2 ቆሮ 3 - ኦራ ጫ̈ቃ ማጻ̈ፋ

¹ ኑ ማ̈ቃ̇ር ኑ ቆሚ̇ን ኣንጂን ኤ̈ና? ዎይ ፔቲ̇ ፔቲ̇ ኣሳን ዎታዚንዲፌ̈ኒ ዪንታ̇̇ቦ ዎይ ዪንታ̇ ጋልዳፖ̇ ኑ̈ብ ማርካ̇ ማ̈ቂ̇ዝ ዳብዳቢ ኑ̈ብ ኮሺ̇̈ርዶኔ?

² ኣሲ ዎይ ኤሪዛ̈ዲኬ ናባ̇ባንዳብ ዳንዳኢዛ ኑ ቡ̈ዲን ጋልዳ ጻ̈ፊንቲ̇ኖ ኑ ዳብዳባ̇ን ዪንታ̇̇።

³ ዪንቲ̇ ኑ ኩሽታ ኣማ̇ኒኖ፥ ቃላማባር ጊዳካ̇ይዶን ሜናብ ዶኢዝ ጾ̈ሳ̇ ኣያ̇ናባራ፥ ሹች ጋልዳ ጊዳ̇ካይዶን ኣሳ ቡ̈ዳ ጋልዳ ጻ̈ፊንቲ̇ኖ ክርስቶ̈ሳ ጋልዳፖ̇ ዬይኖ ዳብዳ̈ቢ ማ̈ቂ̇ኖን ኤሪንቲ̇ኖ ባዜ።

⁴ ዪኖ̇ ኑ ጌይኖንዳ ክርስቶ̈ሳ ጎባራ ጾ̈ሳ̇ ጋልዳ ኑ̈ብ ኣማ̇ና ዎኮታ̇ቦ።

⁵ ኑ ኦ̈ሲን ፎታ̇ንዳብ ዳንዳኣምፔ̈ን ዎቲዛዲ ጾ̈ሳ̇̇̈ዳዶኬ ኑ ኑ̈ብ ኣባካር ኦ̈ንዳብ ዳንዳኢዛን ጊዳካ̇ዬ።

⁶ ኑ̈ኒ ኦራ ጫ̈ቂምቦ ኦ̈ዝ ኣስ ማ̈ቃ̇ምፔ̈ን ዎልቃ ኑ̈ብ ኢሚ̇ኖ̈ዲ ኢያ፤ ዪ ጫ̈ቃ̈ዲ ፊዳላባር ጻ̈ፊንቲኖ ሂጋ̇ ጊዳካ̇ይዶን ጌ̈ሻ̇ ኣያ̇ና ዎልቃባር ጻ̈ፊንቲ̇ኔ፤ ፊዳላባር ጻ̈ፊንቲ̇ኖ ሂጎ̇ ዓይቃ ኤሄይሬ፤ ጌ̈ሻ̇ ኣያ̇ና̈ዲ ሼምፓ ኢሚ̇̈ሬ።

⁷ ሂጋ̇ ኢሚ̇ንቲ̇ኖ ኬሊ̇ንባር ሙ̈ሳ ዴ̈ሚንዳ ዎይሊን ፎ̈ኢ̈ዛኮታ̇ቦ (ዪና̇ ፎኢንንዳ ዎሃ ዲል̇ ጌያ ያሙታ ዬይናካሬ) ኢስሬ̈ላን ኮት̇ ዎቲ ኢያ ቤቃ̇ንዳብ ዳንዳኣካ̇ዬ። ዪዚ ዪና̇ ሹች̇ ጋልዳ ፊዳላባር ጻ̈ፊንቲ̇ኖ ዓይቃ ኤካ ዬይኖ ሂጊ̇ንዳ ጴች ቦንችባራ ዬይኖ ማ̈ቄ̇ጌይንዶ፤

⁸ ጌ̈ሻ̇ ኣያ̇ና ጎይባር ማ̈ቃ̇ዝ ኦ̈ሲንዳ ሺ ቦንቺ̇ ኢዝቦ ዶኢባሳ?

⁹ ኣስ ባዣ ጋርታ ጌልሳዝ ኦ̈ሲንዳ ዪኒ̇ፌ̈ኒ ቦንች ኢዝቦ ዶኤጌይንዶ ኣስ ጺሊዝ ኦ̈ሲንዳ ዎዛርፌ̈ን ሺ ቦንች ኢዝቦ ዶኣኔ?

¹⁰ ጋሶ ቦንቺ̇ንዳ ዎይሊን ሺ ማ̈ቂ̇ኖኮታ̇ቦ ዚቃንታ ኣ̈ኖንዳ ኣባካር ቦንቺ̇ ኢዝቦ ባዮ̇̈ዲፌ̈ን ፋይዲንታ̇̈ሬ።

¹¹ ዪና̇ ዲል̇ ጌያ ሙታ̇ ሉካ̇ዝ ባዚንዳ ዪፌ̈ን ዎይ ቦንቺ̇ ኢዝቦ ዎኮ ሜናብ ሚጛር ዶኣዚንዳ ዎዛርፌ̈ን ጴች̇ ቦንቺ̇ ኢዝቦ ዶኢባ̈ሳ?

¹² ዪዚ ዪ̈ዲፌ̈ኖ ታስፋ ኑ̈ብ ዎኮታ̇ቦ ኑ ኢ̈ጫካይዶር ሶ̈ሊሬ።

¹³ ኑ̈ኒ ዲል̇ ጌያ ያሙታ̇ ዎ ፎኢንን ኢስሬ̈ላ ኣሳን ኢዝ ዉርን ቤቃካ̇ይፌ̈ን ፌ ኣ̈ፊን ካጚኖ ሙሳፌ̈ን ጊዳካ̇ዬ።

¹⁴ ኢንቲ̇ ዓታ̇ብ ዬላ̇ሪ ሚኖ ጫ̈ቃ ማጻ̈ፋን ናባቢንታ̇ምባራ ሚን ሙ̈ሶ ፌ ኣ̈ፊን ካጚኖ ኣፊሊንዳ ኢንታ ኣ̈ፊን ጋልዳፖ̇ ፋካካይ ዎኮታ̇ቦ ኢንታ̇ ቡዲን ዓታ̇ር ዛቢኖንዲፌ̈ን ዎ። ኢንታ ኣ̈ፊን ካጚኖ ኣፊሊን ፋይንዳብ ዳንዳኢዛ̈ዲ ክርስቶ̈ስ ማ̈ቂ̇ኖኮታ̇ቦ።

¹⁵ ዓታ̇ር ማ̈ቄጌዪን ሂጋ̇ ማጻ̈ፋን ናባ̇ቢንታምባር ኢንታ̇ ቡ̈ዲንዳ ካጚንታ̈ሬ።

¹⁶ ዎቲናካሬ ኣሲ ጎዳ ዬሱ̈ሳክ ማ̈ቄጌይን ዪና̇ ካጚኖ ባዚንዳ ፋካ̈̇ሬ።

¹⁷ ጎዳ̈ዲ ኣያ̇ና፤ ጎዳ ኣያ̇ና ዎ ቤስ̇ ጋርታ̇ ኣይሊቲ ባዬ̇።

¹⁸ ኑ ዎይን ኣፊላባር ካጚንታካዮ ኣ̈ፍባራ ጎዳ ቦንቺ̇ን ማስቶ̈ታፌ̈ን ቤይሲሙታ̇ ኢያ ማይጻንዳ̇ቦ ቦንች ጋልዳ ቦንች ጉጂ̇ሙታ ዲጪ̇̈ሬ፤ ዪዳር ማ̈ቂ̇̈ዛ̈ዲ ጎዳ ኣያ̇ና ጋልዳፖ̇።