2 ቆሮ 11 - ኦራ ጫ̈ቃ ማጻ̈ፋጳውሎ̈ሳኬ ዎርዳ ሃዋ̈ራ̈ታን 1 ታ ኣባካር ዳሽ ኣስፌ̈ን ማ̈ቂ̇ናካሬ ዪንቲ̇ ታ̈ኮን ጊላ̇ ጋርዣር ሲስኪ̈ሬ ጌያ ኣማ̇ና̈ሬ፤ ዋ̈ዲቴ ጋርዢብቴ። 2 ፔቲ̇ ዉዲሪንዳ ፔቲ ኣቲና̈ባር ሳ̈ ኤ̈ዚንዲፌ̈ኒ ታ̈ናር ዪንታ̇ ክርስቶ̈ሳብ ሳ̈ ኤይኖኮታ̇ቦ ዪንቲ̇ ሜላ̈ክ ሉኪ̈ሬ ጌያ ቂና̈ታ ቴ ጋርታ̇ ጌሊኔ። 3 ሾ̈ሺ̇ ፌ ዉጪ̇ምባራ ሄዋ̈ኖ ባሊኖንዲፌ̈ኒ ዪንታ̇ ቆፊንዳር ኢ̈ታራ ዪንቲ̇ ኣሽካኬ ኮሽ ማ̈ቂ̇ኖ ቡ̈ዳባራ ክርስቶ̈ሳብ ኣማ̇ኒንታዚንዶ ኣሺ̇ዝዳ ጌያ ኢ̈ጫ̇̈ሬ። 4 ፔቲ̇ ኣሲ ዪንታ̇ክ ዬ̈ሪ ኑ ዪንታ̇ ሳባ̇ኪኖ ጊዳካ̇ይዶን ሜላ ዬሱ̈ሳ ዪንታ̇ ሳባኬጌዪን ዎይ ዪንቲ̇ ኤኪ̇ኖ ጌ̈ሻ ኣያ̇ና ጊዳካዶን ሜላ ኣያ̇ና ዪንቲ̇ ኤኬ̇ጌይን ዎይ ዪንቲ̇ ኣማ̇ናር ኤኪ̇ኖ ዎጛሊን ጊዳካ̇ይዶን ሜላ ዎጛላ ኤኬ̇ጌዪን ዪንቲ̇ ጋሚንታር ዚምዶኢኔ ጌንቴ። 5 ዎቲናካሬ ታ̈ኒ ዪን ጴቻ ሃዋ̈ራታንፖ ኣባካር ጉ̈ጺዛ ታ̈ክ ማይጺባ̈ሴ። 6 ታ̈ኒ ሶ̈ሊዝ ሶ̈ላባራ ኤጫ ማ̈ቃካ̇ይካሬ ኤራ ታ̈ብ ጉጻካ̇ዬ፤ ዪና̇ሬ ዎይ ጋላስ ዎይ ጎይባራ ኑ ዪንታ̇ ፋል̇ ታማ̈ርሲኔ። 7 ታ̈ኒ ጾ̈ሳ̇ ዎጛላ ታ̈ብ ኣባክ ጪጊ̇ዝ ባዚ ባይዶን ዪንታ̇̇ብ ሳባ̇ኪኖምቤኬ ዪንታ̇ ሾክ̇ ዎታ̇ንዳቦ ጋራ ታ ታ̈ና ዪርክ ዎቲኖንዳ ታ̈ብ ናጋራ ማ̈ቃ̇ ፋይዲንታንዳዶኔ? 8 ዪንታ̇ብ ኦ̈ንዳቦ ጋ̈ራ ሜላ ዎሳ ኬ̈ፖ̇ ማ̈ዲ ሚ̈ሺ̇ ቴ ኤኪ̇ኖንዳ ቴ ኢንታ̇ ጋልዳፖ̇ ቡሪኔ። 9 ቴ ዪንታ̇̇ባር ዎዶን ታ̈ና ጊላ̇ ሜቲንዶ̈ን ሜቂዶ̈ናፖ ዬይኖ ቴ ኢሺንታን ታ̈ብ ኮሺ̇̈ዝ ባዝ ዎይባራ ታ̈ና ማዲ̇ኖኮታ̇ቦ ቴ ኦ̈ናካር ዋ̈ዪካ̇ዬ፤ ዓኖ̇ ዬላ̇ር ዪንታ̇ ኣባካባር ዋዪካዬ ዓት ዎሃባር ዪንታ̇ ዋ̈ይንዳባዬ̇። 10 ክርስቶ̈ሳ ኪንቲን ታ ጋርታ ዎ! ቴ ኦቲርቃካይፌ̈ን ዎቲዝ ኣሲ ኣካ̈ያ ጋዳ̇ ዎ ጋዳን ጋርታ̇ ኦ̈ናካር ባዬ̇። 11 ቴ ዪና̇ ኣባብ ጌዬ? ቴ ዪንታ̇ ካባሶምቢያ? ቴ ዪንታ̇ ካዚን ጾ̈ሲ ኤሪ̈ሬ። 12 ዪን ሜላ ሃዋራታን “ኑ̈ናር ኢንታ̇ፌን ኦሬ” ጌዪሙታ̇ ኦቲርቃ̇ዝ ጎይን ይሳ̇ንዳቦ ቴ ዓት ዎታዚን ዎሃር ዎታንዳ። 13 ዪንፌ̈ኖ ኣሳን ክርስቶ̈ሳ ሃዋራ ማይጻንዳቦ ፌ̈ና ኦ̈ሂዝ ማቃ ሃዋ̈ራኬ ማቃባር ኦ̈ዝ ኣሴ። 14 ዪ̈ዲ ጋራ̇ሚሲዝ ባዝ ጊዳካ̇ዬ። ሜላ ኣቲ̇ን ሴ̈ጣኖ ኣስ ባሊንዳቦ ፌ̈ና ጾ̈ሳ̇ ኪ̈ታንቻ ማይጺሲ̈ሬ። 15 ዪዚ ዪን ሴ̈ጣና ኣሽካራን ጾ̈ሳ̇ ኣሽካራ ማይጻንዳቦ ፌ̈ና ኦሄጌይን ጋራ̇ሚሲባ̈ሴ፤ ዉርሲ ጋልዳ ኢንቲ̇ ፌ ኦ̈ሲ̇ን ጋቲን ዲጚ̈ሬ። ጳውሎ̈ሲ ሃዋራ ማ̈ቂ̇ኖኮታ̇ ኢያ ዬሊ̇ኖ ሜታ 16 ታ ዓታ̇ር ማሃ ሶ̈ላ̈ሬ፤ ኦ̈ናካር ኣሲ ታ̈ና ዳሻፌ̈ን ፋይዳፖ̇ጋቤ፤ ዪንቲ̇ ታ̈ና ቦ̈ዛ ጌዪ ፋይዲ̈ርኮ ታ̈ናሬ ጊላ̇ ኬርፋምፔ̈ኒ ዳሻ ኣስፌ̈ን ፋይዳር ታ̈ኮን ሲስኪ̇ብቴ። 17 ታ̈ኒ ዓ̈ዲፌ̈ን ኬርፋ ሶ̈ሊዛ̈ዲ ጎዳ ቆፊፌ̈ን ጊዳካይዶን ዳሻ ማ̈ቃ̇ራ ሶ̈ላ̈ሬ። 18 ዎይሊንን ዓና̇ ኣላሚን ጋልዶ ባዝባር ኬርፊዛኮታ̇ቦ ታ̈ናሬ ኬርፋ̈ሬ። 19 ዪንቲ̇ ቆፒ ቢሪንዝ ኣስ ማ̈ቂ̇ኖኮታ̇ቦ ዳሻንኮን ኡፋይስባር ጋርዣር ኤኪ̇̈ሬ። 20 ኦ̈ናካር ዪንታ̇ ኣይላፌ̈ን ማሄጌዪን፣ ኦ̈ናካር ዪንታ̇ ባዚን ዎይ ኤኬ̇ጌይናር፣ ኦ̈ናካር ፌ̈ና ማ̈ዳ̇ንዳብ ጋ̈ሪ ዪንታ̇ክ ኡኬ̇ጌይን፣ ኦ̈ናካር ዪንታ̇ ሌቄ̇ጌይን፣ ኦ̈ናካር ዪንታ̇ ኣ̈ፊን ጋርታ ባቄ̇ጌይናር ዪንቲ̇ ጋርዢ̈ሬ። 21 ታ̈ና ዬ̈ሊ̇ዝ ባዝ ማ̈ቄ̇ጌይናሬ ቴ ዪንታ̇̇ብ ሶ̈ላዚንዳ፥ ዪን ባዛን ኦ̈ንዳቦ ኑ̈ኒ ዳንዳኢዝ ኣስ ጊዳካ̇ዬ። ኦ̈ናካሬ ኬርፋንዳቦ ኮዬ̈ጌይን ታ̈ናር ኢፌ̈ን ዬ̈ልቃካ̇ይ ኬርፋንዳ፤ ዪና ታ ጋዚንዳ ዓታ̇ር ቦዛፌ̈ን ማ̈ቃ̇ር ሶ̈ላ̈ሬ። 22 ኢንቲ̇ ኣይሁድ ዜር? ታ̈ናር ኣይሁድ ዜርሴ፤ ኢንቲ̇ ኢስሬ̈ላ ጋዶ̇ ኣሳ? ታ̈ናር ኢስሬ̈ላ ጋዶ̇ ኣሴ፤ ኢንቲ̇ ኣብራሃ̈ማ ዜር? ታ̈ናር ኣብራሃማ ዜር። 23 ኢንቲ̇ ክርስቶ̈ሳ ኣሽካራ? (ቴ ዣ̈ሾትፌ̈ን ማ̈ቃ̇ር ሶ̈ላ̈ሬ) ቴ ኢንታ̇ፖ ሺ ክርስቶ̈ሳ ኣሽካ̇ራ። ቴ ኢንታ̇ፖ̇ ሺ ኦ̈ሳባር ዳቡሪኔ፤ ዎይሊን ጎይ ቃቺ̇ንቲኔ፤ ዎይሊን ጎይ ቴ ቡኪ̇ንቲ̇ኔ፤ ዎይሊን ጎይ ዓይቃብ ዬላ̇ር ኣቲ̇ኔ። 24 ኣይሁዳን ኣላጛባራ ዓይዚ̇ ታ̈ጶ ሳ̈ካሊ ኣላጛ ኢሺ̇ን ቶ̈ህ ታ̈ና ቡኪ̇ኔ። 25 ዓይዚ̇ ቶ̈ህ ጉፋባር ቡኪ̇ንቲ̇ኔ፤ ፔቲ̇ ቶ̈ህ ሹችባር ቆጺንቲ̇ኔ፤ ባሃራ ጋልዳ ማርካ̇ባባር ሉካ̇ምባራ ዓይዚ̇ ቶህ ቴ ዎ ማርካ̇ባን ሜቂ̇ኔ። ማርካቢ ሜቂ̇ን ፔቲ̇ ቃ̈ምኬ ጋላስኬ ኩም ባሃ̈ራ ጋርታ̇ ኣቂኔ። 26 ታ̈ኒ ዎይሊን ቤስ̇ ዬ ቢሪንታ ዳ̈ቡሪኔ፤ ዋ̈ ኪጻ̇ር ታ̈ና ዋ̈ዪኔ ማ ፋ̈ና̇ሬ ታ ጋልዳ ዎይሊን ሜታ̇ ዬልኔ፤ ቴ ዜር ኣይሁዳንሬ ማ ኣይሁድ ባዮ̇ ኣሳንሬ ሜታ ታ ጋልዳ ዬልኔ። ካታማ ጋርታ̇ሬ ባራሃ ጋርታ̇ሬ ባሃራ ጋልዳሬ ሜታ ታ̈ና ዬሊ̇ኔ፤ ማ ማቃባር ፌ̈ና ኣማ̇ና ጌይዝ ኣሳንሬ ሜታ ታ ጋልዳ ዬልኔ። 27 ዎይሊን ኦ̈ሳባር ዳቡሪኔ፤ ሱ̈ርቃካ̇ይ ዎይሊን ኣቂኔ፤ ዋ̈ ዎይሊን ታ̈ና ባርሲኔ ጋፋር ታ̈ና ዎኔ፤ ዎይሊን ጋላስ ፊ̈ሺ ታ̈ና ዪኔ፤ ዛ̈ክኬ ካሊ̇ቲር ታ̈ና ዬሊ̇ኔ። 28 ቴ ጋልዳ ዬሊ̇ኖ ባዝ ዪን ጋልዳ ጉጃ̇ሪ ዎይ ጋላስ ዎሳ ኬ̈ ባዛቦ ቆፓ̇ሙታ ሜቲ̇ንታ̈ሬ። 29 ፔቲ̇ ኣሲ ዳ̈ቡራምባራ ታ̈ናር ኢባር ዳ̈ቡራካይ ኣቲ̇ኖን ኣ̈ንታ̇? ፔቲ̇ ኣሲ ናጋራ ጋርታ̇ ኬዳ̇ምባራ ቴ ሼኒታካ̇ይ ኣቲ̇ኖን ኣ̈ንታ̇? 30 ኬርፋንዳብ ኮሺ̇ዝ ባዝ ማ̈ቄ̇ጌዪን ታ̈ኒ ቴ ዳቡርሲን ቤይሲዝ ባዛንባራ ኬርፋ̈ሬ። 31 ሜናብ ጋላቲንቲ̇ኖ ኑ ጎዳ ዬሱ̈ሳ ባ̈ባ̈ ጾ̈ሳ̇̇ዲ ታ̈ኒ ማቃ̇ባሶን ኤሪ̈ሬ። 32 ታ̈ኒ ዳማ̈ስቃ ካታሚን ጋርታ̇ ዎዶራ ካ̈ታ ኣራ̈ታ̈ሳፖ̇ ጻና ዎ ጋዲን ኣቂሲዝ ና̈ሳ ታ̈ና ኤ̈ንዳብ ኮያሪ ካታ̇ሚን ና̈ጊዝ ኣሳንባር ና̈ጊሲዴ። 33 ዎቲናካሬ ኣሳን ዳ̈ቻ̇ ጋርታ̇ ታ̈ና ጋዳ̇ሪ ኣጺሪምቦ ማስኮ̈ታ ካሪንባር ሶቢሲን ኢ ኩሽታፖ ቡ̈ታ̇ዴ። |