2 ቆሮ 2 - ኦራ ጫ̈ቃ ማጻ̈ፋ1 ዪዚ ቴ ዪንታ̇̇ ሺን̇ ዎታብዳ ጋ̈ር ቆፓ̇ራ ዪንታ̇ ኦይጫ̇ንዳብ ማ̈ቃ ዬ̈ብዳ ጋ̈ር ዎሳ̇ናዴ። 2 ዎይሊን ቴ ዪንታ̇ ሺን̇ ዎቲናካርዶን ቴ ሺን̇ ዎቲኖን ዪንታ̇ዶኬ ሜላ ታ̈ና ኡፋይሲ̇ዛ ኦ̈ኖ? 3 ቴ ዪኒ̇ፌ̈ን ዪንታ̇̇ብ ጻ̈ፊኖንዳ ቴ ዪንታ̇̇ክ ዬ̈ዚምባራ ታ̈ና ኡፋይሳንዳብ ኮሺ̇ዝ ኣሳን ታ̈ና ሺን̇ ዎታካ̇ዮ̈ዲፌ̈ኔ፤ ቴ ኡፋይሲ̇ንዳ ዎይን ኡፋይስ ማ̈ቂ̇ኖን ታ ኣማ̇ና̈ሬ። 4 ዎይሊን ኣዛ̇ናሙታ̇ኬ ጫና̇ቂንታ̇ሙታ̇ ማ ዎይሊን ኣብባራ ዪንታ̇̇ብ ዓና̇ ጻ̈ፊኖንዳ ቴ ዪንታ̇ ዎይሊን ካዛ ማ̈ቂ̇ኖን ዪንቲ̇ ኤራምፔ̇ንዶኬ ቴ ዪንታ̇ ሺን̇ ዎታንዳብ ኮያር ጊዳካ̇ዬ። ኢ̈ሲ̇ኖ ኣሳብ ኣቶ̇ ጌዪ 5 ኣስ ሺን̇ ዎቲኖ ኣሲ ኦ̈ናካር ዎኮ ኢ ሺን̇ ዎቲኖንዳ ታ̈ና ሙታ̇ ጊዳካ̇ዬ፤ ቴ ሶ̈ሊን ዴጺሳንዳ ጊዳካ̇ይዶን ጊላ̇ካር ማ̈ቂ̇ን ዪንታ̇̇ ዎይን ሺን̇ ዎቲኔ። 6 ዪ̈ፌ̈ኖ ና̈ሳ̈ቦ ዪንታ̇ ጋርታፖ̇ ዎይሊንን ፊርዲኖ ፊርዲን ኢ̈ብ ጊዳ̈ሬ። 7 ዪ̈ኮታ̇ቦ ዪ̈ ና̈ሳ̈ዲ ዎይሊን ሺን̇ ጋ̈ሪ ፌ ኣማ̇ኒን ጋልዳፖ ኬዳካ̇ዮ̈ዲፌ̈ኒ ዪንቲ̇ ኢ̈ብ ኣቶ̇ ጋ̈ሪ ኢያ ሚን̇ንዳብ ኮሺ̈̇ሬ። 8 ማ ዪንቲ̇ ኢያ ካዚን ኢ ኤራምፔ̈ን ዎቲብቴ ጋ̈ር ቴ ዪንታ̇ ጌሻ̈ሬ። 9 ቴ ዪንታ̇̇ብ ጻ̈ፊኖንዳ ዪንቲ̇ ዎይ ባዝባራ ኤኤ ጋ̈ር ኪ̈ቲንቲ̇ዝ ኣስ ማ̈ቂ̇ኖን ማላ̇ር ቤቃ̇ንዳቦ። 10 ዪንቲ̇ ኢ̈ብ ኣቶ̇ ጌይዝ ና̈ሳዲ ታ̈ናር ኢ̈ብ ኣቶ̇ ጋ̈ንዳ፤ ኪን ቴ ኢ̈ብ ኣቶ̇ ጋምፔ̈ኖ ባዚ̇ ዎኮ ክርስቶሳ ቲ̈ን ዪንታ̇ ጊሻ̇ቦ ጋ̈ራ ቴ ኢ̈ብ ኣቶ̇ ጋ̈ሬ። 11 ዪኖ̇ ቴ ዎታዚንዳ ሴ̈ጣናኮን ውጫ ኦ̈ሲ̇ን ኑ ኤሪ̈ዛኮታ̇ቦ ኢ ኑ̈ና ባሊ̇ካ̇ዮ̈ዲፌ̈ኒዬ። ጋሚ̇ ክርስቶ̈ሳባር ቤንቲ̇̈ሬ 12 ታ̈ኒ ክርስቶ̈ሳ ዎጛሊን ታማ̈ርሳ̇ንዳቦ ጢሮኣዳ ካታሚን ጋርታ ሉኪ̇ን ጎዳ̈ዲ ታ̈ቦ ሻክ̇ ኦ̈ሳ̇ ካራ ፊርቂንዶ̈ን፤ 13 ዎቲናካሬ ታ̈ኒ ቴ ኢሻ ቲ̈ታ̇ ዬላ̇ካዮኮታ̇ቦ ታ̈ና ኡፋይሳካ̇ዬ። ዪ̈ኮታ̇ቦ ኢና ዎ ኣማኒ̇ኖ ኣሳን ሳሪራ ሜቂዶ̈ና ሉካ̇ዴ። 14 ዎቲናካሬ ኑ̈ና ዎይ ጋላስ ክርስቶ̈ሳባር ጋሚዝ ኣስ ማሃር ቲ̈ኒዛ̈ብኬ ኮሽ ሳዉቂ̇ዝ ሺታ̇ፌ̈ን ክርስቶ̈ሳ ባዝ ኑ ኤራዚን ዎይ ዎይ ቤስ̇ ዬልምፔ̈ን ኑ̈ና ማ̈ዲ̇ዝ ጾ̈ሳ̇̇̈ቦ ጋላቲ ዬሎ̇። 15 ኑ̈ኒ ፋጺዝ ኣሳንባር ማ̈ቂ̇ን ይዛንቦ ኮሽ̇ ሳዉቂ̇ዝ ሺታፌ̈ን ማ̈ቃ̇ር ክርስቶ̈ሳ ጎይባር ጾ̈ሳ̇ቦ ሺ̈ቂኖ ኣሴ። 16 ኑ̈ኒ ዪዛንቦ ዎዝ ዓይቃ ሺታ፤ ፋጺዛንቦ ሼምፓ ኢሚ̇ዝ ሼምፓ ሺታ̇። ዪዚ ዪ̈ዲፌ̈ኖ ጴች ኦ̈ሳቦ ማ̈ቂ̇ዛ ኦ̈ኖ? 17 ኑ̈ኒ ጾ̈ሳ̇ ቃ̈ሊን ዛላ ባዝፌ̈ን ማሂዝ ዎይሊን ኣሳንፌ̈ን ጊዳካዬ። ዎቲናካሬ ጾ̈ሳ̇ ቲ̈ናፖ̇ ኪ̈ቲንታ̇ር ዬይኖ ኮሽ̇ ኪ̈ታ̇ንቻ̇ንፌ̈ኒ ክርስቶ̈ሳባር ማ̈ቃ̇ር ጾ̈ሳ̇ ቲ̈ን ኪን ቡ̈ዳፖ̇ ሶ̈ሊ̈ሬ። |