1 ጢማ̈ 6 - ኦራ ጫ̈ቃ ማጻ̈ፋኣሳ ኣ̈ላ ጋርታ ኦ̈ዝ ኣይላንቦ ኢሚ̇ንቲ̇ኖ ዞራ 1 ጾ̈ሳ̇ ሱምንዲኬ ኑ ታማ̈ርሳዝ ቲሚርቲ̇ንዳ ቆ̈ንታካ̇ዮ̈ድፌ̈ኒ ኣይላ ማ̈ቂ̇ኖ ኣሳን ዎይ ፌ ላ̈ንቦ ቦንች ኮሻ̇ዚን ኤሮ̈ጋቤ። 2 ኣማ̇ኒኖ ላ̈ ኢንታ̇ብ ዎ ኣይላን ጎዳ ዬሱ̈ሳባር ዎ ፔቲቲንባራ ኢንቲ̇ ኢንታ̇ብ ኢሺንታ ማ̈ቂ̇ኖኮታቦ ኢንታ̇ ሌቃፖ ጋ̈ቤ፤ ዪኒ̇ፖ ቲ̈ኖምፖ ሺ ኢንታ̇ብ ኦ̈ጋ̈ቤ ኣባ ጌይን ኢንቲ̇ ኦ̈ኖ ኦ̈ሲንባር ማ̈ዲንቲ̇ዝ ኢንታ̇ ላ̈ን ኣማ̇ኒኖ ኣስ ማ̈ቂ̇ኖኮታ̇ብኬ ማ ኢንታ̇ብ ካንቲ̇ኖ ኢሺ ማ̈ቂ̇ኖኮታ̇ቦ። ኔ̈ናር ታማ̈ርሳ̇ንዳብኬ ኮሺንቻ ዞራንዳብ ኮሻ̇ዚንዳ ዓኖ̇። 3 ኪንባር ጾ̈ሳ̇ ጎሽታ̇ዝ ጎይን ኤርሳ̇ዝ ቲሚርቲ̇ንባር ዎል ዬላ̇ዝ ኑ ጎዳ ዬሱ̈ስ ክርስቶ̈ሳ ኮሻ̇ ቃ̈ሊን ኣሻ̇ሪ ማቃ ቲሚርታ ታማ̈ርሲዝ ኣሲ ዎኮ፤ 4 ዪ ና̈ሳዲ ሜላ̇ ኦቲራባር ጋቢ̇ኖ ኣባክ ኤሪባ̈ሶ ኣሴ፤ ዪ ና̈ሳ̈ዲ ቃ̈ላ ጎይ ኣሳባር ዋች ዋጫንዳብኬ ጎይል ጎይላንዳቦ ኢ̈ት ኢና̇ ኢ ጋርታ ዎ። ዪኒፌ̈ኖ ባዚንዳ ቂና̈ታ፣ ጎይል፣ ቆ̈ሳኬ ፔታ̇ና ፔታ̇ና ኣማ̇ናካይፌ̈ን ዎቲ ኤሄ̈ሬ። 5 ማ ኢንታ ቆፊን ኢ̈ቲኖ ኣሳንኬ ኪንን ኢንታ ጋልዳፖ ዪኖ ኣሳን ጊዳ ዉሪባሶ ዋች ዲን̈ሬ፤ ዪንፌ̈ኖ ኣሳን ጾ̈ሳ̇ብ ጎ̈ሽታ̈ዚንዶ ሚ̈ሽ ዲጚዝ ጎ̈ይፌ̈ን ፋይዲ̈ሬ። 6 “ታ̈ብ ዎን ታ̈ብ ጊዳ̈ሬ” ዪዝ ጋ̈ዚንዳ ጾ̈ሳ̇ ማይጺሙታ̇ ዶኢዝ ዶኢምባር ዎል ማ̈ቃ̇ራ ዪ ና̈ሳቦ ጴች ዱሪቲ። 7 ኑ̈ ዬሊንቲ̈ርዶሪ ዓኒ̇ ኣላሚን ጋልዳ ኣባካ̈ር ኤካ̇ር ዬይኖ ባዚ ባዬ̇። ማ ሉኪ̇̈ርዶራር ኣባካር ኤካ̇ር ሉኪ̇ዝ ባዚ ባዬ። 8 ኑቦ ሙ̈ይዝ ባዝኬ ማ̈ኢዝ ባዚ ዎኮ ጊዲ̈ሬ። 9 ዱ̈ር ማ̈ቃ̇ንዳቦ ኮዪዛን ፋታና ጋርታ ጌላሪ ኬዲ̇̈ሬ፤ ኣስ ኢ̈ሲ̇ዝ ባዝኬ ይሲ̇ዛ ማ̈ቂ̇ኖ ፋባ̈ሶ ኢ̈ታ ኢና̇ ጺሂባራ ኤ̈ንቲ̇̈ሬ። 10 ዪና̇ ማ̈ቃ̇ዚንዳ ሚ̈ሺ̇ ካን ኢ̈ት ባዝ ዎይ̈ቦ ጻጲን ኢዚ ማ̈ቂ̇ኖኮታ̇ቦ። ፔቲ̇ ፔቲ̇ ኣሳን ዱር ማ̈ቃ̇ንዳብ ኮዪዛኮታ̇ቦ ኣማ̇ና ጎይን ጋልዳፖ̇ ባሊ̇ታ̇ር ኬዲ̇ኔ፥ ፌ̈ና ኢ̈ታ ሜታ ጋርታ̇ር ጌልሲ̇ኔ። ጳውሎ̈ሲ ጢማ̈ቶ̈ሳ ዞሪኖ ዞራ 11 ዪዚ ኔ̈ኒ ጾ̈ሳ̇ ኣሳ̈ዶ! ኔ̈ኒ ዪንፌ̈ኖ ባዛን ጋልዳፖ ጎታ̇ቤ፤ ኔ̈ኒ ጺሊ̇ቲ ጎይን፣ ጾ̈ሳ̇ ማይጻር ዶኣዚን፣ ኣማ̇ና ጎይን፣ ካን ጎይን፣ ዳንዳኣባር ሚ̈ጛዚንዴኬ ኣሽኪቲባራ ዶኣ̈ዚን ኮያቤ። 12 ኣማ̇ና ጎይንኮን ኮሻ̇ ኦ̈ሊን ኦላቤ፤ ኔ̈ኒ ዎይሊን ኣሳ ቲ̈ን ኣማ̇ኒንቲ̇ኖ ማ̈ቃ̇ራ ማ̈ርኪቲኖንዲኬ ጾ̈ሲ ኢዝቦ ኔ̈ና ጼይጊኖ ሜና ሼምፒ̇ን ሚ̈ንር ኤ̈ቤ። 13 ዎይቦ ሼምፓ ኢሚ̇ዝ ጾ̈ሳ̇̇ ቲ̈ንኬ ጴንጣናዋ ጲላጦ̈ሳ ቲ̈ን ኪንን ማርኪቲኖ ዬሱ̈ስ ክርስቶ̈ሳ ቲ̈ን ቴ ኔ̈ና ኪ̈ታ̇̈ሬ። 14 ኑ ጎዳ ዬሱ̈ስ ክርስቶ̈ሲ ዬይዝ ዲራስ ዓና̇ ኪ̈ቲን ኢ̈ታ ባዝ ኣባክ ኔ ጋልዳ ቤንታ̇ካይዶን ኮሺንቻ ኢዝቦ ኪ̈ቲንታሙታ̇ ና̈ጋቤ። 15 ክርስቶ̈ሳ ዬንቲ̇ንዳሬ ኣንጂንቲ̇ኖ̈ዲኬ ኢ ሙ̈ታ ጋ̈ዢ ማ̈ቂ̇ኖ፣ ካ̈ቲንታ̈ን ካ̈ታ፣ ጎዳንቦ ጎዳ ኢ ጌይኖ ቃሚ̇ንባር ማ̈ቃ̇̈ሬ። 16 ኢ ሙ̈ታ ዓዪቂባ̈ሶ̈ዳ፤ ኦ̈ናካር ኡካ̇ንዳብ ዳንዳኢባ̈ሶ ፎኢን ጋርታ̇ ዶኢ̈ሬ፥ ኢያ ኦ̈ናካር ኣሲ ቤቃካ̇ዬ፤ ቤቃ̇ንዳባር ዳንዳኢባ̈ሴ። ዎልቃኬ ጋላታኬ ሜናብ ኢ̈ብ ማ̈ቆ̇ጋ̈ቤ፤ ኣሚንኤ። 17 ዓኒ̇ ኣላሚን ጋ̈ልዶ ዱራን ኦቲርቃካ̇ዮ̈ዲፌ̈ኒ ዎይ ፌ ታስፊን ዪዝ ባዝ ጋልዳ ጋዳካ̇ዮ̈ዲፌ̈ኒ ኢንታ̇ ኪ̈ታ̇ቤ። ኑ̈ኒ ኡፋይታ̇ምፔ̈ኒ ዎይ ባ̈ዚ ሺሻር ኑ̈ብ ኢሚ̇ዝ ጾ̈ሳ̇ ጋ̈ልዳ ኢንቲ̇ ፌ ታስፊን ጋዳ̇ምፔ̈ኒ ኢንታ̇ ዞ̈ራቤ። 18 ማ ኢንቲ ኮሽ ኦ̈ሳ ኦ̈ምፔ̈ን፥ ኮሽ ኦ̈ሳባር ዱር ማ̈ቃ̇ምፔ̈ኒ፥ ኢንታብ ዎ ባዝ ሜላንቦ ፋጋ̇ር ኢማ̇ንዳቦ ጊ̈ጊንቲ̇ኖ ኣስ ማ̈ቃ̇ምፔ̈ኒ ኢንታ̇ ዞራቤ። 19 ኢንቲ̇ ዪኒፌ̈ን ዎቲሙታ ኪን ማ̈ቂ̇ኖ ሼምፒ̇ን ዲጛንዳቦ ዬ̈ዝ ላይምቦ ዪባ̈ሶ ቆሊን ፌ̈ብ ሺ̈ሺ̈̇ሬ። 20 ጢማ̈ቶ̈ሶ! ዓዳራባራ ኔ̈ቦ ኢሚ̈ንቲኖን ጌዚንር ና̈ጋ̈ቤ፤ ኪን ኤራ ጊዳካ̇ይዶን ኤራ ማይጺዝ ጾ̈ሳ̇ ቦንቺሺባ̈ሶ ዋች̇ ጋልዳፖ ጎታ̇ቤ። 21 ፔቲ̇ ፔቲ̇ ኣሳን “ዪኒ̇ፌ̈ኖ ኤሪን ኑ̈ብ ዎ” ጋ̈ሪ ፌ ኣማ̇ኒን ጋልዳፖ ኬዲ̇ኔ። ጾ̈ሳ̇ ኮሺቲን ኔባር ማ̈ቆ̇ጋ̈ቤ። |