚ̇ኖኮታ̇ቦ ኑ̈ኒ ቦስባ̈ዳ።

² ጌ̈ማ ኦ̈ዚን ኣስ ዬ̈ሊዝ ባዝ ማ̈ቂ̇ኖ ባዛን ዎይ ኑ̈ ኦ̈ባ̈ሴ፤ ማ ውጫር ውጪቲባ̈ሴ፤ ጾ̈ሳ̇ ቃ̈ላዳር ላሚ̇ባ̈ሴ፤ ዪኒፖ̇ ኪን ባዚን ፋላ̇ ጋልዳ ቤይሲሙታ̇ ኑ̈ኒ ጌ̈ሺ̇ቲባር ዶኢሙታ̇ ዎንዶ ኣስ ዎይ̈ቦ ጾ̈ሳ̇ ቲ̈ን ፋላ̇ ማሂ̈ሬ።

³ ኑ ታማ̈ርሳዝ ዎጛላ ቃ̈ሊን ጌ̈ማ ማ̈ቄጌይናሬ ኢዛ ጌ̈ሚታዚንዳ ዪዝ ኣሳንቦ።

⁴ ዓኒ̇ ኣላሚንቦ ላ̈ ማ̈ቂ̇ኖ ሴ̈ጣኖ ኣማ̇ኒባሶ ኣሳን ቆፊን ዎቢ̇ሳሪ ጾ̈ሳ̇ ሚሳ̇̈ሊ ማ̈ቃ̇ር ቤንቲ̇ኖ ክርስቶ̈ሳ ቦንቻ̇ ዎጛላ ፎኢን ኢንታ̇ብ ፎ̈ኣካይፌ̈ን ዎቲዴ።

⁵ ኑ ታማ̈ርሳዚንዳ ዬሱ̈ስ ክርስቶ̈ሲ ጎድ ማ̈ቂ̇ኖንዲኬ ኑ ኑ ቆሚ̇ን ክርስቶ̈ሳ ጊሻ̇ቦ ጋ̈ሪ ዪንታ̇̇ብ ኣሽካ̇ራ ማ̈ቂኖንዲዶኬ ኑ ኑባዝ ሳባ̇ኪባ̈ሴ።

⁶ “ፎኢን ም ጋርታ ፎኦ!” ጋ̈ሪ ሶ̈ሊኖ ጾ̈ሳ̇̇̈ዲ ክርስቶ̈ሳ ዴ̈ሚን ጋልዳ ፎ̈ኢዛ ጾ̈ሳ̇ ቦንቺ̇ን ኤራምፔ̈ን ዎቲዝ ፎኢን ኑ̈ብ ኢማ̇ንዳቦ ፌ ፎኢንን ኑ ቡ̈ዲን ጋርታ ፎ̈ኣምፔን ዎቲዴ።

⁷ ዎቲናካሬ ዪ̈ ዎይፖ̇ ሺዝ ዎልቃ̈ዲ ጾ̈ሳ̇ዳይዶኬ ኑዪ ጊዳካ̇ዮን ኤሪታምፔ̈ኒ ዪና̇ ቦንች ባዚንዳ ሳ̈ዝባር ኮቺ̇ንቲ̇ኖ ኢቃ ማይጺዛን ኑ ጋርታ ዎ።

⁸ ኑ̈ና ዎይ ጎይባራ ሜታ̇ ዬሊ̇̈ሬ፤ ዎቲናካሬ ኑ ጋሚንቲባ̈ሴ፤ ዎይሊን ኑ̈ና ማላ ጋሚን ቤቂ̇ኔ ዎቲናካሬ ታስፋ ቃጺ̇ባ̈ሴ።

⁹ ኣሲ ኑ̈ና ዳኪ̇̈ሬ ዎቲናካሬ ላ̈ጋ ኑ̈ና ዪ ቤቃካ̇ዬ፤ ኑ ቡኪንታ̇ር ኬዲ̈ ቤቂ̇ኔ ዎቲናካር ዓይቃካ̇ዬ።

¹⁰ ዬሱ̈ሲ ኑ ጋርታ̇ ዎንዳ ቤንታ̇ምፔ̈̇ኒ ኢያ ዬሊ̇ኖ ዓይቂንዳ ዎይ ጋላስ ኑ̈ና ዬላ̇̈ሬ።

¹¹ ዬሱ̈ሲ ኑ ጋርታ̇ ዎንዳ ዓይቂዝ ኑ ኣይሺ̇ን ጋልዳ ቤንታ̇ምፔ̈ኒ ኑ̈ኒ ሼምፓባር ዎን ዬሱ̈ሳኮታ̇ቦ ዎይ ጋላስ ዓይቃብ ኣ̈ ኢሚ̇ንቲ̈̇ሬ።

¹² ዪዚ ኑ̈ኒ ዓይቃቦ ኣ̈ ኢሚ̇ንቲን ዪንቲ̇ ሼምፓባር ዶኢ̈ሬ።

¹³ ማቂ̇ናካሬ “ኣማ̇ናዴ፤ ዪ̈ኮታ̇ቦ ሶ̈ላዴ” ጋ̈ሪ ጻ̈ፊንቲ̇ኖንዲፌ̈ኒ ኑ̈ባር ዪ̈ዲፌ̈ኖ ኣማ̇ና ኑ̈ብ ዎኮታ̇ቦ ኑ̈ናር ኣማ̇ናር ሶ̈ሊሬ።

¹⁴ ጎዳ ዬሱ̈ሳ ዓይቃ ጋርታፖ̇ ዲንኖ ጾ̈ሳ̇ዲ ኑ̈ናር ዬሱ̈ሳባር ዲንዚንዲኬ ማ ዪንታ̇ባር ዎልኣ ፌ ቲ̈ን ሺሻ̇ዚን ኑ ኤሪ̈ሬ።

¹⁵ ጾ̈ሳ̇̇ ኮሺ̇ቲ̈ዲ ዎይላሪ ዎይሊን ኣሳቦ ዬላ̇ምባራ ጾ̈ሳ̇̇̈ብ የሊ̇ዝ ቦንቻ̇̈ዳሬ ዪና̇ ኢዝፌ̈ኒ ዎይላምፔ̈ኒ ዪ̈ ዎይ ዪንታ̇̇ቦ ጋ̈ሪ ማ̈ቂ̇ኔ።

ኣማ̇ናባር ዶኢ

¹⁶ ዪ̈ኮታ̇ቦ ኑ̈ኒ ቦ̈ሳንዳባዬ̇፤ ኑ ኣይሺ̇ን ዳ̈ቡሪናካሬ ኑ ጋርቶ ኣሲቲንዳ ዎይ ጋላስ ኦራ ማ̈ቃ̇ሙታ̇ ዶኣ̈ሬ።

¹⁷ ዓት ኑ̈ና ዋ̈ዪዝ ጊላ̇ ጊዛብ ሙታ̇ ጋምኣዝ ሜቲን ጊሊ̇ን ዓና ዎይሊን ጴች ማ̈ቂ̇ኖ ሜናብ ዶኢዝ ቦንች ኑ̈ብ ቤይሳ̈ሬ።

¹⁸ ኑ ና̈ጋዚንዳ ቤንታ̇ባሶ ባዚንዶዶኬ ቤንታ̇ዝ ባዚን ጊዳካ̇ዬ። ቤንታ̇ዝ ባዚንዳ ዓት̇ ዪንዳ ኢና ጊላ̇ ጊዛብ ማ̈ቃ̇ዝ ባዜ ዎቲናካር ቤንታ̇ባሶንዳ ሜናብ ዶኢዝ ባዜ።